कजारियाको ‘डाइन विथ द डिभाज’ अभियान सार्वजनिक, मिस नेपालसँग डिनरको अवसर
काठमाडौं । ‘द हिडन ट्रेजर मिस नेपाल २०२६’को मुख्य प्रायोजक कजारिया रमेश टायल्स लिमिटेडले ‘डाइन विथ द डिभाज – एन इभिनिङ विथ मिस नेपाल’ नामक विशेष उपभोक्ता अभियान सार्वजनिक गरेको छ । कम्पनीका अनुसार यस अभियानमार्फत मिस नेपाल अडिसन आयोजना हुने प्रमुख सहरका ग्राहक जोडीहरूले वर्तमान मिस नेपाल विजेतासँग डिनर गर्ने अवसर पाउनेछन् । यसलाई उपभोक्तामाझ फरक जीवनशैली अनुभव प्रदान गर्ने योजनाका रूपमा प्रस्तुत गरिएको छ । अभियानमा सहभागी हुन ग्राहकले एकैपटक न्यूनतम १,००० वर्गफिट कजारिया टायल्स खरिद गर्नुपर्नेछ। यो योजना मिस नेपालको क्षेत्रीय अडिसनसँग जोडिएको छ र नेपालगन्ज, बिर्तामोड, इटहरी, पोखरा, बुटवल, जनकपुर र काठमाडौंमा लागू हुनेछ । अभियानबारे जानकारी दिँदै कम्पनीका प्रवक्ताले मिस नेपालसँगको सहकार्यले आधुनिकता र भव्यतालाई प्रतिनिधित्व गर्ने उल्लेख गरे । उनले ग्राहकप्रतिको कृतज्ञता स्वरूप अविस्मरणीय अनुभव प्रदान गर्न खोजिएको बताए । यो अभियान २०८३ जेठ १० देखि २५ गतेसम्म सञ्चालन हुनेछ । अफर अभियान अवधिभित्र गरिएको एकल खरिद बिलमा मात्र लागू हुने कम्पनीले जनाएको छ । थप जानकारीका लागि ग्राहकहरूले नजिकैको कजारिया शोरुम वा कम्पनीका आधिकारिक सामाजिक सञ्जालमार्फत जानकारी लिन सक्नेछन् ।
सहकारीको बचत दुरुपयोगसम्बन्धी प्रतिवेदन सार्वजनिक गर्ने सरकारको निर्णय
काठमाडौं सरकारले सहकारीको बचत दुरुपयोगसम्बन्धी प्रतिवेदन सार्वजनिक गर्ने निर्णय गरेको छ । सोमबार ९आज० बसेको मन्त्रिपरिषद् बैठकले सहकारी क्षेत्रमा देखिएका समस्या समाधानका लागि गठित ‘सहकारीमा भएको बचत रकम दुरुपयोग सम्बन्धमा गठित संसदीय छानबिन विशेष समिति को प्रतिवेदन सार्वजनिक गर्ने निर्णय गरेको हो।
धानको न्यूनतम समर्थन मूल्य निर्धारण गर्ने सरकारको निर्णय
काठमाडौं । सरकारले बर्खे धानको न्यूनतम समर्थन मूल्य निर्धारण गरेको छ । सोमबार बसेको मन्त्रिपरिषद् बैठकले आर्थिक वर्ष ८३/८४ मा बर्खे धान बालीको न्यूनतम समर्थन मूल्य मोटो धानको ३ हजार ६६० रूपैयाँ प्रति क्विन्टल र मध्यम धानको ३ हजार ८६० रूपैयाँ प्रतिक्विन्टल तोक्ने निर्णय गरेको हो ।
नागरिक उड्ययन प्राधिकरणको महानिर्देशक बने मुकेश
काठमाडौं । नेपाल नागरिक उड्ययन प्राधिकरणको महानिर्देशकमा सहसचिव मुकेश डंगोल नियुक्त भएका छन् । सोमबार बसेको मन्त्रिपरिषद् बैठकले डंगोललाई महानिर्देशक नियुक्त गर्ने निर्णय गरेको सरकारका प्रवक्ता सस्मित पोखरेलले जानकारी दिए ।
चीन जाँदै गरेका गुरुङ ४३ हजार अमेरिकन डलरसहित पक्राउ
काठमाडौं । चीन जान लागेका एक नेपाली ४३ हजार अमेरिकी डलरसहित पक्राउ परेका छन् । आइतबार काठमाडौंबाट टिमुरे जाँदै गरेको बा प्र ०१००६ ख ९५१५ नम्बरको यात्रुबाहक बसबाट ३७ वर्षीय सुशील गुरुङ पक्राउ परेका हुन् । उनको साथबाट १०० को ३६३ वटा, ५० को ११२ वटा, २० को २९ वटा, १० को ५० वटा, ५ को ३ वटा र १ को ५ वटा अमेरिकी डलर फेला परेको थियो । अमेरिकन डलर लिएर गुरुङ चीन लागेका थिए । उनी गाइडको रूपमा समेत काम गर्ने गरेको अनुसन्धानबाट खुलेका रसुवा जिल्ला प्रहरी कार्यालयका प्रवक्ता राजु शाहले जानकारी दिए । रसुवाको उत्तरगया गाउँपालिका–५ बेत्रावती बजारस्थित पासाङ ल्हामु सडक खण्डमा प्रहरीले नियमित सवारी साधनहरू चेकजाँच गर्ने क्रममा उनी पक्राउ परेका हुन् । धादिङको गंगाजमुना गाउँपालिक–५ का ३७ वर्षीय गुरुङलाई आजै बिहान राजश्व अनुसन्धानको कार्यालयमा बुझाइसकेको शाहले जानकारी दिए ।
प्रधानमन्त्रीले मंगलबार इयूआबद्ध देशका राजदूत तथा मिसन प्रमुखसँग छलफल गर्ने
काठमाडौं । प्रधानमन्त्री वालेन्द्र शाहले युरोपेली सङ्घ (इयू)मा आबद्ध देशका गैरआवासीय राजदूत तथा मिसन प्रमुखहरूसँग मंगलबार संयुक्त भेटवार्ता गर्नेछन् । प्रधानमन्त्री शाहले मंगलबार बिहान ११ः३० बजे प्रधानमन्त्री तथा मन्त्रिपरिषद्को कार्यालयमा उनीहरुसँग सामूहिक भेट र संवाद गर्ने कार्यक्रम तय भएको छ । प्रधानमन्त्री शाहका प्रेस तथा अनुसन्धानविज्ञ दीपा दाहालका अनुसार सामूहिक भेटका अवसरमा नेपालको वर्तमान प्राथमिकताबारे जानकारी गराउने, द्विपक्षीय सम्बन्धलाई थप सुदृढ तुल्याउने र सहकार्यका विविध विषयमा छलफल केन्द्रित हुनेछ । यसअघि चैत २५ गते प्रधानमन्त्री शाहले नेपालस्थित विभिन्न देशका राजदूत तथा कूटनीतिक नियोगका प्रमुखहरुसँग सामूहिक भेट र संवाद गरेका थिए ।
६० जिल्लामा सरकारी कुरियर सेवा विस्तार
काठमाडौं । सरकारले सार्वजनिक सेवा प्रवाहलाई डिजिटल, व्यवस्थित र नागरिकमैत्री बनाउने लक्ष्यसहित सरकारी कुरियर सेवाको विस्तारलाई तीव्र बनाएको छ । राहदानी, सवारी चालक अनुमति पत्र (लाइसेन्स), शैक्षिक प्रमाणपत्रलगायतका सरकारी कागजात घरमै पुर्याउने व्यवस्था विस्तार गर्दै सरकारले परम्परागत सेवा प्रणालीलाई प्रविधिमैत्री र सहज बनाउँदै लगेको हो । हुलाक सेवा विभागका अनुसार हालसम्म यो सेवा देशका ६० जिल्लामा विस्तार भइसकेको छ । विभागले सरकारी कार्यालयबाट प्रवाह हुने सेवामा नागरिकको प्रत्यक्ष पहुँच बढाउने तथा अनावश्यक झन्झट कम गर्ने उद्देश्यले सेवा प्रणालीलाई क्रमशः डिजिटल माध्यमसँग जोड्दै लगेको जनाएको छ । विभागका महानिर्देशक मनमाया भट्टराई पंगेनीले सरकारी सेवा वितरण प्रणालीलाई आधुनिक र प्रभावकारी बनाउन स्थानीय तहसम्म संयन्त्र परिचालन गरिएको बताइन्। ‘नागरिकले सामान्य सरकारी कागजातका लागि पटक–पटक कार्यालय धाउनुपर्ने अवस्थालाई अन्त्य गर्ने लक्ष्यका साथ सेवा विस्तार गरिरहेका छौं । सीमित स्रोतसाधनका बाबजुद पनि यो क्रमश: सबै जिल्लामा सुरु हुँदै गएको छ,’ उनले भनिन् । विभागका अनुसार हालसम्म २९ हजार ७५८ वटा राहदानी सम्बन्धित जिल्लासम्म ढुवानी गरिएको छ । तीमध्ये एक हजार ७६३ वटा राहदानी सेवाग्राहीको घरमै पुगेर वितरण गरिएको छ । जिल्ला प्रशासन कार्यालयमा राहदानी आवेदन दिनेक्रममै सेवाग्राहीको ठेगाना संकलन गर्न थालिएकाले वितरण प्रक्रिया थप व्यवस्थित भएको विभागले जनाएको छ । यातायात क्षेत्रको सेवा वितरणलाई पनि डिजिटल र सहज बनाउने प्रयासअन्तर्गत चार लाख ७५ हजार ९०८ वटा सवारी चालक अनुमतिपत्र सम्बन्धित यातायात कार्यालयसम्म पुर्याइएको छ । तीमध्ये ६७२ वटा लाइसेन्स सेवाग्राहीको घरमै वितरण गरिएको विभागले जनाएको छ । सरकारी सेवा वितरण प्रणालीलाई एकीकृत र बहुआयामिक बनाउने प्रयासस्वरूप विभागले शिक्षा र स्वास्थ्य क्षेत्रसँग पनि सहकार्य विस्तार गरेको छ । हालसम्म २६० वटा शैक्षिक प्रमाणपत्र वितरण गरिएको छ भने राष्ट्रिय जनस्वास्थ्य प्रयोगशालासँगको सहकार्यमा ५३९ वटा प्रयोगशाला नमूना ढुवानी गरिएको छ । सुर्खेत, बाँके र काठमाडौंबाट प्रयोगशाला नमूना ढुवानी सेवा सुरु गरिएको विभागले जनाएको छ । नेपाल टेलिकमसँग सहकार्य गरी सिमकार्ड घरमै पुर्याउने सेवा सुरु गर्ने तयारी भइरहेको छ । त्यसैगरी मध्यपश्चिम विश्वविद्यालयसँग प्रश्नपत्र, उत्तरपुस्तिका तथा प्रमाणपत्र ढुवानी कार्य सुरु भइसकेको छ भने नेपाल खुला विश्वविद्यालयसँग शैक्षिक प्रमाणपत्र ढुवानीबारे छलफल भइरहेको विभागले जनाएको छ । विभागले सेवा प्रणालीलाई अझ प्रभावकारी बनाउन विभिन्न सरकारी निकायसँग प्रणाली एकीकरणको काम पनि अघि बढाएको छ । राहदानी विभागसँग प्रणाली अन्तरआवद्धता गर्न अध्ययन समिति गठन गरिएको छ भने महालेखा नियन्त्रक कार्यालयसँग प्रणाली एकीकरणका लागि पहल भइरहेको छ । पोस्टल इन्टरनल ट्र्याकिङ सिस्टम (पिट्स) मा पोस्टल कोड स्तरोन्नति गर्ने कार्य पनि अघि बढाइएको विभागले जनाएको छ । अन्तर्राष्ट्रिय कुरियर सेवातर्फ पनि विस्तारको तयारी भइरहेको छ । हवाई सेवा प्रदायक कम्पनीहरूसँग समन्वय गरी थप देशसम्म हुलाक पहुँच विस्तार गर्ने तयारी भइरहेको विभागले जनाएको छ ।
