साओमी १७ अल्ट्रा बजारमा, क्यासब्याकदेखि स्मार्टवाचसम्म अफर
काठमाडौं । प्रविधि ब्रान्ड साओमीले फ्ल्यागशिप स्मार्टफोन ‘साओमी १७ अल्ट्रा’ को प्रि–अर्डर नेपालमा औपचारिक रूपमा सुरु गरेको छ । कम्पनीका अनुसार उच्च कार्यक्षमता, पातलो डिजाइन तथा उत्कृष्ट प्रदर्शनका लागि परिचित उक्त स्मार्टफोन १६ जीबी र्याम र ५१२ जीबी स्टोरेज भेरियन्टमा उपलब्ध हुनेछ । प्रि–अर्डर अवधिमा ग्राहकहरूले तीन विशेष अफरमध्ये कुनै एक रोज्न सक्ने व्यवस्था गरिएको छ । अफरअन्तर्गत ग्राहकले १० हजार रुपैयाँ क्यासब्याक, साओमी वाच एस–४ (४१ एमएम) सहुलियत मूल्यमा वा साओमी बड्स ५ निःशुल्क प्राप्त गर्न सक्नेछन् । फोन खरिद गर्ने ग्राहकलाई बिक्रीपछिका विशेष सुविधा पनि उपलब्ध गराइने कम्पनीले जनाएको छ । खरिदपछि पहिलो ६ महिनाभित्र एक पटक निःशुल्क स्क्रिन प्रतिस्थापन, नियमित १२ महिनाको वारेन्टीमा थप ६ महिना गरी कुल १८ महिनाको वारेन्टी तथा वारेन्टी सकिएपछि २४ महिनासम्म सेवा शुल्क नलाग्ने सुविधा प्रदान गरिनेछ । कालो, सेतो र स्टारलाइट रङमा उपलब्ध साओमी १७ अल्ट्रा लाइकासँगको सहकार्यमा विकसित क्यामेरा प्रणालीसहित आएको छ । यसमा २०० मेगापिक्सेल टेलिफोटो क्यामेरा, उन्नत इमेज सेन्सर तथा अप्टिकल जुम प्रविधि समावेश गरिएको छ । ६००० एमएएच क्षमताको ब्याट्री रहेको उक्त फोनले ९० वाट हाइपरचार्ज र ५० वाट वायरलेस चार्जिङ सपोर्ट गर्ने कम्पनीले जनाएको छ । साथै आइपी–६८ स्तरको पानी तथा धुलो प्रतिरोधी सुरक्षा र साओमी शिल्ड ग्लास ३.० प्रयोग गरिएको छ । कम्पनीका अनुसार साओमी १७ अल्ट्रा (१६ जीबी + ५१२ जीबी) को मूल्य १ लाख ९९ हजार ९९९ रुपैयाँ तोकिएको छ । प्रि–अर्डर अफर मार्च २५ देखि ३१ सम्म मात्र लागू हुने जनाइएको छ ।
भदौ २३ को हत्याको आक्रोशले २४ गतेको घटना निम्त्यायो : रक्षा बम
काठमाडौं । जेनजी आन्दोलनकी अगुवा रक्षा बमले भदौ २३ गते ठूलो संख्यामा युवाहरूको हत्या भएको कारण नै भदौ २४ गतेको अप्रिय घटना घटेको बताएकी छन् । ‘जेनजी जाँचबुझ आयोग’ को प्रतिवेदनमा आफ्नो धारणा राख्दै बमले अघिल्लो दिनको दमन र आक्रोशको परिणामस्वरूप २४ गते तोडफोड तथा आगजनीजस्ता घटनाहरू भएको उल्लेख गरेकी छन् । प्रदर्शनको क्रममा मादक पदार्थ सेवन गरेका व्यक्तिहरू प्रशस्त भेटिएको र उनीहरूलाई पटक–पटक सम्झाईबुझाई गर्दा उल्टै आफूहरूमाथि नै जाइलाग्ने गरेको अनुभव उनले सुनाइन् । प्रदर्शनमा राजवादी भनी परिचय दिनेदेखि लिएर सबै राजनीतिक दलका कार्यकर्ताहरूको सहभागिता रहेको आफूले महसुस गरेको प्रतिवेदनमा उल्लेख छ । घटनाको दिन नयाँ बानेश्वरमा एकजना मादक पदार्थ सेवन गरेका व्यक्ति हातमा बन्दुक लिएर उच्छृङ्खल रूपमा प्रस्तुत भइरहेको र प्रदर्शनमा कुनै समूह वा व्यक्तिले घुसपैठ गरी माहोल भड्काएको हुन सक्ने भन्दै बमले यस विषयमा छानबिन आयोगले सत्यतथ्य बाहिर ल्याई दोषीलाई कानुनी कारबाही गर्नेमा आशासमेत व्यक्त गरिन् । प्रदर्शनकारी र ब्यारिकेटमा रहेका सुरक्षाकर्मीबीच धकेलाधकेल हुँदै गर्दा सुरक्षाकर्मीले हतियार ताक्ने जस्ता कार्य गरेपछि स्थिति थप तनावपूर्ण बनेको उनले खुलाइन् । प्रदर्शनकारीहरू निषेधित क्षेत्र तोडेर बानेश्वर चोक हुँदै संसद भवनभित्र छिर्न खोजेको खबर आएपछि सुरक्षाकर्मीले फायर गरेको र अवस्था जटिल बन्दै गएपछि आफूले स्कुल पोशाकमा रहेका विद्यार्थीहरूलाई वैकल्पिक बाटोबाट घर पठाउन पहल गरेको ‍बमले प्रतिवेदनमा उल्लेख गरेकी छन् । बमले भदौ २३ र २४ गते सहिद भएका व्यक्तिका परिवारलाई राज्यले उच्च सम्मान दिनुपर्ने र घाइतेहरूको जीविकोपार्जनको उचित व्यवस्थापन गर्नुपर्ने मागसमेत गरेकी छन् । राज्यले दमन गरी गोली हानी हत्या गरेका शहीदहरूको न्यायका लागि दमन पक्षका जिम्मेवार व्यक्तिहरू र तोडफोड तथा आगजनी जस्ता विध्वंसात्मक कार्यमा संलग्न दुवै पक्षलाई कानुन बमोजिम कडा सजाय हुनुपर्ने उनको जोड छ ।
२ हजार ९ सय रुपैयाँले घट्यो सुनको मूल्य
काठमाडौं । नेपाली बजारमा सुनको मूल्य घटेको छ । बिहीबार (आज) सुन तोलामा २९ सय रुपैयाँले घटी प्रतितोला २ लाख ८५ हजार ६०० रुपैयाँ तोकिएको नेपाल सुनचाँदी व्यवसायी महासंघले जनाएको छ । बुधबार सुन २ लाख ८८ हजार ५०० रुपैयाँमा कारोबार भएको थियो । यस्तै, आज चाँदीको भाउ पनि घटेको छ । तोलमा १०० रुपैयाँले घटेर ४ हजार ८२० कायम भएको महासंघले जनाएको छ । अघिल्लो दिन चाँदी ४ हजार ९२० रुपैयाँमा कारोबार भएको थियो ।
चैते दशैँको अवसरमा देशभरका शक्तिपीठहरूमा भक्तजनको घुइँचो
काठमाडौं । बिहीबार चैत्र शुक्ल अष्टमी अर्थात चैते दशैँ । यस अवसरमा काठमाडौं उपत्यकासहित देशभरका विभिन्न शक्तिपीठ एवं देवीका मन्दिरहरूमा बिहानैदेखि भक्तजनको ठूलो भीड लागेको छ । विशेष गरी काठमाडौंको भद्रकाली, मैतीदेवी, नक्साल भगवती, शोभा भगवती, र गुह्येश्वरी मन्दिरहरूमा पूजाआजा र दर्शन गर्नेहरूको घुइँचो देखिएको छ । चैते दशैँका दिन देवीको उपासना गर्नाले सुख, शान्ति र मनोकामना पूरा हुने धार्मिक विश्वास रहेको छ । उपत्यका बाहिरका गोरखाको मनकामना, पोखराको विन्ध्यवासिनी, बागलुङ कालिका र ताप्लेजुङको पाथीभरा लगायतका प्रसिद्ध मन्दिरहरूमा पनि दर्शनार्थीको विशेष उपस्थिति रहेको छ । वर्षमा दुई पटक मनाइने दशैँमध्ये चैत्रमा मनाइने यो दशैँलाई ‘सानो दशैँ’ का रूपमा पनि लिइन्छ । असोजको बडादशैँ जस्तै यस दिन पनि शक्तिस्वरूपा भगवतीको विशेष पूजा गरिन्छ । चैते दशैँको भोलिपल्ट अर्थात चैत्र शुक्ल नवमीका दिन रामनवमी पर्व मनाइन्छ । भगवान श्रीरामको जन्मजयन्तीका अवसरमा भोलि राम मन्दिरहरूमा विशेष उत्सव हुने गर्दछ ।
कार्की आयोग निष्पक्ष छानबिनका लागि बनेको होइन : शंकर पोखरेल
काठमाडौं । नेकपा (एमाले) का महासचिव शंकर पोखरेलले जेनजी आन्दोलनको छानबिनका लागि गठित गौरीबहादुर कार्की नेतृत्वको आयोग निष्पक्ष छानबिनका उद्देश्यले गठन नभएको बताएका छन् । सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले कार्की आयोगको प्रतिवेदनले नै आयोग निष्पक्ष छानबिनका लागि नबनेको पुष्टि गरेको दाबी गरेका छन् । पोखरेलले आयोगको प्रतिवेदन र निर्वाचन प्रक्रियामा प्रयोग गरिएको भनिएको ‘अल्गोरिदम’ मार्फत नेपाली समाजमा परेको प्रभावलाई राजनीतिक तथा कानुनी वैधानिकता दिने प्रयास गरिएको स्पष्ट भएको उल्लेख गरेका छन् । सोही प्रयासअनुसार निर्वाचनको परिणाम र आयोगको प्रतिवेदन आएको उनको भनाइ छ । उनका अनुसार निर्वाचन र आयोगको प्रतिवेदनसँगै नेपाली राजनीति नयाँ मोडतर्फ अग्रसर भएको छ । अल्गोरिदमको प्रयोगबाट लोकप्रियतावाद, अराजकतावाद र अवसरवादको मिश्रणमार्फत नयाँ शक्तिको उदय भएको उनले टिप्पणी गरेका छन् । पोखरेलले आगामी राजनीतिक यात्रा सहज नहुने उल्लेख गर्दै राष्ट्र र लोकतन्त्रले केही समय चुनौती सामना गर्नुपर्ने अवस्था आउने बताएका छन् । यस्तो अवस्थामा नयाँ शक्ति र नेतृत्वलाई आफ्नो दृष्टिकोणअनुसार काम गर्ने अवसर दिनु तथा जनतालाई प्रत्यक्ष अनुभवमार्फत मूल्याङ्कन गर्न दिनु विवेकपूर्ण कदम हुन सक्ने उनले बताएका छन् । यद्यपि लोकप्रियतावाद, अराजकतावाद र अवसरवाद दीर्घकालीन रूपमा समस्याको समाधान वा विचारधारात्मक राजनीतिको विकल्प हुन नसक्ने उनको धारणा छ ।
बागलुङ–सिगाना सडक कालोपत्र, उत्पादन बजार लैजान सहज
गलकोट । विकास पूर्वाधारका दृष्टिले पछि परेको सिगाना गाउँ पक्की सडकले जोडिएपछि त्यहाँका बासिन्दा दङ्ग परेका छन् । आफ्ना उत्पादन बजारसम्म पुर्याउन सहज भएकाले उनीहरू खुशी भएका हुन् । सिगाना सुन्तला उत्पादनका निम्ति प्रख्यात छ । ‘ट्रयाक’ खुलेको २८ वर्षपछि बागलुङ–सिगाना १० किलोमिटर सडक रु २९ करोडको लागतमा कालोपत्र गरिएको सडक डिभिजन कार्यालयका प्रमुख हरि सुवेदीले जानकारी दिए । ‘एक निर्वाचन क्षेत्र, एक रणनीतिक सडक’ कार्यक्रमअन्तर्गत यो सडक स्तरोन्नतिसँगै कालोपत्र गरिएको हो ।
१७ महिनादेखि चिकित्सकविहीन भेटेरिनरी केन्द्र, बैतडीका पशुपालक मारमा
बैतडी । पाटनस्थित भेटेरिनरी अस्पताल तथा पशु सेवा विज्ञ केन्द्र १७ महिनादेखि चिकित्सकविहीन हुँदा स्थानीय पशुपालक किसानलाई मर्का परेको छ । केन्द्रका प्रमुख गुमानीदत्त पन्तका अनुसार चिकित्सक अभावका कारण उपचारमा समस्या भएको छ । करारमा कार्यरत डाक्टरले त्यागपत्र दिएपछि केन्द्र चिकित्सकविहीन भएको हो । केन्द्रमा एक जना पशु चिकित्सकको दरबन्दी रहे पनि सुदूरपश्चिम प्रदेश सरकारले पूर्ति गर्न नसक्दा सेवा प्रवाहमा कठिनाइ भएको हो । गम्भीर प्रकृतिका बिरामी पशुको उपचारका लागि धनगढीबाट चिकित्सक बोलाउनुपर्ने परेको केन्द्रप्रमुख पन्तले बताए ।
रास्वपाको केन्द्रीय समिति बैठक आज, संसदीय दलको नेतामा बालेन चयनको तयारी
काठमाडौं । राष्ट्रिय स्वतन्त्र पार्टी (रास्वपा) को केन्द्रीय समिति बैठक आज बस्दैछ । बैठक अपराह्न ४ बजे पार्टीको केन्द्रीय कार्यालय बनस्थलीमा बोलाइएको छ । बैठकमा संसदीय दलको नेता चयनसम्बन्धी विषयमा छलफल हुने पार्टीले जनाएको छ । केन्द्रीय समितिबाट औपचारिक निर्णय गराएपछि संसदीय दलले बालेन शाहलाई संसदीय दलको नेता चयन गर्ने तयारी गरिएको पार्टीका नेताहरूले बताएका छन् । यसअघि आजै नवनिर्वाचित सांसदहरूले पद तथा गोपनीयताको शपथ लिने कार्यक्रम रहेको छ । शपथ ग्रहणलगत्तै रास्वपाले केन्द्रीय समिति बैठक बोलाएको हो । रास्वपाले संसदीय दलको नेतृत्व टुंग्याएर आगामी सरकार गठन प्रक्रिया तथा संसदीय रणनीति तय गर्ने तयारी गरेको जनाएको छ ।
