३ अर्ब ३४ करोड बढी राजस्व सङ्कलन
पोखरा, ५ माघ । आन्तरिक राजस्व कार्यालय पोखराले चालु आर्थिक वर्षको साउनदेखि पुस मसान्तसम्म तीन अर्ब ३४ करोड ५२ लाख रुपैयाँ राजस्व सङ्कलन गरेको छ । सो अवधिमा कार्यालयले दुई अर्ब ६५ करोड १९ लाख रुपैयाँ राजस्व सङ्कलन गर्ने लक्ष लिएको थियो । कार्यालयले अन्तःशुल्कतर्फ एक अर्ब ६० करोड ५६ लाख रुपैयाँ , आयकरतर्फ ९९ करोड ७५ लाख रुपैयाँ, मूल्यअभिवृद्धि करतर्फ ४९ करोड ४३ लाख रुपैयाँ, घर भाडा करतर्फ आठ करोड २९ लाख रुपैयाँ, स्वास्थ्य सेवा करतर्फ चार करोड पाँच लाख रुपैयाँ तथा शिक्षा सेवा करतर्फ दुई करोड ४० लाख रुपैयाँ राजस्व सङ्कलन गरेको कार्यालयका सूचना अधिकारी विजय लामिछानेले जानकारी दिएका छन् । आन्तरिक राजस्व कार्यालय पोखराअन्तर्गत गण्डकी र धवलागिरि अञ्चलका १० जिल्लामा एक लाख ११ हजार ५०० करदाता रहेका छन् । ६९ हजार ८०० करदातासँग व्यावसायिक स्थायी लेखा नम्बर र ४१ हजार ७०० सँग व्यक्तिगत स्थायी लेखा नम्बर लिएका करदाता रहेका छन् । रासस
अर्थमन्त्री कृष्णबहादुर महरामाथि लागेका गम्भीर ४ आरोप र उनको खण्डन
केहि दिनदेखि मेरो नाम जोडेर केहि मिडियाहरुले गम्भिर खाले आरोपहरु लगाईरहेका छन् । खासगरि सुन काण्ड, कर फर्स्यौट आयोग, एनसेल काण्ड र मलेसिया भ्रमणसँग जोडेर त्यस्ता आरोप लगाइएका छन् । पहिलो कुरा मलेसिया भ्रमण रहस्यमय भन्ने आरोप गलत छ । मलेसियाका प्रधानमन्त्रीका प्रमुख राजनीतिक सल्लाहकारले नेशनल ट्रान्सफरमेशन प्रोगाम नामको संस्था खोल्नु भएको छ । उहाँ केहि समय भित्रै नेपाल आउने योजना छ । चाडो नतिजा दिने उहाँको सिद्धान्त हो । त्यसका लागि उहाँको ल्याब नै रहेछ । त्यो ल्याब हेर्न उहाँले २ पटक निम्ता दिनुभयो । त्यो ल्याब हेर्न म मलेसिया गएको हुँ । बिहान ८ बजेदेखि दिउसो १ बजेसम्म ४ वटा प्रेजेन्टेशन हेरेँ ल्याबमा । निमन्त्रणा पत्र पनि मसँग सुरक्षित छ । दिउँसो अकस्मत, मैले सोचेको पनि थिइँन, मास र्यापीड ट्राञ्जिट भन्ने मेट्रो रेलको उद्घाटन रैछ । उनले मलाई त्यहाँ जाने र मलेसियाका प्रधानमन्त्री र अर्थमन्त्रीसँग भेट गर्ने व्यवस्था मिलाए । मलेसियामा २ जना अर्थमन्त्री हुने रहेछन् । हामी कहाँ अर्थ सचिव र राजश्व सचिव भए जस्तै त्यहाँ राजश्व र अर्थमन्त्री गरि २ जना अर्थमन्त्री हुने रहेछन् । राजश्व मन्त्री छुट्टै रहेछन अनि प्रधानमन्त्रीले नै अर्थमन्त्रालय हेर्ने रहेछन् । उनीहरुसँ भेट भयो । मैले विप्रेषणको बिषयमा पनि उनीहरुसँग कुरा गरेँ । अर्काे दिन मैले मलेसियामा भएको बिद्रोहको संग्रहालय अवलोकन गरेको हुँ । त्यसकारण यो मलेसिया भ्रमण रहस्यमय भन्ने कुरा सरासर गलत हो । दोश्रो कुरा सुन तस्करीका बिषयमा अर्थमन्त्रालय माथि अर्थ समितिमा पनि धेरै कुरा उठ्यो । म माथि पनि आरोप लगाउने प्रयास भयो । अर्थमन्त्रालय मातहतको भन्सार विभाग दोषी छ भन्ने सबैको कुरा रह्यो । मैले पोखराको अर्थमन्त्रालयकै एक कार्यक्रममा भनेको थिए, हाम्रो अर्थमन्त्रालयको भन्सार विभागका कर्मचारी दोषी हुन सक्छन् । दोषीमाथि कारवाही हुन्छ । दोषी को हुन छानबिनले देखाउँछ । सिआइबीले पनि छानबिन गरिरहेको छ । र मन्त्रालयले पनि छानबिन गरिरहेको छ । मैले त्यसमा भनेको कुरा हाम्रा कर्मचारीको संलग्नता हुन सक्छ, यदि त्यस्तो हो भने पनि त्यो टेक्निकल खालको हो । भूरा माछा खालको हो ठूला माछा खालको होइन भन्ने मेरो भनाई थियो । ठूलो माछा अलि अर्कै खालको हो, यिनले गरेको गल्ती भनेको भूरा खालको मात्रै हो तै पनि कारवाही हुन्छ भन्ने मेरो कुरा थियो । तर यहाँ त मेरो कुरालाई अर्कै ढंगले बङग्याएर राजनीतिक प्रतिशोध राखेर समाचार अाए । तेश्रो कुरा जहाँसम्म कर फर्स्यौट आयोगको सवाल छ, त्यसमा नेपाल उद्योग बाणिज्य महासंघका अध्यक्षले २० जनाको टोली लिएर कर फर्यौट आयोग बनाउनु पर्यो भनेर निवेदन दिनु भयो । मैले त्यो निवेदन हाम्रा दुबै जना सचिवहरुलाई राखेर सोँधे । हाम्रो छलफल भयो र निष्कर्षमा अहिले कर फर्स्यौट आयोग बनाउनु आवश्यक नपर्ने निष्कर्ष निकाल्यो । त्यसमा कुनै निर्णय भएको छैन् । कुनै भ्रममा नपर्दा हुन्छ । उद्योग बाणिज्य महासंघ भनेको निजी क्षेत्रको ठूलो संस्था हो । उनीहरुको मागलाई के गर्ने ? सुन्ने कि चुप लाग्ने भन्नेबारे छलफल भैरहेको छ । तत्काल निर्णय गरिहाल्नु पर्छ भन्ने हामीलाई लागेको छैन् । चौथो कुरा भनेको एनसेलको करको हो । यसमा पनि मसँग जोडिएर धेरै कुरा आएको छ । म स्पष्ट पार्न चाहान्छु, एनसेलको एक रुपैंयाँ कर पनि छोडिन्न । त्यो सबै असुलिन्छ । सार्वजनिक लेखा समितिले कर कार्यालयलाई पत्र लेखेर व्याख्या गरेन भनेछ । कर अधिकृतले कर कसले कति तिर्ने हो भनेर व्याख्या गर्ने हो । क्रेता र बिक्रेताले कति कर तिर्ने हो भन्ने कर अधिकृतले व्याख्या गर्छन । त्यो हिसाब किताब होला तर एक रुपैंयाँ पनि छोडिन्न भन्न चाहान्छु । (अर्थमन्त्रालयमा आयोजित पत्रकार सम्मेलनमा अर्थमन्त्री महराले दिएको स्पष्टिकरण)
एनसीसी बैंकलाई आस्वा सदस्यता प्रदान
काठमाडौं, ५ माघ । नेपाल धितोपत्र बोर्डले नेपाल क्रेडिट एण्ड कमर्स बैंक लि. लाई आस्वा सदस्यता प्रदान गरेको छ । बोर्डका अनुसार यस प्रणालीबाट शेयर कारोबार गर्दा लगानी गरेको रकम लगानीकर्ताको खातामा नै रोक्का हुन्छ भने शेयर बाँडफाँड पश्चात् खाताबाट आवश्यक रकम कट्टा गरी बाँकी रकम खातामा फुकुवा गरिन्छ । यस सेवाबाट एनसीसी बैंकमा खाता भएका ग्राहकहरु प्राथमिक निष्कासनको समय आवेदन बुझाउन घण्टौं लाईन बस्नुपर्ने, बाँडफाँड पश्चात् चेक संकलन गर्नु पर्ने, चेक संकलन गर्नु पर्दा घण्टौं लाईन बस्नुपर्ने, चेक क्लियरिङ्ग गर्नुपर्ने जस्ता समस्याबाट झन्झट मुक्त हुने बैंकले जनाएको छ ।
उच्च अदालतका ८० जना न्यायाधीशलाई शपथ ग्रहण
काठमाडौं, ५ माघ । उच्च अदालतमा नियुक्त भएका नवनियुक्त ८० जना न्यायाधीशले बुधबार पद तथा गोपनीयताको शपथ लिएका छन् । सर्वोच्च अदालतमा बुधबार आयोजित विशेष समारोहमा उनीहरुलाई सम्बन्धित उच्च अदालतका मुख्य न्यायाधीशले पद तथा गोपनीयताको सपथ गराएका हुन् । समारोहमा विराटनगर उच्च अदालतका मुख्य न्यायाधीश तेजबहादुर केसी, जनकपुरका उच्च अदालतका मुख्य न्यायाधीश सुरेन्द्रवीर बस्नेत, पाटन उच्च अदालका मुख्य न्यायाधीश टङ्कबहादुर मोक्तान, पाटन उच्च अदातलका मुख्य न्यायाधीश पुरुषोत्तम भण्डारी, तुलसीपुर उच्च अदालतका मुख्य न्यायाधीश बमबहादुर श्रेष्ठ, सुर्खेत उच्च अदालतमा मुख्य न्यायाधीश डम्बरबहादुर शाही र दिपायल उच्च अदालतका मुख्य न्यायाधीश प्रकाशकुमार ढुङ्गानाले आ-आफ्नो क्षेत्रका न्यायाधीशलाई पद तथा गोपनीयताको सपथ गराएका हुन्। समारोहमा प्रधानन्यायाधीश सुशीला कार्की र कानुन, न्याय तथा संसदीय मामिलामन्त्री अजयशङ्कर नायक र सर्वोच्च अदालतका न्यायाधीशको उपस्थिति रहेको थियो । सात उच्च अदालतमा ८० जना न्यायाधीशलाई न्याय परिषद्को सिफारिसमा सर्वोच्चका प्रधानन्यायाधीश कार्कीले पुस २९ गते नियुक्त गरेका हुन् । परिषद्ले पुस २८ गते नियुक्तिका लागि उनीहरुलाई सिफारिस गरेको थियो । रासस
नेपाल बैंकको हकप्रद निश्काशन गर्न बिक्री प्रबन्धकमा सिभिल क्यापिटल नियुक्त
काठमाडौं, ५ माघ । नेपाल बैंकले २३ दशमलब ७४ प्रतिशत हकप्रद सेयर निश्काशन गर्न लागेको छ । उक्त सेयर निष्काशनका लागि बैंकले निश्काशनकर्ता तथा बिक्री प्रबन्धकमा सिभिल क्यापिटललाई नियुक्त गरेको छ । बुधबार सम्पन्न सेयर निष्काशन तथा बिक्री प्रबन्धक नियुक्त गर्ने सम्झौतामा बैंकका प्रमुख कार्यकारी अधिकृत देवेन्द्रप्रताप शाह तथा क्यापिटलका प्रमुख कार्यकारी अधिकृत पराग बिष्टले हस्ताक्षर गरेका छन् । बैंकका अनुसार सिभिल क्यापिटलले बैंकको हाल कायम चुक्ता पूँजीको २३ दशमलव ७४ प्रतिशतले हुने एक करोड ५४ लाख ३१ हजार आठ सय ४० कित्ता हकप्रद सेयर निष्काशन गर्नेछ । बैंकले ५६ औं वार्षिक साधारण सभाबाट पारित भए बमोजिम प्रति एक सय कित्ता बराबर २३ दशमलब ७४ कित्ता हकप्रद सेयर निष्काशनको प्रकृया अघि बढाएको बैंकले जनाएको छ । हाल बैंकको चुक्ता पूँजी छ अर्ब ५० करोड रहेको छ । सो मात्राको हकप्रद सेयर निष्काशन पश्चात बैंकको कूल चुक्ता पूँजी आठ अर्ब चार करोड रुपैंया पुग्नेछ ।
७० प्रतिशत नेपालीको बैंक खाता यसै बर्षभित्र, सरकारी पैसा बैंकबाट मात्रै
काठमाडौं, ५ माघ । सरकारले चालु आर्थिक बर्षभित्रै ७० प्रतिशत नेपालीको बैंक खाता खोल्ने महत्वकांक्षी योजना अघि सारेको छ । अर्थमन्त्री कृष्ण बहादुर महराले समृद्ध नेपालको लागि दिगो आर्थिक विकासको तत्कालिन कार्यान्वयन कार्ययोजना २०७३ सार्वजनिक गर्दै यसै आव भित्र ७० प्रतिशत नेपालीको बैंक खाता खोलिसक्ने घोषणा गरेका हुन् । मन्त्री महराले द्धन्द्धकालमा विस्थापित भएका बैंकका शाखाहरु पुनस्थापित गर्ने, बैंक तथा वित्तिय संस्थाहरुलाई गाउँगाउँमा शाखा विस्तार गर्न प्रोत्साहन गर्ने, वित्तिय साक्षरता अभियानलाई तिब्र बनाउने लगायतका योजना मार्फत ७० प्रतिशत नेपालीको बैंक खाता खोलिसक्ने दावी गरेका हुन् । उनले एक व्यक्ति एक बैंक खाता कार्यक्रम अन्तर्गत शुन्य मौज्दातमा खाता खोल्ने अभियान चलाउने र सो वापतको सेवा शुल्क बैंक तथा वित्तिय संस्थालाई सरकारले नै उपलब्ध गराउने नीति रहेको पनि जानकारी गराए । राष्ट्रिय बाणिज्य बैंकले द्धन्द्धकालमा विस्थापित आफ्ना ६५ शाखा पुनस्थापित गराउने तयारी अघि बढाएको जानकारी पनि मन्त्री महराले दिएका थिए । ग्रामिण क्षेत्रमा पुगेर उत्पादन मुलक क्षेत्रमा केन्द्रिय बैंकले तोके भन्दा बढि कर्जा प्रवाह गर्ने बैंकलाई प्रोत्साहन उपलब्ध गराउने पनि उनले घोषणा गरे । उनले ब्याजदर करिडोरलाई कडाईका साथ लागु गर्ने, बैंक तथा वित्तिय संस्थाहरुमा रहेको २ लाखसम्मको निक्षेप सुरक्षणलाई थप प्रभावकारी बनाउने, मझौला उद्यम कर्जा र लघुवित्त विपन्न कर्जाको सुरक्षण अनिवार्य गर्ने पनि बताए । त्यस्तै, एक बैंक शाखा एक नमुना कार्यक्रम सञ्चालन गरेर ग्रामिण अर्थतन्त्रलाई उकास्ने पनि मन्त्री महराको कार्ययोजनामा समेटिएको छ । सरकारी पैसा बैंकबाट मात्रै मन्त्री महराले सार्वजनिक गरेको योजनामा आगामी बर्षदेखि हुने सबै खाले सरकारी भुक्तानीलाई बैंकिङ च्यानल अनिवार्य गरिने उल्लेख गरिएको छ । वित्तिय अनुशासनलाई बढावा दिन सरकारी निकाय मार्फत हुने सबै नगद प्रवाह बैंक खाता मार्फत मात्रै गर्ने प्रबन्ध मिलाईने उनले उल्लेख गरेका छन् ।
लक्ष्मी बैंकको नयाँ शाखा काठमाडौंको पुरानो बानेश्वरमा सञ्चालन
काठमाडौं, ५ माघ । लक्ष्मी बैंकले आफ्नो नयाँ शाखा काठमाडौंको पुरानो बानेश्वरमा संचालनमा ल्याएकोे छ । बैंकले शाखा संजाल विस्तार गर्ने क्रममा बुधबार उक्त शाखा संचालन गरेको हो । यस शाखा पश्चात् काठमाडौँमा लक्ष्मी बैंकको १६ वटा शाखाहरु हुनेछ । बैंकको शाखा संजाल अब ६५, ३ विस्तार काउन्टर अनि ८१ ए.टि.एम पुगेको छ । यस शाखाको विस्तार सँगै बैंकले ग्राहकहरुलाई उनीहरुकै रोजाईको माध्यम अर्थात शाखा कार्यालय, इन्टरनेट बैंकिङ्ग र मोवाईल फोन मार्फत बैंकिङ्ग सेवा प्रादन गरी शहरी तथा अर्ध शहरी क्षेत्रमा आफ्नो ब्राण्ड तथा ग्राहक अनुभवलाई अझ सशक्त पार्ने नीतिअनुरुप महत्वपूर्ण फड्को मार्ने विश्वास लिएको छ । सुविधाजनक नयाँ निक्षेप योजनाहरु र विभिन्न आवधिक तथा बचत निक्षेप सेवाहरुका साथसाथै व्यक्तीगत तथा साना व्यवसायकर्जा सेवाहरु प्रदान गरी व्यक्तीगत तथा साना व्यवसाय बैंकिङ्ग सेवाको दायरालई फराकिलो पार्दै जाने बैंकको लक्ष्य छ । आगामी दिनहरुमा बैंकले अझ धेरै शाखा अनि सेवाहरु देशभरि विस्तार गर्ने लक्ष्य लिएको छ ।
नेप्से सामान्य अंकले ओरालो, हिमाल डिष्टिलरीको सेयर मूल्य १० प्रतिशतले गिरावट
काठमाडौं, ५ माघ । बुधबारको सेयर बजारमा निकै उतारचढाव देखिएको छ । बजारमा कारोबार शुरु भएको एक घण्टामै नेप्से परिसूचक घटेर १४५७ अंकमा पुगेको थियो । त्यस पछिको कारोबारमा भने परिसूचकलाई केही टेवा पुगेको देखिन्छ । बजार बन्द हुँदा नेप्से परिसूचक शून्य दशमलब ८१ अंकले घटेर १४६२ दशमलब २३ अंकमा अडिएको छ । सामान्य अंकले घटेको बजारमा ३० करोड ९४ लाख रुपैयाँ बराबरको सेयर कारोबार भएको छ । सबैभन्दा बढी प्रभु बैंकको ३ करोड बढी रुपैयाँको सेयर कारोबार भएको छ । बजारमा बैंकको सेयर मूल्य प्रतिकित्ता ३४७ रुपैयाँ रहेको छ । सो दिन कुल १३३ कम्पनीको १२ लाख १७ हजार कित्ता सेयर किनबेच भएको छ । बजारमा सबैभन्दा बढी जनउत्थान सामुदायिक लघुवित्त विकास बैंकका लगानीकर्ताले करिब ९ प्रतिशत कमाएका छन् । सो दिन यस कम्पनीको सेयर मूल्य प्रतिकित्ता १ हजार ८६० रुपैयाँ रहेको छ । सोही बजारमा सबैभन्दा बढी हिमालयन डिष्टिलरी लिमिटेडको सेयर मूल्य १० प्रतिशतले घटेको छ । यस कम्पनीको सेयर मूल्य प्रतिकित्ता ६७५ रुपैयाँ रहेको छ । त्यस्तै, खानीखोला हाइड्रोपावर कम्पनीको सेयर मूल्य करिब १० प्रतिशतले घटेको छ । बुधबार इन्स्योरेन्स र विकास बैंक समूूहको परिसूचक बाहेक बाँकी समूहको परिसूचक ओरालो लागेका छन् । बीमा समूहको परिसूचक ६६ अंकले र विकास बैंक समूूहको परिसूचक ६ अंकले उकालो लागेका हुुन् । होटल र उत्पादनमूलक समूहको परिसूचक दोहोरो अंकले ओरालो लागेका छन् ।
