नयाँ पर्यटकीय गन्तव्य बन्दै ‘जटायु रेस्टुरेन्ट’, लोपोन्मुख अवस्थामा पुगेको गिद्ध बचाउन सक्रिय
काठमाडौं, ७ माघ । लोपोन्मुख अवस्थामा पुगेका गिद्धलाई विषादीरहित आहार उपलब्ध गराई संरक्षण गर्ने उद्देश्यले स्थापना गरिएका ‘जटायु रेस्टुरेन्ट’ पछिल्लो समयमा पर्यटकीय दृष्टिले समेत आकर्षक बन्दै गएका छन् । लोपोन्मुख अवस्थामा पुगेको गिद्ध बचाउने अभियानअन्तर्गत नेपालमा सर्वप्रथम सन् २००६ मा नवलपरासीको पिठौलीमा विश्वकै पहिलो समुदायद्वारा सञ्चालन गरिएको ‘जटायु रेस्टुरेन्ट’ को स्थापना भएको थियोे । सामुदायिक वन उपभोक्ताको सक्रियतामा यसरी खुलेका ‘जटायु रेस्टुरेन्ट’ जैविक विविधता संरक्षणका लागि उपयोगी मात्र नभई पछिल्लो समयमा पर्यटकीय गन्तव्य बन्दै आयआर्जनको स्रोतसमेत बन्दै गएका यस क्षेत्रका जानकार बताउँछन् । जटायु रेस्टुरेन्टको स्थापनापछि गिद्धको सङ्ख्या तीन गुना बढेकोे जानकारी दिँदै पिठौली जटायु रेस्टुरेन्ट व्यवस्थापन समितिका संयोजक डिबी चौधरी पछिल्लो समयमा गिद्धका क्रियाकलाप हेर्न र अनुसन्धान गर्नसमेत पर्यटक आउन थालेको बताउछन् । समितिले जटायु रेस्टुरेन्ट सञ्चालनका साथै दिगो जीविकोपार्जनका लागि पर्या-पर्यटनसँग सम्बन्धित विभिन्न तालिम तथा कार्यक्रमसमेत सञ्चालन गरेको छ । नवलपरासी ‘जटायु रेस्टुरेन्ट’को सफलतापछि रुपन्देहीको गैडहवा ताल, दाङको लालमटिया र बिजनौरी, कैलालीको खुटिया, कास्कीको घाँचोक र सुनसरीको रामधुनीमा पनि सोही प्रकारका रेस्टुरेन्ट स्थापना गरिएका छन् । यसरी खोलिएका रेस्टुरेन्टमा गौरक्षा केन्द्र हुन्छन् जहाँ किसानबाट वृद्ध, अशक्त, र बेकामी गाईवस्तु सङ्कलन गरी पालनपोषण गरिन्छ । रेस्टुरेन्टमा राखिएका गाई गोरुको प्राकृतिक मृत्युपश्चात् गिद्धको आहारका लागि निश्चित स्थानमा राखिन्छ जहाँ गिद्ध आई खान्छन् । त्यहाँ गिद्धको आनीबानी नजिकबाट लुकेर हेर्ने पर्यटक अवलोकन घर पनि हुन्छ । नेपाल पर्यटन बोर्डका कार्यकारी सदस्य कृष्ण अर्यालले यस्ता रेस्टुरेन्टलाई गिद्धको संरक्षणका साथसाथै पर्यापर्यटनसँग जोडेर आर्थिक उपार्जनको बाटो बनाउन सकिनेमा जोड दिए । पर्यटकलाई आकर्षित गर्ने योजनासहित जटायु रेस्टुरेन्टको बजारीकरण गरी आन्तरिक र बाह्य दुवै पर्यटकलाई भित्र्याउन सकिने कार्यकारी सदस्य अर्यालको भनाइ छ । घरपालुवा पशु उपचारमा प्रयोग गरिने पीडानाशक औषधि डाइक्लोफेनेक सेवन गरेका पशुको सिनो खाएकै कारण पछिल्ला दशकमा नेपाललगायत दक्षिण एसियामै गिद्ध ९० प्रतिशतले घटेको अध्ययन प्रतिवेदनले पुष्टि गरेको छ । यसबाहेक विष खुवाएर मारेका जनावरको सिनो खाएर र गुँड बनाउने अग्ला सिमलका रुखको विनाशले पनि गिद्ध लोप हुँदै गएको विज्ञहरुले बताएका छन् । नेपालमा पनि सन् २००२ देखि २०१० सम्मको राजमार्ग ट्रान्सेक्ट सर्भेबाट डङ्गर गिद्ध ९१ प्रतिशतले घटेको पाइएको नेपाल पक्षी संरक्षण सङ्घका प्रमुख कार्यकारी अधिकृत डा नरेन्द्रमान बाबु प्रधानले बताए । यस्ता रेस्टुरेन्टमार्फत स्थानीय समुदायको जीविकोपार्जन, सामुदायिक विकास, स्थानीय संस्कृतिको संरक्षण तथा प्रवद्र्धनका साथै पर्या-पर्यटनको विकास गर्न सकिने प्रमुख कार्यकारी अधिकृत, डा प्रधानको भनाइ छ । विश्वमा २३ प्रजातिका गिद्ध पाइन्छन् । विश्व प्रकृति संरक्षण सङ्घका अनुसार नेपालमा पाइने नौ प्रजातिका गिद्धमध्ये डङ्गर, सानो खैरो र लामो ठुँडे गिद्ध अति सङ्कटापन्न अवस्थामा छन् । प्रकृतिको कुचिकार भनिने गिद्धले मरेका जनावरको सिनो खाएर पृथ्वीलाई सफा राख्नुका साथै दुर्गन्धले फैलने रोगबाट मानिसलाई समेत जोगाउँछन् । सङ्घले अन्य साझेदार संस्थाको समन्वयमा जटायु रेस्टुरेन्टलाई दिगो व्यवस्थापन गरी गिद्धलगायत अरु जैविक विविधताको संरक्षण गर्न र पर्यटन विकासका लागि स्थानीय समुुदायमा विभिन्न सीप विकासका तालिम पनि सञ्चालन गर्दै आएको सङ्घका गिद्ध संरक्षण कार्यक्रम अधिकृत कृष्णप्रसाद भुसालले जानकारी दिए । सरकारले डाइक्लोफेनेक औषधिलाई २०६३ जेठ २३ देखि पशु उपचारका लागि उत्पादन, प्रयोग र बिक्री वितरणमा प्रतिबन्ध लगाएको छ । औषधि ऐन, २०३५ बमोजिम यसको उल्लङ्घन गरेको पाइएमा तीन वर्ष कैद वा पाँच हजार रुपैयाँ जरिवाना वा दुवै सजाय हुनसक्ने कानुनी प्रावधान छ । यसबाहेक राष्ट्रिय निकुञ्ज तथा वन्यजन्तु संरक्षण विभागले गिद्ध संरक्षणका लागि चितवन राष्ट्रिय निकुञ्जको कसरामा गिद्ध संरक्षण तथा प्रजनन केन्द्रको स्थापना गरेको छ । त्यस्तै ‘गिद्ध संरक्षण कार्ययोजना सन् २००९–२०१३ को सफल कार्यान्वयनपश्चात् नयाँ पञ्चवर्षीय कार्ययोजना सन् २०१५–२०१९ लागू गरेको विभागका महानिर्देशक मनबहादुर खड्काले जानकारी दिएका छन् । यस्ता रेस्टुरेन्टको स्थापनासँगै स्थानीय जनतामा आएको चेतनाले एकातिर पारिस्थितिकीय प्रणालीको एक प्रमुख हिस्सा गिद्धको संरक्षणमा योगदान पुगेको छ भने अर्कोतिर नयाँ पर्यटकीय आकर्षण केन्द्र बन्नाले स्थानीय जनताका लागि आयआर्जनको स्रोतसमेत बनेको छ । रासस
केन्द्रीय प्रसारण लाइनमा छ मेगावाट विद्युत् थप
पाँचथर, ७ माघ । कावेली करिडोर १३२ केभी प्रसारण लाइनअन्तर्गत फिदिम-४ स्थित थापाटारको स्टेसनमा हेवाखोला जलविद्युत् परियोजना ‘ए’ को उत्पादित ६ मेगावाट विद्युत् केन्द्रीय प्रसारण लाइनमा जोडिएको छ । केन्द्रीय प्रसारण लाइनमा ६ मेगावाट विद्युत् थपिएको कावेली करिडोर प्रसारण लाइनका आयोजना प्रमुख दीपेन्द्रराज द्विवेदीले जानकारी दिए । यसअघि पाँचथर पावर कम्पनीले निर्माण गरेको हेवाखोला जलविद्युत् परियोजना ‘ए’ को उत्पादित १० मेगावाट विद्युत् त्यसै खेर गइरहेको थियो । दश मेगावाटमध्ये ६ मेगावाट विद्युत् केन्द्रीय प्रसारण लाइनमा थपिएको हो । झापाको दमकदेखि पाँचथर र ताप्लेजुङको सिमाना कावेलीको दुविचौरसम्म ९० किलोमिटर प्रसारण लाइन रहेको छ । त्यसअन्तर्गत चारवटा सवस्टेसन रहेका छन् । फिदिमको थापाटारमा जोडिएको सवस्टेसनसँगै अहिलेसम्म तीनवटा स्टेसनको काम सकिएर केन्द्रीय प्रसारण लाइनमा जोडिसकिएको द्विवेदीले बताए । उक्त प्रसारण लाइनमा २५८ वटा टावर निर्माण हुनेछन् । दमकदेखि गोदकसम्म ९५ वटा टावर र गोदकदेखि अमरपुरसम्म ९५ वटा टावर निर्माण भइसकेको छ । २०६७ जेठ १४ गतेबाट मात्रै आयोजनाको काम अघि बढेको हो । विश्व बैंक, नेपाल सरकार र नेपाल विद्युत् प्राधिकरणको तीन अर्ब ५९ करोड रुपैयाँको लागतमा सो आयोजनाको काम अगाडी बढाइएको हो । रासस
नेप्से परिसूचक १५.१६ अंकले घट्दा एक अर्ब ८५ करोडको सेयर कारोबार
काठमाडौं, ७ माघ । यस साताको नेप्से परिसूचक पहिलो दिनको तुलनामा १५.१६ अंकले घटेर अन्तिम दिन १४६२ दशमलब ५६ अंकमा झरेको छ । सातामा नेप्से परिसूचक घटे पनि कारोबार रकममा भने सुधार आएको छ । साताभर एक अर्ब ८५ करोड ९० लाख रुपैयाँको सेयर कारोबार भएको छ । सो अवधिमा १५३ कम्पनीहरुको एक करोड १३ लाख १८ हजार कित्ता सेयरहरु खरिद बिक्री भएका छन् । कारोबार रकम गत साताको भन्दा ६.९६ प्रतिशत बढि हो । गत साता १४८ कम्पनीहरुको कारोबार भएको थियो । जस अनुसार १३१४० कारोबारबाट एक अर्ब ७३ करोड ७९ लाख ९९ हजार रुपैयाँ बराबरका एक करोड ३३ हजार सात सय ८० कित्ता सेयरहरु खरिद बिक्री भएका थिए । बजारमा सबैभन्दा बढी बीमा समूहको परिसूचक ओरालो लागेको छ । त्यस्तै, उत्पादनमूलक र वाणिज्य बैंक समूहको परिसूचक क्रमशः २५ र २२ अंकले ओरालो लागेका छन् । विकास बैंक र होटल समूहको परिसूचक सामान्य अंकले उकालो लागेका छन् । यस साता सबैभन्दा बढी प्रभु बैंकको सेयर कारोबार भएको छ । सो अवधिमा बैंकको २० करोड ९३ लाख रुपैयाँको सेयर किनबेच भएको हो । यस साता तीन कम्पनीको सेयर नेप्सेमा सूचिकृत भएको छ । युनाईटेड फाइनान्स र प्रोगेशिभ फाइनान्सको बोनस सेयर र सिद्धार्थ डेभलपमेन्ट बैंकको हकप्रद सेयर नेप्सेमा सूचिकृत भएको हो । ‘क’ वर्गका कम्पनीहरुको कारोबार मापन गर्ने सेन्सेटिभ इन्डेक्स पहिलो दिनको तुलनामा २.७३ अंकले घटेर ३१७.३२ अंकमा आईपुगेको छ ।
मेगा र टुरिजम् डेभलपमेन्ट बैंकबीच मर्जरको सैद्धान्तिक सहमति, मेगाको १३ प्रतिशत र टुरिजमको १८ प्रतिशत बोनस शेयर यथावत
काठमाडौं, ७ माघ । मेगा बैंक नेपाल लिमिटेड र टुरिजम् डेभलपमेन्ट बैंक बीच एक आपसमा गाभ्ने/गाभिने सम्बन्धमा माघ ६ गते सैद्धान्तिक सहमति भएको छ । मेगा बैंक सञ्चालक समितिका अध्यक्ष भोजबहादुर शाह र टुरिजम् डेभलपमेन्ट बैंक सञ्चालक समितिका अध्यक्ष प्रा.डा. पुष्पराज कँडेलले दुबै बैंकको सञ्चालक समितिका सदस्यहरुको रोहवरमा सैद्धान्तिक सहमति पत्रमा हस्ताक्षर गरेका छन् । मेगा बैंकका अध्यक्ष भोज बहादुर शाहका अनुसार मर्जर पश्चात् बैंकको नाम मेगा बैंक नेपाल लिमिटेड नै कायम रहनेछ । “अन्तिम शेयर आदान प्रदान अनुपात (डीडीए) प्रतिवेदनको आधारमा फरक पर्न सक्ने गरी हाललाई मेगा बैंक र टुरिजम् डेभलपमेन्ट बैंकको शेयर आदान प्रदान अनुपात १०० : ९५ तय गरिएको छ । साथै मेगा बैंकका अध्यक्ष र प्रमुख कार्यकारी अधिकृतले नै मर्जर पछिको संस्थामा अध्यक्ष र प्रमुख कार्यकारी अधिकृतको रुपमा निरन्तरता पाउने छन् । मेगा बैंकको हालको चुक्ता पुँजी ४ अर्ब १ करोड रुपैयाँ छ भने १ एक्स्टेन्सन काउण्टर सहित शाखा संख्या ४० तथा ४७ वटा एटिएमहरु रहेको छ । टुरिजम् डेभलपमेन्ट बैंकको हालको चुक्ता पुँजी ९१ करोड ९७ लाख रुपैयाँ छ भने १ एक्स्टेन्सन काउण्टर सहित शाखा संख्या २३ तथा १२ वटा एटिएमहरु रहेको व्यहोरा मेगा बैंकका सिईओ अनिल केशरी शाहले बताए । आगामी साधारण सभाले स्वीकृत गरेको खण्डमा मेगा बैंकको सञ्चालक समितिले आर्थिक वर्ष २०७२/७३ सम्मको वितरणयोग्य सञ्चित मुनाफाबाट हालको चुक्ता पुँजीमा १३.९५ प्रतिशत बोनस शेयर जारी गर्ने सिफारिश गरेको उनले बताए । साथै टुरिजम् डेभलपमेन्ट बैंकले हालको चुक्ता पुँजी ९१ करोड ९७ लाखमा १८.६० प्रतिशत बोनस शेयर प्रस्ताव गरेको छ । दुबै बैंकले प्रस्ताव गरेकाे बाेनस सेयर यथावत रूपमा रहने शाहले बताए । सिईओ शाहले दुबै बैंकको शेयर रोक्काको प्रकृया अघि बढाईएको र यथाशिघ्र नेपाल राष्ट्र बैंक समक्ष संयुक्त निवेदन दर्ता गराइने बताए ।
टोयोटाको मोर्टस पार्टसको आउटलेट कुलेश्वरमा, जेनियुन पार्टसहरु मात्र बिक्री हुने
काठमाडौं, ७ माघ । युनाइटेड ट्रेर्डस सिन्डिकेट प्रालिले ग्राहकको सुबिधाको लागि काठमाडौंको कुलेश्वरमा मोर्टस पार्टसको आउटलेट सञ्चालनमा ल्याएको छ । कम्पनीका अनुसार उक्त आउटलेटबाट टोयोटाको आधिकारीक जेनियुन पार्टसहरु मात्र बिक्री हुने छन् । कम्पनीले अँग्रेजी नयाँ बर्षको अवसर पारेर उक्त नयाँ आउटलेट संचालनमा ल्याएको बताएको छ । यस आउटलेटबाट ग्राहकले टोयोटाको आफ्नै जेनियुन मोटर आयल समेत खरिद गर्न सक्ने कम्पनीले जनाएको छ । विगत ५० वर्षदेखि नेपाली उपभोक्तालाई सेवा दिदै आएको यस कम्पनीले आफ्ना ग्राहकले जेनियुन पार्टसहरु सहजरुपमा प्रयोग गर्न पाउन् भन्ने मान्यता राख्दै आएको छ । नयाँ बजारमा केहि समय अगाडी खोलिएको पार्टसको आउलेटबाट ग्राहकको सकारात्मक प्रतिक्रिया र माग बमोजिम कुलेश्वरमा नयाँ आउटलेट सञ्चालनमा ल्याएको कम्पनीले जनाएको छ ।
पूर्व प्रधानमन्त्री ओलीले गरे पिएलओ लुब्रिकेन्टसको फ्याक्ट्री अवलोकन
काठमाडौं, ७ माघ । पूर्वाञ्चल ल्युव आयल प्रालि १५ वर्ष पुगेको अवसरमा पूर्व प्रधानमन्त्री केपीशर्मा ओलीले कारखाना अवलोकन गरेका छन् । नेपालमा उत्पादन हुने लुब्रिकेन्टस मध्ये अग्रणी रहेको पिएलओले नेपालमा ८ प्रतिशत बजार हिस्सा रहेको पिएलओका डाइरेक्टर कृष्णप्रसाद दुलालले बताए । मोरङको बिराटचोकमा रहेका यस कम्पनीले पिएलओ, मेगा र स्टार ब्राण्डका ९० भन्दा बढी प्रकारका लुब्रिकेन्टस उत्पादन गरिरहेको छ । प्रत्यक्ष रुपमा २ सय भन्दा बढीलाई रोजगारी दिइरहेको पिएलओका देशभरमा ७ सय भन्दा बढी डिस्ट्रीब्युटर रहेका छन् । चालू आर्थिक वर्षमा ५० करोड बढीको कारोबार लक्ष कम्पनीले लिएको डाइरेक्टर दुलालले बताए । पिएलओको अबलोकन कार्यक्रममा पूर्व संचारमन्त्री शेरधन राई र पूर्व कानून मन्त्री अग्नी खरेलको पनि उपस्थिती रहेको थियो ।
एक महिनाभित्र पुनर्निर्माणमा ५० अर्ब खर्च गर्न अर्थमन्त्रीको निर्देशन, खर्च गर्ने मोडालिटी बनाउन दौडधूप गर्दै सिईओ पोखरेल
काठमाडौं, ७ माघ । अर्थमन्त्री कृष्णवहादुर महराले पुनर्निर्माण कार्य ढिला भएको भन्दै अबको एक महिनाभित्र ५० अर्ब रुपैयाँ खर्च गरिसक्न पुनर्निर्माण प्राधिकरणलाई निर्देशन दिएका छन् । प्राधिकरणका प्रमुख कार्यकारी अधिकृत (सीईओ) प्रा डा. गोविन्दराज पोखरेललाई अर्थमन्त्रीले आफ्नै कार्यकक्षमा बोलाएर सो निर्देशन दिएका हुन् । विनाशकारी भूकम्प गएको २२ महिना बित्न लाग्दा समेत पीडितहरु अस्थायी टहरामै बस्न बाध्य भएको भन्दै छिटो स्थायी बसोबासको व्यवस्था गर्न अर्थमन्त्रीले त्यस्तो निर्देशन दिएका हुन् ।’ प्राधिकरणका अनुसार २०७२ को भूकम्प र त्यसपछिका परकम्पनका कारण ८ लाख घरपरिवारमा क्षति पुगेको छ । भूकम्प पीडितले दुई वर्षात र दुई जाडो अस्थायीे जस्ताको टहरामा बिताएका छन् । भूकम्प गएको पौने दुई वर्ष नाघिसक्दा हालसम्म पाँच लाख ४८ हजार ३ सय ६३ भूकम्प पीडित घरधुरीसँग मात्र अनुदान सम्झौता भएको छ भने चार लाख ७६ हजार आठ सय १३ लाभग्राहीले पहिलो किस्ता अनुदान रकम जम्मा भएको छ । पुनर्निर्माणको काम ढिला भएको भन्दै सरकारले केही दिनअघिमात्र प्राधिकरणमा सिईओ नै परिवर्तन गरेको छ । नयाँ सिईओले नेपाली सेनालाई परिचालन गरेर भएपनि छिटो भूकम्प पीडितलाई स्थायी बसोबासमा फर्काउने भएका छन् । अहिले प्राधिकरणका सीईओ पोखरेल अर्थ मन्त्रीले दिएको निर्देशन पालन गर्न कार्यतालिका बनाउन र पीडितलाई सेवा जतिसक्दो छिटो सेवा दिनका लागि प्रधानमन्त्री लगायतका उच्च पदस्थ अधिकारीलाई भेटेर राय तथा सल्लाह लिइरहेका छन् । बुधबारदेखि प्राधिकरणले लाभग्राहीहरुलाई दोस्रो किस्ता अनुदान वितरण कार्य शुरु गरेको छ । अबको दुई महिनाभित्र नै पहिलो किस्ता रकम बुझेका मध्ये करिब ३० प्रतिशतले दोस्रो किस्ताको रकम माग गर्ने अनुमान रहेको भन्दै प्राधिकरणले करिब २८ अर्ब रुपैयाँ अर्थ मन्त्रालयसँग माग गरेकोे छ । उक्त रकम पहिलो किस्ता अनुदान लिन बाँकी र दोस्रो किस्ताका दिनका लागि माग गरिएको प्राडा. पोखरेलले बताए । प्राधिकरणका प्रमुख पोखरेल अहिले सोही रकम निकाशनको माग गर्न प्रधानमन्त्रीको कार्यालय गइरहेका छन् । अहिले पनि अनुदान वितरणको कार्य भइरहेको र रकम निकासा भएपछि पूँजी र जनशक्ति सहितको लाभग्राहीहरुले अझ छिटो र प्रभावकारीे सेवा पाउने उनले बताए । भूकम्पपछिको पुनर्निमाण र पुनस्र्थापनका लागि सरकारले चालू आवको बजेटमा एक खर्ब ४० अर्ब रुपैयाँ छुट्याएको छ भने गत वर्ष ९४ अर्ब रुपैयाँ छुट्याएको थियो । सरकारले पुनर्निमाणको गतिलाई अघि बढाउन नसक्दा पीडितहरुले सरकारले दिन्छु भनेको सेवा समेत लिन पाइरहेका छैनन् । भूकम्प पीडितहरूलाई बढीमा २ प्रतिशतसम्मको ब्याजमा आवासीय कर्जा प्रदान गर्न यस बैंकबाट बैंक तथा वित्तीय संस्थाहरूलाई शून्य ब्याजदरमा पुनरकर्जा सुविधा उपलब्ध गराउने व्यवस्था अन्तर्गत २०७३ मंसिर मसान्तसम्म कुल आठ लाख भूकम्प पीडितमध्ये एक २१ जनामात्र २५ करोड ४९ लाख कर्जा लिएका छन् । यसले धेरै भूकम्प पीडितले अझैसम्म पनि आवास निर्माण कार्य शुरु गरेका छैनन् भन्ने हो ।
कलङ्की–कोटेश्वरका चार पुल निर्माण अन्तिम चरणमा, सडक जस्तै पुल पनि ८ लेनका
ललितपुर, ७ माघ । निर्माणाधीन कलङ्की–कोटेश्वर सडकमा पर्ने चारवटा मोटर गुड्ने पुल निर्माणको काम अन्तिम चरणमा पुगेको छ । निर्माणको ९५ प्रतिशत काम सकिएको काठमाडौँ चक्रपथ सडक योजनाले बताएको छ । यो सडक खण्डमा आगामी एक वर्षमा सकिने काममा पुलको कामसमेत रहेको योजनामा कार्यरत इञ्जिनियर रमेश दृष्टिले बताए । उनले भने, ‘रेलिङ राख्ने, फुटपाथ बनाउनेलगायतका काम मात्रै बाँकी छ ।’ कलङ्की (खसीबजार), बल्खु खोला, बागमती खोला र बालकुमारीमा मनोहरा खोलामा गरेर चार स्थानमा पुल निर्माणको काम भइरहेको छ । सडक जस्तै पुल पनि आठलेनको बनाउन लागिएको हो । मुख्य लेन चार र साइड लेन दुई/दुई गरेर आठ लेनको बाटो पुलमा निर्माण भइरहेको छ । पहिले मोटर गुड्ने पुल भएका यी स्थानमा छेउ–छेउबाट थप गरेर आठ लेन गुड्ने बनाउन लागिएको दृष्टि बताए । उनले भने, ‘आठलेन गुड्ने भएपछि पुलमा पनि सडकमा जस्तै जाम हुने छैन ।’ चिनियाँ सहयोगमा निर्माणाधीन चक्रपथको कलङ्की–कोटेश्वर सडकको कुल लागत तीनसय १२ मिलियन युयान रहेको छ । १०.३९ किलोमिटर सडकमा ५ किलोमिटर सडक यो वर्ष र बाँकी ५.३९ किलोमिटर सडक अबको दुई वर्षभित्रमा सम्पन्न हुनेछ । रासस
