नेपालमा थप १ सय ५० जनामा कोरोना पुष्टि, ६०९ जना डिस्चार्ज
काठमाडौं । पछिल्लो २४ घण्टा यता थप १ सय ५० जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयकाे नियमित प्रेस ब्रिफिङमा स्वास्थ्य तथा जनासंख्या मन्त्रालयका प्रवक्ता जागेश्वर गौतमले २४ घण्टामा नेपालमा १ सय ५० जनामा कोराेना भाइरस देखिएको बताए । गौतमका अनुसार अहिले देशभरीका विभिन्न आईसोलेसनमा ५ हजार ४ सय ७७ जना संक्रमित उपचाररत रहेका छन् । प्रदेश नम्बर १ मा १ सय ८, प्रदेश नम्बर २ मा १ हजार ९ सय १३, बागमती प्रदेशमा ४ सय २१ र गण्डकी प्रदेशमा ३ सय ८० जना संक्रमित उपचाररत रहेका छन् । यस्तै प्रदेश नम्बर ५ मा ३ सय ७०, कर्णाली प्रदेशमा २ सय ९३ र सुदूरपश्चिम प्रदेशमा १ हजार ९ सय ९२ जना संक्रमित उपचाररत रहेका छन् । हाल क्वारेन्टिनमा २१ हजार ७ सय ४ जना रहेका छन् भने पीसीआर विधिबाट मंगलबार ३ हजार ९ सय ६३ जनाको कोरोना परीक्षण भएको छ । आजसम्म ३ लाख २३ हजार ८ सय ३५ जनाको पीसीआर विधिबाट परीक्षण भएको छ । मंगलबार विभिन्न अस्पतालबाट ६ सय ९ जना निको भएर घर फर्किएका छन् । आजसम्म कोरोना मुक्त हुनेको संख्या १२ हजार ४ सय ७७ पुगेको छ । अहिलेसम्म नेपालमा कोरोनाबाट मृत्यु हुनेको संख्या ४० पुगेको छ ।
नबिल बैंकको २० लाख थान ऋणपत्र नेप्सेमा सूचीकृत
काठमाडौं । नबिल बैंकको २० लाख थान ऋणपत्र नेपाल स्टक एक्स्चेञ्ज(नेप्से)मा सूचीकृत भएको छ । बैंकको अंकित तथा चुक्ता मूल्य एक हजार रुपैयाँ कायम भएको २० लाख थान १० प्रतिशत नबिल डिबेन्चर २०८२ (ऋणपत्र) मंगलबार नेप्सेमा सूचीकृत भएको हो । कम्पनीले सर्वसाधारण समक्ष लक्ष्मी क्यापिटल मार्केट लिमिटेड मार्फत् २० लाख थान १० प्रतिशत नबिल डिबेन्चर २०८२ खुल्ला बिक्री आव्हान गरेको थियो । यसरी सर्वसाधारणमा वितरण गरिएको २० लाख थान ऋणपत्र वितरण भई यस स्टक एक्सचेन्जमा सूचीकरण भएको छ । सो सम्बन्धि साउन ६ गते नेपाल स्टक एक्सचेन्ज र नबिल बैंकबीच सम्झौता भएको छ । उक्त सम्झौता पत्रमा स्टक एक्सचेन्जको तर्फबाट प्रमुख कार्यकारी अधिकृत चन्द्र सिंह साउदले र बैंकको तर्फबाट प्रमुख कार्यकारी अधिकृत अनिल केशरी शाहले हस्ताक्षर गरेका छन् । नबिल बंैकले आफ्नो देशभर ११८ वटा शाखा कार्यालयहरु, १७५ एटीएम र १५०० भन्दा धेरै नबिल रेमिट एजेन्टहरु सहित विभिन्न देशमा रहेका ऐजेन्टको बृहत सन्जाल मार्फत निरनतर गुणस्तरिय सेवा प्रवाह गरिरहेको छ ।
सिटिजन्स बैंकद्वारा बाल विकास समाजलाई आर्थिक सहयोग प्रदान
काठमाडौं । सिटिजन्स बैंकले करिव २८ वर्ष देखि बाल अधिकारबाट वन्चित भएका नेपाली बालबालिकाहरुको चौतर्फी विकाश गर्ने उदेश्यका साथ स्थापित बाल विकास समाजलाई १ लाख ५० हजारको आर्थिक सहयोग उपलब्ध गराएको छ । बैंकको केन्द्रिय कार्यालय नारायणहिटी पथमा आयोजित एक कार्यक्रममा बैंकद्वारा सो संस्थालाई रू एक लाख पचास हजारको चेक हस्तान्तरण गरिएको हो । उक्त रकमबाट १५ जना गरीब तथा जेहन्दार विद्यार्थीलाई छात्रवृत्ति प्रदान गरिने कुरा सो संस्थाले जानकारी दिएको छ । विगत ९ वर्षदेखि बैंकले आफ्नो वार्षिक कार्यतालिका अनुरुप सामाजिक रूपान्तरणका लागि कार्य गर्ने बाल विकास समाजलाई आर्थिक सहयोग उपलब्ध गराउँदै आएको छ । आगामी दिनहरुमा पनि बैंकले संस्थागत सामाजिक उतरदायित्व कार्यक्रम अन्तर्गत सामाजिक, आर्थिक,सांस्कृतिक,शैक्षिक आदि जस्ता क्षेत्रमा सकारात्मक परिवर्तन ल्याउनका निम्ति विभिन्न कार्यक्रम संचालन गर्ने कुरा बैंकले जानकारी दिएको छ ।
राष्ट्रिय वाणिज्य बैंक कर्मचारी संघ नेपालको ३१ औं वार्षिकोत्सब कार्यक्रम सम्पन्न
काठमाडौं । राष्ट्रिय वाणिज्य बैंक कर्मचारी संघ नेपालको ३१औं वार्षिकोत्सव कार्यक्रम विश्व महामारीको रुपमा फैलिएको कोभिड–१९ को कारण सामाजिक दुरी कायम गरी यस वर्ष सरल रुपमा सम्पन्न भएको छ । वार्षिकोत्सवको अवसरमा संघका अध्यक्ष श्री हेमराज सुवेदी, बैंक, बिमा तथा वित्तीय क्षेत्र कर्मचारी संघका अध्यक्ष श्री नारायणप्रसाद सुवेदी, संघका पूर्व अध्यक्ष वेतबहादुर लावतीले संयुक्त रुपमा संघको झण्डोत्तलन गरेका थिए । संघको वािर्षकोत्सवको अवसरमा रा.वा. बैंकको केन्द्रीय कार्यालय सिंहदरबारप्लाजा परिसरमा बैंकका प्रमुख कार्यकारी अधिकृत किरणकुमार श्रेष्ठले वृक्षारोपण गरे । त्यस्तै शाखा कार्यालय दरबारमार्ग परिसरमा संघका अध्यक्ष हेमराज सुवेदी, तालिम तथा विकास विभागका प्रमुख दीपकराज न्यौपाने र दरबारमार्ग शाखाका प्रबन्धक दीनेश न्यौपानेले संयुक्त रुपमा वृक्षारोपण गरेका थिए । वार्षिकोत्सवको अवसरमा प्रादेशिक कार्यालयहरुको परिसरमा समेत वृक्षारोपण गरिएको थियो भने बैंकको केन्द्रीय कार्यालय सिंहदरबारप्लाजा स्थित सम्पूर्ण कर्मचारीलाई मास्क वितरण गरिएको थियो ।
हिमालयन बैंकद्धारा कान्ती बाल अस्पताललाई १ लाख ४२ हजार सहयाेग
काठमाडौं । हिमालयन बैंकले आफ्नो संस्थागत सामाजिक उत्तरदायित्व अन्तर्गत माहाराजगंज, काठमाडौंस्थित कान्ती बाल अस्पताललाई सहयोग प्रदान गरेको छ । बैंकले उक्त अस्पतालमा आउने सेवाग्राहीको सुबिधाको लागि अस्पताल हातामा रहेको उच्च प्रबिधियुक्त पानी प्रशोधन प्रणाली ¥यापिड स्यान्ड फिल्टर, हस्पिटल भेसल र यु.एफ फिल्ट्रेसनको मर्मत–संभार गरी अस्पताललाई हस्तान्तरण गरेको छ । उक्त मेशिन मर्मत संभार गर्न बैंकले १ लाख ४२ हजार ९ सय ४५ रुपैयां प्रदान गरेको छ । बैंकका तर्फबाट बैंकका माहाराजगंज शाखा प्रबन्धक अभय बहादुर शाहले उक्त मेसिनको मर्मत–संहार पछि अस्पतालका निर्देशक डा. कृष्ण प्रसाद पौडेललाई हस्तान्तरण गरेका थिए । बैंकका तथा अस्पतालका अन्य कर्मचारीहरु पनि सो कार्यक्रममा उपस्थिति रहेका थिए ।
७ वाणिज्य बैंकको नयाँ व्याजदरः निक्षेपमा सबैभन्दा बढी व्याज प्राइम बैंकमा
काठमाडौं । नयाँ आर्थिक वर्ष लागेसँगै ७ वटा वाणिज्य बैंकले नयाँ व्याजदर सार्वजनिक गरेका छन् । नयाँ आर्थिक वर्ष लागेसँगै व्याजदर सार्वजनिक गर्ने बैंकहरुमा ग्लोबल आइएमई, एभरेष्ट, बैंक अफ काठमाण्डू, प्राइम, सनराइज, एनसीसी र लक्ष्मी बैंक छन् । नयाँ व्याजदरमा केही बैंकले व्याज घटाएको जानकारी दिएका छन् । अहिले प्रकाशित भएका नयाँ व्याजदरमा निक्षेपमा सबैभन्दा बढी व्याज दिने सुचना प्राइम बैंकको छ । प्राइमले बचत खातामा साढे ५ प्रतिशतसम्म व्याज दिने सुचना प्रकाशित गरेको छ । मुद्दति निक्षेपमा भने ८.२५ प्रतिशतसम्म व्याज दिने सुचनामा उल्लेख छ । कर्जामा भने आधार दर (बेस रेट) मा ४ देखि ६ प्रतिशतसम्म प्रिमियम थप गरेर व्याजदर तय गरिने बैंकले उल्लेख गरेको छ । प्राइम बैंकको आधार दर ९.८५ छ । एनसीसी बैंकले सबै प्रकारका बचत निक्षेपमा ५ प्रतिशत व्याज दिने सुचना सार्वजनिक गरेको छ । मुद्दति खातामा भने ८.२५ प्रतिशतसम्म व्याज दिने एनसीसी बैंकले जानकारी दिएको छ । एनसीसी बैंकबाट ऋण लिदा कर्जामा भने उसको आधार दरमा २ देखि ५ प्रतिशतसम्म प्रिमियम थप गरेर व्याज तिर्नुपर्छ । उसको आधार दर १०.३६ प्रतिशत छ । लक्ष्मी बैंकले बचत खातामा ४ देखि ४.५ प्रतिशतसम्म व्याज दिने भएको छ । यस्तै, मुद्दति निक्षेपमा भने ७.२५ देखि ७.७५ प्रतिशतसम्म व्याज दिनेछ । लक्ष्मी बैंकले कर्जाको व्याज भने आधार दरमा २ देखि ५ प्रतिशत प्रिमियम थप गरेर लिने जानकारी गराएको छ । सो बैंकको आधार दर ९.२३ प्रतिशत छ । सनराइज बैंकले बचतमा साढे २ प्रतिशतदेखि ४ प्रतिशतसम्म व्याज दिने गरी नयाँ सुचना सार्वजनिक गरेको छ । मुद्दति निक्षेपमा भने ७.५ प्रतिशतसम्म व्याज दिने सुचनामा उल्लेख छ । सो बैंकबाट कर्जा लिदा भने आधार दरमा ५ प्रतिशतको हाराहारीमा प्रिमियम तिर्नुपर्छ । सनराइज बैंकको आधार दर ८.९५ प्रतिशत छ । बैंक अफ काठमाण्डूले बचत खातामा ३ देखि ४.५ प्रतिशतसम्म व्याज दिने सुचना प्रकाशित गरेको छ । मुद्दति निक्षेपमा भने ७.२५ प्रतिशतसम्म व्याज दिइनेछ । सो बैंकबाट कर्जा लिँदा आधारमा ५ प्रतिशतसम्म प्रिमियम थप तिर्नुपर्छ । बैंक अफ काठमाण्डूको आधार दर अहिले ८.९१ प्रतिशत छ । एभरेष्ट बैंकले बचत खातामा ३.५ प्रतिशतदेखि ५ प्रतिशतसम्म व्याज दिने भएको छ । सो बैंकले मुद्दति निक्षेपमा भने ६.५ प्रतिशतसम्म व्याज दिनेछ । एभरेष्ट बैंकबाट कर्जा लिदा भने आधार दरमा ५ प्रतिशतसम्म प्रिमियम थप गरेर तिर्नुपर्छ । अहिले एभरेष्ट बैंकको आधार दर ७.९५ प्रतिशत छ । ग्लोबल आइएमई बैंकले बचत निक्षेपमा ३ देखि ५ प्रतिशतसम्म व्याज दिने सुचना प्रकाशित गरेको छ । यस्तै, मुद्दति निक्षेपमा भने ७.७५ प्रतिशतसम्म दिने बैंकले जानकारी गराएको छ । ग्लोबल आइएमई बैंकबाट कर्जा लिदा भने आधार दरमा १ देखि ५ प्रतिशतसम्म प्रिमियम थप गरेर तिर्नुपर्छ । अहिले सो बैंकको आधार दर ९.४१ प्रतिशत छ ।
नेकपा स्थायी कमिटी बैठक साउन १३ गतेसम्म स्थगित
काठमाडाैं । नेपाल कम्युनिस्ट पार्टी (नेकपा) स्थायी समिति बैठक बाढी र पहिरोमा परेकाको राहत र उद्धारमा जुट्ने प्रस्ताव पारित गर्दै स्थगित भएको छ। मंगलबार प्रधानमन्त्रीको सरकारी निवास बालुवाटारमा बसेको स्थायी कमिटी बैठकले राहत र उद्धारमा जुट्ने प्रस्ताव पारित गर्दै आजका लागि स्थगित भएको प्रवक्ता नारायणकाजी श्रेष्ठले जानकारी दिए। नेकपाले बाढी र पहिरोमा परेकाको राहत र उद्धारमा जुट्न सबै नेता तथा कार्यकर्तालाई निर्देशनसमेत दिएको छ। नेकपाले सरकारलाईसमेत राहत र उद्धारमा जुट्न आग्रह गरेको छ। अर्को बैठक असार १३ गते बिहान ११ बजे बस्नेगरी स्थगित भएको प्रवक्ता श्रेष्ठले जानकारी दिए। मंगलबारको बैठकमा पार्टी अध्यक्षसमेत रहेका प्रधानमन्त्री केपी ओली भने उपस्थित थिएनन्। बैठकको अध्यक्षता अर्का अध्यक्ष पुष्पकमल दाहाल ‘प्रचण्ड’ले गरेका थिए।
स्क्रब टाइफसबाट चितवनमा एकजनाकाे मृत्यु
चितवन । भरतपुर अस्पतालमा उपचाररत् स्क्रब टाइफसका एक विरामीको मृत्यु भएको छ । मृत्यु हुनेमा भरतपुर महानगरपालिका–१ ठिमुराका ३२ वर्षीय पुरुष रहेका छन् । अस्पतालका सूचना अधिकारी लिलाधर पौडेलका अनुसार गत असार २९ गते उनी उपचारका लागि अस्पताल भर्ना भएका थिए । ज्वरोसँगै स्वासप्रश्वास, मुटु र कलेजोमा समस्या देखिएका उनको आज बिहान मृत्यु भएको सूचना अधिकारी पौडेलले जानकारी दिए । जिल्लाको एक मेडिकल कलेजमा उपचार गरिरहेका ती विरामीको खर्चको अभाव भएपछि भरतपुर अस्पताल ल्याइएको बताइएको छ । उनका अनुसार मृत्युको कारणमा स्क्रब टाइफसलगायत अन्य समस्या उल्लेख गरिएको छ । स्वास्थ्य कार्यालयका प्रमुख दीपक तिवारीले गत आवमा डेङ्गुबाट मृत्यु भएका तीन जनामध्ये एक जनामा स्क्रब टाइफस पनि देखिएको जानकारी दिए । उनका अनुसार मुसाको जुम्राले टोकेर स्क्रब टाइफस रोग लाग्छ । मुसाको जुम्रा झारमा झर्ने र त्यसबाट मानिसमा टाँसिएर यसले टोक्छ । चिकित्सकका अनुसार स्क्रब टाइफस रोग लागेमा १०४ डिग्री ज्वरो आउने, टाउको दुख्ने, विभिन्न ठाउँमा रातो डाबर आउने, शरीरका विभिन्न अङ्ग दुख्ने लक्षण देखिन्छ । मुख्य गरी मुसाको नियन्त्रण गर्ने तथा झारका काम गर्दा सावधानी अपनाउनुपर्छ ।
