शिक्षामन्त्री पोखरेल भन्छन् - ‘नतिजा समयमै प्रकाशन गर्न कुनै हतार गरिएको होइन’
काठमाडौं । शिक्षा तथा खेलकुद मन्त्री सस्मित पोखरेलले राष्ट्रिय परीक्षा बोर्डले नतिजा समयमै प्रकाशन गर्न कुनै हतार नगरेको स्पष्ट पारेका छन् । मन्त्री पाखरेलले बिहीबार (आज) सामाजिक सञ्जालमा पोस्ट गर्दै आवश्यक जनशक्ति थप गरी तथा अनावश्यक प्रशासनिक प्रक्रिया छोट्याएर नतिजा प्रकाशित हुनुपर्ने समयमा नै सार्वजनिक गरिएको बताएका हुन् । ‘राष्ट्रिय परीक्षा बोर्डको नतिजा प्रक्रियाबारे मेरो धारणा मैले यसअघि पनि सार्वजनिक गरिसकेको छु । यस प्रक्रियाप्रति हामी स्पष्ट र विस्वस्त छौं । नतिजा समयमै प्रकाशन गर्न कुनै हतारो गरिएको हैन, बरु आवश्यक जनशक्ति थप गरी र अनावश्यक प्रशासनिक प्रक्रिया छोट्याएर नतिजा प्रकाशित हुनुपर्ने समयमा नै प्रकाशित गरिएको हो’, मन्त्री पोखरेलले पोस्टमा लेखेका छन् । मन्त्री पोखरेलले नतिजासम्बन्धी विषयमा शान्तिपूर्ण रूपमा भइरहेका आन्दोलनप्रति सम्मान व्यक्त गर्दै लोकतान्त्रिक समाजमा नागरिकले आफ्ना धारणा राख्ने अधिकारको सम्मान गरिनुपर्ने उल्लेख गरे । सामाजिक सञ्जालमा विद्यार्थीहरूप्रति भएका केही नकारात्मक तथा असम्मानजनक टिप्पणीप्रति आफ्नो ध्यानाकर्षण भएको जनाउँदै मन्त्री पोखरेलले आन्दोलनरत विद्यार्थी वा कुनै पनि समूहप्रति गालीगलौज, दुव्र्यवहार तथा अपमानजनक टिप्पणी नगर्न सबैमा आग्रह गरे । यसैबिच नतिजा प्रक्रियाबारे उठेका जिज्ञासा र प्रश्नहरूको निष्पक्ष परीक्षणका लागि शिक्षा तथा खेलकुद मन्त्रालय तथा पाठ्यक्रम विकास केन्द्रका उपसचिवहरूको प्रतिनिधित्व रहने समिति गठन गरिएको मन्त्री पोखरेलले जानकारी दिए । उक्त समितिले उत्तर पुस्तिकाको स्याम्पलिङ परीक्षण गर्नुका साथै परीक्षाङ्क र डेटा इन्ट्रीको भेरिफिकेसन गर्नेछ ।
एनआईसी एशिया लघुवित्तको सीईओमा लक्ष्मी प्रसाद शर्मा नियुक्त
काठमाडौं । एनआईसी एशिया लघुवित्त वित्तीय संस्था लिमिटेडको प्रमुख कार्यकारी अधिकृत (सीईओ) मा लक्ष्मी प्रसाद शर्मा नियुक्त भएका छन् । कम्पनीको असार ११ गते बसेको सञ्चालक समितिको बैठकले शर्मालाई सीईओ पदमा नियुक्त गर्ने निर्णय गरेको हो । बैठकको निर्णयअनुसार शर्मालाई असार ११ गतेदेखि लागू हुने गरी चार वर्षका लागि सीईओको जिम्मेवारी प्रदान गरिएको कम्पनीले जनाएको छ । शर्माले संस्थाको नेतृत्व सम्हाल्दै लघुवित्त सेवाको विस्तार, संस्थागत सुशासन तथा वित्तीय पहुँच अभिवृद्धिमा योगदान पुर्याउने अपेक्षा गरिएको छ।
आईएमई लाइफद्वारा समता एजुकेशन फाउन्डेसनलाई ५ लाख रुपैयाँ सहयोग
काठमाडौं । आईएमई लाइफ इन्स्योरेन्स कम्पनी लिमिटेडले समता एजुकेशन फाउन्डेसनलाई ५ लाख रुपैयाँ आर्थिक सहयोग प्रदान गरेको छ । शिक्षा क्षेत्रको विकास तथा सामाजिक रूपान्तरणमा योगदान पुर्याउने उद्देश्यले प्रदान गरिएको उक्त रकम कैलाली, दोलखा र सिन्धुली जिल्लामा सञ्चालित समता एजुकेशन फाउन्डेसनअन्तर्गतका विद्यालयहरूको शैक्षिक गतिविधि सुदृढीकरण तथा गुणस्तरीय शिक्षा प्रवर्द्धनमा खर्च गरिने कम्पनीले जनाएको छ । आईएमई लाइफले शिक्षा, स्वास्थ्य, वित्तीय साक्षरता तथा सामाजिक उत्थानका क्षेत्रमा विभिन्न कार्यक्रममार्फत निरन्तर योगदान दिँदै आएको छ । समाजमा दीर्घकालीन सकारात्मक परिवर्तन ल्याउने आफ्नो प्रतिबद्धताअनुरूप सहयोग उपलब्ध गराइएको कम्पनीको भनाइ छ । समता एजुकेशन फाउन्डेसनले लामो समयदेखि आर्थिक रूपमा विपन्न परिवारका बालबालिकालाई न्यून शुल्कमा गुणस्तरीय शिक्षा उपलब्ध गराउँदै आएको छ । आईएमई लाइफको सहयोगले फाउन्डेसनका शैक्षिक कार्यक्रमलाई थप प्रभावकारी बनाउन तथा अझ बढी विद्यार्थीलाई गुणस्तरीय शिक्षा पहुँचमा ल्याउन मद्दत पुग्ने अपेक्षा गरिएको छ ।
ईभी बीमामा छुट्टै पोलिसी ल्याउने विषयमा प्राधिकरणको छलफल
काठमाडौं । विद्युतीय सवारी साधन (ईभी) को बीमा, क्षति मूल्याङ्कन र मर्मत सम्भारमा देखिएका चुनौती तथा समाधानका उपायबारे नेपाल बीमा प्राधिकरणले सरोकारवालासँग छलफल गरेको छ । प्राधिकरणको केन्द्रीय कार्यालय कुपण्डोलमा बुधबार आयोजित अन्तरक्रिया कार्यक्रममा विद्युतीय सवारी साधनको क्षति मूल्याङ्कनमा एकरूपता कायम गर्ने, देखिएका समस्या पहिचान गरी समाधानका उपाय खोज्ने तथा सवारी बीमासम्बन्धी विद्यमान व्यवस्थामा सुधारका लागि सुझाव संकलन गरिएको थियो । कार्यक्रममा प्राधिकरणका निर्देशक शाम्भराज लामिछानेले नेपालमा ईभीको प्रयोग तीव्र रूपमा बढिरहेको उल्लेख गर्दै परम्परागत मोटर बीमा पोलिसीलाई परिमार्जन गर्ने वा विद्युतीय सवारीका लागि छुट्टै बीमालेख ल्याउने विषयमा छलफल भइरहेको जानकारी दिए । उनले छुट्टै बीमालेख आवश्यक देखिएमा सवारी निर्माता, डिलर, यातायात व्यवसायी, बीमा कम्पनी, सर्भेयरलगायत सबै सरोकारवालासँग परामर्श गरेर अघि बढिने बताए । जोखिम विश्लेषणका लागि ईभीको आयात, बिक्री, प्रयोग, क्षति, मर्मत, दाबी र भुक्तानीसम्बन्धी विश्वसनीय तथ्यांक आवश्यक भएकाले त्यसतर्फ ध्यान दिन पनि उनले आग्रह गरे । प्राधिकरणका अर्का निर्देशक निर्मल अधिकारीले सरकारले अघि सारेको तेस्रो पक्ष बीमा नीतिअनुसार मोटर बीमामा सुधार र ईभी बीमाको आवश्यकताबारे सुझाव लिन कार्यक्रम आयोजना गरिएको बताए । उनले क्षति मूल्याङ्कनमा एकरूपता, ह्रासकट्टी तथा अन्य समसामयिक विषयमा स्पष्ट धारणा दिन सरोकारवालालाई आग्रह गरे । अन्तरक्रियामा नाडा अटोमोबाइल्स एसोसिएसन अफ नेपाल, नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन, रिसर्च इन्स्टिच्युट अफ सर्भेयर्स इन इन्स्योरेन्स, नेपाल सर्भेयर संघ तथा बीमक संघ नेपालका प्रतिनिधिहरूले ईभीको वर्तमान अवस्था, बीमा दाबी, सर्भे, मर्मत र चुनौतीबारे प्रस्तुति दिएका थिए । सहभागीहरूले परम्परागत सवारीको तुलनामा ईभी महँगो हुने भएकाले बीमा दाबी रकम पनि बढी हुने गरेको बताए । मर्मतभन्दा पार्टपूर्जा प्रतिस्थापनमा बढी जोड दिइने, जोखिम मूल्याङ्कन पर्याप्त रूपमा नहुने तथा ईभीका लागि छुट्टै बीमालेख आवश्यक रहेको धारणा पनि उनीहरूले राखे । त्यसैगरी, ईभी चालकलाई विशेष तालिमको आवश्यकता, मर्मतका लागि पर्याप्त वर्कसपको अभाव, ब्याट्रीमा उच्च ह्रासकट्टी, पार्टपूर्जामा सहुलियत नहुँदा बढ्दो मर्मत खर्च तथा प्रयोगपछि ब्याट्री व्यवस्थापनसम्बन्धी स्पष्ट नीति आवश्यक रहेको विषय पनि छलफलमा उठाइएको थियो । कार्यक्रममा नेपाल बीमा प्राधिकरणका अधिकारीहरू, अटोमोबाइल व्यवसायी, सर्भेयर तथा बीमा कम्पनीका प्रतिनिधिहरूको सहभागिता रहेको थियो ।
लामो समय अफिसमा बसिरहनु स्वास्थ्यका लागि घातक, हरेक घण्टा हिँड्न जरुरी
काठमाडौं । धेरैजसो कार्यालयमा कर्मचारीहरूको दिन कुर्सीमै बसेर बित्ने गर्छ । तर यस्तो बानीले स्वास्थ्यमा नकारात्मक असर पार्न सक्छ । विज्ञहरूका अनुसार लामो समयसम्म लगातार बसिरहँदा मोटोपना, मुटुरोग तथा टाइप–२ मधुमेहको जोखिम बढ्न सक्छ । स्क्रिनबाट बेला–बेलामा विश्राम लिनु फाइदाजनक हुन्छ भन्ने कुरा धेरैलाई थाहा छ । तर कामका बीचमा शरीरलाई सक्रिय राख्न कति अन्तरालमा हिँडडुल गर्नुपर्छ भन्ने विषयमा स्पष्ट जानकारी कम छ । ब्रिटिस जर्नल अफ स्पोर्ट्स मेडिसिनमा प्रकाशित नयाँ अध्ययनले हरेक घण्टामा कम्तीमा पाँच मिनेट हिँड्न सुझाव दिएको छ । यसलाई ‘मुभमेन्ट स्न्याक’ नाम दिइएको छ । दिनभरि कार्यालयमा बसेर काम गर्ने मानिसहरूका लागि स्वास्थ्य राम्रो राख्ने यो सरल र प्रभावकारी उपाय मानिएको छ । यसले काममा पनि खास असर पार्दैन । अध्ययनका प्रमुख अनुसन्धानकर्ता किथ डियाजले अहिले अधिकांश मानिसहरू उठेदेखि सुत्नुअघिसम्मको करिब तीनचौथाइ समय बसेर बिताउने गरेको जानकारी दिए । उनी ‘कम बसौं, बढी हिँडौं’ भन्ने सल्लाहलाई निकै उपयोगी बताउँछन् । डियाजका अनुसार हरेक घण्टामा पाँच मिनेट हिँड्दा मुडमा सुधार हुन्छ र थकान कम महसुस हुन्छ । सहभागीहरूले यो सुझावलाई दैनिक जीवनमा सजिलै अपनाउन सकिने बताएका छन् । कोलम्बिया युनिभर्सिटीले गरेको यस अध्ययनमा अमेरिकाका ११ हजारभन्दा बढी कर्मचारी सहभागी थिए । अधिकांश सहभागी कार्यालयमा आठदेखि नौ घण्टासम्म काम गर्ने कर्मचारी थिए । पहिलो सातामा उनीहरूले आफ्नो सामान्य दैनिक तालिका कायम राखे । यस अवधिमा उनीहरूले दैनिक थकान, मनोस्थिति र कार्यक्षमतासम्बन्धी सर्वेक्षणमा उल्लेख गरे । त्यसपछि दुई सातासम्म उनीहरूलाई कामका क्रममा हरेक आधा घण्टा, एक घण्टा वा दुई घण्टाको अन्तरालमा पाँच मिनेट हिँड्न लगाइयो र पुनः सर्वेक्षणमा सहभागी गराइयो । नतिजाअनुसार हरेक आधा घण्टामा हिँड्दा मुडमा सुधार र थकानमा कमी देखिए पनि काममा केही अवरोध परेको पाइयो । हरेक दुई घण्टामा हिँड्नु नहिँड्नुभन्दा राम्रो भए पनि अपेक्षाकृत कम प्रभावकारी देखियो । तर हरेक घण्टामा पाँच मिनेट हिँड्दा कार्यक्षमता, एकाग्रता र मनोस्थितिमा उल्लेखनीय सुधार भएको अनुसन्धानकर्ताहरूले बताएका छन् । अनुसन्धानकर्ता डियाजका अनुसार लामो समयसम्म बसिरहने बानी परिवर्तन गर्न सजिलो छैन । अध्ययनमा सहभागी धेरै कर्मचारीहरूले बारम्बार ब्रेक लिँदा आफ्ना हाकिम वा सहकर्मीले कसरी लिने हो भन्ने चिन्ता व्यक्त गरेका थिए । उनले भने, ‘सुन्दा उल्टो लाग्न सक्छ, तर यस्ता मुभमेन्ट ब्रेकहरूले वास्तवमा कामको गुणस्तर सुधार गर्न सक्छन् । ब्रेकले एकाग्रता, स्मरणशक्ति र सोच्ने क्षमतामा सुधार ल्याउँछ। यसले मानिसलाई ताजगी र आरामको अनुभूति गराउँछ ।’ उनका अनुसार हिँडडुल गर्नु कम खर्चिलो उपाय हो र यसको अर्थ काम नै रोक्नुपर्छ भन्ने होइन । बैठकमा सहभागी हुँदै हिँड्न सकिन्छ वा फोनमा कुरा गर्दा पनि टहलिन सकिन्छ । कार्यालयभित्र वा बाहिर जहाँसुकै हिँड्न सकिन्छ । बिट्रिश हर्ट फाउन्डेसनकी वरिष्ठ कार्डियाक नर्स एमिली म्याकग्राथले पनि यस अध्ययनको प्रशंसा गरेकी छन् । उनका अनुसार शरीरको सानो–सानो गतिविधिले पनि स्वास्थ्यमा सकारात्मक प्रभाव पार्न सक्छ । यद्यपि उनले चेतावनी दिँदै भनिन्, ‘यो अध्ययन छोटो अवधिमा गरिएको हो र सहभागीहरूको अनुभवमा आधारित छ । त्यसैले मुटुको स्वास्थ्यमा दीर्घकालीन प्रभावबारे निष्कर्ष निकाल्न अझ विस्तृत र लामो अनुसन्धान आवश्यक छ ।’
कुमारी बैंकका ग्राहकलाई नेसनल प्याथ ल्याबका सेवामा १० प्रतिशतसम्म छुट
काठमाडौं । कुमारी बैंक लिमिटेड र नेसनल प्याथ ल्याब एण्ड रिसर्च सेन्टर लिमिटेडबीच कुमारी बैंकका ग्राहकलाई विभिन्न प्रयोगशाला परीक्षण सेवामा विशेष छुट उपलब्ध गराउने सम्झौता भएको छ । सम्झौताअनुसार नेसनल प्याथ ल्याबले प्रदान गर्ने विभिन्न परीक्षण सेवामा कुमारी बैंकका ग्राहकले १० प्रतिशतसम्म छुट प्राप्त गर्नेछन् । बैंकका अनुसार ग्राहकलाई बैंकिङ सेवासँगै स्वास्थ्य सेवामा समेत सहज पहुँच उपलब्ध गराउने उद्देश्यले उक्त सहकार्य गरिएको हो । यसबाट बैंकका ग्राहकले गुणस्तरीय स्वास्थ्य सेवा सहुलियत दरमा प्राप्त गर्न सक्ने विश्वास गरिएको छ । कुमारी बैंकले विगत २५ वर्षदेखि बैंकिङ सेवा प्रदान गर्दै आएको छ । हाल बैंकले देशभर फैलिएको २८६ शाखा, ३०४ एटीएम, ४१ एक्सटेन्सन काउन्टर तथा ४० शाखारहित बैंकिङ इकाइमार्फत सेवा प्रवाह गरिरहेको जनाएको छ ।
सेयर बजारमा साढे ८ अंकको गिरावट, २ अर्ब ८३ करोडको कारोबार
काठमाडौं । साताको चौंथो कारोबार दिन बिहीबार (आज) सेयर बजारमा साढे ८ अंकको गिरावट आएको छ । नेपाल स्टक एक्सचेन्ज (नेप्से)का अनुसार सूचक उक्त गिरावटपछि २६५१.५२ विन्दुमा छ । आज २ अर्ब ८३ करोडको कारोबार भएको नेप्सेले जनाएको छ । नेप्सेका अनुसार आज ८३ वटा सेयरको मूल्य बढ्दा १७२ वटाको घटेको र १९ वटाको स्थिर रहेको छ । टक्सार पिठुवा खोला हाइड्रोपावर १४.९९ प्रतिशत, याम्बलिङ हाइड्रोपावर १४.९९ प्रतिशत र कालिका लघुवित्त १२.८४ ले बढेका छन् । अन्य सेयर अधिकतम ५.१६ प्रतिशतसम्म बढेको नेप्सेले जनाएको छ । भुजुङ हाइड्रो ११.०३ प्रतिशत घटेको छ । यसबाहेक अधिकतम ८.९७ प्रतिशतसम्मले सेयरहरु ओरालो लागेको नेप्सेले जनाएको छ । कारोबारमा भने १२ करोड ७७ लाखसहित सोपान फरम्यास्युटिकल्स अगाडि छ । समूहगत सूचकतर्फ म्यानिफ्याक्चरिङ एन्ड प्रोसेसिङ समूह ०.१४ प्रतिशतले बढेको छ । बाँकी १२ समूह घटेको छ ।
नाकामा सहजीकरण गर्न ‘बोर्डर इन्ट्रयाक्सन टिम’
काठमाडौं । सशस्त्र प्रहरी महानिरीक्षक नारायणदत्त पौडेलले सङ्गठनलाई प्राप्त ‘म्याण्डेड’ अनुसार सीमा सुरक्षा, विपद् व्यवस्थापन र राजस्व चुहावट नियन्त्रणमा प्रभावकारी ढङ्गबाट कार्यसम्पादन भइरहेको बताएका छन् । सशस्त्र प्रहरी प्रधान कार्यालय हल्चोकमा बिहीबार (आज) सञ्चारकर्मीसँगको भेटमा उनले मौसमजन्य विपद् व्यवस्थापनका लागि पूर्वतयारी र प्रतिकार्य योजना निर्माण गरी सरोकारवाला निकायसँग पूर्णसमन्वयका साथ काम प्रारम्भ भइसकेको बताए । महानिरीक्षक पौडेलले सीमा सुरक्षालाई विगतभन्दा थप व्यवस्थित बनाउने ढङ्गबाट काम गर्ने प्रयास गरिएको जानकारी दिनुभयो । सीमा अपराध नियन्त्रणको सन्दर्भमा जनशक्ति, प्रविधि र परिचालनको चुनौती भोग्नुपरेको उल्लेख गर्दै उनले परिणाममुखी कामका लागि सङ्गठन प्रतिबद्ध रहेको बताए । राजस्व चुहावट नियन्त्रण सरकारको उच्च प्राथमिकतामा रहेको जानकारी दिँदै उनले त्यस विषयलाई सङ्गठनले आत्मसात गरेर सरकारको लक्ष्य प्राप्तिमा कटिबद्ध भएर परिचालित भएको बताए । सशस्त्र प्रहरीसम्बन्धी कानुन निर्माणका प्रक्रिया अघि बढिरहेको जानकारी दिँदै महानिरीक्षक पौडेलले त्यसबाट कानुनी र नीतिगत स्पष्टता ल्याउने धारणा राखे । उनले आर्थिक सुशासन र पारदर्शीता सरकारको मूल लक्ष्य भएको सन्दर्भमा सङ्गठनभित्रका आर्थिक पारदर्शीता र सुशासनसम्बन्धी गुनासालाई समयमै निराकारण गर्न शून्य सहनशीलताको नीति अवलम्बन गरिएको स्पष्ट पारे । ‘आन्तरिक सुरक्षालाई मबजुद बनाउने गरी काम भइरहेको छ, अहिले नयाँ कुरा ‘सेटअपँ गर्नेभन्दा पनि भइरहेको कुराबाट कसरी उत्कृष्ट नतिजा दिने भनेर हामीले काम गरिरहेका छौं,’ महानिरीक्षक पौडेलले भने । सरकार र जनताको अपेक्षा पूरा गर्न सशस्त्र प्रहरी बल क्रियाशील रहेका उनकोे भनाइ थियो । महानिरीक्षक पौडेलले पछिल्लो समय सङ्गठनको नीति, अनुसन्धान तथा योजना निर्देशनालय गठन गरी सङ्गठनका कार्य जिम्मेवारीलाई विगतभन्दा व्यवस्थितरुपमा अघि बढाउने काम थालिएको जानकारी दिए । उनले भने, ‘हाम्रा ‘म्यान्डेट’ र जिम्मेवारीलाई विगतभन्दा पनि भविष्यमा चाहिँ कसरी उत्कृष्ट बनाउने ? हाम्रा जिम्मेवारीलाई कसरी अगाडि लैजाने ? कसरी सङ्गठनलाई विकास–विस्तार गर्ने र यसका विभिन्न आयाममा अनुसन्धान र योजना निर्माण गर्ने उद्देश्यले काम भइरहेको छ ।’ सीमा सुरक्षा तथा सीमा नाकालाई व्यवस्थित बनाउन मुख्य नाकामा ‘बोर्डर इन्ट्रयाक्सन टिम’ (बिआइटी) संयन्त्र गठन गर्न लागिएको जानकारी दिँदै महानिरीक्षक पौडेलले सो संयन्त्रले नाकामा समकक्षी सङ्गठनसँग समन्वय अभिवृद्धिसँगै यात्रुको आवातजावतलाई सहजीकरण गर्ने बताए । ‘हाम्रा नाकाहरुबाट दैनिक हजारौँ जनताको आवातजावत हुन्छ, त्यहाँ कसरी सहजीकरण गर्ने, ‘काउन्टर पार्ट’ सँग पनि समन्वय गर्न सहज होस्, सीमा नाकामा कुनै अप्ठ्यारो नहोस् र गलत क्रियाकलाप नियन्त्रणमा सहयोग पुगोस् भन्ने हेतुले उक्त अवधारणा अघि सारिएको हो,’ महानिरीक्षक पौडेलले भने, ‘यो अन्तिम चरणमा पुगेको छ, यसलाई ‘पाइलट प्रोजेक्ट’ का रुपमा केही नाकाहरुमा लागू गर्छौं ।’
