हुन्डाई नेपालको ‘विन्टर डिलाइट’ अभियान सुरु, ५ लाखसम्म छुट
काठमाडौं । नेपालमा हुन्डाई गाडीको आधिकारिक वितरक लक्ष्मी इन्टरकन्टिनेन्टल प्रालिले ‘हुन्डाई विन्टर डिलाइट’ अभियान सार्वजनिक गरेको छ । बिहीबार (आज) देखि लागू हुने यस सीमित अवधिको अभियानमार्फत ग्राहकलाई आकर्षक छुट, नयाँ वर्ष बोनस तथा थप विशेष सुविधाहरू प्रदान गरिने कम्पनीले जनाएको छ । अभियानअन्तर्गत हुन्डाईका छानिएका मोडलहरूमा ग्राहकले ५ लाख रुपैयाँसम्मको नगद छुट तथा १ लाख रुपैयाँसम्मको नयाँ वर्ष बोनस प्राप्त गर्न सक्नेछन् । साथै १ वर्षको निस्शुल्क बीमा सेवा र निस्शुल्क सडक कर सुविधा पनि समावेश गरिएको छ, जसले नयाँ वर्षको अवसरमा गाडी खरिदलाई अझ लाभदायक बनाएको छ । हुन्डाई गाडीहरूमा उपलब्ध ३ वर्षको वारेन्टी, हाई–भोल्टेज ब्याट्रीमा ८ वर्षको वारेन्टी तथा ६ वर्षको निस्शुल्क सर्भिसिङ सुविधाले हुन्डाईको गुणस्तर, विश्वसनीयता र ग्राहक सन्तुष्टिप्रतिको प्रतिबद्धता झल्काउँछ । देशभर रहेका हुन्डाई शोरूमहरूमा लागू हुने यस ‘विन्टर डिलाइट’ अभियानका अफरहरू सीमित अवधिका लागि मात्र उपलब्ध रहने लक्ष्मी इन्टरकन्टिनेन्टलले जनाएको छ ।
मोटरसाइकल चोरी गरी अवैध रूपमा खरिद-बिक्री गर्दै आएको संगठित गिरोह पक्राउ
काठमाडौं । धनुषा जिल्लाका विभिन्न स्थानबाट मोटरसाइकल चोरी गरी अवैध रूपमा खरिद-बिक्री गर्दै आएको एक संगठित गिरोहलाई धनुषा प्रहरीले पक्राउ गरेको छ । चोरी तथा विक्री कार्यमा संलग्न सिकिन्द्र यादवसहित १२ जनालाई नियन्त्रणमा लिई उनीहरूको कब्जाबाट ११ थान चोरीका मोटरसाइकल बरामद गरिएको हो । जिल्ला प्रहरी कार्यालय, धनुषाका प्रहरी नायव उपरीक्षक गणेशबहादुर बमले पछिल्लो समय मोटरसाइकल चोरीका घटना बढेपछि विशेष निगरानी र अनुसन्धान अभियान सञ्चालन गरिएको बताए । अनुसन्धानका क्रममा समूहले सार्वजनिक, बजार, अस्पताल तथा आवासीय क्षेत्रबाट मोटरसाइकल चोरी गरी नम्बर प्लेट परिवर्तन गरेर कम मूल्यमा बेच्ने गरेको खुलेको छ । पक्राउ परेकामाथि चोरी तथा संगठित अपराधसम्बन्धी मुद्दामा थप अनुसन्धान भइरहेको प्रहरीले जनाएको छ ।
एनपीएल सकिएको १२ दिन बित्दा पनि उठेन फोहोर
काठमाडौं । नेपालको सर्वाधिक ठूलो फ्रेन्चाइज क्रिकेट प्रतियोगिता नेपाल प्रिमियर लिग (एनपीएल) सकिएको १२ दिन पूरा भइसक्दा पनि त्रिभुवन विश्वविद्यालय अन्तर्राष्ट्रिय क्रिकेट मैदान वरपरको फोहोर अझै उठेको छैन । अत्यन्तै उत्साहका साथ सम्पन्न भएको प्रतियोगितापछि फोहोर व्यवस्थापनमा लापरबाही भएको भन्दै सरोकारवालाहरूले आलोचना सुरु गरेका छन् । मैदान आसपासको फोहोर उठाउने विषयमा न त नेपाल क्रिकेट संघ (क्यान)ले चासो देखाएको छ, न त कीर्तिपुर नगरपालिका नै सक्रिय देखिएको छ । यसले आयोजक र स्थानीय सरकारबीचको समन्वय नभएको देखाउँछ । क्यानका प्रवक्ता छुम्बी लामाले फोहोर उठाउने जिम्मेवारी संघकै भएको स्वीकार गर्दै फोहोर उठाउन ढिलाइ भएको बताए । उनले भने, ‘हामी एनपीएल सकिएपछि अन्य काममा व्यस्त भयौं, अब एक–दुई दिनभित्र विश्वविद्यालय परिसरबाट फोहोर उठाइनेछ ।’
चीनमा तीव्र गतिको रेल सेवा सञ्चालनमा आउँदै
काठमाडौं । चीनको सान्सी प्रान्तमा सियान–यानान उच्च गतिको रेल मार्ग सञ्चालनमा आउने भएको छ । जुन उक्त क्षेत्रको लागि एउटा महत्त्वपूर्ण कोशेढुङ्गा सावित हुने विश्वास लिइएको छ । यो उत्तरी सान्सीको पुरानो क्रान्तिकारी आधार क्षेत्रमा सेवा पुर्याउने पहिलो उच्च गतिको रेल सेवा हुनेछ । जसले विशेष गरी यानानलाई जोड्नेछ । ३५० किलोमिटर प्रतिघण्टाको गतिको लागि डिजाइन गरिएको यो २९९.८ किलोमिटरको परियोजनाले सियानदेखि यानानसम्मको यात्रा समय २.५ घण्टाबाट घटाएर करिब एक घण्टामा पुर्याउनेछ । सन् १९३७ र १९४७ को बीचमा चिनियाँ कम्युनिस्ट पार्टीको नेतृत्वको आधार क्षेत्रको रूपमा सेवा गरेको हुनाले यानानको ऐतिहासिक महत्त्व रहेको छ ।
जेफरी एपस्टीनसँग जोडिन सक्ने १० लाखभन्दा बढी फाइल अमेरिकी अधिकारीको कब्जामा
काठमाडौं । अमेरिकी अधिकारीहरूले १० लाखभन्दा बढी दस्तावेजको सम्बन्ध यौन अपराधी जेफरी एपस्टीनसँग हुन सक्ने बताएका छन् । अमेरिकी अधिकारीहरूका अनुसार ती दस्तावेजहरू आगामी दिन र हप्ताहरूमा सार्वजनिक गर्ने योजना बनाइएको छ । अमेरिकी अनुसन्धान निकाय फेडरल ब्यूरो अफ इन्भेस्टिगेशन (एफबीआई) र न्यूयोर्कका संघीय अभियोजकहरूले यी फाइलहरूको बारेमा न्याय विभागलाई जानकारी दिएका छन् । न्याय विभागले बुधबार भनेको छ, ‘हाम्रा वकिलहरू पीडितहरूको सुरक्षाका लागि कानुनी रूपमा आवश्यक संशोधन र समीक्षा गर्न चौबीसै घण्टा काम गरिरहेका छन्, र हामी यी दस्तावेजÞहरू सकेसम्म चाँडो सार्वजनिक गर्नेछौं ।’ विभागका अनुसार सबै फाइलहरू सार्वजनिक गर्न ‘अझ केही हप्ता’ लाग्न सक्छ । डिसेम्बर १९ सम्म एपस्टीन मामलासँग सम्बन्धित सबै फाइलहरू सार्वजनिक नभएपछि न्याय विभागमाथि अनुसन्धान भइरहेको छ । नयाँ कानुनअनुसार विभागले तोकिएको समयसीमाभित्र यी दस्तावेजÞहरू सार्वजनिक गर्नुपर्ने थियो ।
सुरक्षण मुद्रण केन्द्रले दिन थाल्यो लाइसेन्स, चैतभित्र १२ लाख बाँड्ने लक्ष्य
काठमाडौं । वर्षौंदेखि सवारी चालक अनुमति पत्र (लाइसेन्स) को पर्खाइमा रहेका सेवाग्राहीलाई सुरक्षण मुद्रण केन्द्रले वितरण गर्न थालेको छ । सुरक्षण मुद्रण केन्द्रले क्यूआर कोडसहितको नयाँ स्मार्ट लाइसेन्स छपाइलाई तीव्रता दिन थालेको भौतिक पूर्वाधार तथा यातायात मन्त्रालयले जनाएको छ । मन्त्रालयका अनुसार गत कात्तिक २१ गतेदेखि छपाइ सुरु गरेको केन्द्रले डेढ महिनाको छोटो अवधिमा ६ हजार ७०० थानभन्दा बढी लाइसेन्स छापेको छ । भौतिक पूर्वाधार तथा यातायात मन्त्रालय सम्हालेको १०० दिन पुगेको अवसरमा मन्त्री कुलमान घिसिङले आफ्नो कार्य प्रगति विवरण सार्वजनिक गर्दै यसबारे जानकारी दिएका हुन् । लाइसेन्सको ठूलो ब्याकलग हटाउन केन्द्रले आगामी चैत महिनाभित्र १२ लाख थान लाइसेन्स छपाइसक्ने जिम्मेवारी पाएको छ । केन्द्रसँग दैनिक २५ हजार थानसम्म लाइसेन्स छाप्न सक्ने उच्च क्षमता भए तापनि हाल केही प्राविधिक कारणले छपाइको गति सुस्त देखिएको छ । केन्द्रको क्षमता उच्च भए पनि यातायात व्यवस्था विभागले पर्याप्त डाटा उपलब्ध गराउन नसक्दा मेसिनहरू पूर्ण क्षमतामा चल्न पाएका छैनन् । हाल विभागले दैनिक रूपमा प्राप्त हुने अत्यावश्यक लाइसेन्सका लागि मात्र डाटा पठाउने गरेको छ । विभागका अनुसार सन् २०२२ मे देखि हालसम्म करिब २५ लाख थान लाइसेन्स छाप्न बाँकी छ । जसका लागि आवश्यक सफ्टवेयर निर्माणको काम अन्तिम चरणमा पुगेको विभागले जनाएको छ । लामो समयदेखि रसिदकै भरमा सवारी चलाउन बाध्य चालकहरूलाई राहत दिन पहिलो चरणमा १२ लाख थान लाइसेन्स छापिनेछ ।
सिटिजन्स बैंकको मोबाइल एपमै रेमिट्यान्स, २४सै घण्टा सेवा
काठमाडौं । वैदेशिक रोजगारीमा रहेका नेपालीहरूले पठाएको रेमिट्यान्स आज देशको अर्थतन्त्रको मेरुदण्ड बनेको छ । यही यथार्थलाई आत्मसात गर्दै सिटिजन्स बैंकले डिजिटल रेमिट्यान्स सेवामा उल्लेखनीय फड्को मारेको छ । बैंकले आफ्नै सिटिजन्स मोबाइल बैंकिङ एप मार्फत घरमै बसेर रेमिट्यान्स प्राप्त गर्न सकिने सुविधा दिएको छ । सिटिजन्स बैंकका अनुसार बैंकमा खाता भएका र मोबाइल बैंकिङ एप प्रयोगकर्ताले विदेशबाट आएको रेमिट्यान्स सिधै आफ्नो खातामा प्राप्त गर्न सक्छन् । मोबाइल एपमा लगइन गरी सेन्ड मनीमा गएर सिटिजन्स रेमिटमा क्लिक गरेपछि आवश्यक विवरण भरेर रेमिट्यान्स प्राप्त गर्न सकिने व्यवस्था गरिएको छ । सिटिजन्स बैंकका रेमिट्यान्स विभाग प्रमुख विष्णुमान श्रेष्ठका अनुसार ग्राहकका आफन्तले विदेशबाट पैसा पठाउँदा रकम स्वतः खातामा क्रेडिट हुन्छ । ‘२४सै घण्टा, सातै दिन अटो–क्रेडिट हुने सुविधा हामीले दिएका छौं,’ श्रेष्ठ भन्छन्, ‘ग्राहकलाई शाखा धाउनुपर्ने झन्झट छैन ।’ मोबाइल एप मात्र होइन, सिटिजन्स बैंकका २०० भन्दा बढी शाखा, ३ एक्सटेन्सन काउन्टर, २० हजारभन्दा बढी एजेन्ट, साथै खल्ती, ईसेवा, सिटी पे जस्ता डिजिटल वालेटबाट पनि रेमिट्यान्स रकम प्राप्त गर्न सकिने उनले बताए । यसले ग्राहकलाई आफ्नो अनुकूलताअनुसार पैसा लिन सक्ने स्वतन्त्रता दिएको उनको भनाइ छ । सिटिजन्स बैंकले गल्फ (खाडी) मुलुक, मलेसिया, यूएई, अमेरिका, युरोप, अस्ट्रेलिया, सिंगापुरलगायत ५० भन्दा बढी देशमा प्रत्यक्ष टाइअप गरेको छ । त्यसैगरी नेपालका प्रमुख रेमिट्यान्स कम्पनी आईएमई, प्रभु, सिटी एक्सप्रेसलगायतबाट पठाएको रकम पनि सिटिजन्स बैंकमार्फत प्राप्त गर्न सकिने उनले बताए । विदेशबाट पैसा पठाउँदा लाग्ने सेवा शुल्क देश र रकमको आकारअनुसार फरक पर्ने भए पनि सामान्यतया शून्यदेखि अधिकतम २२ दिरामसम्म मात्र लाग्ने बैंकको भनाइ छ । तर, सिटिजन्स बैंकबाट रेमिट्यान्स प्राप्त गर्दा भने कुनै शुल्क नलाग्ने उनले बताए । श्रेष्ठका अनुसार, सिटिजन्स बैंकले रेमिट्यान्सलाई पूर्ण रूपमा डिजिटल बनाएको छ । ‘ग्राहकलाई सजिलो र छिटो सेवा दिने हाम्रो उद्देश्य हो । त्यसकारण पठाउने ठाउँ पनि डिजिटलाइज र पाउने ठाउँमा डिजिटलाइज भएको हुनाले सिटिजन्स बैंक नै रोज्दा ग्राहकलाई सहज हुने भयो,’ उनले भने । विभाग प्रमुख श्रेष्ठका अन्सार देशको जिडीपीमा रेमिट्यान्सको २५ देखि ३० प्रतिशत योगदान छ । अर्थतन्त्रको लाइफलाइन नै रेमिटेन्स बनिरहेको उनले बताए । रेमिटेन्स धेरै आउँदा बैंकहरुमा डिपोजिट पनि बढेको र नेपालीहरुको खर्च गर्ने क्षमता पनि बढेको उनको भनाइ छ । ‘राम्रो विद्यालय पढ्न पाएका छन्, राम्रो लुगा लगायत र मिठोमसिनो खान पाएका छन् । पहिला खान लाउन गाह्रो हुने मान्छे अहिले अलिकति खर्च गरिरहेका छन् । खरको घर भएको मान्छेले टायलको घर बनाएको छ, छोराछोरीले राम्रो स्कुल पढ्न पाएको छ, राम्रो औषधि उपचार गर्न पाएको छ,’ उनले भने, ‘रेमिट्यान्सले नेपालमा मात्रै नभएर अन्य देशमा पनि राम्रो व्यवस्था गरेको छ ।’ उनका अनुसार नेपालमा वार्षिक ५ देखि ७ लाख काम गर्न योग्य मान्छे तयार हुन्छन् । उनीहरुलाई नेपालमा काम गर्ने अवसर नहुँदासम्म विदेश जानु पर्ने बाध्यता रहेको उनले बताए ।
१५औं महाधिवेशन फेरि बहसमा, शेखर-गगन प्रस्तावमा कांग्रेस बैठक केन्द्रित
काठमाडौं । नेपाली कांग्रेसको केन्द्रीय कार्यसम्पादन समितिको बैठक बिहीवार (आज) पनि बस्दैछ । बुधबारबाट सुरु भएको बैठक आज मध्यान्ह १ बजे पार्टीको केन्द्रीय कार्यालय, सानेपामा बस्ने गरी बोलाइएको पार्टी प्रवक्ता डा. प्रकाशशरण महतले जानकारी दिए । बुधवारको बैठकमा पार्टीको १५औं महाधिवेशनको कार्यतालिका संशोधन गर्नुपर्ने माग प्रमुख रूपमा उठेको थियो । बैठकमा सहभागी अधिकांश सदस्यहरूले हालको कार्यतालिका व्यवहारिक नभएको भन्दै यसलाई समयसापेक्ष र कार्यान्वयनयोग्य बनाइनुपर्ने धारणा राखेका थिए । आजको बैठकमा नेता डा. शेखर कोइरालाले कार्त्तिक अन्तिममा छलफल चलाएको संक्षिप्त महाधिवेशनमा छलफल हुने एक पदाधिकारीले बताए । कोइरालाले पार्टीमा निर्वाचन पहिले १५ औं महाधिवेशन नगर्ने र विशेष महाधिवेशन गर्ने दुई अडानका बीच मंसिर २ गते संक्षिप्त महाधिवेशनको छलफल चलाएका थिए । कांग्रेसका एक पदाधिकारीले भने, ‘डेढ महिना खेर फालेर हामी फेरि डा. कोइरालाकै प्रस्तावमा आएका छौं ।’ बुधवारको बैठकमा महामन्त्री गगनकुमार थापाले महाधिवेशन प्रक्रिया र क्रियाशील सदस्यतासम्बन्धी विषयमा विस्तृत ब्रिफिङ गरेका थिए । उनले वडा र क्षेत्रीय अधिवेशन सम्पन्न गरी सिधै केन्द्रीय महाधिवेशनमा जाने प्रस्ताव प्रस्तुत गरेका थिए । ती पदाधिकारीका अनुसार समय छँदै सुन्न नखोजिएको प्रस्तावमा समय घर्किएपछि छलफल सुरु भएको छ । महामन्त्री थापाको उक्त प्रस्तावमाथि नेताहरूले आ-आफ्ना धारणा राख्ने क्रम आजको बैठकमा पनि जारी रहने जनाइएको ती नेताले बताए । ती नेताका अनुसार बैठकबाट महाधिवेशनको संशोधित कार्यतालिकासम्बन्धी ठोस निर्णय आउने अपेक्षा गरिएको छ । पार्टीका प्रवक्ता डा. महतका अनुसार छलफल सुरु भएको छ । कार्य सम्पादन समितिले पक्कै राम्रो निर्णय गर्ने छ। नेपाली कांग्रेसको वडा, पालिका, प्रदेश निर्वाचन क्षेत्र, संघीय निर्वाचन क्षेत्र, जिल्ला, प्रदेश र केन्द्रीय महाधिवेशन गरेर ७ तहको अधिवेशन हुन्छ । संक्षिप्त महाधिवेशनको प्रस्तावमा वडा, संघीय र केन्द्रीय महाधिवेशन निर्वाचन पहिले गर्ने र बाँकी अधिवेशन निर्वाचन पछि गर्ने प्रस्ताव गरिएको छ ।
