नेप्से परिसूचक र कारोबार रकम दुबैमा वृद्धि, ५ कम्पनीको एक करोड बढीको सेयर किनबेच
काठमाडौं । लगातार ओरालो लागिरहेको बजार बुधबार भने एकाएक उकालो लागेको छ । दिनभरको बजारमा नेप्से परिसूचक र कारोबार रकम दुबैमा वृद्धि भएको छ । अघिल्लो दिनको तुलनामा नेप्से परिसूचक ८.०४ अंकले बढेर ११८८ अंकमा पुगेको छ । त्यस्तै, कुल १६९ कम्पनीको २५ करोड रुपैयाँ बढीको सेयर किनबेच भएको छ । जुन रकम मंगलबारको तुलनामा ६ करोड रुपैयाँ बढी हो । बजारमा विभिन्न ५ कम्पनीको एक करोड रुपैयाँ बढीको सेयर किनबेच भएको छ । सो मध्ये सबैभन्दा बढी छिमेक लघुवित्त विकास बैंकको एक करोड १४ लाख रुपैयाँ बराबरको सेयर कारोबार भएको छ । त्यस्तै, नेशनल लाइफ इन्स्योरेन्स कम्पनी, नागबेली लघुवित्त विकास बैंक, नबिल बैंकको प्रमोटर सेयर र सानिमा माई हाइड्रोपावरको एक करोड माथिको कारोबार भएको हाे । बजारमा कारोबारमा आएका सबैसमूहको परिसूचक हरिया भएका छन् । सबैभन्दा बढी बीमा ६० अंकले उकालो लागेको छ । त्यस्तै, बैकिङ, फाइनान्स र अन्य समूह सामान्य अंकले उकालो लागेका छन् भने बाँकी बाँकी समूह दोहोरो अंकले बढेका छन् ।
१७ प्रतिशत बोनस पछि वेष्ट्रन डेभलपमेन्ट बैंकको सेयर मूल्य समायोजन
काठमाडौं । वेष्ट्रन डेभलपमेन्ट बैंकको १७.४१३ प्रतिशत बोनस पछिको सेयर मूल्य समायोजन भएको छ । नेप्सेले बुधबार नमस्ते वित्तीय संस्थासँग मर्ज भर्इ वेष्ट्रन डेभलपमेन्ट बैंककाे नामबाट काराेबार गरिरहेकाे यस कम्पनीकाे मूल्यमा समायोजन गरेको हो । समायोजन पश्चात कम्पनीको सेयर मूल्य प्रतिकित्ता २७० रुपैयाँ रहेको छ । जसको आधार मूल्य प्रतिकित्ता ३०० रुपैयाँ रहेको थियो ।
साउन ४ गतेदेखि नागवेली लघुवित्तको हकप्रद सेयरकाे बिक्री खुला
काठमाडौं । नागवेली लघुवित्त वित्तीय संस्था लिमिटेडले आगामी साउन ४ गतेदेखि हकप्रद सेयर निष्काशन गर्ने भएको छ । संस्थाले चुक्तापुँजी बढाउन १ बराबर १ अनुपातमा(अर्थात १०० प्रतिशत) हकप्रद सेयर बिक्री गर्न लागेको हो । लघुवित्तले ७ करोड ६६ लाख ४६ हजार रुपैयाँ बराबरको ७ लाख ६६ हजार ४६३ कित्ता हकप्रद बिक्री प्रबन्धक एनएमबि क्यापिटल मार्फत निष्काशन गर्न लागेको हो । सो मात्राको हकप्रदको लागि इच्छुक सेयरधनीले भदाै ७ गतेसम्म आवेदन दिन पाउने छन् । हाल संस्थाको चुक्ता पुँजी ७ करोड ६६ लाख रुपैयाँ रहेको छ । सो मात्राको हकप्रद जारी पश्चात संस्थाको पुँजी १५ करोड ३२ लाख रुपैयाँ नाघ्ने छ ।
