लुम्बिनी लायन्स र सुदूरपश्चिम रोयल्स, जनकपुर बोल्ट्स र पोखरा एभेन्जर्स भिड्दै
काठमाडौं । राजधानीमा जारी दोस्रो संस्करणको नेपाल प्रिमियर लिग (एनपीएल) अन्तर्गत आज लुम्बिनी लायन्स र सुदूरपश्चिम रोयल्स तथा जनकपुर बोल्ट्स र पोखरा एभेन्जर्सबीच प्रतिस्पर्धा हुँदैछ । त्रिभुवन विश्वविद्यालयको अन्तर्राष्ट्रिय क्रिकेट रङ्गशालामा पहिलो खेल ११:४५ र दोस्रो खेल अपरान्ह ४ बजे हुनेछ । रोहितकुमार पौडेलको कप्तानीमा लुम्बिनी सुदूरपश्चिमलाई पराजित गर्ने लक्ष्यमा छ । सुदूरपश्चिले भने आफ्नो अपराजित यात्रालाई काय राख्ने लक्ष्यमा छ । तीन खेलमा एउटा मात्र जितेको लुम्बिनी अङ्क तालिकाको छैटौं स्थानमा छ । दीपेन्द्रसिंह ऐरीको कप्तानीमा सुदूरपश्चिम लगातार तीन जितका साथ अङ्क तालिकामा शीर्ष स्थानमा छ । यो टोलीले ६ अङ्क बटुलेको छ । अनिल शाह नेतृत्वको साविक विजेता जनकपुर र कुशल भुर्तेलको कप्तानीमा पोखरा जित आफ्नो पोल्टामा पार्ने दाउमा छन् । यसअघि जनकपुर र पोखरा दुवै खेलमा पराजित भएका थिए ।
लगातार तीन खेल जितको विराटनगर किङ्स चितवन राइनोजसँग ४८ रनले पराजित
काठमाडौं । नेपाल प्रिमियर लिग (एनपीएल) को दोस्रो सिजन २ मा सन्दीप लामिछानेको कप्तानीमा रहेको विराटनगर किङ्सको अपराजित यात्रालाई चितवन राइनोजले रोकेको छ । लगातार तीन खेलमा जित दर्ता गरेको विराटनगर किंग्स बुधबार चितवन राइनोजसँग ४८ रनले पराजित भएको हो । किर्तिपुरस्थित त्रिवि क्रिकेट रंगशालामा टस जितेर १७५ रनको लक्ष्यसहित जबाफी ब्याटिङमा उत्रिएको विराटनगरलाई चितवनले १६ दशमलव ४ ओभरमा १२६ रनमै समेटेको हो । विराटनगरले यसअघि जनकपुर बोल्टस्, काठमाडौं गोर्खाज र पोखरा एभेन्जर्ससँग लगातार जित निकालेको थियो । चितवनको यो तीन खेलमा दोस्रो जित हो । यस टिमले लुम्बिनी लायन्सँग हार र कर्णाली याक्ससँग जित निकालेको थियो । ब्याटिङ र बलिङ दुवैमा लय समात्दा चितवनले आजको जित निकालेको हो । चितवनका रवि बोपाराले यस खेलमा ६५ रन जोडे । ३८ बल खेल्दा उनले ३ चौका र ४ छक्का प्रहार गरे । उनले ब्याटिङ उकास्दा चितवन १७५ रनको बलियो लक्ष्य प्रस्तुत गर्न सफल भएको हो । चितवनका सैफ जबले ३२, देव खनालले २८, कप्तान कुशल मल्लले अविजित २० र डविड मलानले १७ जोडे । जवाफी ब्याटिङमा उत्रिएको विराटनगरका ब्याटरमाथि चितवनका बलर हाबी भए । चितवनका रञ्जित कुमारले पाँच विकेट लिए । उनले विराटनगरका साम हिजलेट, बसिर अहमद, नरेन भट्ट, नारायण जोशी र सूर्य तामाङको विकेट लिएका हुन् । प्रतियोगितामा विराटनगरको यो पहिलो हार हो । विराटनगरले यसअघि पहिलो खेलमा पोखरा एभेन्जर्सविरुद्ध ५३ रनको जित निकालेको थियो । दोस्रो खेलमा काठमाण्डू गोर्खाजलाई पाँच विकेटले र तेस्रो खेलमा साविक विजेता जनकपुर बोल्ट्सलाई नौ रनले हराएको थियो ।
निर्वाचनका लागि दलले निवदेन दिने समय ४ दिन थपियो
काठमाडौं । निर्वाचन आयोगले आगामी फागुन २१ गते हुने प्रतिनिधिसभा सदस्य निर्वाचनका लागि राजनीतिक दलले निवेदन दिने समय ४ दिन थप्ने निर्णय गरेको छ । यसअघिको स्वीकृत कार्यक्रमअनुसार यही मङ्सिर १ गतेदेखि आजसम्मका लागि सो समय दिइएकामा विभिन्न पक्षको आग्रहमा आयोगको आजको बैठकले चार समय थप्ने निर्णय गरेको आयोगका प्रवक्ता नारायणप्रसाद भट्टराईले जानकारी दिए । आयोगमा दर्ता कायम रहेका ठूलालगायत नयाँ–पुराना अधिकांश दलले प्रतिनिधिसभा सदस्य निर्वाचनको प्रयोजनका लागि निवेदन दिइसकेका छन् । आयोगका हाल दर्ता कायम रहेका १३२ दलमध्ये ८० दलले निर्वाचनमा भाग लिन निवेदन दिइसकेका छन् । यो निर्वाचनको पहिलो हुने निर्वाचित हुने (प्रत्यक्ष) तर्फमा उम्मेदवारको मनोनयन आगामी माघ ६ गते हुने कार्यक्रम रहेको छ । प्रतिनिधिसभा निर्वाचनको मिति आउन अब ९९ दिन बाँकी रहेको छ । यसैगरी, आयोगले आगामी माघ ११ गते हुने राष्ट्रियसभा सदस्य निर्वाचनको तयारी पनि सँगसँगै गरेको छ ।
एमएडब्लू वृद्धिको प्रि–न्यू इयर ब्याश अफर सार्वजनिक, सेरेस ईभीमा ६ लाखसम्म छुट
काठमाडौं । एमएडब्लू वृद्धिले ‘प्रि–न्यू इयर ब्याश’ नामक अफर सार्वजनिक गरेको छ । नयाँ वर्षअघि सीमित समयका लागि उपलब्ध यो अफरअन्तर्गत डोंगफेङ नामी र सेरेसका लोकप्रिय मोडेलहरूमा यस सिजनकै उत्कृष्ट अफरहरू दिइने कम्पनीले जनाएको छ । डोंगफेङ नामीको अफरअन्तर्गत ‘नामी भिगो’ र ‘नामी ०१’ लाई नाडा मूल्यमै किन्न सकिनेछ । साथै प्रत्येक ग्राहकलाई ७ किलोवाट होम चार्जर, ३.५ किलोवाट पोर्टेबल चार्जर र अटो प्लस इन्स्योरेन्स पूर्णरूपमा निःशुल्क प्रदान गरिने जनाइएको छ । नामी किनेका ग्राहकहरू स्पेशल लक्की ड्रमा पनि सहभागी हुन पाउनेछन् जहाँ तीन भाग्यशालीले थाइल्यान्ड भ्रमण र एक विजेताले आईफोन १७ प्रो म्याक्स जित्ने मौका पाउनेछन् । यस्तै, सेरेस ईभीमा पनि ६ लाख रुपैयाँसम्मको लाभ हुने कम्पनीले जनाएको छ । अफरमा क्यास डिस्काउन्ट, कम्प्रिहेन्सिभ इन्स्युरेन्स, निःशुल्क एक्सेसरिज, उच्च मूल्यांकनसहितको एक्सचेञ्ज सुविधा र आकर्षक एक्सचेञ्ज बोनस समावेश छन् । एमएडब्लू वृद्धिका अनुसार ‘प्रि–न्यू इयर ब्याश’ अन्तर्गतका सबै अफरहरू काठमाडौँ उपत्यका तथा बाहिरका सबै अधिकृत डोंगफेङ नामी र सेरेस शोरूमहरूमा एकसाथ उपलब्ध छन् ।
श्रमिकको स्वास्थ्य परीक्षण शुल्कमा गरिएको वृद्धिप्रति पूर्वमन्त्री पौडेलले जनाए खेद
काठमाडौं । पूर्वस्वास्थ्यमन्त्री प्रदीप पौडेलले वैदेशिक रोजगारीमा जाने श्रमिकको स्वास्थ्य परीक्षण शुल्कमा गरिएको वृद्धिप्रति खेद व्यक्त गरेका छन् । उनले सामाजिक सञ्जालमार्फत स्वास्थ्य परीक्षणवापत लाग्ने सम्पूर्ण शुल्क पूर्ण रूपमा श्रमिकले नै बेहोर्ने गरी लागू गरिएको व्यवस्था तत्काल फिर्ता गर्न आग्रह गरेका छन् । उनले लेखेका छन्, ‘फ्री भिषा, फ्री टिकट लागू हुन नसकेको अवस्थामा सरकारले मारमा पार्ने गरी शुल्क मात्रै बढाएर व्यापारलाई प्रश्रय दिए जस्तो देखियो, यो स्वाभाविक होइन ।’ २०८१ भाद्रमा तत्कालीन अतिरिक्त स्वास्थ्य सचिव दिपेन्द्ररमण सिंहको संयोजकत्वमा गठित समितिको प्रतिवेदनले वैदेशिक रोजगारीमा श्रमिकलाई स्वास्थ्य बीमामा आवद्ध गर्ने र शुल्क बीमाले नै बेहोर्ने गरी व्यवस्था गर्न सुझाव दिइएको थियो । अघिल्लो मन्त्रीस्तरीय निर्णयले कार्यान्वयन हुन रोकेको विषय अहिलेको सरकारले कार्यन्वन गरेकोमा पौडेलको आपत्ति छ । ‘सबै श्रमिकलाई स्वास्थ्य बीमा कार्यक्रममा आवद्ध गरेर स्वास्थ्य परीक्षण शुल्क त्यसैबाट बेहोर्ने गरियोस्,’ उनी भन्छन्, ‘वैदेशिक रोजगारीमा जाने श्रमिकको सबै उपचार खर्च रोजगारदाताबाटै भराउने नीति लागू हुने गरि श्रम सम्झौता गरियोस् म सरकारसँग सोही व्यवस्था लागू गरेर श्रमिकलाई थप भार पार्ने हालैको व्यवस्था खारेज गर्न जोडदार माग गर्दछु ।’
स्वास्थ्यमन्त्री गौतम र पूर्वस्वास्थ्यमन्त्री पौडेलबीच भेटवार्ता, के भयो कुराकानी ?
काठमाडौं । स्वास्थ्य तथा जनसंख्यामन्त्री डा. सुधा गौतम शर्मा र पूर्वस्वास्थ्यमन्त्री प्रदीप पौडेलबीच भेटवार्ता भएको छ । बुधबार दिउँसो कांग्रेस युवा नेता पौडल मन्त्री शर्मालाई भेट्न स्वास्थ्य मन्त्रालय पुगेका थिए । उनले मन्त्री शर्मालाई आफ्नो पालामा गरेका कामको विवरण समेटिएको हाते पुस्तक हस्तान्तरण गरे । भेटमा पौडेलले आफूले गरेका र गर्ने क्रममा रहेका कार्यक्रमहरूलाई निरन्तरता दिन आग्रह गरेका थिए । मन्त्री शर्माले आफ्नो प्राथमिकता स्वास्थ्य बीमा, औषधी क्षेत्र र स्वास्थ्यका खरिद प्रक्रियालाई व्यवस्थित बनाउनु रहेको भन्दै त्यहीअनुसार काम गरिरहेको बताइन् । उनले आफ्नो कार्यकालसम्म सक्दो काम गर्ने प्रतिवद्धता जनाएकी छिन् । भदौ २३ र २४ गते जेनजी आन्दोलन पछि गठित अन्तरिम सरकारले स्वास्थ्य क्षेत्रमा लामो समयदेखि काम गरिरहेकी विज्ञलाई मन्त्री बनाएको छ । मन्त्री शर्मा यसअघि स्वास्थ्यमन्त्री रहेका पौडेलको सल्लाहकारको भूमिकामा थिइन् ।
सप्तकोशी सिमेन्टले आईपीओ जारी गर्ने, बिक्री प्रबन्धकमा सिद्धार्थ क्यापिटल नियुक्त
काठमाडौं । सप्तकोशी सिमेन्ट लिमिटेडले आईपीओ जारी गर्ने भएको छ । कम्पनीले १०० रुपैयाँ (एकसय) दरले जारी पुँजीको २० प्रतिशत सेयर सर्वसाधारणमा निष्काशन गर्न लागेको हो । कम्पनीले सिद्धार्थ क्यापिटल लिमिटेडलाई निष्काशन तथा बिक्री प्रबन्धकको रूपमा नियुक्त गरेको छ । सम्झौतापत्रमा सप्तकोशी सिमेन्टका तर्फबाट अध्यक्ष मोना जालान तथा सिद्धार्थ क्यापिटल लिमिटेडका तर्फबाट प्रमुख कार्यकारी अधिकृत (सीईओ) सन्दिप कार्कीले हस्ताक्षर गरे । सप्तकोशी सिमेन्टको दैनिक उत्पादन क्षमता ६०० टन रहेको छ । कम्पनीले नेपाल गुणस्तरको निर्धारित मापदण्ड अनुसार पीपीसी तथा ४३ र ५३ ग्रेडको ओपीसी सिमेन्ट उत्पादन गर्दै आएको छ । नेपालको सिमेन्ट बजारमा अग्रणी भूमिका निर्वाह गर्दै आएको एचआर गोयल समूहद्वारा प्रवर्धित यस कम्पनीले सन् २०१९ मा व्यवसायिक उत्पादन सुरु गरेदेखि हालसम्म निरन्तर सञ्चालन नाफा कायम राख्न सफल रहेको छ। पूर्वी नेपालमा यस कम्पनीले करिब २० प्रतिशत बजार हिस्सा ओगटेको छ । आईपीओबाट उठ्ने पुँजी नयाँ क्लिङ्कर प्लान्ट स्थापना गर्न तथा हाल सञ्चालनमा रहेको प्लान्टको क्षमता विस्तार गर्न प्रयोग गरिने जनाइएको छ।
