नेप्से परिसूचक ३५ दशमलव ३७ अङ्क घट्याे
काठमाडौं । धितोपत्र बजारमा शेयर कारोबार मापक नेप्से परिसूचक आज ओरालो लागेको छ । नेपाल स्टक एक्सचेञ्जका अनुसार नेप्से परिसूचक ३५ दशमलव ३७ अङ्कले ओरालो लागेर दुई हजार एक सय ५० दशमलब ९९ मा सीमित भएको छ । आजको कारोबारमा ठूला कम्पनीको शेयर कारोबार मापन गर्ने सेन्सेटिभ परिसूचक नौ दशमलब ७६ अङ्कले ओरालो लागेर चार सय दुई दशमलबव ७५ मा सीमित भएको छ । कारोबार भएका कूल १३ उपसमूहमध्ये एक उपसमूहको मात्रै शेयर मूल्यमा बृद्धि भएको छ भने १२ उपसमूहको शेयर मूल्यमा गिरावट आएको छ । आजको कारोबारमा विभिन्न कम्पनीका कूल एक करोड ३३ लाख ४२ हजार नौ सय ९६ कित्ता शेयर रु पाँच अर्ब ९७ करोड २२ लाख ८६ हजार चार सय ८१ मूल्यमा खरिद बिक्री भएका छन् । कारोबार रकमका आधारमा हिमालयन लायफ इन्स्योरेन्स शीर्ष स्थानमा छ । उक्त कम्पनीको रु ८३ करोड ७० लाख ३६ हजार सात सय ९१ बराबरको कारोबार भएको छ । त्यस्तै, शिवम् सिमेन्ट रु २८ करोड २२ लाख ६७ हजार पाँच सय ५९, सोल्टी होटल रु २३ करोड ५६ लाख ३८ हजार नौ सय ९९, एशियन लाइफ इन्स्योरेन्स रु १९ करोड ५० लाख ७२ हजार र आइजीआई प्रुडेन्सियल इन्स्योरेन्स रु १७ करोड २७ लाख ७६ हजार दुई सय ७४ बराबरको कारोबार भई शीर्ष पाँचभित्र पर्न सफल भएका छन् । नेप्सेका अनुसार हिमालयन लाइफ इन्स्योरेन्स बीपीडब्ल्यू लघुवित्त र सिटी होटलको शेयर मूल्यमा १० प्रतिशतले बृद्धि भई सकारात्मक सर्किट लागेको छ । त्यस्तै, सामुदायिक लघुवित्त आठ दशमलब १६ र शुभम् पावर कम्पनीको शेयर मूल्य आठ दशमलव ११ प्रतिशतले बढेको छ । साथै इन्ग्वा हाइड्रोपावर छ दशमलब ६४, खप्तड लघुवित्त छ दशमलब १५, तारागाउँ रिजेन्सी होटल छ दशमलब ११, मकर जीतमाया सुरी हाइड्रोपावर पाँच दशमलब ८६ र ग्लोबल आइएमई लघुवित्तको शेयर मूल्य पाँच दशमलव ७१ प्रतिशतले घटेको छ ।
४३ कम्पनीमा केदार शर्माको २ करोड कित्ता सेयर, यी हुन् २४ जना व्यवसायिक पार्टनर
काठमाडौं । शिवशिखर बहुउद्देश्यीय सहकारी संस्था र श्री तुलसी बहुमुखी सहकारी संस्थाको रकम हिनामिना गरेको आरोप लागेका केदारनाथ शर्माले विभिन्न ४३ वटा कम्पनीमा लगानी गरेको भेटिएको छ । उनले दुई सहकारी संस्थाको कूल १२ अर्ब २३ करोड ५१ लाख रुपैयाँ हिनामिना गरेर विभिन्न ४३ वटा कम्पनीमा लगानी गरेका हुन् । बचतकर्ताको रकम हिनामिनाकै आरोपमा फरार रहेका उनलाई प्रहरीले सोमबार बाँकेकाे नेपालगञ्ज उपमहानगरपालिका वडा नं. १५ बाट पक्राउ गरेको थियो । उनलाई नेपाल प्रहरीले भारतीय प्रहरीको सहयोगमा पक्राउ गरेको बुझिएको छ । अहिले उनीसहित उनकी श्रीमती गिता शर्मा र सहकारीका सञ्चालकहरु पुष्कर मल्ल र अनिशराज भण्डारी प्रहरीको नियन्त्रणमा छन् । शर्माले सहकारी संस्थामा रहेको निक्षेप रकमबाट आफु र आफ्ना नजिकका व्यक्तिहरुको नाममा जमिन र सवारीसाधन खरिद गरी सर्वसाधारणको बचत रकम दुरुपयोग गरी सहकारी संस्थालाई नोक्सानी पुर्याएको भन्दै सीआईबीले उनलाई पक्राउ गरेको हो । सीआईबीका अनुसार शर्माले शिवशिखर बहुउद्देश्यीय सहकारीको १० अर्ब ७७ करोड ७६ लाख ३७ हजार ५२६ रुपैयाँ र श्री तुलसी बहुमुखी सहकारीबाट एक अर्ब ४५ करोड ७५ लाख ४५ हजार ९९१ रुपैयाँ हिनामिना गरेका छन् । प्रचलित सहकारी ऐन र नियमावली विपरित सहकारी संस्थाबाट आफू र आफ्ना नजिकका व्यक्तिहरुको नाममा सञ्चालित ४३ वटा विभिन्न कम्पनीहरुमा ऋण लगानी गरी उक्त रकमको साँवा व्याजसमेत सहकारी संस्थामा फिर्ता नगरेको पाइएको हो । शिखर अर्गनाईजेशनका सञ्चालक समेत रहेका उनले विभिन्न क्षेत्रका ४३ कम्पनीमा ठूलो रकम लगानी गरेको भेटिएको हो । ती कम्पनीहरुमा अन्य २४ जनाले पनि लगानी गरेका छन् । उनको मुख्य लगानी रहेको कम्पनीहरुमा उनकी श्रीमती गिता शर्मा, शुसिला बानियाँ, तेज बहादुर तामाङ, लिलानाथ गौतम, कमल शाह, अमृता श्रेष्ठ, सुदर्शन कपाली, पुस्कर मल्ल, अनिल आचार्य, सुमन कुमार लुइँटेल, राजु शाखकर्मी, बिक्रम कुवँर र छविलाल बिकको पनि लगानी छ । यस्तै, ती कम्पनीहरुमा दिकेन्द्र कुमारी गिरी, सरिता गिरी, जुठे राउत क्षेत्री, अमृत गिरी, सुनिता खड्का, प्रदिप भट्टराई, बालकृष्ण ढकाल, राजकुमार शर्मा, डम्बर बहादुर तामाङ, धन बहादुर तामाङ र दिपक लामाको लगानी देखिएको छ । अधिकांश कम्पनीहरुमा उनको एकल लगानी देखिएको छ भने केहीमा उनले साझेदारहरुसँग मिलेर काम गरेको देखिन्छ । उनको १९ वटा कम्पनीमा एकल लगानी देखिएको छ भने ९ वटा कम्पनीमा उनकी श्रीमती गिता शर्माको एकल लगानी छ । अन्य कम्पनीमा भने शर्मा र गितासहित अन्य लगानीकर्ताको संयुक्त स्वामित्व भेटिएको छ । उनी र उनको श्रीमती शर्माको ती कम्पनीहरुमा १ करोड ९१ लाख ३६ हजार कित्ता सेयर स्वामित्व देखिएको छ । सिआईबीका प्रवक्ता नवराज अधिकारीका अनुसार उनले ती सबै कम्पनीहरुमा सहकारीका बचतकर्ताको बचत प्रयोग गरेको देखिएको छ । सो सहकारीमा एकैजनाको २ करोड रुपैयाँसम्मको बचत छ । ती कम्पनीमा उनले ८ अर्ब रुपैयाँ बढी लगानी गरेको देखिएको छ । उनले आफू र आफ्ना परिवारका सदस्यका नाममा घरजग्गा, सवारी साधनलगायत खरिद गरेर समेत सर्वसाधारणको निक्षेपको दुरुपयोग गरेको सीआईबीले जनाएको छ । उनको ती कम्पनीमा साढे डेढ करोड कित्ता सेयर स्वामित्व छ । ती कम्पनीमा ८ अर्ब बढी लगानी गरेको देखिएको सिआईबीको भनाइ छ । अझै पनि उनको सम्पत्तिको विषयमा अनुसन्धान भइरहेको प्रवक्ता अधिकारीले बताए । उनले गोर्खा टि एण्ड कफी इण्डष्ट्रिज, गोर्खा वेभरेज, शिखर मेसेनरी एण्ड अटोमोबाइल्स, नटराज एग्रो, तुलसी मोटर पम्प इण्डष्ट्रि, तुलसी कृषि अनुसन्धान केन्द्र, गार्डेन मार्ट, शिवशिखर इन्भेष्टमेन्ट, उपकार मडिया, उपकार गार्मेन्ट, शिखर मिनरल वाटर एण्ड वेभरेज, उपकार आयल, हिमालयन लायन कन्ष्ट्रक्सन, तुलसी फुड, नटराज फुड, उपकार फाउण्डेसन लगायत कम्पनीमा लगानी गरेका छन् । सीआईबीका अनुसार सहकारीको बचत हिनामिना गरेका ६/७ जनालाई प्रहरीले खोजिरहेको छ । यो हालसम्मकै ठूलो सहकारी ठगी हो ।
प्रेम गीत ३ डिशहोममा प्रदर्शन हुँदै
काठमाडौं । नेपाल सहित विदेशमा समेत एकै साथ प्रदर्शन भएको सर्वाधिक सफल नेपाली चलचित्र ‘प्रेम गीत ३’ डिशहोममा एक्सक्लुसिभ प्रर्दशन हुने भएको छ । विभिन्न कारणवस हल सम्म गएर यो चलचित्र हेर्न छुटाउनु भएका दर्शकहरुले अव डिशहोमको सिनेमाघरमा सपरिवार एकै साथ हेर्न सक्ने जनाएको छ । ‘प्रेम गीत ३’ यहि असार १५ गते सिनेमाघर च्यानल नं. १०८ मा प्रदर्शन हुँदैछ । सिनेमाघरमा दैनिक ८ शो विहान १, ४, ७, १०, दिउँसो १, ४, साँझ ७ र राती १० वजे प्रदर्शन हुनेछ । यस्तै डिशहोमको एक्सभिओडीमा मा पनि यो चलचित्र उपलव्ध हुनेछ । यो चलचित्र उपलव्ध भए पछि आफुले चाहेको समयमा खरिद गरेर हेर्न सकिने छ । डिशहोममा उपलब्ध यो सेवाले नेपाली चलचित्रहरु सपरिवार तथा आफुले चाहेको समयमा हेर्न सकिने भएको कारण नेपाली चलचित्र प्रति दर्शकहरुको चासो र माया बढ्नुका साथै नेपाली चलचित्रको विकासमा समेत टेवा पुग्नेमा कम्पनीले विश्वास लिएको छ ।
ललिता निवास जग्गा प्रकरणका पक्राउ सरकारी वकील कार्यालय पुगे
काठमाडौं । ललिता निवास जग्गा प्रकरणमा पक्राउ परेकालाई म्याद थपका लागि जिल्ला सरकारी वकीलको कार्यालय, काठमाडौं लगिएको छ । बुधबार नेपाल प्रहरीले ललिता निवास जग्गा प्रकरणमा पक्राउ परेकालाई म्याद थपका लागि जिल्ला सरकारी वकीलको कार्यालय, काठमाडौं लगेको हो । व्यवसायी मिनबहादुर गुरुङ, पूर्वनिर्वाचन आयुक्त सुधिरकुमार शाहलगायतलाई प्रहरीले हिरासतमा राखेर अनुसन्धान गर्न म्याद थपका लागि जिल्ला सरकारी वकिल कार्यालयमा पुर्याएको हो । ललिता निवासको सरकारी जग्गा व्यक्तिको नाममा नामसारी गर्दा सरकारी कागजात किर्ते गरेको आरोपमा सीआईबीले अनुसन्धान गरिरहेको छ । सरकारी लिखित कीर्तेको विषय भएकाले कानूनी प्रक्रिया अरु मुद्दा सरह नै चल्ने सरकारी वकील कार्यालय, काठमाडौंका सहन्यायाधिवक्ता अच्युतमणि न्यौपानेले बताए । उनले अनुसन्धानको क्रममा कसुरदार देखिएमा हिरासतमा राख्ने बताए । ‘सरकारी सम्पती किर्तेको विषयमा अनुसन्धानको कुरा हो । कानूनी प्रक्रिया अरु मुद्दा सरह नै हुन्छ । अनुसन्धानको क्रममा कसुरदार वा संकित देखिएमा हिरासतमा राख्ने, वा हिरासत बाहिर राखेर अनुसन्धान गर्ने हुन्छ ।’ सहन्यायाधिवक्ता न्यौपानेले भने । अनुसन्धानको सिलसिलामा भाटभटेनी डिपार्टमेण्ट स्टोरका सञ्चालक मिनबहादुर गुरुङ, पूर्वनिर्वाचन आयुक्त सुधिरकुमार शाह, मालपोत कार्यालयका तत्कालीन कर्मचारी गोपाल कार्की र धर्मप्रसाद गौतम सिआईबीको हिरासतमा छन् ।
डा. शिवजी सिलवालले नर्भिकमा फ्रि ओपिडी सेवा दिने
काठमाडौं । थापाथलीस्थित नर्भिक इन्टरनेशनल हस्पिटलमा आगामी शनिबार (असार १६ गते) फ्रि कार्डियोलोजी ओपिडी हुने भएको छ । गत शनिबार (असार ९ गते) पनि अस्पतालका मुटुरोग विशेषज्ञ (कन्सलट्यान्ट कार्डियोलोजिष्ट) डा. शिवजी सिलवाल नेतृत्वको टिमले निःशुल्क कार्डियोलोजी ओपिडी सञ्चालन गरेको थियो । सर्वसाधारणहरुको अत्यधिक सहभागिता र मागका कारण डा. सिलवालको टिमले आगामी शनिवार पनि पुनः मुटुरोगसम्बन्धी निःशुल्क ओपिडी सञ्चालन गर्ने भएको हो । शनिबार बिहान ९ बजेदेखि ११ बजेसम्म निःशुल्क ओपिडी सञ्चालन हुने अस्पतालले एक विज्ञप्ति जारी गरी जनाएको छ । निःशुल्क ओपिडीमा सहभागिताका लागि अस्पतालको ल्याण्डलाइन नम्बर ०१५९७००३२ र मोवाइल नम्बर ९८८०८८८००० मा सम्पर्क गरी आफ्नो नाम टिपाउन सकिनेछ । नेपालीहरुमा पछिल्लो समय मुटुसम्बन्धी समस्या बढ्दो छ । यही कुरालाई मध्यनजर गरी फ्रि कार्डियोलोजी ओपिडी सञ्चालन भइरहेको हो । नर्भिक इन्टरनेशनल हस्पिटलले विगत लामो समयदेखि आफ्नो संस्थागत सामाजिक उत्तरदायीत्व(सीएसआर) अन्तर्गत विभिन्न रोगका विशेषज्ञहरुको सहभागितामा निःशुल्क ओपिडी सञ्चालन गर्दै आइरहेको छ । यो क्रममा सर्वसाधारणहरुको सहभागिता समेत उल्लेख्य हुने गरेको छ ।
आकाशमा पदयात्रा शुक्रबारदेखि, २४औं तलामा रेस्टुरेन्ट, शुल्क एक हजार
काठमाडौं । कमलादीस्थित स्काईवाक टावर असार १५ गतेदेखि सञ्चालनमा आउने भएको छ । निर्माण कम्पनी वन्डर्स नेपाल प्रालिले सो टावरको काम सम्पन्न भएको र शुक्रबार टावरको उद्घाटन गरी आम सर्वसाधारणका लागि प्रवेश खुल्ला गरिन लागेको वन्डर्स नेपालका अध्यक्ष आकर्षण पोखरेलले बताए । आन्तरिक तथा वाहिय पर्यटकलाई नयाँ अनुभव दिने उद्देश्यका साथ कम्पनीले उक्त टावर निर्माण गरेको हो । अध्यक्ष पोखरेल अनुसार स्काईवाक टावर २ अर्बको लगानीमा तयार भएको छ । साहसिक पर्यटकको लागि नयाँ गन्तव्य, मनोरञ्जनको नयाँ क्षेत्रको रूपमा टावर स्थापित हुने पनि उनको भनाइ छ । सो टावर चढ्नको लागि प्रति व्यक्ति एक हजार रुपैयाँ शुल्क लाग्ने पोखरेलले बताए । उनका अनुसार विदेशी पर्यटनलाई पनि एक हजार रुपैयाँ नै शुल्क लाग्ने छ । अशक्त अपाङ्ग भएकाहरूलाई टावर चढ्नको लागि ५० प्रतिशत छुट अर्थात् ५०० रुपैयाँ लाग्ने पनि पोखरेलले बताए । यसै गरी ७० देखि ८० वर्षकालाई पनि ५०० रुपैयाँ लाग्ने छ भने ८० वर्ष माथिकालाई र ३ फिटसम्मको बच्चालाई निःशुल्क टावरमा प्रवेश छ । कम्पनीले टावर चढ्न अनलाइनबाटै प्रि-बुकिङ तथा बुकिङ गर्न सक्ने व्यवस्था पनि मिलाएको छ । टावरमै रेस्टुरेन्टदेखि पार्किङसम्मको सुविधा स्काईवाक अर्थात् ‘आकाशमा पदयात्रा’ बाट काठमाडौंको दृश्यलाई निहाल्न सकिन्छ । भुईँबाट धेरै माथि चढ्ने र पूर्ण पारदर्शी शीशाको संरचनामा पदयात्रा गर्ने ठाउँ हो । उक्त टावरमा हिँड्दा आकाशमा हिँडेको अनुभूति हुन्छ । माथि अविराम आकाश देखिन्छ । करिव ७८ मिटर अग्लो यो टावर काठमाडौं उपत्यकाकै अग्लो संरचना हुनुका साथै यहाँबाट उपत्यकाको ३६० डिग्री भ्यु देखिन्छ । काठमाडौंको उचाइमा उभिएर मानिसहरूलाई आकाशमा हिँडेजस्तो अनुभूत गराउन यो टावर सञ्चालनमा ल्याएको पोखरेलले बताए । कम्पनीले कमलादीमा १३ रोपनी जग्गा २३ वर्षसम्मको लागि लिजमा लिएर स्काईवाक टावर बनाएको हो । लिज अवधि सकिएपछि सबै संरचना जग्गाधनीलाई छोडिदिनुपर्छ । यो टावरको निर्माण कार्य २०७७ सालबाट सुरु गरिएका थियो । टपको सिसामा हिँड्दा ७८ मिटर तलको बगैँचा, पार्किङ, बजार देखिन्छ । नजिकका सडकमा शान्तसँग सवारी बगिरहेको देखिन्छ । टावर सत प्रतिशत सुरक्षित रहेको पनि कम्पनीले बताएको छ । ‘भवन विभागको मापदण्ड अनुसार यसको सम्पूर्ण संरचना तयार पारेका छौं, यस भवनमा चढ्दा कुनै असुरक्षित हुन्छ कि भनेर कुनै संङ्का गर्नु पर्दैन, यो टावर सत प्रतिशत सुरक्षित छ,’ उनले भने । यस्तै, टावरको माथि सीमा हिँड्ने स्पेश २ हजार स्कवायर फिट छ । वरिपरि ६ फिट अग्लो ग्लासको रेलिङ छ । स्काईवाक एरियामा एकै पटक ५ सय जनासम्म अट्ने बताइएको छ । उक्त टावरमा लिफ्ट मात्र नभई भर्याङबाट पनि चढ्न तथा ओर्लन सकिने सुविधा छ । टावर २५ तलाको छ । २२ तलासम्म जान दुई वटा लिफ्टको व्यवस्था छ । एउटा लिफ्टमा करिव २४ जना अट्छन् भने दुइटै लिफ्टमा गरी एकपटकमा ४८ जना चढेर तलमाथि गर्न सकिन्छ । टावरमै बसेर चिया कफीको लिँदै काठमाडौंको रमणीय दृश्य निहाल्न सकिन्छ । किनभने टावरको २३ औं र २४ औं तलामा रेस्टुरेन्ट छ । यसै गरी भुईँ तलाको साइटमा गार्डेन, सपिङ सेन्टर, रेस्टुरेन्ट छ । त्यस क्षेत्रमा ५० वटा गाडी र २ सय वटा मोटरसाइकल पार्किङ गर्न ठाउँ रहेको पनि पोखरेलले सुनाए । उनका अनुसार सोही ठाउँमा पार्किङले नपुगे ग्राहकको लागि अन्य ठाउँमा व्यवस्था मिलाइएको छ ।
छोरी जन्माउने आमालाई ५ हजार रुपैयाँ दिने
सर्लाही । बागमती नगरपालिकाले छोरी जन्माउने आमालाई पाँच हजार सुत्केरी भत्ता दिने भएको छ । मधेसमा छोरी जन्मिए दाइजो दिनुपर्छ भन्ने सोचले भ्रुण हत्याका घटना बढिरहेको सन्दर्भलाई जोड्दै नगरपालिकाले छोरी जन्माउने आमालाई प्रोत्साहनस्वरुप पाँच हजार रुपैयाँ दिने घोषणा गरेको नगर उपप्रमुख लीलाकुमारी मोक्तानले जानकारी दिए । नगरपालिकाले आगामी आर्थिक वर्ष २०८०/८१ को नीति कार्यक्रम र बजेट सार्वजनिक गर्दै दलित समूदायको उत्कृष्ट विद्यार्थीलाई ल्यापटप प्रदान गर्ने समेत घोषणा गरेकोे छ । नगरपालिकाले आगामी आवको नीति तथा कार्यक्रम र बजेटठमा नेपालका प्रथम राणा प्रधानमन्त्री जङ्गबहादुर राणाको समाधिस्थललाई पर्यटकीय क्षेत्रका रूपमा विकास गर्ने, बागमती नदी किनारमा आधुनिक आर्यघाट निर्माण, सुविधायुक्त बजार केन्द्र निर्माण, सांस्कृतिक नमुना बस्ती, बागमती माछापोखरी (भरत ताल) पर्यटन पूर्वाधार निर्माण आयोजना, बागमती फनपार्क आयोजना, बागमती रिसोर्ट, कृषि आधुनिकीकरण कार्यक्रम, नगर बगैँचा आयोजना, बौद्ध तपोवन पर्यटकीयस्थल निर्माण लगायत समेटेको छ । नगरपालिकाको आगामी आवका लािग ९० करोड १० लाखको बजेट सार्वजनिक गर्दै करिब एक दर्जन योजनालाई नगर गौरबका योजनाको रुपमा समेटेको छ । जङ्गबहादुर राणा विसं १८७४ असार ४ गते अर्घाखाँचीमा जन्मिएका र तराईमा सिकार खेल्न आएको समयमा १९३३ सालमा रौतहटको पत्थरघट्टामा निधन भएको थियो । उनको अन्त्येष्टि भने सर्लाहीको बागमती नगरपालिका(७ राजघाटस्थित मानेचौरमा गरिएको थियो । अहिले नगरपालिकाले सोही स्थानलाई पर्यटकीय क्षेत्रको रुपमा विकास गर्न लागेको हो । रासस
भोलिदेखि उपत्यकामा दुई हजार २८ शय्या निःशुल्क
काठमाडौं । स्वास्थ्य तथा जनसङ्ख्यामन्त्री मोहनबहादुर बस्नेतले भोलिदेखि सरकारी अस्पतालमा विपन्न, असहाय र बेवारिसे बिरामीको उपचारका लागि दुई हजार २८ शय्या निःशुल्क गरिने बताएका छन् । बिहीबारदेखि उपत्यकाका गङ्गालाल हृदयरोग केन्द्र, प्रसूति गृह, कान्तिबाल र शुक्रराज ट्रपिकल सरुवा रोग अस्पतालले विपन्नका लागि निःशुल्क शय्या उपलब्ध गराउने उनले जानकारी दिए । ‘कान्तिबाल अस्पतालले ६० शय्या, परोपकार प्रसूति तथा स्त्री रोग अस्पतालले चार सय ५० शय्या, ट्रमा सेन्टरले एक सय ५० शय्या र शहीद गङ्गालाल हृदयरोग केन्द्रले ९० शय्या निःशुल्क गर्ने निर्णय गरेका छन्’, मन्त्री बस्नेतले भने । उनका अनुसार अहिलेसम्म विपन्नका लागि निःशुल्क घोषणा गरिएका शय्याको सङ्ख्या दुई हजार २८ पुगेको छ। ‘वीर अस्पतालले सात सय शय्या र कोशी अस्पतालले तीन सय ३० शय्या निःशुल्क उपलब्ध गराउने यसअघि नै घोषणा गरिसकेका छन्’, मन्त्री बस्नेतले भने । उनले विस्तारै देशभरिका केन्द्रिय अस्पतालमा विपन्नका लागि निःशुल्क शय्या थप्दै जाने र ती शय्यामा उपचार पनि निःशुल्क हुने जानकारी दिए । शय्या निःशुल्क गरेपछि अस्पतालमाथि पर्ने आर्थिक भार कम गर्नका लागि केही बजेट सम्बन्धित अस्पतालले व्यवस्थापन गर्ने र अपुग रकम स्वास्थ्य मन्त्रालयले बेहोर्ने गरी काम भइरहेको मन्त्री बस्नेतले बताए । स्वास्थ्य उपचार पाउनु जनताको संवैधानिक अधिकार भएकाले उक्त निर्णय सबै अस्पतालले कार्यान्वयन गर्नुपर्नेमा उनले जोड दिए । निजी अस्पताल पनि जिम्मेवार भई नियम अनुसार कूल शय्याको १० प्रतिशत विपन्नका लागि निःशुल्क छुट्याउनुपर्ने भन्दै मन्त्री बस्नेतले १० प्रतिशत शय्या निःशुल्क गर्ने नियम कडाइका साथ कार्यान्वयन गराइरहेको बताए ।
