हेटौंडा कपडा उद्योग पुनः सञ्चालन गर्ने
काठमाडौं, ६ असोज । हेटौंडा कपडा उद्योग पुनः संचालन गर्ने सम्वन्धमा वस्तुस्थितिको अध्ययन गरी १५ दिनभित्र सुझावसहित प्रतिवेदन पेश गर्न अर्थशास्त्री एवं राष्ट्रिय योजना आयोगका पूर्वसदस्य डा. पुष्कर बज्राचार्यको संयोजकत्वमा आठ सदस्यीय समिति गठन गरिएको छ । समितिले उद्योग पुनः सञ्चालनका लागि उपयुक्त मोडालिटी, प्रक्रिया, मेशिन र पूर्वाधारको अवस्था, उद्योगमा हुन सक्ने लगानीका विकल्पहरु र उद्योगबाट हुने उत्पादनको लागि बजारको सम्भाव्यता अध्ययन गरी सरकारलाई प्रतिवेदन बुझाउने छ । समितिमा अर्थ मन्त्रालयका सहसचिव हरिशरण पुडासैनी, उद्योग मन्त्रालयका सहसचिव यमलाल भुषाल, नेपाली सेनाको प्रतिनिधि, नेपाल प्रहरीको प्रतिनिधि, सशस्त्र प्रहरीको प्रतिनिधि एवं निजी क्षेत्रबाट रामएकबल यादव, अजय मुडबरी र विना गौतम श्रेष्ठ सदस्य रहेका छन् । सार्वजनिक निजी साझेदारी अवधारणाअनुसार हालै मात्रै रुग्ण बनेको नेपाल औषधि लिमिटेडलाई पुनः सञ्चालनको निर्णय गरेको सरकारले आफ्नो पूर्ण स्वामित्वमा रहेको हेटौंडा कपडा उद्योग पनि पुनः सञ्चालनको तयारी थालेको हो । यो उद्योग २०५७ साल देखि बन्द छ । यस उद्योगको दैनिक ३६ हजार मिटर कपडा उत्पादन गर्न सक्ने क्षमता छ ।
सुपथ मूल्य पसलमा नै कम तौलको सामान
काठमाडौं, ६ असोज । चाडबाडलाई लक्षित गरी सरकारले सञ्चालन गरेको सुपथ मूल्य पसलमा नै कम तौलको सामान भेटिएको छ । आपूर्ति व्यवस्थापन तथा उपभोक्ता हित संरक्षण विभागले गरेको अनुगमनका क्रममा साल्ट ट्रेडिङले जावलाखेलमा राखेको पसलमा दुई किलोको चिनीको प्याकेटमा २० ग्राम कम भेटेपछि विभागले सामान तौलेर मात्र बिक्री वितरण गर्न निर्देशन दिएको छ । दुई हप्तादेखि रोकिएको बजार अनुगमन मङ्गलबारदेखि विभागले पुनःतीव्र पारेको छ । गत शनिबारदेखि सरकारले सुपथ मूल्य पसल सञ्चालन गरेको छ । विभागले आज १७ वटा पसलमा अनुगमन गरेको छ । अनुगमनका क्रममा दर्ता नगरी सञ्चालन गरेका, सरकारले तोकेअनुसारको मूल्यसूची नराखेको र सरसफाइ नगरेको भन्दै श्री पोखरा फार्मेसी गोँगङ्बु, आमिन फार्मेसी गोँगङ्बु, कामना फार्मेसी गोंगङ्बु, युनिभर्सल फार्मेसी टोखा, श्री जय माँ लक्ष्मी मेडिकल हल टोखा, गोसाइँकुण्ड स्वास्थ्य सेवा केन्द्र गोंगङ्बु, श्री पाटन ओम पोलिकिल्निक लगनखेल, फेमेली माइल डेन्टल केयर सेन्टल लगनखेललाई मूल्यसूची राख्न, दर्ता गरी सञ्चालन गर्न निर्देशन दिइएको विभागका निर्देशक लक्ष्मण श्रेष्ठले जानकारी दिए । विभिन्न स्थानका खाद्य पसलमा गरिएको अनुगमनमा नापतौल मेसिन नभएको, मिति नाघेको खाद्य सामग्री भेटिएको, लेबल नभएको र सरसफाइ नभएको हुँदा श्री पसलमा सेजवाल डिपार्टमेन्टल स्टोर जावलाखेल, भाटभटेनी सुपर स्टोर बौद्ध, मेघा मार्ट खुमल्टार, श्री राम स्टोर खुमल्टारलाई मिति सकिएको सामग्री बिक्री वितरण रोकी नापतौल मेसिन राख्न निर्देशन दिइएको छ । बाजेको सेकुवा प्राली बत्तिसपुतली, बाजेको सेकुवा प्राली सिनामङ्गल, श्री बाजेको सेकुवा, कमलपोखरीलाई सरसफाइ गरी पसल सञ्चालन गर्न निर्देशन दिइएको छ । रासस
पुल र बस्ती संरक्षणमा चार करोड २५ लाख रुपैयाँ खर्च लाग्ने
पोखरा, ६ असोज । कास्की जिल्लाको पोखरा उपमहानगरपालिका–१७ स्थित दोविल्लामा केही दिनयता लगातार परेको पानीका कारण फुस्रो खोलाको कटानबाट प्रभावित बस्ती र पुल संरक्षण गर्न चार करोड २५ लाख रुपैयाँ लाग्ने अनुमान गरिएको छ । जिल्ला दैवी प्रकोप उद्धार समिति कास्कीले जिल्लामा बाढीका कारण भएको क्षतिबारे सरोकारवाला निकायसँग जिल्ला प्रशासन कार्यालयमा गरेको छलफलमा सडक डिभिजन कार्यालय पोखराका इन्जिनियर नवराज बास्तोलाले उक्त जानकारी दिए । उनले पुल र बस्तीमा परेको क्षति सम्बन्धमा स्थलगत अवलोकन गरेको जानकारी दिँदै पुलको पूर्व किनारातर्फ २५० मिटर लम्बाइको पक्की पर्खाल र तारजाली लगाउनु आवश्यक भएको हुँदा सडक डिभिजन र पुल महाशाखामा बजेट निकासका लागि पत्राचार गरिसकिएको बताए । फुस्रेखोलाको लगातारको कटानले सो क्षेत्रका ४२ घरपरिवारमध्ये १५ घर उच्च जोखिममा परेको र पक्की पुलबाट मालबाहक साधन आवागमनमा समेत रोक लगाइएको छ भने सो क्षेत्रमा रहेका विभिन्न संस्थाका भौतिक संरचना जोखिममा परेका छन् । बाढीका कारण कास्की जिल्लाका कृषितर्फ लगभग दुई करोड छ लाख ७४ हजार रुपैयाँ क्षति भएको जिल्ला कृषि विकास कार्यालय कास्कीका प्रमुख रमेशप्रसाद कोइरालाले सो अवसरमा जानकारी दिए । उनका अनुसार जिल्लामा तरकारी, धान, माछा एवम् पशुपालनतर्फ धेरै क्षति पुगेको छ । प्रमुख जिल्ला अधिकारी एवम् जिल्ला दैवी प्रकोप उद्धार समितिका संयोजक हरिप्रसाद मैनालीले विगतका तुलनामा जिल्लामा मानवीय क्षतिमा कमी आए पनि भौतिक क्षति भने धेरै भएको बताए । उनले बाढीले भत्केका बाटो तथा ढल मर्मतका लागि चाडपर्व अगाडि नै नगरपालिकाले कार्य अघि बढाउनुपर्ने धारणा राखे । कार्यक्रममा जिल्लास्थित सिँचाइ, खानेपानी, रेडक्रस, पशुसेवा, जलउत्पन्न, भूसंरक्षणलगायत विभिन्न कार्यालय एवम् जिल्लाका राजनीतिक पार्टी प्रतिनिधिको सहभागिता रहेको थियो । रासस
साइन रेसुङ्गा डेभलपमेन्ट बैंकले २७ प्रतिशत बोनस सेयर दिने
काठमाडौं, ६ असोज । साइन रेसुङ्गा डेभलपमेन्ट बैंकले सेयरधनीलाई २७ प्रतिशत बोनस सेयर दिने निर्णय गरेको छ । उक्त निर्णय बिहीबार बसेको बैंक सञ्चालक समितिको बैठकले गरेको हो । बैठकको निर्णयलाई नेपाल राष्ट्र बैंकले स्वीकृति तथा बैंकको आगामी साधारणसभाले पारित गरेपछि लगानीकर्ताले सो मात्रामा लाभांश पाउने छन् । हाल बैंकको चुक्ता पूँजी ८६ करोड ८४ लाख रुपैयाँ रहेको छ भने बोनस सेयर पश्चात बैंकको पूँजी एक अर्ब १० करोड रुपैयाँ पुग्ने छ । बिहीबार बैंकको प्रतिकित्ता सेयर ६३३ रुपैयाँमा कारोबार भइरहेको छ ।
कोकाकोलाको ‘मन खोलौं कोकसँग’ अभियान घोषणा, १५ नयाँ लेबलहरु सार्वजनिक
काठमाडौं, ६ असोज । कोकाकोलाले दशैँतिहारलाई लक्षित गर्दै ‘मन खोलौं कोकसँग’ भन्ने नयाँ अभियान घोषणा गरेको छ । कोकाकोलाले जिवनका १५ वटा महत्वपूर्ण सम्बन्धहरुलाई दर्शाउने गरि १५ वटा संदेश सहितका नयाँ लेबल प्याक सार्वजनिक गरेको छ । उत्सवको अवधिभर परिवारका सदस्यहरु अथवा जो कोहीका लागि उपभोक्ताहरुले आफूले चाहेको प्याक खरीद गरेर हरेकका लागि संदेश सहित उपहार प्रदान गर्न सक्ने कम्पनीले जनाएको छ । कोकाकोला नेपालका निर्देशक अलोक कोहलीले भावना साट्दै भने, ‘दशैं आर्शिवाद थाप्ने तथा एक आपसमा जोडिने महोत्सव हो । कोकाकोला आफ्ना उपभोक्ताहरुलाई साथीहरु तथा परिवारसँग जोडिन सहयोग गर्न चाहन्छ । नेपाली इतिहासमा पहिलो पटक कोकाकोलाले, हाम्रो परम्परागत कोक लेबलहरु यो वर्ष हटाएको छ र हरेक मानिसको जीवनलाई प्रभावित पार्ने विशेष सम्बन्धहरु जस्तै दाइ, बुवा लगायतलाई सम्मानले प्रतिस्थापन गरेको छ । हामी आशा गर्दछौं की हाम्रा उपभोक्ताहरुले विशेष संदेश भएका कोकाकोला लिनेछन र त्यो आफ्ना प्रियजनहरुलाई प्रदान गर्नेछन् ।’ कोइरालालाई माइती नेपालका केही युवायुवतीले परिवार, मेरो खुशीको संसार संदेश भएको बोतल प्रदान गरेका थिए । कार्यक्रममा अभिनेत्री अन्ना शर्माले आफ्नी आमा रचना गुरुङ्ग शर्मालाई आमा धेरे धेरै माया संदेश सहितको उपहार प्याक प्रदान गरिन् । बैंकर रविना देशराज श्रेष्ठले आफ्ना छोरा आयुशमान देशराजलाई छोरा तिमी हाम्रो संसार सन्देश सहितको उपहार प्रदान गरिन् । राष्ट्रिय फुटबल खेलाडी नवयुग श्रेष्ठले आफ्ना प्रशिक्षक राजु शाक्यलाई तपाईँ सँधै आदरणीय संदेश सहितको प्याक प्रदान गरे । गायिक शितल मोक्तानले आफ्नी बहिनी सुवानी मोक्तानलाई ठट्टामा लुकेको माया संदेश सहितको बोतल हाँसो र रमाइलोको बीच प्रदान गरिन् । गायक रामकृष्ण ढकालले आफ्नी श्रीमती नीलम साह ढकाललाई तिमी र म सँधै सँग–सँगै भन्दै बोतल प्रदान गरेका थिए ।बोटलर्स नेपाल लिमिटेडका निर्देशक पुनित भार्शनेले १५ वटा फरक बोतल ल्याएर परिवार र साथीलाई जोड्ने माध्यम बन्न खोजेको बताए ।
बिजी मलमा शुरु भयो ‘फ्यान्टास्टिक दशैं तिहार, हरेक दिन उपहार’ योजना
काठमाडौं, ६ असोज । गोगंबुस्थित नयाँ बसपार्कमा सञ्चालनमा आएको बिजी मलले दशैं तिहारलाई लक्षित गर्दै ‘फ्यान्टास्टिक दशैं तिहार, हरेक दिन उपहार’ नामक योजना शुरु गरेको छ । यसै वर्षदेखि सञ्चालनमा आएको बिजी मलले असोज ५ गतेदेखि उक्त उपहार योजना शुरु गरेको छ । मलले ग्राहकलाई सुपथ मूल्यमा उपभोग्य वस्तु उपलब्ध गराउँदै १ हजार रुपैंयाभन्दा बढीको सामान खरिदमा धेरै भन्दा धेरै उपहार बितरण गर्ने लक्ष्य लिएको छ । मलका निर्देशक राजु गिरीले चाड पर्वका बेला अधिकांशले सपिङग गर्ने भएकाले उनीहरुलाई कुनै न कुनै उपहार सहित सामान उपलब्ध गराउनका लागि चाडपर्वको उपहार योजना सुरु गरिएको बताए । उपहार योजनामा सहभागी हुन ग्राहकले कम्तीमा एक हजार रुपैंयाको सामान खरिद गर्नु पर्ने उपहार कार्यक्रमका संयोजक हिरमणि तिमल्सिनाले बताए । ‘सामान खरिद गरेपछि ग्राहकले पाउने उपहार कुपनका आधारमा दैनिक, साप्ताहिक तथा बम्पर उपहार प्रदान गर्ने व्यवस्था गरेका छौं ।’ कार्यक्रम संयोजक तिमल्सिनाले बताए । उपहार कार्यक्रम अन्तर्गत ग्राहले दैनिक रुपमा स्मार्ट फोन, १ हजार रुपैंयाको नगद छुट, खाजा तथा अन्य उपहारहरु प्राप्त गर्न सक्ने छन् । त्यसै गरी साप्ताहिक रुपमा ३२ ईञ्चको सिजि टेलिभिजन, सिजि वासिंग मेशिन, सिजि ग्यास तथा इलेक्ट्रििक हिटर, सिजि इलेक्ट्रिक ओभन र सिजि साउण्ड बार प्राप्त गर्न सक्नेछन् । उपहार योजनाको बम्पर उपहारका रुपमा ग्राहकरु मध्येबाट एक एक जनाले टिभिएस अपाची आरटिआर मोटरसाइकल, टिभिएस जुपिटर स्कुटर तथा एक जोडीले ४ रात ५ दिनको बैंकक ट्रिपमा जाने अवसर पाउने छन् । उपहार योजना कार्तिक २८ गतेसम्म सञ्चालन हुनेछ । मलमा विभिन्न घरायसी, विद्युतीय सामग्री, मोबाइल शोरुम, लत्ता कपडा, श्रृंगार तथा सौन्दर्य सामग्री, रेष्टुरेण्ट, सिनेमा हल, बैंकको कार्यालय, एटीएम लाउञ्ज लगायत ५ दर्जन बढी पसलहरु सञ्चालनमा रहेका छन् ।
यतीको ब्राण्ड एम्बेसडरमा महर्जन नियुक्त
काठमाडौं, ६ असोज । यती डेभलपमेण्ट बैंकले २ बर्षको लागी ब्राण्ड एम्बेसडरमा महेश्वर महर्जनलाई नियुक्त गरेको छ । खेलाडीको उच्च कदर गर्दै खेलाडीको मनोबल बृद्धि गर्ने उद्देश्यले बैंकले महर्जनलाई ब्राण्ड एम्बेसडरको रुपमा नियुक्ती गरेको हो । महर्जनले शरीरिक सुगठनको ५० औं एसियन च्याम्पियनसिपमा स्वर्णपदक प्राप्त गरेका थिए । भुटानमा भएको प्रतियोगिता अन्तर्गत ७५ के.जी. तौल समुहमा महर्जनले १० देशका प्रतिस्पर्धीहरुलाई उछिन्दै प्रथम स्थान हांसिल गरेका थिए ।
सिटिजन्स बैंक र ओभरसिज रेमिटबीच भुक्तानी सम्झौता
काडमाडौं, सिटिजन्स बैंक इन्टरनेसनल लिमिटेड र ओभरसिज रेमिट प्रा.लिबीच विप्रेषण भुक्तानी गर्नका लागि सम्झौता भएको छ । उक्त सम्झौतापत्रमा बैंकका सहायक प्रमुख कार्यकारी अधिकृत रामधन श्रेष्ठ र ओभरसिज रेमिटका तर्फवाट जापानी प्रतिनिधि निर्देशकद्वय भुषण घिमिरे र रोशन के सीले हस्ताक्षर गरेका छन् । यस सम्झौता अनुरुप जापानमा रहेका नेपालीले स्वदेशमा रहेका आफन्तहरूलाई ओभरसिज रेमिट प्रालि मार्फत पठाएको रकम यस बैंकका सम्पूर्ण शाखाहरु तथा देशैभरि फैलिएर रहेका सहायक प्रतिनिधिहरुबाट छिटो, छरितो तथा भरपर्दो रुपमा भुक्तानी पाउन सक्ने छन् । यस अघि पनि बैंकले स्वदेशका विभिन्न विपे्रषण कम्पनीहरुसंग सहकार्य गरि आफ्नो सम्पूर्ण शाखाहरुबाट वेस्र्टन यूनियन, मनिग्राम, आइ.एम.ई, प्रभु मनि, हिमाल रेमिट, सिटि एक्सप्रेस, रिलायबल रेमिट, जे.एम.ई, नेपाल रेमिट, इजिलिङ्क, बेष्ट रेमिट, पृथ्वि एक्सप्रेस, सम्सारा, सेवा एक्सप्रेस, सिजि मनि, आइपे रिलायबल र बुम रेमिट बाट आएको विपे्रषण रकमको भुक्तानी गर्दै आइरहेको छ । यसको साथ साथै बंैकले निकट भविष्यमा पनि अन्य विभिन्न मुलुकमा रहेको विभिन्न विप्रेषण कम्पनीहरु संग सम्झौता गरि विप्रे्रषण सेवालाई विस्तार गर्दै लैजाने योजना राखेको छ ।
