सेयर बजारमा विकास बैंक खोज्दा ईपीएस पर्यो प्राथमिकतामा, कुनको कति ?
काठमाडौं । आज (बिहीबार) लगाानीकर्ताको मुख्य लगानीको क्षेत्र विकास बैंक देखिएका छन् । विकास बैंकहरुमा पनि प्रति सेयर आम्दानी (ईपीएस) बढी भएका बैंकहरुमा लगानीकर्ताको आकर्षण बढेको हो । बिहीबार मात्रै सेयर बजारमा विकास बैंक सब-इन्डेक्स सबैभन्दा बढेको छ । आज विकास बैंकको सब–इन्डेक्स हिजो बुधबारको तुलनामा ८९ दशमलब ५७ अंक अर्थात २ दशमलब १२ प्रतिशतले बढेको छ । नेप्सेमा सुचिकृत १६ वटै विकास बैंकहरुको सेयर मूल्य बुधबारको तुलनामा अधिकतम १८ रुपैयाँसम्म बढेको छ । विशेष गरेर सबैभन्दा बढी ईपीएस भएका विकास बैंकहरुको सेयरमूल्य आज धेरै बढेको देखिएको हो । विकास बैंकहरुको सेयर मूल्य बुधबारको तुलनामा १ रुपैयाँदेखि १८ रुपैयाँसम्म बढेको देखिएको छ । आज सबैभन्दा बढी सेयरमूल्य बढ्नेमा महालक्ष्मी विकास बैंक देखिएको छ । जसको प्रतिसेयर आम्दानी १६.१० रुपैयाँ छ । यस्तै, सबैभन्दा बढी ईपीएस भएको कामना सेवा बैंकको आज सेयर मूल्य आज १२ रुपैयाँले बढेको छ । गरिमा विकास बैंकको १० रुपैयाँ बढेर ५१४ रुपैयाँ सेयर मूल्य कायम भएको छ । ज्योति विकास बैंकको १० रुपैयाँ बढेर ४४५ रुपैयाँ कायम भएको छ । तर, ईपीएस कम भएको कर्पोरेट डेभलपमेन्ट बैंकको सयर मूल्य आज ३० रुपैयाँले घटेको छ । जसको इपीएस ६.७१ रुपैयाँ मात्रै छ । आज कर्पोरेटको सेयर मूलय ८ सय रुपैयाँमा झरेको छ । मुक्तिनाथ विकास बैंकको सेयर मूल्य ११ रुपैयाँले बढेको छ । बैंकको सेयर मूल्य ६२५ रुपैयाँ पुगेको छ । जसको ईपीएस २७.८७ रुपैयाँ छ । कुन विकास बैंकको ईपीएस कति ? विकास बैंकले चालु आर्थिक वर्षको तेस्रो त्रैमासमा सार्वजनिक गरेको वित्तीय विवरण अनुसार सबैभन्दा बढी ईपीएस भएको विकास बैंकका रुपमा कामना सेवा विकास बैंक रहेको छ । जसको प्रति सेयर आम्दानी २९.४७ रुपैयाँ रहेको छ । आज सो बैंकको सेयरमूल्य ५२५ रुपैयाँ पुगेको छ । यस्तै, दोस्रो बढी ईपीएस हुने विकास बैंककाे रुपमा मुक्तिनाथ विकास बैंक छ । बैंकको ईपीएस २७.८७ रुपैयाँ रहेको छ । यस्तै, गरिमा विकास बैंकको ईपीएस २४.६० रुपैयाँ रहेको छ । यस्तै, एक्सेल डेभलपमेन्ट बैंकको ईपीएस १९.३६ रुपैयाँ छ । आज सो बैंकको सेयर मूल्य ७७९ पुगेको छ । आज एक्सेलको सेयर मूल्य ५ रुपैयाँ बढेको छ । महालक्ष्मी विकास बैंकको सेयर मूल्य ४२३ छ । यो बैंकको ईपीएस भने १६.१० रुपैयाँ छ । के हो ईपीएस ? प्रतिसेयर आम्दानी (ईपीएस) लगानीकर्तालाई प्रतिफल दिने आधार हो । लगानीकर्ताले कम्पनीको ईपीएसकै आधारमा पनि लगानी गर्ने गरेका छन् । करपछिको नाफालाई कुल सेयर संख्याले भाग गर्दा आउने प्रतिफल नै प्रति सेयर आम्दानी हो । प्रति सेयर आम्दानीले कम्पनीले प्रत्येक सेयरबाट संकलित पूँजी परिचालन गरेर कमाएको नाफालाई वित्तीय विवरणमा राख्छ । कम्पनीको सेयरमा लगानी गर्दा त्यो कम्पनीले लगानीको प्रतिफल कति दिन्छ भन्ने आधारमा लगानी गर्ने अभ्यास छ । तर, ईपीएस नै लगानीका लागि सबैथोक हुन सक्दैन । कतिपय थोरे ईपीएस भएका कम्पनीको सेयर मूल्य धेरै पनि छ । आज सेयर बजारमा भने बढी ईपीएस भएका विकास बैंकमा नै लगानीकर्ताको आकर्षण देखिएको हो ।
एभरेष्ट इन्स्योरेन्ससहित एक लघुवित्तको बोनस सेयर सूचीकृत
काठमाडौं । नेपाल स्टक एक्स्चेञ्ज(नेप्से)मा एभरेष्ट इन्स्योरेन्ससहित एक लघुवित्तको बोनस सेयर सूचीकृत भएको छ । आज(असार २४ गते) मात्रै एभरेष्ट इन्स्योरेन्स कम्पनी र सिभिल लघुवित्तको कूल ९ लाख ५८ हजार ६२० कित्ता बोनस सेयर सूचीकृत भएको हो । जसमध्ये एभरेष्ट इन्स्योरेन्सको ८ प्रतिशत अर्थात ८ लाख ७६ हजार ७४४ कित्ता बोनस सेयर नेप्सेमा थपिएको छ । त्यस्तै, सिभिल लघुवित्तको ३.५ प्रतिशत अर्थात ८१ हजार ८७६ कित्ता बोनस सेयर सूचीकृत भएको हो । यससँगै यी दुबै कम्पनीको सेयर सम्बन्धित सेयरधनीको डिम्याट खातामा हस्तान्तरण हुने छ । र, दोश्रो बजारमा किनबेच गर्न मिल्ने छ ।
बोटलर्स नेपाल (तराई) भन्छ: ५ वर्षसम्म पनि लाभांश लिन आएनन् लगानीकर्ता
काठमाडौं । बोटलर्स नेपाल (तराई)का सेयरधनीले ५ वर्ष पुग्दा पनि लाभांश नबुझेका छैनन् । केही सेयरधनीले हालसम्म पनि आर्थिक वर्ष २०७१/७२ सालको लाभांश लिन नगएका कम्पनीले बताएको हो । कम्पनीका अनुसार गत २०७२ साल पुस २८ गते सम्पन्न कम्पनीको आर्थिक वर्ष २०७१/७२ को पारित लाभांश सेयरधनीले लिएका छैनन् । उक्त लाभांश सम्बन्धित सेयरधनीले वा निजको हकवालाले ५ वर्ष पुगिसक्दा पनि हालसम्म लिन नआएको तथा दावी समेत नपरेको कम्पनीको भनाई छ । यससँगै उक्त लाभांश भुक्तानी गर्न कम्पनीले सेयरधनीलाई आग्रह गरेको छ । जसको लागि लगानीकर्ताले कम्पनीको सेयर रजिष्ट्रारको कार्यालय काठमाडौंको नक्सालस्थित नबिल इन्भेष्टमेन्ट बैंकिङ्गमा सम्पर्क गर्न सक्नेछन् । उनीहरुले आफ्नो सेयर प्रमाणपत्रका साथ परिचय पत्र लिई आजको मितिबाट एक महिनाभित्रमा सम्पर्क गर्नुपर्ने हुन्छ । यदि सो अवधिभित्र लाभांश लिन नगएमा उक्त लाभांश रकम लगानीकर्ता संरक्षण कोषमा जम्मा हुने कम्पनीले जानकारी गराएको छ । सो कोष कम्पनी ऐन २०६३ को दफा १८३ बमोजिम स्थापित भएको हो ।
