रेल्वे मार्ग परिवर्तनका लागि पहल गर्छु: प्रधानमन्त्री
काठमाडौं, ७ माघ । प्रधानमन्त्री पुष्पकमल दाहालले जयनगर-जनकपुर रेल मार्गअन्तर्गत बिजुलपुरा–बर्दिवास खण्डको रेल्वे मार्ग ९रुट० परिवर्तनका लागि पहल गर्ने बताएका छन् । धनुषा क्षेत्र नं ७ बाट निर्वाचित सांसद शत्रुधन महतोको नेतृत्वमा सांसद ज्ञानबहादुर भुजेलसहितको सर्वदलीय प्रतिनिधिमण्डलसँग आज प्रधानमन्त्री निवासमा ज्ञापनपत्र बुझ्दै उनले सो कुरा बताएका हुन् । “ज्ञापनपत्र हेरें, यसभन्दाअघि पनि यस्तै ज्ञापनपत्र आएको छ, रेल्वे लाइन बिस्तार गर्दा साविकका बस्ती विस्थापित हुन्छ र मुआब्जा पनि बढी लाग्छ भने त्यसको वैकल्पिक उपाय खोज्नु पर्छ, त्यसका लागि भौतिक पूर्वाधार तथा यातायात मन्त्रालय र रेल विभागका प्रतिनिधिलाई बोलाएर कुरा गर्छु, आवश्यक परे भारतीय रेल्वे विभागसँग पनि समन्वय गरेर समस्या समाधानका लागि पहल हुनेछ”- उनले भने । जयनगर-जनकपुर-बिजुलपुरा-बर्दिवास खण्डको रेल्वे मार्ग विभागले पुस ७ गते प्रकाशित गरेको सूचनाअनुसारको स्थानबाट लैजाँदा मिथिला नगरपालिकाको वडा नं ८ र ९ को बेङ्गाटावरका ४०० घर परिवारलाई उठाउनुपर्ने सांसद महतोले बताए । “यो मार्गबाट रेल अगाडि बढाउँदा बस्ती बिस्थापित हुने र राज्यलाई मुआब्जाको भार बढी पर्छ, यसबाट २०० मिटर पश्चिम गए खाली जग्गा छ, यहाँको मुआब्जा पनि कम पर्छ, स्थानीयवासीलाई विस्थापित बनाउनु पर्दैन”- उनले भने । भौतिक पूर्वाधार तथा यातायात मन्त्रालयमा पनि यसअघि ज्ञापनपत्र बुझाएपछि मन्त्री रमेश लेखकले यो मार्गको निरीक्षण गर्नुभएको सांसद महतोले जानकारी दिए। रासस
सरकारले माग्यो मोबाइल बैंकिङको ठोस योजना, सहायक कम्पनी खोल्ने एनसेलको तयारी
काठमाडौं, ७ माघ । सरकारले प्रबिधी मैत्री बैंकिङ सेवा विस्तार गर्न भन्दै मोबाइल बैंकिङ सर्भिसको ठोस योजना मागेको छ । सूचना तथा सञ्चार मन्त्रालयको उच्च व्यवस्थापन समुह(एसएमटी)को माघ २ गते बसेको बैठकले नेपाल दुर सञ्चार प्राधिकरण र नेपाल टेलिकमसँग मोबाइल बैंकिङको ठोस योजना माग्ने निर्णय गरेको हो । सोही निर्णय अनुसार मन्त्रालयको संस्थान प्रशासन शाखाले माघ ३ गते नै प्राधिकरण र नेपाल टेलिकमलाई पत्र लेखेर ठोस योजना पेश गर्न निर्देशन दिएको छ । ‘एसएमटी बैठकको निर्णय अनुसार माघ ३ गते नै पत्र लेखेर दुर सञ्चार प्राधिकरण र नेपाल टेलिकमलाई माघ ९ गते आइतबार बस्ने बैठकमा उपस्थित हुन पत्र पठाएका छौं’, सूचना तथा सञ्चार मन्त्रालयको संस्थान प्रशासन शाखाका एक अधिकारीले विकासन्युजसँग भने । नेपाल दुर सञ्चार प्राधिकरणका प्रवक्ता मिन प्रसाद अर्यालका अनुसार दुर सञ्चार सेवा प्रदायक कम्पनीहरुले सहायक कम्पनी खडा गरेर मोबाइल बैंकिङ सेवा सञ्चालन गर्न सक्ने कानुनी व्यवस्था रहेको छ । एनसेलले सहायक कम्पनी खडा गरेर मोबाइल बैंकिङ सेवा सञ्चालनका लागि अनुमति मागेको पनि उनले जानकारी दिए । उता, नेपाल राष्ट्र बैंकका प्रवक्ता नारायण पौडेलले हाललाई लिमिटेड बैंकिङ सर्भिस मात्रै मोबाइल बैंकिङका रुपमा सञ्चालनमा रहेको बताए । उनले प्रबिधी, त्यसको सुरक्षा र उपभोक्ताको अवस्था हेरेर मोबाइल बैंकिङलाई विस्तार गर्न सकिने पनि बताए । ‘एजेण्ट नियुक्त गरिएको हुन्छ, उसलाई सानो तिनो रकम खर्च गर्ने अख्तियार दिएको हुन्छ । पैसा जम्मा गर्ने, भुक्तानी गर्ने लगायतका थोरै अधिकार प्रत्याभुत गरिएको छ’ प्रवक्ता पौडेलले भने । नेपाल टेलिकमका सहायक प्रवक्ता सोभन अधिकारीले हाल बैंकहरुले दुर सञ्चार कम्पनीसँग सट कोर्ड लिएर सिमित सर्भिस दिईरहेको बताए । ‘बैंकहरुले एसएमएस बैंकिङ सञ्चालन गरिरहेका छन तर त्यो एक्चुअल मोबाइल मनि सर्भिस भने होइन । अब त्यता पनि जानु आवश्यक छ’ टेलिकमका सहायक प्रवक्ता अधिकारीले भने । लक्ष्मी बैंकका प्रमुख कार्यकारी अधिकृत सुदेश खालीङले आफुहरुले नेपालमै पहिलो पटक मोबाइल बैंकिङ सुरु गरेको तर त्यसलाई अपेक्षाकृत गतिमा अघि लैजान भने नसकेको बताए ।‘नेपालमा मोबाइल बैंकिङको सुभारम्भ लक्ष्मी बैंकले नै गरेको हो तर पुर्वाधार र चेतनाको अभावमा त्यसलाई उच्चस्तरमा लैजान सकिएको छैन्’ खालिङले विकासन्युजसँग भने । हाल नेपालमा ब्यालेन्स इन्क्वायरी, चेक इस्यु र रिक्वेस्ट पठाउने सेवा मोबाइल बैंकिङ मार्फत उपलब्ध गराइएको पनि उनले जानकारी दिए । उनी भन्छन‘ मोबाइलमै खाता हुने व्यवस्था छ, मोबाइल खाताबाट पैसा पठाउन सकिन्छ । कसैले आफ्नो मोबाइलबाट पैसा पठाउन सक्छ र उसको आफन्तले प्राप्त गर्ने एउटा कोड नम्बर प्रयोग गरेर हाम्रा एटिएमहरुबाट रकम निकाल्न सक्छन ।’ खालिङले भने । यस्तो सर्भिस लक्ष्मी बैंकले एक बर्षअघि देखि सञ्चालनमा ल्याएको पनि उनले जानकारी दिए । मन्त्रालयले मोबाइल बैंकिङको मोडालिटी, सुरक्षा प्रबन्ध, पहुँच विस्तार लगायतका सवालमा ठोस योजना बनाउन दुर सञ्चार सेवाको नियामक निकाय प्राधिकरण र सरकारी सेवा प्रदायक कम्पनी टेलिकमलाई पत्राचार गरेको हो । सरकारी कम्पनी मार्फत भरपर्दाे र विश्वस्तरिय मोबाइल बैंकिङ सर्भिस विस्तार गर्ने सोँच मन्त्रालयले बनाएको छ ।
सिप्रदीको नयाँ डिलर अब पोखरामा, डिलरको रुपमा गण्डकी ट्रेड हाउस नियुक्त
काठमाडौं, ७ माघ । सिप्रदी ट्रेडिङ्ग प्रा.लि. ले पोखरामा आफ्नो नयाँ डिलर सञ्चालनमा ल्याएको छ । कम्पनीले पोखरामा टाटा पेसेन्जर भेहिकलहरुको लागि डिलरको रुपमा गण्डकी ट्रेड हाउसलाई नियुक्त गरेको छ । हालै काठमाडौंमा सम्पन्न गरिएको एक कार्यक्रममा दुवै पक्षले उक्त विषय अन्तर्गतको सम्झौता पत्रमा हस्ताक्षर गरेका थिए । कार्यक्रममा कम्पनीका जनरल म्यानेजर प्रवीण खतिवडाले नयाँ डिलरलाई आफ्नो कम्पनीको बृहत नेटवर्कमा स्वागत गरेका थिए । सोही क्रममा गण्डकी ट्रेड हाउसका प्रोपाइटर, पोखरा चेम्बर अफ कमर्स एण्ड इन्ड्रष्टिजका भूतपूर्व अध्यक्ष, नेपाल अटोमोबाइल डिलर्स एशोसियशनका भूतपूर्व उपाध्यक्ष तथा नेपाल रसिया चेम्बर अफ कमर्स एण्ड इन्ड्रष्टिज गण्डकीका वर्तमान अध्यक्ष, बिन्दु कुमार थापाले पनि सिप्रदी जस्तोे प्रतिष्ठित कम्पनीसँग आवद्ध भएर काम गर्दा आफूहरु खुशी एवं उत्साहित भएको कुरा बताए । सिप्रदी ट्रेडिङ्ग प्रा.लि. भारतको प्रख्यात गाडी निर्माता कम्पनी टाटा मोटर्स् लिमिटेडको नेपालका लागि एकमात्र आधिकारिक बिक्रेता हो । पेसेन्जर भेहिकल अन्तर्गत टाटा मोटर्स्को प्रमुख आकर्षणहरुमा बजारको प्रमुख मल्टी यूटीलिटी भेहिकल, सुमो गोल्ड, कम्प्याक्ट सेडान वर्गमा बजारमा उत्कृष्ट जेस्ट, नेपालको पहिलो मल्टी ड्राइभ ह्याच बोल्ट, लायोनेल मेस्सीले आफैं प्रचार गरिरहेका टाटाको स्टाइलिस उत्पादन टियागो र २५ के.एम.पि.एल. प्रदान गर्ने इन्डिका सिआर४ आदि पर्दछन् ।
नाडाको इनह्यान्सिङ ट्याक्स तालिम सम्पन्न, कूल ८१ सदस्य फर्महरुको सहभागिता
काठमाडौं, ७ माघ । नाडा अटोमोवाइल्स एशोसिएशन अफ नेपालको आयोजनामा तालिम सहितको वर्कसप अन इनह्यान्सिङ ट्याक्स स्किलतालिम सम्पन्न भएको छ । शुक्रबार काठमाडौको ग्राण्ड होटलमा नाडाका निमित्त अध्यक्ष शम्भुप्रसाद दाहालको सभापतित्वमा यो कार्यक्रम सम्पन्न भएको हो । उक्त तालिममा कूल ८१ सदस्य फर्महरुले आफनो सहभागिता जनाएका थिए । उक्त कार्यक्रममा भन्सार विभागका निर्देशक लावन्यकुमार ढकाल, आन्तरिक राजश्व विभागका निर्देशक राजकुमार खतिवडा तथा सि.ए साहिल अग्रवालले प्रशिक्षण दिएका थिए । कार्यक्रममा नाडाका निमित्त अध्यक्ष दाहालले सहभागिहरुलाई आजको हिसाब आजै राख्न व्यवशायीलाई आग्रह गरे । सरकारको प्रतिनिधित्व सहित यस किसिमको तालिम कार्यक्रम आयोजना गरेको पहिलो भएको नाडाले जनाएको छ । खाशगरी अटोमोवाइल खुद्रा व्यवसायीहरुले भोग्नु परिरहेका विविध समस्याहरुमा केन्द्रित रहेर यस किसिमको तालिमको आयोजना गरिएको नाडाका उपाध्यक्ष देबकाजी श्रेष्ठले बताए । उक्त कार्यक्रमबाट धेरै हदसम्म अटोमोवाइल व्यवसायीहरु लाभान्वित भएको नाडाले जनाएको छ । उक्त कार्यक्रमको व्यवस्थापन नाडाका महासचिव कृष्णप्रसाद दुलालले गरेका थिए भने सो कार्यक्रमको संयोजन नाडाका कोषाध्यक्ष तथा स्पेयर पार्टस समितिका सभापति सुनिल रिजालले गरेका थिए ।
आंशिक र पूर्ण गरी आठ लाख ७७ हजार ६७१ घर क्षतिग्रस्त
काठमाडौं, ७ माघ । केन्द्रीय तथ्याङ्क विभागले आगामी एक महिनाभित्र सम्पूर्ण भूकम्प प्रभावित क्षेत्रको लगत सार्वजनिक गर्ने बताएको छ । केन्द्रका उपमहानिर्देशक रुद्र सुवालले नेपालको इतिहासमा विभागले पहिलोपल्ट भौगोलिक अवस्था प्रणाली (जिपिएस) बाट तथ्याङ्क सङ्कलन गरी सार्वजनिक गर्न लागेको जानकारी दिए । यसअघि केन्द्रले अतिप्रभावित १४ जिल्लाको लगत सङ्कलन गरिसकेको छ । प्राप्त लगतलाई केन्द्रले राष्ट्रिय पुनःनिर्माण प्राधिकरण र राष्ट्रिय सूचना प्रविधि केन्द्रमा हस्तान्तरण (डाउनलोट) गराइसकेको छ । तथ्याङ्क सङ्कलनका लागि केन्द्रले २५०० प्राविधिक (इन्जिनियर) खटाएको थियो । जस्मा १६०० ट्याबलेटबाट क्षतिग्रस्त (आंशिक तथा पूर्ण) आठ लाख ७७ हजार ६७१ घरका एक करोड फोटो सङ्कलन गरेको छ । उपत्यकाका तीन जिल्ला काठमाडौंमा ४० हजार ९१९ पूर्ण र १० हजार २०९ आंशिक घर क्षतिग्रस्त भएको छ । सरकारले पूर्ण क्षतिग्रस्त घरलाई तीन लाख रुपैयाँ र आंशिक क्षतिग्रस्त घरलाई एक लाख रुपैयाँ आर्थिक सहयोग उपलब्ध गराउने निर्णय गरेको छ । ललितपुरमा २२ हजार ५५५ पूर्ण, आंशिक सात हजार ७९० र भक्तपुरमा २३ हजार ५३२ पूर्ण र आंशिक ६ हजार ६६५ घर क्षति भएका छन् । अतिप्रभावित ११ जिल्ला क्रमशः गोरखा, धादिङ, नुवाकोट, रसुवा, सिन्धुपाल्चोक, काभ्रेपलाञ्चोक, मकवानपुर, सिन्धुली, ओखलढुङ्गा, रामेछाप, र दोलखा जिल्लाबाट पूर्ण विवरण आइसकेको भए पनि अन्य प्रभावित १७ जिल्लाबाट दुई लाख घर पूर्ण र आंशिक) क्षति भएता पनि हालसम्म ११ हजार घरको मात्र विवरण सङ्कलन भएको छ । रासस
लन्डनका लर्ड मेयर शनिबार नेपाल आउँदै, चारदिने औपचारिक भ्रमण गर्ने तयारी
काठमाडौं, ७ माघ । नेपाल र बेलायतबीचको पारस्परिक सम्बन्धलाई नयाँ उचाइमा पुर्याउन लर्ड मेयर अफ द सिटी अफ लन्डन डा एन्ड्रयु पार्म नेपालको चारदिने औपचारिक भ्रमणका लागि शनिबार अपराह्न यहाँ आउने भएका छन् । बेलायतमा मन्त्रिस्तरको पद सम्हालेका उनले उक्त मुलुकको अन्तर्राष्ट्रिय सम्बन्ध र आर्थिक कूटनीति सञ्चालनको प्रमुख व्यक्तित्व मानिन्छन् । गैरराजनीतिकस्तरका बेलायतका उच्च कूटनीतिक व्यक्तित्व उनलाई विश्वका विकसित मुलुकसमेत आफ्नो देशको भ्रमण गराउन लालायित हुने गरेका छन् । नेपाल र बेलायतबीच कूटनीतिक सम्बन्ध स्थापना भएको दुई शताब्दी पूरा भएका सन्दर्भमा लर्ड मेयरको भ्रमणले पारस्परिक आत्मीयता अभिवृद्धिमा थप योगदान पुग्ने परराष्ट्र मन्त्रालयले जनाएको छ । राष्ट्रपति विद्यादेवी भण्डारी र प्रधानमन्त्री पुष्पकमल दाहाल ‘प्रचण्ड’सँग लर्ड मेयरले शिष्टाचार भेट गर्ने कार्यक्रम रहेको उक्त मन्त्रालयले जनाएको छ । यहाँ रहँदा उपप्रधानमन्त्री कृष्णबहादुर महरा, परराष्ट्रमन्त्री प्रकाशशरण महत, ऊर्जामन्त्री जनार्दन शर्मा र उद्योगमन्त्री नवीन्द्रराज जोशीसँग पनि उनले बेग्लाबेग्लै भेटवार्ता गर्नेछन् । नेपाल लगानी बोर्डका प्रमुख कार्यकारी अधिकृत र नेपाल राष्ट्र बैंकका गभर्नरसँग पनि उनको भेट गर्ने कार्यक्रम छ । परराष्ट्र मन्त्रालयका अनुसार बेलायत सरकारको सहयोगमा सञ्चालित विकासका केही परियोजना तथा भूकम्पपछिको पुनःनिर्माणका कार्यक्रमको उनले अवलोकन गर्नेछन् । बेलायतको ‘सम्माननीय’ पदवीबाट विभूषित उनी आठ सय ६९ औँ लर्ड मेयर अफ द सिटी अफ लन्डन छन् । रासस
नयाँ पर्यटकीय गन्तव्य बन्दै ‘जटायु रेस्टुरेन्ट’, लोपोन्मुख अवस्थामा पुगेको गिद्ध बचाउन सक्रिय
काठमाडौं, ७ माघ । लोपोन्मुख अवस्थामा पुगेका गिद्धलाई विषादीरहित आहार उपलब्ध गराई संरक्षण गर्ने उद्देश्यले स्थापना गरिएका ‘जटायु रेस्टुरेन्ट’ पछिल्लो समयमा पर्यटकीय दृष्टिले समेत आकर्षक बन्दै गएका छन् । लोपोन्मुख अवस्थामा पुगेको गिद्ध बचाउने अभियानअन्तर्गत नेपालमा सर्वप्रथम सन् २००६ मा नवलपरासीको पिठौलीमा विश्वकै पहिलो समुदायद्वारा सञ्चालन गरिएको ‘जटायु रेस्टुरेन्ट’ को स्थापना भएको थियोे । सामुदायिक वन उपभोक्ताको सक्रियतामा यसरी खुलेका ‘जटायु रेस्टुरेन्ट’ जैविक विविधता संरक्षणका लागि उपयोगी मात्र नभई पछिल्लो समयमा पर्यटकीय गन्तव्य बन्दै आयआर्जनको स्रोतसमेत बन्दै गएका यस क्षेत्रका जानकार बताउँछन् । जटायु रेस्टुरेन्टको स्थापनापछि गिद्धको सङ्ख्या तीन गुना बढेकोे जानकारी दिँदै पिठौली जटायु रेस्टुरेन्ट व्यवस्थापन समितिका संयोजक डिबी चौधरी पछिल्लो समयमा गिद्धका क्रियाकलाप हेर्न र अनुसन्धान गर्नसमेत पर्यटक आउन थालेको बताउछन् । समितिले जटायु रेस्टुरेन्ट सञ्चालनका साथै दिगो जीविकोपार्जनका लागि पर्या-पर्यटनसँग सम्बन्धित विभिन्न तालिम तथा कार्यक्रमसमेत सञ्चालन गरेको छ । नवलपरासी ‘जटायु रेस्टुरेन्ट’को सफलतापछि रुपन्देहीको गैडहवा ताल, दाङको लालमटिया र बिजनौरी, कैलालीको खुटिया, कास्कीको घाँचोक र सुनसरीको रामधुनीमा पनि सोही प्रकारका रेस्टुरेन्ट स्थापना गरिएका छन् । यसरी खोलिएका रेस्टुरेन्टमा गौरक्षा केन्द्र हुन्छन् जहाँ किसानबाट वृद्ध, अशक्त, र बेकामी गाईवस्तु सङ्कलन गरी पालनपोषण गरिन्छ । रेस्टुरेन्टमा राखिएका गाई गोरुको प्राकृतिक मृत्युपश्चात् गिद्धको आहारका लागि निश्चित स्थानमा राखिन्छ जहाँ गिद्ध आई खान्छन् । त्यहाँ गिद्धको आनीबानी नजिकबाट लुकेर हेर्ने पर्यटक अवलोकन घर पनि हुन्छ । नेपाल पर्यटन बोर्डका कार्यकारी सदस्य कृष्ण अर्यालले यस्ता रेस्टुरेन्टलाई गिद्धको संरक्षणका साथसाथै पर्यापर्यटनसँग जोडेर आर्थिक उपार्जनको बाटो बनाउन सकिनेमा जोड दिए । पर्यटकलाई आकर्षित गर्ने योजनासहित जटायु रेस्टुरेन्टको बजारीकरण गरी आन्तरिक र बाह्य दुवै पर्यटकलाई भित्र्याउन सकिने कार्यकारी सदस्य अर्यालको भनाइ छ । घरपालुवा पशु उपचारमा प्रयोग गरिने पीडानाशक औषधि डाइक्लोफेनेक सेवन गरेका पशुको सिनो खाएकै कारण पछिल्ला दशकमा नेपाललगायत दक्षिण एसियामै गिद्ध ९० प्रतिशतले घटेको अध्ययन प्रतिवेदनले पुष्टि गरेको छ । यसबाहेक विष खुवाएर मारेका जनावरको सिनो खाएर र गुँड बनाउने अग्ला सिमलका रुखको विनाशले पनि गिद्ध लोप हुँदै गएको विज्ञहरुले बताएका छन् । नेपालमा पनि सन् २००२ देखि २०१० सम्मको राजमार्ग ट्रान्सेक्ट सर्भेबाट डङ्गर गिद्ध ९१ प्रतिशतले घटेको पाइएको नेपाल पक्षी संरक्षण सङ्घका प्रमुख कार्यकारी अधिकृत डा नरेन्द्रमान बाबु प्रधानले बताए । यस्ता रेस्टुरेन्टमार्फत स्थानीय समुदायको जीविकोपार्जन, सामुदायिक विकास, स्थानीय संस्कृतिको संरक्षण तथा प्रवद्र्धनका साथै पर्या-पर्यटनको विकास गर्न सकिने प्रमुख कार्यकारी अधिकृत, डा प्रधानको भनाइ छ । विश्वमा २३ प्रजातिका गिद्ध पाइन्छन् । विश्व प्रकृति संरक्षण सङ्घका अनुसार नेपालमा पाइने नौ प्रजातिका गिद्धमध्ये डङ्गर, सानो खैरो र लामो ठुँडे गिद्ध अति सङ्कटापन्न अवस्थामा छन् । प्रकृतिको कुचिकार भनिने गिद्धले मरेका जनावरको सिनो खाएर पृथ्वीलाई सफा राख्नुका साथै दुर्गन्धले फैलने रोगबाट मानिसलाई समेत जोगाउँछन् । सङ्घले अन्य साझेदार संस्थाको समन्वयमा जटायु रेस्टुरेन्टलाई दिगो व्यवस्थापन गरी गिद्धलगायत अरु जैविक विविधताको संरक्षण गर्न र पर्यटन विकासका लागि स्थानीय समुुदायमा विभिन्न सीप विकासका तालिम पनि सञ्चालन गर्दै आएको सङ्घका गिद्ध संरक्षण कार्यक्रम अधिकृत कृष्णप्रसाद भुसालले जानकारी दिए । सरकारले डाइक्लोफेनेक औषधिलाई २०६३ जेठ २३ देखि पशु उपचारका लागि उत्पादन, प्रयोग र बिक्री वितरणमा प्रतिबन्ध लगाएको छ । औषधि ऐन, २०३५ बमोजिम यसको उल्लङ्घन गरेको पाइएमा तीन वर्ष कैद वा पाँच हजार रुपैयाँ जरिवाना वा दुवै सजाय हुनसक्ने कानुनी प्रावधान छ । यसबाहेक राष्ट्रिय निकुञ्ज तथा वन्यजन्तु संरक्षण विभागले गिद्ध संरक्षणका लागि चितवन राष्ट्रिय निकुञ्जको कसरामा गिद्ध संरक्षण तथा प्रजनन केन्द्रको स्थापना गरेको छ । त्यस्तै ‘गिद्ध संरक्षण कार्ययोजना सन् २००९–२०१३ को सफल कार्यान्वयनपश्चात् नयाँ पञ्चवर्षीय कार्ययोजना सन् २०१५–२०१९ लागू गरेको विभागका महानिर्देशक मनबहादुर खड्काले जानकारी दिएका छन् । यस्ता रेस्टुरेन्टको स्थापनासँगै स्थानीय जनतामा आएको चेतनाले एकातिर पारिस्थितिकीय प्रणालीको एक प्रमुख हिस्सा गिद्धको संरक्षणमा योगदान पुगेको छ भने अर्कोतिर नयाँ पर्यटकीय आकर्षण केन्द्र बन्नाले स्थानीय जनताका लागि आयआर्जनको स्रोतसमेत बनेको छ । रासस
केन्द्रीय प्रसारण लाइनमा छ मेगावाट विद्युत् थप
पाँचथर, ७ माघ । कावेली करिडोर १३२ केभी प्रसारण लाइनअन्तर्गत फिदिम-४ स्थित थापाटारको स्टेसनमा हेवाखोला जलविद्युत् परियोजना ‘ए’ को उत्पादित ६ मेगावाट विद्युत् केन्द्रीय प्रसारण लाइनमा जोडिएको छ । केन्द्रीय प्रसारण लाइनमा ६ मेगावाट विद्युत् थपिएको कावेली करिडोर प्रसारण लाइनका आयोजना प्रमुख दीपेन्द्रराज द्विवेदीले जानकारी दिए । यसअघि पाँचथर पावर कम्पनीले निर्माण गरेको हेवाखोला जलविद्युत् परियोजना ‘ए’ को उत्पादित १० मेगावाट विद्युत् त्यसै खेर गइरहेको थियो । दश मेगावाटमध्ये ६ मेगावाट विद्युत् केन्द्रीय प्रसारण लाइनमा थपिएको हो । झापाको दमकदेखि पाँचथर र ताप्लेजुङको सिमाना कावेलीको दुविचौरसम्म ९० किलोमिटर प्रसारण लाइन रहेको छ । त्यसअन्तर्गत चारवटा सवस्टेसन रहेका छन् । फिदिमको थापाटारमा जोडिएको सवस्टेसनसँगै अहिलेसम्म तीनवटा स्टेसनको काम सकिएर केन्द्रीय प्रसारण लाइनमा जोडिसकिएको द्विवेदीले बताए । उक्त प्रसारण लाइनमा २५८ वटा टावर निर्माण हुनेछन् । दमकदेखि गोदकसम्म ९५ वटा टावर र गोदकदेखि अमरपुरसम्म ९५ वटा टावर निर्माण भइसकेको छ । २०६७ जेठ १४ गतेबाट मात्रै आयोजनाको काम अघि बढेको हो । विश्व बैंक, नेपाल सरकार र नेपाल विद्युत् प्राधिकरणको तीन अर्ब ५९ करोड रुपैयाँको लागतमा सो आयोजनाको काम अगाडी बढाइएको हो । रासस
