कर नतिर्ने कम्पनीमा ताला लगाउँदै काठमाडौं महानगर
काठमाडौं । काठमाडौं महानगरपालिकाले कर नतिर्ने ठूला संस्थाहरूलाई कारबाही गर्ने तयारी गरेको छ । महानगरले निश्चित समयको अल्टिमेट दिंदै पत्राचार गरे पनि कर तिर्न अटेर गरेपछि कारबाहीको प्रक्रिया अगाडि बढाउने तयारी गरेको हो । महानगरपालिकाले कर नतिर्ने कम्पनीहरूलाई पुनः एक पटक पत्राचार गरेर तिहार पछि कारबाही गर्ने तयारीमा छ । पत्राचार गरेपछि पनि महानगरलाई कर नबुझाए कारबाही हुने महानगरपालिका राजस्व विभाग प्रमुख शिवराज अधिकारीले बताए । यस अघि लामो समयदेखि कर नतिर्ने ठुला तथा साना संस्थालाई महानगरले निश्चित समय दिंदै कर तिर्नको लागि ताकेता गरेको थियो । विभागीय प्रमुख अधिकारीका अनुसार कर नतिरे कम्पनीमा ताला लगाइने छ । समयमा नै कर नतिर्ने कम्पनीलाई रकमको जरिवाना पनि हुने पनि महानगरको भनाइ छ । कर तिर्ने ताकेता गरेपछि महानगरपालिकाको राजस्व संकलनमा वृद्धि भएको छ । गत आर्थिक वर्ष २०७८/७९ असोज सम्मको तुलनामा चालु आर्थिक वर्षको असोजसम्ममा महानगरको राजस्व् करिब दोब्बरले वृद्धि भएको हो । चालु आर्थिक वर्षको असोज महिनासम्ममा २ अर्ब ३५ करोड ८० लाख १८ हजार ३ सय ८५ रुपैयाँ राजस्व संकलन भएको छ । ‘हामीले कारबाही गर्न पनि प्रक्रिया पुर्याउनु पर्छ, सो प्रक्रिया पुर्याएर कारबाही गर्छौं, तिहारपछि केही समय दिएर पत्राचार गर्छौं, हामीलाई कर नतिर्ने कम्पनीलाई ताला लगाउन सक्नेसम्मको अधिकार छ, ताला लगाउने नलाउने भन्न विषयमा महानगरको पनि छलफल हुन्छ,’ उनले भने । कर नबुझाए महानगरपालिकाको राजस्व ऐन २०७५ बमोजिम कारबाही गरी सरकारी बाँकी सरह कर असुलउपर गर्न सक्ने व्यवस्था छ । यी हुन् कर नबुझाउने संस्था तथा कम्पनी काठमाडौं महानगरपालिकाले कर बुझाउन पत्राचार गरेर ताकेता गरे पनि धेरै ठूला संघ संस्था कम्पनीहरुले कर बुझाउन बाँकी छ । महानगरपालिका अनुसार कर नबुझाएका कम्पनीलाई पत्राचार गरे पनि उनीहरूले वास्ता नगरको बताएको छ । कतिपय संघ संस्थाहरूले कर नलाग्ने भन्दै सात प्रतिशत कर छुट समेत मागेको महानगरले जनाएको छ । अधिकारीका अनुसार केही कम्पनीहरूले कर तिर्नको लागि थप समय मागेका छन् । महानगरले पत्राचार गरे पनि खाद्य संस्थान, ह्वाईट फिल स्कुल, रञ्जना ट्रेड सेन्टर, साझा भण्डार, राष्ट्रिय नाँचघर, चेम्बर अफ कमर्स, कर्मचारी सञ्चय कोष, नेपाल विद्युत प्राधिकरण, नेसनल ट्रेडिङ्ग लिमिटेड, नेपाली जामे मस्जिद, कृषि सामाग्री संस्थान, आर.बि. कम्प्लेक्स र नेपाल सेयर मार्केटले पनि सम्पत्ति कर बुझाउन बाँकी छ । यसै गरी काठमाडौं प्लाजा, शैलेन्द्र राज मानन्धर, काठमाडौं इन्जिनियरिङ कलेज र सिभिल मलले सम्पत्ति कर बुझाउन बाँकी रहेको महानगरपालिकाले जानकारी दिएको छ । नेपाल विद्युत प्राधिकरणले काठमाडौं महानगरलाई १९ करोड रुपैयाँ कर बुझाउनु पर्ने भएको छ । यस्तै, क्यासिनो प्याट, र्याडिसन होटल–२, साँग्रिला क्यासिनो, साँग्रिला होटल–३, रोयल र क्यासिनो याक एण्ड यति–१ ले मनोरञ्जन कर तिर्न बाँकी छ । यि हुन् कर बुझाउने २० संस्था काठमाडौं महानगरपालिकाले कर बुझाउनका लागि ताकेता गरेपछि चालु आर्थिक वर्षमा २० वटा संस्थाले भने कर बुझाएका छन् । कुनै संस्थाले थोरै बुझाएर थप किस्ता बुझाउँदै जाने प्रतिबद्धता पनि गरेका छन् । काठमाडौं महानगरपालिकाका अनुसार चालु आर्थिक वर्षको असोजसम्म ८६ लाख ४५ हजार १ सय ८९ रुपैयाँ मनोरञ्जन कर संकलन भएको छ । काठमाडौं फन पार्कले १७ लाख ३६ हजार ११, डेल्टीन क्यासिनो होटल म्यारियटले २१ लाख ४२ हजार ३४, क्यासिनो अन्पुर्ण होटलले ११ लाख ८५ हजार ४ सय ६३ रुपैयाँ मनोरञ्जन कर बुझाएका छन् । यस्तै, प्राइड इन्टरटेन्मेन्ट एण्ड रिक्रीएसन हायात होटलले ९ लाख ८९ हजार ४ सय ६०, बाल्को क्यासिनो होटल एलफ्ट–२६ ले २ लाख १० हजार २ सय ५८, माजोङ्ग इन्टरनमेन्ट होटल सोल्टी–२३ ले ९ लाख ९३ हजार ६ सय र बेलीज क्यासिनो मल्ल होटलले १३ लाख ८८ हजार ३ सय ६३ रुपैयाँ मनोरञ्जन कर बुझाएका छन् । मनोजङ्ग इन्टरटेन्मेन्ट होटल सोल्टीले १७ लाख ८५ हजार ५ सय र महावीर प्यालेसले १ लाख १५ हजार गरी जम्मा १९ लाख ५ सय व्यवसायिक कर बुझाएका छन् । यसै गरी महानगरपालिकाले पत्राचार गरे पश्चात् २ करोड ३८ लाख १२ हजार ५९ रुपैयाँ सम्पत्ति करको संकलन गरेको छ । मनमोहन मेमोरियल कलेज एण्ड शिक्षणले ८९ लाख, सिविक हस्पिटल प्रा.लि.ले ८ लाख ३५ हजार ३ सय ८०, नेपाल फाइनान्स लिमिटेडले १४ लाख ७० हजार ४ सय १२, शैलेन्द्र राज मानन्धरले २ लाख ४४ हजार ७ सय २८ र केदारलाल श्रेष्ठ १३ लाख ९२ हजार ७ सय ९१ रुपैयाँ सम्पत्ति कर बुझाएका छन् । यस्तै, कान्तिपुर डेण्टल कलेजले ५२ लाख, सगरमाथा इन्स्योरेन्सले ८ लाख ८ हजार १ सय ४७ हजार, भिजी अटो मोबाइलले ११ लाख ७८ हजार, ८ सय ४७, गोपालजी प्रोपर्टिजले ५० लाख ६६ हजार ७ सय ३ सय, देवेन्द्र लाल श्रेष्ठ १४ लाख ८५ हजार ५१, सिद्धार्थ वनस्थली इन्स्टिच्युट २ लाख रुपैयाँ सम्पत्ति कर बुझाएको छ ।
आत्मीयता र पुनर्मिलनको पर्व ‘भाइटीका’
फूलैफूल, रङ, उमङ्ग र उज्यालै उज्यालोको पर्वका रुपमा लिइने तिहार अर्थात् भाइटीका दिदीभाइ, दाजुबहिनीबीचको आत्मीयता, स्नेह र पुनर्मिलन गराउने पर्वका रुपमा लिइन्छ । टाढा भएका दिदीभाइ, दाजुबहिनीलाई नजिक बनाउने, उनीहरुबीचको सम्बन्ध प्रगाढ बनाउने पर्व उत्साह र उमङ्गका साथ भाइटीका मनाइन्छ । साहित्य श्रष्टा दानस मल्ल भाइटीकाको अवसरमा दिदीलाई समर्पण गरेर आफ्ना सिर्जनालाई यसरी पोख्छन्, सयपत्री र मखमली, घरको दायाँबायाँ । पवित्र होस् सधँैभरि, दिदीभाइको माया ।। यी माथि व्यक्त गरिएका साहित्य हरफले तिहार पर्वमा गलामा सयपत्री, मखमली फूलको माला र दिदीको न्यानो स्नेह, ममता पाउँदाको भाव र ती क्षणलाई सम्झदै उहाँले आफ्ना शब्दमार्फत दर्शाउन खोजेका हुन् । तिमै्र साथमा रहन पाऊँ, बनी तिम्रो छाया । पवित्र होस् सधैँभरि, दिदीभाइको माया ।। तिहार पर्वले दिदीभाइ र दाजुबिहिनीबीचको सम्बन्ध अझै पवित्र प्रगाढ स्नेही र पुनर्मिलन गराउनमा महत्वपूर्ण भूमिका खेलेको उहाँको बुझाइ छ । ‘दाजुभाइ पनि आफ्नो कार्यव्यस्तताले जहाँ रहे पनि वर्ष दिनमा एक पटक आउने चाड तिहारमा जस्तोसुकै काम भए पनि थाती राखेर दिदीबहिनीसँग पुनर्मिलन हुन पुग्ने गर्दछन्’, उनले भने, ‘मलाई सबैभन्दा बढी मनपर्ने चाड तिहार हो, यस पर्वले सबैलाई उमङ्ग, उज्यालो र आत्मीयता बढाएको हुन्छ ।’ निधारमा सप्तरङ्गी टीका, मखमली र सयपत्री फूलले सजिएका ती गला, दिदीबहिनीको माया, स्नेह र आशीर्वाद लिने पर्व भाइटीकाले सबै उमेर समूहमा उत्तिकै आत्मीयता र महत्व राख्दछ । साहित्यकार मित्रलाल गौतम कवितामार्फत भाइटीकालाई यसरी व्यक्त गर्नुहुन्छ, बल्छन् बत्तीहरु झिलीमिली गरी सबैका घर । दुःखी हुन् अथवा गरिब पनि सुखी देखिने तर ।। आफ्ना जो घरका दिदी र बहिनी छन् जसका जहाँ जति । आशीर्वाद लिनेदिने समयको मौका मिलेको कति ।। सबका घरमा बलेका ती झिलीमिली बत्तीले को धनीको गरिब छुट्याउँदैनन्, धनी गरिब सबैलाई समानरुपमा जोड्ने पर्व तिहार अर्थात् भाइटीकालाई लिनुहुन्छ, साहित्यकार गौतम । उनका कविताले दिदीभाइ, दाजुबहिनीले एकापसमा भाइटीका ग्रहण गरी आशीर्वाद दिने र लिने एक महत्वपूर्ण अवसर, उत्सवका रुपमा लिने गरेको गौतम बताउँछन् । ‘अन्य पर्वका तुलनामा यो पर्वले फरक भूमिका खेलेको छ, दाजुभाइ दिदीबहिनीले एकले अर्कोलाई गर्ने माया प्रेम, हेरचाह, प्रेमिल सम्बन्धलाई फराकिलो बनाएको पाइन्छ, दिदीभाइ, दाजुबहिनीबीचको माया, प्रेम, आशीर्वाद लिने र दिने गर्दा अझ बढी तिहारको महत्व बढेको पाइन्छ’, उनले भने। रामपुर साहित्यिक प्रतिष्ठानको आयोजनामा भएको तिहारको सन्दर्भ पारेर आयोजना गरिएको रचनावाचन कार्यक्रममा लक्ष्मीपूजा, देउसीभैलो, भाइटीकाको महत्व समेटिएका आफ्ना सिर्जना साहित्य श्रष्टाले अभिव्यक्त गरेका छन् । करिब दुई दर्जन श्रष्टाले तिहार विशेष आफ्ना साहित्य सिर्जनामार्फत दिदीभाइ, दाजुबहिनीबीचको सम्बन्धलाई जोड्ने, मखमली फूल, सप्तरङ्गी टीकाको महत्वलाई उजागर गरेका छन् । दाजुभाइका लागि दिदीबहिनीले दीर्घायुको कामना गर्दै कहिल्यै नओइलाउने मखमली फूलको माला लगाइदिने चलन छ । मखमली फूलको तिहारमा धेरै महत्व छ । यो फूल कहिले न ओइलिने भएकाले यसलाई दीर्घायु र स्वस्थ जीवनको प्रतीकको रुपमा लिइन्छ । त्यसैले यस फूलको माला तिहारको अवसरमा दिदीबहिनीले दाजुभाइको लामो आयुको कामना गरी लागाइदिन्छन् । नझर्ने, नओइलाउने र वर्षौं पनि टिक्ने हुनाले यसको अजम्बरी प्रकृतिलाई आत्मसात् गरेर दिदीबहिनीले आफ्ना दाजुभाइलाई मखमली फूलको माला लगाइदिएर दीर्घायुको कामना गर्छन् । विभिन्न समयमा पर्व विशेष, मोती जयन्ती, भानु जयन्ती, लक्ष्मी जयन्ती, मेला पर्व, विभिन्न मठ मन्दिरमा हुने पूजाका अवसरमा विभिन्न क्लब संघ संस्थाले आयोजना गर्ने कार्यक्रममा सहभागी भई रचनावाचन कार्यले कला, संस्कृति, सिर्जना, साहित्यको विकासका निम्ति महत्वपूर्ण योगदान रहेको बताउँछन्, रामपुर साहित्यिक प्रतिष्ठानका अध्यक्ष वासुदेव ढकाल । ‘रामपुर नगरपालिका मात्रै नभई कालीगण्डकीबेँसी आसपासका साहित्यकारले नियमित रचनावाचनका अलवा चाडपर्व विशेष र समय सान्दर्भिक बिशेष कार्यक्रमलाई असाध्यै चासो दिनुुहुन्छ, बेला बेलामा रचनावाचन कार्यक्रम आयोजना हुने गरेपछि साहित्य श्रष्टा जुर्मुराउन थालेको पाइएको छ’, उनले भने । प्रतिष्ठानले साहित्यिक रचनावाचन कार्यक्रमलाई नियमितरुपमा हरेक महिना गर्न थालेपछि लुकेर रहेका प्रतिभाको उजागर गर्ने अवसर मिलेको छ । कला र गला भएका श्रष्टाले आफ्ना सिर्जना, भावनालाई बेला बखत पोख्ने माध्यम बनेको छ । प्रतिष्ठानले घुम्तीरुपमा रामपुरका विभिन्न स्थानमा साहित्यिक गतिविधि गर्दै आइरहेको छ । रासस ।
निर्वाचन आयोगले ५५० जनाको नाम हटायो बन्दसूचीबाट, ५२ जनाको उमेर पुगेन
काठमाडौं । निर्वाचन आयोगले समानुपातिक पद्धती तर्फका ५५० जनाको नाम हटाएको छ । निर्वाचन कानून तथा आचारसंहिता उल्लघंनमा परी जरिवाना नबुझाएका समानुपातिक तर्फका ३६९ जनासहित ५५० जनाको नाम बन्दसूचीबाट हटाएको आयोगले जनाएको छ । प्रतिनिधिसभा सदस्य र प्रदेशसभा सदस्य निर्वाचनका लागि समानुपातिकतर्फ दलहरूले पेश गरेको बन्दसूचीमा नाम समावेश भएका ६ हजार ४५७ जना उम्मेदवारहरूमध्ये ५५० जनाको नाम हटाएको आयोगले विज्ञप्ति मार्फत जनाएको छ । विज्ञप्तिमा भनिएको छ, ‘जरिवाना नबुझाउने ३६९ जना, उम्मेदवारहरूका सम्बन्धमा परेको दावी विरोध उपर जाँचबुझवाट गरी ५४८ जना र समानुपातिक निर्वाचन प्रणालीतर्फको मुख्य निर्वाचन अधिकृतको कार्यालयको निर्णयवाट लाभको पदमा बहाल रहेका एक जना र कालो सुचीमा रहेका एक जना गरी कूल ५५० जना व्यक्तिको नाम सम्बन्धित दलले पेश गरेको बन्दसूचीबाट हटाउने निर्णय गरेको छ ।’ उमेर नपुगेकाहरुमध्ये प्रतिनिधिसभामा २३ र प्रदेशसभामा २९ जना गरी ५२ जनाको नाम हटाएको आयोगले जनाएको छ । दोहोरो उम्मेद्वारी परेका ६६ जना, महिला पुरुषको विवरण फरक परेका ३७ जना, मतदाता नामावलीमा नाम नै नभएका कारण ६ जना, सम्बन्धित प्रदेश भित्रको मतदाता नामावलीमा नाम नभएका प्रदेश सभा तर्फका १२ जना र आवश्यक कागजात पेश नगरेका ६ जनाको नाम बन्दसूचीबाट हटाएको हो ।
तिहारमा साढे १३ करोडको पुष्पमाला कारोबार
काठमाडौं । फूलैफूलको पर्वका रुपमा लिइने तिहारमा १३ करोड ५० लाख बराबरको पुष्पमाला कारोबार भएको छ । तिहारको समयमा करिब साढे २४ लाख मालाको कारोबार हुने अनुमान गरिएको फ्लोरिकल्चर एशोसिएशन नेपाल (फ्यान) का अध्यक्ष मीनबहादुर तामाङले बताए । ‘यस वर्षको तिहारमा करिब साढे २४ लाख माला खपत हुने हाम्रो अनुमान छ । त्यसमध्ये सयपत्रीको मात्रै २० लाख मालाको माग हो’, तामाङले भने, ‘थोक मूल्यका आधारमा साढे १३ करोड बराबरको फूल र मालाको कारोबार हुने अनुमान छ ।’ यद्यपि, खपत र कारोबार रकमबारे वास्तविक तथ्याङ्क भने तिहारपछि मात्रै आउने उनको भनाइ छ । फ्यानका अनुसार यस वर्षको तिहारका लागि साढे २४ लाख मालाको माग छ । सबैभन्दा बढी सयपत्री मालाको माग छ । यसवर्ष बिक्री हुने अनुमान गरिएका २० लाख सयपत्रीका मालामध्ये १७ लाख माला नेपालभित्रकै उत्पादन रहेको र तीन लाख माला भारतबाट आयात गरिएको छ । त्यस्तै, यस वर्ष तीन लाख २५ हजार हाराहारी मखमली मालाको किनबेच हुने अनुमान गरिएको छ । बीसदेखि २५ हजारको सङ्ख्यामा गोदावरी फूलको माला बिक्री हुनेछ । नेपालबाट मखमली माला निर्यात भएको छ । तिहारको समयमा मात्रै करिब एक लाखको सङ्ख्यामा मखमली माला निर्यात हुने गरेको फ्यान अध्यक्ष तामाङले बताए । ‘मखमली फूल विश्वका विभिन्न देशमा जान्छ । भारत र विभिन्न देशमा रहेर तिहार मान्ने नेपालीले मखमली मालाको माग गर्ने गरेका छन् । एक लाखको सङ्ख्यामा मखमली माला हामीले निर्यात गरेका छौँ’, उनले भने। यस वर्ष सयपत्री फूलको प्रतिमाला थोक मूल्य ५५ रहेको छ । त्यस्तै, मखमली फूलको मालाका ४० मा कारोबार भइरहेको छ । यद्यपि खुद्रा मूल्य भने फरक छ । पसलैपिच्छे फरक–फरक मूल्यमा बिक्री भइरहेका छन् । फूल र मालाको कारोबार यस वर्ष पनि गत वर्षकै मूल्यमा भइरहेको फ्यानले जनाएको छ । ‘उत्पादन, आयात र कारोबारको अवस्था हेरेर हामीले यस्तो अनुमान गरेका हौँ । यो वर्ष सयपत्रीको माला गत वर्षकै मूल्यमा कारोबार भएको छ । मखमलीको मालामा भने रु पाँच जति बढेको छ ।’ अध्यक्ष तामाङले भने। तिहारमा प्रयोग हुने माला र फूलका लागि नेपालभित्रकै उत्पादनले धान्न सक्ने अवस्था रहे पनि व्यवसायीले बढी नाफा कमाउनका लागि भारतबाट आयात गर्ने गरेका छन् । ‘हामीलाई चाहिने जति माला नेपालभित्रै उत्पादन हुन्छ । यस वर्षको उत्पादन पनि बढी नै हो’, तामाङले भने, ‘नेपालको उत्पादन पर्याप्त भए पनि भारतीय मालामा बढी नाफा हुन्छ । त्यस कारण व्यापारीले भारतबाट ल्याउने गरेका छन् । यस वर्ष बजारको मागभन्दा बढी आयात भएको देखिन्छ । अर्कोतर्फ आयातित माला मूल्यमा पनि सस्तो हुने भएका कारण नेपाली उत्पादनले बजार नपाउने तर भारतबाट ल्याइएका फूलमाला तिहारमा प्रयोग हुने देखिएको छ ।
पाँच अर्ब पुँजीको ‘रियल एग्रा लिमिटेड’ कृषि प्रोजेक्ट बैंक स्थापना गरिने
काठमाडौं । कृषि क्षेत्रलाई औद्योगिकीकरण गर्ने उद्देश्यसहित पाँच अर्ब पुँजीको कृषि प्रोजेक्ट बैंक स्थापना हुने भएको छ । तनहुँको पर्यटकीय नगरी बन्दीपुरमा केबलकार परियोजना निर्माण गरिरहेको आरकेडी समूहले पाँच अर्ब पुँजीको कृषि प्रोजेक्ट बैंक स्थापना गर्ने घोषणा गरेको हो । बन्दीपुरमा आयोजित कार्यक्रममा सलामी र इलमी कार्यक्रमको घोषणा गरिएको छ । नेपालको कृषि क्षेत्रलाई औद्योगीकरण गर्ने उद्देश्यसहित कृषि क्षेत्रको कम्पनीको लगानीलाई जोखिममुक्त महसुस गराउने बृहत्तर योजना र कार्यक्रमसहित नेपालकै ठूलो पुँजी र प्रवद्र्धक हुने पहिलो कृषिमूलक पब्लिक कम्पनी ‘रियल एग्रा लिमिटेड’ स्थापना गर्न लागिएको समूहका अध्यक्ष रामचन्द्र शर्माले जानकारी दिए । कम्पनीको अधिकृत पुँजी पाँच अर्ब र चुक्ता एवं जारी पुँजी दुई अर्ब ४५ करोड रहनेछ । कम्पनीमा देशभरि र विदेशबाट गरी पाँच हजार एक सय नेपाली प्रवद्र्धक शेयरधनी रहनेछ । यसका लागि लागि देशभरि र विदेशमा समेत नेपाली प्रवद्र्धक बन्नका लागि प्रस्ताव गर्ने गरी ‘उद्यममध्ये महाभियान’ आयोजना गरिएको छ । कृषि क्षेत्रको लगानीमा अधिकतम जोखिम हुन्छ भन्ने आमधारणा रहिरहेका बेला त्यसलाई चुनौती दिँदै चार वर्षमा नै शतप्रतिशत लगानी बराबर बोनस सुनिश्चितता गर्ने गरी शेयर एवं जग्गा प्राप्ति गुरुयोजना पहल ‘सलामी’ कार्यक्रम प्रस्तुत गरिएको शर्माले बताए । यसमार्फत प्रवद्र्धक लगानीकर्तालाई कम्पनीमा कबुलअनुरुपको रकमको किस्ता भुक्तान गरिसकेपछि शेयरधनीले तोकेको समय अवधि दुई वा चार वर्षमध्ये एक र तोकेको ठाउँमा शेयर राशि बराबर नै हुने गरी बोनसको रुपमा जग्गा नामसारी गरिदिने र कृषि उद्यमको विकासका लागि ठोस सुरुआतको पहल लिइनेछ । प्रस्तावित कम्पनीले प्रोजेक्ट बैंक खडा गरी दश उद्देश्य कार्यान्वयन गर्ने लक्ष्य लिएको आरकेडी स्कूल तथा संस्कृति विभागका प्रमुख डा तुलसी प्रभासले जानकारी दिए। उनका अनुसार उत्पादनमूलक कृषि पर्यटन व्यवसायका लागि रियलस्टेट संरचना निर्माण गरी मानिसले अर्थोपार्जन गर्नसक्ने व्यवस्थासहित फरक–फरक उद्यम सञ्चालन गर्नसक्ने बनाउने लक्ष्य लिइएको छ । कृषि ब्लक एवं जोन परियोजना बैंक तयार गरी व्यक्तिलाई अवसर प्रदान गर्ने, कृषि रिसोर्ट एवं हाउजिङ ब्लक निर्माण गरी व्यवसायीलाई बिक्री वितरण गर्ने, कृषि पर्यटनका पूर्वाधार निर्माणका लागि फिल्ड सर्भिस एवं लगानी गर्ने, एकीकृत कृषि पार्कको डिजाइन र पूर्वाधार निर्माण गरी कृषि क्षेत्रको औद्योगिकीकरण गर्ने, कृषि एवं खाद्यान्न उद्योग नेपालभित्र खोल्ने र सञ्चालन गर्ने वातावरण बनाउने मुख्य लक्ष्य लिइएको छ । यो कम्पनी प्रवद्र्धनका लागि प्रवास र स्वदेशमा बस्ने मध्यमवर्गीय नेपालीको ४५ प्रतिशत शेयर रहने गण्डकी प्रदेश संयोजक धर्मराज भण्डारीले जानकारी दिए। आरकेडी समूहअन्तर्गतको टुरिजम इन्भेष्टमेण्ट फिण्ड लिमिटेड र अन्य कम्पनीको सहभागितामा ५५ प्रतिशत शेयर रहने जनाइएको छ ।
बङ्गलादेशले नेपालसँग ५० मेगावाट बिजुली खरिद गर्ने
काठमाडौं । बङ्गलादेशले नेपालसँग ५० मेगावाट विद्युत् खरिद गर्ने भएको छ । प्रधानमन्त्री शेख हसिनासँग बङ्गलादेशका लागि नेपालका राजदूत घनश्याम भण्डारीले मंगलबार गरेको शिष्टाचार भेटवार्तामा प्रधानमन्त्रीले सो विषय जानकारी गराएका हुन्। सन् २०४० सम्म बङ्गलादेशले कूल नौ हजार मेगावाट बिजुली खरिद गर्ने यसअघि नै सार्वजनिक गरिसकेको छ । बङ्गलादेशले भारतीय कम्पनी ग्रान्धी माल्लिकार्जुन राव(जिएमआर)ले निर्माण गर्ने माथिल्लो कर्णाली जलविद्युत आयोजनाबाट पाँच सय मेगावाट बिजुली लैजाने सहमति गरेको छ । शिष्टाचार भेटमा शिक्षा, पर्यटन, ऊर्जा, व्यापार र पारवहनलगायतका विषयमा कुराकानी भएको बङ्गलादेशस्थित नेपाली दूतावासले जनाएको छ । सो अवसरमा राजदूत भण्डारीले पछिल्लो ५० वर्षमा सरकारी र दुई देशका जनता जनताबीचको सम्बन्ध निरन्तर समृद्ध हुँदै गएको, एक अर्का देशबीचको सहकार्यका अलावा असल छिमेकीको सम्बन्ध रहेको बताएका हुन् । प्रधानमन्त्री हसिनाले नेपालको राजनीतिक र नागरिक समाजले बङ्गलादेशको स्वतन्त्रताका सङ्ग्राममा नेपाली राजनीतिक तथा नागरिक समाजले गरेको सहयोगको स्मरण गर्दै दुई देशबीचको द्विपक्षीय सम्बन्ध उत्कृष्ट रहेको बताए । उनले दुई देशबीचको व्यापार, ऊर्जा, पर्यटन र जलवायु परिवर्तनका क्षेत्रमा रहेको सम्भावना र साझा सहकार्यका सम्बन्धमा चर्चा गर्दै ‘बीबीआइएन’ मार्फत विस्तारित सम्पर्क सञ्जालको महत्वमा जोड दिएका थिए । बङ्गलादेशी प्रधानमन्त्रीले राजदूत भण्डारीलाई आफ्नो सरकारको पूर्ण सहयोग रहने र सहकार्यसमेत हुने भन्दै सफल कार्यकालको कामना गरे। राजदूत भण्डारीले आफ्नो कार्यकालमा दुई देशबीचको सम्बन्धलाई थप प्रगाढ बनाउने प्रतिबद्धता व्यक्त गर्नुभएको बङ्गलादेशस्थित नेपाली राजदूतावासले मंगलबार जारी गरेको विज्ञप्तिमा उल्लेख छ ।
विद्यालयको स्तर वृद्धिका लागि म्याग्दीका पूर्व विद्यार्थीले जुटाए एक करोड सहयोग
म्याग्दी । म्याग्दीको धवलागिरि गाउँपालिका–७ धारापानीको किसानी चन्द्रकुन्ता माविको स्तरवृद्धिका लागि पूर्व विद्यार्थीले एक करोड बढी सहयोग जुटाएका छन् । दश जोड दुई तहको कक्षा र प्राविधिक विषयको पठनपाठन सञ्चालन गर्न धारापानी पूर्व विद्यार्थी संघले अक्षयकोष स्थापना गर्न आर्थिक स्रोत जुटाएको हो । संघका अध्यक्ष भरतबहादुर थापाले स्वदेश तथा विदेशमा रहेका धारापानी र छिमेकी गाउँका बासिन्दाबाट एक करोड तीन लाख सहयोग जुटेको जानकारी दिए। सामाजिक सञ्जाल फेसबुकबाट अभियानका साथै सांस्कृतिक कार्यक्रम गरेर आर्थिक सङ्कलन गरिएको हो । धारापानीकी सरु पुनले सबैभन्दा बढी सात लाख उपलब्ध गराएकी छन्। विद्यालयको भवन बनाउन स्थानीय चक्रबहादुर थापा, उनका भाइ पूर्ण थापा, बहिनी सुवा र मना खत्रीले बुबा चन्द्रबहादुर थापा र आमा कुन्तादेवी थापाको नाममा सात रोपनी जग्गा उपलब्ध गराएका छन्। जग्गा उपलब्ध गराउने दाताको नाममा विद्यालयको नामाकरण गरिएको छ । यसअघि किसानी मावि नाम थियो । दाताको नाम थपेर किसानी चन्द्रकुन्ता मावि बनाइएको छ । धारापानी घर भई हाल अमेरिकामा रहेका मोहन थापाले पाँच लाख दुई सय १५, बेदबहादुर राना र गीता रानाले पाँच लाख एक सय ५५, तेजिन्द्र थापा र विष्णु थापाले तीन लाख एक सय २५, काठमाडौँमा बस्ने पदमजङ्ग थापाले एक लाख पाँच सय ५५, लालबहादुर राना र नरदेवी रानाले र एक लाख एक सय ११ सहयोग गरेका छन् । एक वर्षभित्र जम्मा गरिसक्ने र अक्षयकोष बनाएर विद्यालयको स्तरवृद्धिका लागि परिचालन गर्ने विद्यालय व्यवस्थापन समितिका अध्यक्ष चक्रबहादुर थापाले बताए। कक्षा १० सम्मको पठनपाठन हुने विद्यालयमा दुई सय २८ जना विद्यार्थी छन् ।
महाकवि देवकोटाको ११४ औं जन्मजयन्ति मनाइयो
काठमाडौं । आज लक्ष्मी पूजाको दिन महाकवि लक्ष्मीप्रसाद देवकोटाको ११४ औं जन्मजयन्ति धुमधामका साथ मनाइएको छ । काठमाडौंको संचारग्रामस्थित त्रिमूर्ति निकेतनद्वारा मंगलबार आयोजित कार्यक्रममा त्यहाँस्थित महाकवि देवकोटाको पूर्ण कद्को शालिकमा माल्यार्पण गरेर जन्मजयन्ति मनाइएको हो । त्यस अवसरमा साहित्यकारहरुले महाकवि देवकोटालाई समर्पित गरेर कविताहरु बाचन गरेका थिए । कार्यक्रममा वरिष्ठ साहित्यकार डा. तुलसी भट्टराईले महाकवि देवकोटा नेपालको मात्रै नभएर अन्तराष्ट्रिय क्षेत्रमा समेत ख्याती प्राप्त साहित्यकार भएको उल्लेख गरे । उनले देवकोटाले बनारस बसेर कष्टका साथ रचना गरेका साहित्यले ठूल्ठूला खण्डकाब्यको रुपमा लिएको पनि स्मरण गरे । कार्यक्रममा कविशिरोमणि लेखनाथ पौडेल र नाट्य सम्राट बालकृष्ण समको पनि पूर्ण कदको शालिकमा माल्यार्पण गरिएको थियो । महाकवि देवकोटाको जन्म विक्रम संवत १९६६ साल कातिक २७ गते लक्ष्मी पूजाको दिन काठमाडौंको डिल्ली बजारमा भएको थियो । तिलमाधव देवकोटा र अमरराज्यलक्ष्मी देवकोटाको साँहिला छोराको रुपमा जन्मनु भएको महाकवि देवकोटा शिक्षामन्त्री समेत बनेका थिए । उनको २०१६ साल भदौं २९ गते सोमबार साँझ ६ बजेर १० मिनेटमा क्यान्सरको कारणले निधन भएको थियो ।
