आइजीआई प्रुडेन्सियल इन्स्योेरेन्सको ५ प्रतिशत नगद लाभांश स्वीकृत
काठमाडौं । आइजीआई प्रुडेन्सियल इन्स्योेरेन्स लिमिटेडको २८औँ वार्षिक साधारण सभा बिहीबार सम्पन्न भएको छ । सभामा अध्यक्ष हेमराज ढकाल र प्रमुख कार्यकारी अधिकृत युगेशभक्त बादे श्रेष्ठ लगायतले सेयरधनीहरूलाई स्वागत गर्दै कम्पनीको वार्षिक प्रगति, भविष्यका योजना र आर्थिक प्रतिवेदन प्रस्तुत गरे । सभामा चुक्ता पूँजीको ५ प्रतिशत नगद लाभांश दिने प्रस्ताव सेयरधनीहरूले सर्वसम्मति मार्फत स्वीकृत गरेका छन् । साथै, कम्पनीको पानीपोखरी स्थित ११ तल्ले नयाँ भवन सञ्चालनमा आउँदैछ, जसमा प्रधान कार्यालय स्थानान्तरण हुनेछ र अन्य तल्ला भाडामा उपलब्ध गराइनेछ । सभामा अध्यक्ष ढकालले जानकारी दिए कि समीक्षा वर्षमा कम्पनीले देशका सातै प्रदेशमा रहेका ९० शाखा, ५३१ कर्मचारी, ४३० अभिकर्ता र १९२ सर्भेयर मार्फत सेवा प्रदान गर्दै आएको छ । बीमा प्रिमियम संकलन रु. ३८६ करोड ५९ लाख पुगेको छ भने दावी भुक्तानी रु. २ अर्ब ४६ करोड ३३ लाख पुगेको छ । कम्पनीले स्वास्थ्य बीमा योजनामा नवीन सेवा, विदेशी पर्वतारोहण तथा ट्रेकिङ्गमा बीमाको सुरुवात जस्ता डिजिटल र ग्राहकमैत्री पहलहरू अघि बढाएको जानकारी सभामा दिइयो । अध्यक्ष ढकालले सेयरधनीहरूको समर्थन र सरकार तथा नियामक निकायहरूको सहयोगप्रति आभार व्यक्त गर्दै कम्पनीले भविष्यमा पनि बीमा बजारमा विश्वसनीयता, पारदर्शिता र गुणस्तरीय सेवा कायम राख्ने प्रतिबद्धता व्यक्त गरे ।
रास्वपाले प्रत्यक्षका उम्मेदवार छनोट पनि प्रि–प्राइमरी इलेक्सनबाटै गर्ने
काठमाडौं । राष्ट्रिय स्वतन्त्र पार्टी (रास्वपा)ले प्रत्यक्ष निर्वाचनका लागि उम्मेदवार छनोट यसअघि समानुपातिकमा प्रयोग गरिएको प्रि–प्राइमरी इलेक्सनबाटै गर्ने भएको छ । उक्त मोडालिटीमा कस्ता टुल्स प्रयोग गर्ने मापदण्ड कस्तो बनाउने भन्ने विषयमा छलफल भइरहेको पार्टीले जनाएको छ । मोडालिटीका बारेमा पार्टीमा कुनै अन्योल नभएपनि मापदण्ड र त्यसले बोक्ने भारका विषयमा भने पार्टी नेतृत्व अझै स्पष्ट भइसकेको छैन । पार्टीले पहिले नै प्रयोग गरेको मोडालिटीमै उम्मेदवारीका लागि दरखास्त आह्वान गरिसकेको पार्टीका सहप्रवक्ता प्रतिभा रावलले जानकारी दिइन् । मंगलबार राति बसेको सचिवालय बैठकपछि सार्वजनिक गरिएको सूचनामा उम्मेदवारी दिने अन्तिम समय पुस २६ गते राति १२ बजेसम्म तोकिएको छ । सहप्रवक्ता रावलका अनुसार प्रत्येक निर्वाचन क्षेत्रका पार्टी क्याडरहरूले आफ्नो निर्वाचन क्षेत्रका आकांक्षीहरूलाई मतदान गर्न पाउनेछन् । सोही मतदानबाट पहिलो हुने नेता नै आगामी निर्वाचनमा पार्टीको तर्फबाट उमेदवार बन्नेछन् । रावलले भनिन्, ‘पहिलो मत प्राप्त गर्नु एउटा मापदण्ड पुरा गर्नु हो । अन्य मापदण्डको सवालमा हामी छलफलमै छौं ।’ यसअघि रास्वपाले उपसभापति डा. स्वर्णिम वाग्लेको संयोजकत्वमा उम्मेदवार सिफारिस उपसमिति गठन गरिसकेको छ । सामान्यतया प्राइमरी इलेक्सन हुने अवस्थामा सिफारिस उपसमिति आवश्यक नपर्ने भएकाले यसपटक प्रत्यक्षतर्फ प्राइमरी इलेक्सन नहुने आशंका रहेको छ नि भन्ने जिज्ञासामा रावलले भनिन्, ‘हामी जनमतको पूर्वपरीक्षणबाट पछि हट्दैनौं । पहिले पार्टी भित्र लोकप्रियता मापन अनि बल्ल जनतासँग जाने हो । योभन्दा सुन्दर छनोट प्रक्रिया अरु हुँदैन ।’ रास्वपाले समानुपातिकतर्फ प्राइमरी इलेक्सनमार्फत उम्मेदवार छनोट गरेको थियो । रास्वपाले उक्त विधि अपनाए पनि सो प्रक्रिया विवादरहित भने रहन सकेन । उक्त मोडालिटीमा प्राइमरी इलेक्सनलाई ५० प्रतिशत मात्रै मतभार दिइएको थियो भने बाँकी ५० प्रतिशतका लागि जटिल मापदण्डहरू तय गरिएको थियो । यही विधि प्रत्यक्ष निर्वाचनमा लागू गर्न व्यवहारिक नभएकोले विधिमा रिभ्यु आवश्यक रहेको अर्का सहप्रवक्ता रमेश प्रसाईंले जानकारी दिए । प्रसाईंले भने, ‘यसअघि हामीले पूर्ण डिजिटल विधि प्रयोग गर्यौं । अब स्थान विशेषमा फिजिकल विधिपनि गर्नुपर्ने देखिएको छ ।’ पछिल्लो समय पार्टीमा अन्य समूह र नेतासमेत समाहित भएकोले उहाँहरूलाई समेट्न विधिमा परिमार्जन आवश्यक रहेकोले त्यसमा छलफल भइरहेको सहप्रवक्ता प्रसाईंले जानकारी दिए । हाल बालेन समूह, उज्यालो नेपाल पार्टी, थारुवान समूहलगायत रास्वपामा समाहित भइसकेकाले उम्मेदवार छनोट सहमतिका आधारमा गर्नुपर्ने दबाब बढेकोले विधिमा परिमार्जन गर्नुपर्ने देखिएको प्रसाईंले बताए । प्रसाईंका अनुसार एकीकरणपछि पार्टीको तलदेखि माथिसम्मको संरचना बदलिएको छ । नेता र नेतृत्व हिजोको जस्तो छैन । त्यसैले उम्मेदवार छनोटको आधारसमेत परिवर्तन गर्नुपर्ने अवस्था आएको छ । सहप्रवक्ता रावलका अनुसार हिजो मापदण्ड र विधि बनाएको टिममात्रै रास्वपामा छैन । तर छनोटको प्रक्रियामा त्यही हुनुपर्छ । अर्का सहप्रवक्ता प्रसाईं अरू दलभन्दा फरक देखिने यो छनोट प्रक्रियालाई निरन्तरता दिनुपर्ने बताउँछन् । उनी भन्छन्, ‘प्रि–प्राइमरीबाट पछि हट्ने कुरा हुँदैन तर मापदण्डमा फेरबदल गर्न सकिन्छ ।’ तर भर्खरै समायोजन भएका दल र समूहका नेताहरूमा भने उक्त छनोट विधिले आफूहरूलाई समेट्न नसक्ने आशंका छ । यो आशंका मेट्नेगरी मापदण्ड बनाउन बहस आवश्यक रहेको रावलको कथन छ ।
कांग्रेसले बोलायो केन्द्रीय कार्यसम्पादन समितिको बैठक
काठमाडौं । नेपाली कांग्रेसले केन्द्रीय कार्यसम्पादन समितिको बैठक आह्वान गरेको छ । महामन्त्री गगनकुमार थापा र विश्वप्रकाश शर्माले विशेष महाधिवेशन आह्वान गरेपछि उत्पन्न परिस्थितिबारे छलफल गर्न पार्टीले बैठक बोलाएको हो । कांग्रेसका मुख्यसचिव कृष्णप्रसाद पौडेलका अनुसार बैठक बिहीबार (आज) अपराह्न ४ बजे पार्टी केन्द्रीय कार्यालयमा बस्नेछ । यसअघि पार्टीले बुधबार एक विज्ञप्ति जारी गर्दै विशेष महाधिवेशन आह्वान गर्ने अधिकार कुनै एक व्यक्ति वा समूहलाई नभएको स्पष्ट पारेको थियो । यसअघि नै विशेष महाधिवेशन पक्षधर समूहले पत्रकार सम्मेलन गरेर विशेष महाधिवेशन आह्वान गरेको घोषणा गरेको थियो । त्यसपछि महामन्त्रीद्वय थापा र शर्माले पनि आ–आफ्ना वक्तव्यमार्फत विशेष महाधिवेशनको आह्वान गरेका हुन् ।
आईसीटी सीप विकासमा योगदान पुर्याएको भन्दै क्यान महासंघ र नेतृत्व सम्मानित
काठमाडौं । नेपाली सूचना तथा सञ्चार प्रविधि (आईसीटी) क्षेत्रको विकास, डिजिटल साक्षरता र दक्ष जनशक्ति उत्पादनमा रूपान्तरणकारी योगदान पुर्याएको भन्दै नेपाल सरकारले कम्प्युटर एसोसिएसन नेपाल महासंघ (क्यान महासंघ) र यसको उच्च नेतृत्वलाई सम्मान गरेको छ । श्रम, रोजगार तथा सामाजिक सुरक्षा मन्त्रालयअन्तर्गतको राष्ट्रिय व्यावसायिक प्रशिक्षण प्रतिष्ठान (एनएभीटी) को दोस्रो वार्षिकोत्सवका अवसरमा ललितपुरको भैँसेपाटीमा आयोजित एक विशेष समारोहमा क्यानलाई सम्मान गरिएको हो । समारोहमा क्यान महासंघलाई संस्थागत रूपमा र व्यक्तिगत रूपमा महासंघका दुई पदाधिकारीलाई सरकारका तर्फबाट प्रशंसा–पत्र र सम्मान–पत्र प्रदान गरिएको थियो । महासंघका वरिष्ठ उपाध्यक्ष चिरञ्जीवी अधिकारीलाई व्यावसायिक आईसीटी प्रशिक्षणको जग बसाल्न र नेतृत्वदायी भूमिका निर्वाह गरेकोमा तथा महासचिव चन्द्र विलास भुर्तेललाई पाठ्यक्रम मस्यौदा उपसमितिको संयोजकको रूपमा प्रशंसनीय कार्य गरेकोमा सम्मानित गरिएको थियो । श्रम, रोजगार तथा सामाजिक सुरक्षामन्त्री राजेन्द्र सिंह भण्डारी, श्रम सचिव एवं राष्ट्रिय व्यावसायिक प्रशिक्षण प्रतिष्ठान विकास समितिका अध्यक्ष डा. दीपक काफ्ले र प्रतिष्ठानका कार्यकारी निर्देशक रमेश कुमार बखतीले महासंघलाई संयुक्त रूपमा सम्मान वितरण गरे । क्यानका वरिष्ठ उपाध्यक्ष अधिकारीले महासचिव रहँदा सुरु गरेको ‘हातमै सीप’ को अवधारणालाई यस सम्मानको मुख्य आधार मानिएको छ । परम्परागत प्रमाणपत्रमुखी शिक्षाभन्दा माथि उठेर सफ्ट स्किल्स र व्यावसायिक प्राविधिक सीपलाई एकीकृत गर्ने उनको भिजनले उद्योगको ध्यान सर्टिफाइड मात्रै नबनाई अनिवार्य योग्य हुनुमा केन्द्रित गरेको छ । यसले नेपाली प्रशिक्षार्थीहरूले उद्योगको मापदण्ड अनुसार वास्तविक सीप प्राप्त गर्ने सुनिश्चित गरेको महासंघको भनाइ छ । आर्थिक वर्ष २०८१/०८२ मा एनएभीटी र क्यान महासंघबीचको सहकार्यमा श्रम बजारको मागलाई सम्बोधन गर्ने गरी कम्प्युटर क्षेत्रका दुईवटा आधारभूत सीपमूलक पाठ्यक्रमहरू तयार पारिएका थिए । यी कार्यक्रमहरू दक्ष जनशक्ति उत्पादनलाई प्रत्यक्ष रूपमा आर्थिक आवश्यकता र रोजगारीसँग जोड्ने उद्देश्यले डिजाइन गरिएका हुन् । सम्मान ग्रहण गर्दै क्यान महासंघले आगामी दिनमा पनि सरकारसँग मिलेर सूचना प्रविधि क्षेत्रको सीप विकास र रोजगारी सिर्जनामा अझ सशक्त भूमिका निर्वाह गर्ने प्रतिबद्धता जनाएको छ । नेपाली श्रमशक्तिलाई विश्वव्यापी डिजिटल अर्थतन्त्रमा प्रतिस्पर्धा गर्न सक्ने बनाउन महासंघले आफ्ना कार्यक्रमहरूलाई थप विस्तार गर्ने लक्ष्य राखेको छ ।
लुम्बिनी प्यालेस रिसोर्ट अब लुम्बिनी म्यारियोट रिसोर्ट, आईपीओ पनि निष्काशन हुने
काठमाडौं । रुपन्देहीको सियारी–५ मा विगत सात वर्षदेखि सञ्चालनमा रहेको लुम्बिनी प्यालेस रिसोर्ट अब लुम्बिनी म्यारियोट रिसोर्ट एण्ड स्पाको पाँचतारे ब्राण्डमा सञ्चालन हुने भएको छ। लुम्बिनी प्यालेस रिसोर्ट लिमिटेडले आफ्नो सेवालाई स्तरोन्नती गर्न नयाँ चेन ब्राण्डमा पाँचतारे होटल सञ्चालन गर्न लागेको जानकारी दिएको हो । योसँगै चेन ब्राण्ड म्यारियोट इन्टरनेसनलको राजधानी काठमाडौं बाहिर पहिलो उपस्थिति हुनेछ । त्यससम्बन्धमा ग्लोबल हस्पिटालिटि लाइसेन्सिङ एसएआरएल (म्यारियट इन्टरनेसनल)सँग होटल व्यवस्थापन सम्झौता (एचएमए) भएको लुम्बिनी प्यालेसले जनाएको छ । सम्झौताका क्रममा रिसोर्टका अध्यक्ष दीपक पाण्डेय, प्रबन्ध सञ्चालक रोशन न्यौपाने, रिसोर्टका अरु सञ्चालक एवं व्यवस्थापन, म्यारियट इन्टरनेसनलका एशिया प्यासिफिक हेर्ने प्रमुख सञ्चालन अधिकृत नीरज गोभिल, वरिष्ठ उपाध्यक्ष किरन एण्डिकोट, उपाध्यक्ष जुही रोयलगायत सहभागी भएको जनाइएको छ । लुम्बिनी प्यालेस रिसोर्टले यसै आर्थिक वर्षको अन्तसम्ममा पाँचतारे रिसोर्टको सञ्चालन अनुमति लिने लक्ष्य लिएको छ । नेपालको पर्यटन उद्योगमै नयाँ सुविधाहरुसहित पहिलो र एकमात्र वाटर रिसोर्टको रुपमा सञ्चालन हुने यस रिसोर्टमा अत्याधुनिक, फुटुरिस्टिक एवं उच्चप्रविधियुक्त वाटर फाउन्टेन्स, वाटर शोज, म्युजिकल फाउन्टेन्स, थ्रीडी वाटर स्क्रिन्स, मोटर बोटिङ, मिनि क्रुज, वाटर रेस्टुरेन्ट, वाटर स्पा लगायतका सुविधा उपलब्ध हुने कम्पनीको भनाई छ । साथै, रिसोर्टले प्राथमिक सेयर (आईपीओ) निष्काशन गर्नको लागि आवश्यक तयारी समेत अघि बढाइएको छ ।
७ वर्षपछि एप्पललाई पछि पार्दै अल्फाबेट विश्वको दोस्रो सबैभन्दा मूल्यवान कम्पनी
काठमाडौं । टेक उद्योगको मूल्याङ्कनमा ठूलो फेरबदल देखिएको छ । गुगलको मूल कम्पनी अल्फाबेट इंक ७ वर्षपछि पहिलोपटक आईफोन निर्माता एप्पललाई उछिन्दै विश्वकै दोस्रो सबैभन्दा मूल्यवान कम्पनी बनेको छ । सन् २०१९ पछि पहिलो पटक अल्फाबेटले एप्पललाई पछि पारेको हो । हाल अल्फाबेटको बजार पूँजीकरण ३.८९२ ट्रिलियन डलर पुगेको छ भने एप्पलको मूल्य ३.८६३ ट्रिलियन डलरमा झरेको छ । यसअघि झैं एनभीडीया भने ४.६०४ ट्रिलियन डलरको बजार मूल्यसहित पहिलो स्थानमै कायम छ । बुधबार अल्फाबेटको सेयर २.५१ प्रतिशतले बढेर ३२२.४३ डलरमा बन्द भयो । पछिल्लो एक वर्षमा यस सेयरले ६४.७३ प्रतिशत प्रतिफल दिएको छ । उता एप्पलको सेयर भने ०.७७ प्रतिशतले घटेर २६०.३३ डलरमा बन्द भयो, जसले पछिल्लो एक वर्षमा मात्र ७.४९ प्रतिशत वृद्धि देखाएको छ । पहिलो स्थानमा रहेको एनभीडीयाको सेयर मूल्य भने एक वर्षमा २५.३२ प्रतिशतले बढेको छ । अल्फाबेटको बजार मूल्यमा आएको तीव्र उछालको प्रमुख कारण यसको जनरेटिभ एआई प्लेटफर्म ‘जेमिनी’ को बढ्दो प्रयोग हो । यसका साथै अल्फाबेटअन्तर्गत रहेको वेइमो पनि महत्त्वपूर्ण कारण बनेको छ, जुन अमेरिकाको रोबोट्याक्सी बजारको प्रमुख खेलाडी मानिन्छ । वेइमोले फिनिक्स, सान फ्रान्सिस्को बे एरिया, लस एन्जलस, अटलान्टा र अस्टिनजस्ता सहरहरूमा आम सर्वसाधारणका लागि व्यावसायिक रोबोट्याक्सी सेवा सञ्चालन गरिरहेको छ । सुन्दर पिचाई अल्फाबेटका प्रमुख कार्यकारी अधिकृत (सीईओ) हुन्। भारतबाट इन्जिनियरिङ अध्ययन पूरा गरेपछि उनले अमेरिकाको स्ट्यानफोर्ड विश्वविद्यालयबाट उच्च शिक्षा हासिल गरेका थिए । सामग्री इन्जिनियरका रूपमा करिअर सुरु गरेका पिचाई सन् २००४ मा व्यवस्थापन कार्यकारीका रूपमा गुगलमा आबद्ध भए । सन् २०१५ मा गुगलका सह–संस्थापक ल्यारी पेजले उनलाई गुगलको सीईओ नियुक्त गरे भने सन् २०१९ मा उनी अल्फाबेटका सीईओ बने ।
इटहरीस्थित एनआईसी एशिया बैंकमा अराजक गतिविधि, दोषीमाथि कारबाहीको माग
काठमाडौं । एनआईसी एशिया बैंक लिमिटेडको इटहरी शाखामा एक व्यक्तिले कलुसित मनसायका साथ प्रवेश गरी बैंक कर्मचारीमाथि गालीगलौज तथा अभद्र व्यवहार गरेको घटनाप्रति बैंकले गम्भीर ध्यानाकर्षण जनाएको छ । बैंकका अनुसार उक्त व्यक्तिले शाखा कार्यालयभित्र अराजक गतिविधि गर्दै हुलहुज्जत र होहल्ला मच्चाएको थियो । बैंकजस्तो संवेदनशील र अत्यावश्यक सेवा प्रवाह हुने स्थानमा यस्ता गैरकानूनी तथा उच्छृङ्खल गतिविधि अस्वीकार्य भएको बैंकले स्पष्ट पारेको छ । बैंक कार्यालयभित्र आगजनी तथा जिउज्यानमा हानी पुर्याउने उद्देश्यसहित पेट्रोलजस्ता अति प्रज्वलनशील पदार्थ छर्कनेजस्ता कानूनद्वारा बर्जित गम्भीर क्रियाकलापले बैंकिङ क्षेत्रमै असुरक्षित वातावरण सिर्जना भएको बैंकको भनाइ छ । यस्ता गतिविधिले मुलुकको आर्थिक विकासमा महत्वपूर्ण योगदान पुर्याउँदै आएको बैंकिङ क्षेत्रको काम गर्ने वातावरणमा गम्भीर असर परेको र कर्मचारीहरूले असुरक्षा महसुस गर्न थालेको बैंकले जनाएको छ । कुनै पनि बहानामा कर्मचारीमाथि हुने अभद्र व्यवहार सह्य नहुने उल्लेख गर्दै बैंकले उक्त घटनामा संलग्न व्यक्तिमाथि सम्बन्धित निकायले आवश्यक अनुसन्धान गरी प्रचलित कानूनबमोजिम कारबाही गर्न माग गरेको छ । साथै बैंक तथा बैंकमा कार्यरत कर्मचारीहरूको शान्ति–सुरक्षा सुनिश्चित गर्न सम्बन्धित निकायसँग बैंकले आग्रह गरेको छ ।
श्रम मन्त्रालयद्वारा ‘इपिएस’ परीक्षा पास गरेकाका पक्षमा निर्णय
काठमाडौं । सरकारले दक्षिण कोरिया जाने प्रयोजनका लागि रोजगार अनुमति प्रणाली (इपिएस) परीक्षा उत्तीर्ण गरी रोस्टरमा रहेका तर, विभिन्न कारणले हालसम्म अवसर नपाएका व्यक्तिको पक्षमा तीन वटा निर्णय गरेको छ । श्रम, रोजगार तथा सामाजिक सुरक्षा मन्त्रालयले इपिएस प्रणालीबाट कोरिया जान तयार गरिएको रोस्टरको हालको सीमाले रोजगारीको लागि कोरिया जान इपिएस परीक्षा पास गरेका तर रोजगारी प्राप्त गर्न नसकेका उम्मेदवारसमेत अवसरबाट वञ्चित भएकाले हालको प्रणालीमा देखिएको रोस्टर मान्य अवधि थप गर्ने विषयमा कोरिया सरकार समक्ष कूटनीतिक पहलमार्फत अनुरोध गर्ने निर्णय गरेको छ । त्यसैगरी इपिएस प्रणाली अन्तर्गत कोरिया जाने रोस्टरमा रहेका व्यक्तिका मागलगायत इपिएस प्रणाली अन्तर्गत नेपाली कामदारको कोरिया जाने कोटा वृद्धि गर्ने विषयमा आवश्यक कूटनीतिक पहल गर्ने र इपिएस प्रणालीमार्फत कोरिया जाने रोस्टरमा रहेका व्यक्तिको व्यक्तिगत विवरण रोजगारदातासमक्ष पठाउने प्रक्रिया लगायतका विषयको पारदर्शीता र निष्पक्षता कायम गर्न आवश्यक सुझावसहित सिफारिस गर्न कार्यदल गठन गर्ने समेत निर्णय गरेको हो । यही पुस १८ गतेको मन्त्रिस्तरीय निर्णयलाई कार्यान्व्यनमा लैजान पहल भइरहेको श्रम मन्त्रालयका प्रवक्ता पिताम्बर घिमिरेले बताए ।
