सनराइज बैंकको १ लाख २२ हजार कित्ता सेयर लिलामीमा, न्यूनतम मूल्य ४२५ रुपैयाँ
काठमाडौं, ३१ साउन । सनराइज बैंकले १ लाख २२ हजार ३ सय ३७ कित्ता संस्थापक सेयर संस्थापकलाई नै लिलाम बढाबढमा बिक्री गर्ने भएको छ । बैंकका संस्थापक सेयर धनीले सेयर विक्री गर्न चाहेकोले राष्ट्र बैंकको निर्देशन अनुसार संस्थापकलाई नै विक्री गर्न लागिएको हो । बैंकले सोमवार सार्वजनिक सुचना प्रकाशित गरेर सेयर विक्रीको जानकारी गराएको छ । यसको लागि बैंकले न्यूनतम सेयर मूल्य ४२५ रुपैयाँ प्रतिकित्ता तोकेको छ । बैंकले तोकेको मूल्यमा नघटाइ आफूले खरिद गर्न चाहेको सेयरको मूल्य र कित्ता संख्या समेत खुलाएर ३५ दिन भित्रमा बैंकमा निवेदन दिइसक्न पनि बैंकले भनेको छ ।
२४ बाणिज्य बैंकको नाफा ३१ अर्ब ५१ करोड, यी हुन पहिलो पटक अर्ब कमाउने ७ बैंक
काठमाडौं, ३१ साउन । २४ वटा बाणिज्य बैंकहरुले २०७३ असार मसान्तसम्ममा ३१ अर्ब ५१ करोड ८५ लाख नाफा कमाउन सफल भएका छन् । आर्थिक वर्ष २०७२/७३ को चौथो त्रैमासिकको अपरिस्कृत वित्तिय विवरण सार्वजनिक गरेका २४ वटा बैंकले सो मात्रामा नाफा कमाउन सफल भएका हुन् । यीमध्ये १६ वटा बैंकले एक अर्ब भन्दा बढि नाफा कमाउन सफल भएको देखिन्छ । तीमध्ये ७ वटा बैंकले पहिलो पटक अर्ब भन्दा बढि नाफा कमाउन सफल भएका छन् । २४ वटा बाणिज्य बैंकले २०७२ साल असार मसान्तसम्मको तुलनामा २०७३ साल असार मसान्तसम्ममा २ अर्ब ९२ करोड नाफा बढाउन सफल भएका हुन् । सो अवधीमा तिनै २४ वटा बाणिज्य बैंकहरुले २८ अर्ब ५९ करोड रुपैंयाँ नाफा कमाउन सफल भएका थिए । कृषि विकास बैंक र राष्ट्रिय बाणिज्य बैंकको नाफा घटेकाले बाणिज्य बैंकहरुको कुल नाफामै कमि देखिएको हो । कृषि विकास बैंकको नाफा ३ अर्ब ६० करोडबाट घटेर २ अर्ब ५७ करोडमा सिमित भएको छ भने राष्ट्रिय बाणिज्य बैंकको नाफा ६ अर्ब ६४ करोडबाट घटेर २ अर्ब ६४ करोेडमा खुम्चिएको छ । यी दुई बैंकका अलवा स्ट्याण्डर्ड चाटर्ड बैंकको नाफा पनि एक अर्ब २९ करोडबाट घटेर एक अर्ब २६ करोडमा सिमित भएको छ । बाँकी सबै बैंकको नाफामा उल्लेख्य सुधार आएको देखिन्छ । यी हुन पहिलो पटक अर्ब कमाउने ७ वटा बाणिज्य बैंक एनएमबी बैंक, सिद्धार्थ बैंक, नेपाल बंगलादेश बैंक, प्राइम कमर्सियल बैंक, ग्लोबल आइएमई, सिटिजन्स बैंक र एनआइसी एसिया बैंक पहिलो पटक एक अर्ब नाफा कमाउन सफल भएका हुन् । २०७२ असार मसान्तसम्म ५० करोड ३८ लाख नाफा कमाउन सफल भएको एनएमबी बैंकले २०७३ असार मसान्तसम्ममा एक अर्ब २० करोड खुद नाफा कमाएको छ । २०७२ असार मसान्तसम्ममा ७७ करोड नाफा कमाएको सिद्धार्थ बैंक पनि एक अर्ब २४ करोड नाफा कमाउँदै अर्ब कमाउने सूचिमा उक्लिएको छ । त्यस्तै, नेपाल बंगलादेश बैंकले पनि आफुलाई अर्ब नाफा गर्ने बैंकका रुपमा स्थापित गराएको छ । २०७२ असार मसान्तसम्ममा ८१ करोड ३९ लाख नाफा कमाएको बैंकले २०७३ असार मसान्तसम्ममा एक अर्ब १९ करोड नाफा कमाउन सफल भएको छ । प्राइम कमर्सियल बैंक पनि अर्ब नाफा कमाउने सूचिमा समावेश भएको छ । अघिल्लो असार मसान्तसम्मा ७४ करोड नाफा कमाएको प्राइमले यसपालीको असार मसान्तसम्ममा भने एक अर्ब १२ करोेड नाफा कमाउन सफल भएको हो । ग्लोबल आइएमई बैैंक पनि पहिलो पटक अर्ब कमाउने बैंकको सूचिमा उक्लिन सफल रह्यो । २०७२ असार मसान्तसम्ममा जम्मा ९६ करोड ६ लाख नाफा कमाएको बैंकले २०७३ असार मसान्तसम्ममा भने एक अर्ब ३९ करोड खुद नाफा कमाउन सफल भएको छ । अघिल्लो पटक ७२ करोड ३ लाख नाफा कमाएको सिटिजन्स बैंकले पनि एक अर्ब १० करोेड नाफा आर्जन गरेर अर्ब कमाउने सूचिमा आफ्नो नाम लेखाएको छ । त्यस बाहेक एनआइसी एसिया बैंक पनि अर्ब कमाउने बैंकको सूचिमा नव प्रवेशी बनेको छ । एनआइसी एसिया बैंकले २०७३ असार मसान्तसम्ममा एक अर्ब ७ करोड नाफा कमाउन सफल भएको देखिन्छ । जबकी बैंकले २०७२ असार मसान्तसम्ममा जम्मा ६८ करोेड ३ लाख नाफा कमाएको थियो ।
एसियन लाइफले कमायो ३ करोड ६ लाख
काठमाडौं, ३१ साउन । एसियन लाइफ इन्स्योरेन्स कम्पनीले २०७३ असार मसान्तसम्ममा ३ करोड ६ लाख नाफा कमाएको छ । ६७ करोड १३ लाख चुक्ता पुँजी रहेको कम्पनीको जगेडा कोषमा २० करोड २५ लाख रुपैंयाँ रहेको छ भने महाविपक्ति कोषमा एक करोड ९४ लाख रुपैंयाँ रहेको छ । एसियन लाइफले २ अर्ब बिमा शुल्क संकलन गरेर ४६ करोड दावी भुक्तानी गरेको छ । कम्पनीले २ हजार ६ सय ६३ वटा दावी वापत सो मात्रामा भुक्तानी गरेको हो । एसियन लाइफ इन्स्योरेन्सको प्रति सेयर आम्दानी ४ रुपैंयाँ ५६ पैसा रहेको छ भने प्रति सेयर नेटवर्थ १३० रुपैंयाँ रहेको छ ।
कृषि विकास बैंकले कमायो २ अर्ब ५७ करोड, बाणिज्य बैंकको नाफा पनि २ अर्ब ६४ करोड
काठमाडौं, ३१ साउन । कृषि विकास बैंकले २०७३ असार मसान्तसम्ममा २ अर्ब ५७ करोड नाफा कमाएको छ । यद्यपी यो नाफा बैंकले २०७२ असार मसान्तसम्ममा कमाएको भन्दा एक अर्ब ३ करोडले कम हो । बैंकले सो अवधीमा ३ अर्ब ६० करोड नाफा कमाएको थियो । १० अर्ब ३७ करोड चुक्ता पुँजी रहेको बैंकको जगेडा कोषमा ८ अर्ब ३८ करोड रुपैंयाँ रहेको छ । बैंकको खराब कर्जा ५ दशमलब ३५ प्रतिशतबाट घटेर ३ दशमलब ८५ प्रतिशतमा झरेको छ । बैंकले ६२ करोड राइट ब्याकबाट प्राप्त गरेको छ भने ५६ करोड प्रोभिजन गरेको छ । ९ अर्ब ५६ करोड ब्याज आम्दानी गरेको बैंकले ३ अर्ब ३८ करोड ब्याज खर्च गरेको देखिन्छ । बैंकले निक्षेप संकलन पनि ७७ अर्बबाट बढाएर ८७ अर्ब पुर्याएको छ । बैंकको प्रति सेयर आम्दानी ५५ रुपैंयाँ ६४ पैसा र प्रति सेयर नेटवर्थ ३०३ रुपैंयाँ १५ पैसा रहेको छ । यसैबिच, राष्ट्रिय बाणिज्य बैंकले २०७३ असार मसान्तसम्ममा २ अर्ब ६४ करोड नाफा कमाएको छ । बैंकले कमाएको यो नाफा २०७२ असार मसान्तसम्ममा कमाएको भन्दा २ अर्बले कम हो । बैंकले सो अवधीमा ४ अर्ब ६४ करोड नाफा गरेको थियो । यद्यपी १ अर्ब ९१ करोड सञ्चित नोक्सानीमा रहेको बैंकले सो रकम तिरेर जगेडा कोषमा ७३ करोड रुपैंयाँ जम्मा गर्न सफल भएको छ । बैंकको खराब कर्जा पनि ५ दशमलब ३५ प्रतिशतबाट घटेर ३ दशमलब ९५ प्रतिशतमा झरेको छ । बाणिज्य बैंकको चुक्ता पुँजी ८ अर्ब ४८ करोड रुपैंयाँ रहेको छ । बैंकको निक्षेप एक खर्ब २४ अर्बबाट बढेर एक खर्ब ४६ अर्ब पुगेको छ । बैंकले ७ अर्ब ४२ करोड ब्याज आम्दानी गरेर एक अर्ब ८७ करोड ब्याज खर्च गरेको देखिन्छ ।
केन्द्रिय बैङ्कमा डलर सञ्चिति बढ्यो, ८५ प्रशित केन्द्रीय बैंक र बाँकी १५ प्रतिशत वाणिज्य बैंकहरूमा
काठमाडौं, २९ साउन। नेपाल राष्ट्र बैंकले गत आर्थिक वर्षमा १० अर्ब अमेरिकी डलर सञ्चित गरेको छ । यो सञ्चिति अघिल्लो आवको तुलनामा २० प्रतिशत अर्थात् १ अर्ब ६७ करोडले बढी हो । अघिल्लो आवमा केन्द्रीय बैंकसँग ८ अर्ब ३३ करोड डलर सञ्चित थियो । चालू आर्थिक वर्षमा इन्धन आयातमा कमी तथा रेमिट्यान्स धेरै भित्रिएपछि डलर सञ्चिति बढेको हो। भूकम्पका कारण विदेशी सहायता पनि बढी आउँदा डलर बढेको अधिकारीको भनाइ छ । वैदेशिक व्यापारमा निर्यात बढी भएमा डलर परिमाण बढी भित्रने र वस्तु तथा सेवा आयात गर्दा डलर बाहिरिन्छ । गत आवकोे डलर सञ्चितिले करिब डेढ वर्षको वस्तु आयात धान्ने छ । सञ्चितमध्ये ८५ प्रशित केन्द्रीय बैंक र बाँकी १५ प्रतिशत वाणिज्य बैंकहरूमा रहेको राष्ट्र बैङ्कले जनाएको छ। डलर सञ्चिति बढेपछि सर्वसाधारणका लागि डलरको कारोबारको सीमासमेत बढाइएको छ । डलरमा बैंक खाता हुने सर्वसाधारणले वार्षिक १० हजारबाट अब १५ हजारसम्मको कारोबार गर्न सक्ने व्यवस्था गरिएको छ । गत वर्ष कुल व्यापारघाटा ७ खर्ब ४ अर्ब ४५ करोड भएको छ । यो अघिल्लो आर्थिक वर्षभन्दा ०.४९ प्रतिशत बढी हो । अघिल्लो वर्ष ७ खर्ब ९९ करोड रुपैयाँ व्यापारघाटा थियो । आयात ७ खर्ब ८६ अर्ब १९ करोडबाट १.४६ प्रतिशतले घटेर ७ खर्ब ७४ अर्ब ७१ करोड रुपैयाँ पुगेको छ । निर्यात ८५ अर्ब १९ करोडबाट घटेर ७० अर्ब २५ करोड रुपैयाँमा सीमित भएको छ । अन्तरराष्ट्रिय बजारमा कच्चा तेलको मूल्य घटेको हुनाले पनि डलर बचेको हो । विकसित मुलुकहरूले ३ देखि ५ महिना, विकासशील मुलुकले ६ महिना तथा कम विकसित मुलुकले ९ देखि ११ महिनासम्मलाई पुग्ने वस्तु तथा सेवा खरिद गर्न सकिने परिमाणमा डलर सञ्चित गर्छन् ।
हकप्रद शेयर निष्काशन गर्न कृषि विकास बैंक र एस क्यापिटलबीच सम्झौता
काठमाडौं, ३० साउन । कृषि विकास बैंक लिमिटेड र एस क्यापिटलबीच हकप्रद शेयर निष्काशन सम्बन्धी सम्झौता भएको छ । निष्काशन तथा विक्रि प्रबन्धकको रुपमा कार्य गर्नका लागि कृषि विकास बैंक लि. र एस क्यापिटलबीच सम्झौता भएको हो । सम्झौतामा कृषि विकास बैंकका तर्फबाट प्रमुख कार्यकारी अधिकृत लिला प्रकाश सिटौला र एस क्यापिटलका तर्फबाट धितोपत्र निष्काशन तथा विक्री प्रबन्धकका प्रबन्धक संचालक पूर्णचन्द्र दाहालले हस्ताक्षर गरे । सम्झौता पश्चात कृषि विकास बैंकको हकप्रद शेयर निष्काशन सम्बन्धी कार्य यथाशिघ्र अगाडी बढ्ने जारी वित्रप्तिमा उल्लेख छ । बैंकले १०० रुपैयाँ अंकित दरका १ करोड ९६ लाख ८८ हजार कित्ता बराबरको हकप्रद शेयर जारी गर्दै छ ।
मेरो कारण सेयर बजार घटेको हैन – प्रधानमन्त्री प्रचण्ड
काठमाडौं, ३० साउन । प्रधानमन्त्री पुष्पकमल दाहालले आफ्नो नेतृत्वको सरकारका कारण सेयर बजार नघटेको बताएका छन्। नेपाल टेलिभिजनको ‘सीधा कुरा प्रधानमन्त्रीसँग’ कार्यक्रममा शनिबार राति प्रत्यक्ष कुराकानी गर्दै प्रधानमन्त्रीले आर्थिक विकासलाई नै आफ्नो सरकारले प्राथमिकताको एउटा मूल मुद्दा बनाएको हुनाले सेयर बजार चिन्तित हुनुपर्ने कुनै कारण नभएको बताए। उनले कार्यक्रममा भने, ‘मलाई त्यस्तो लाग्दैन। यो सेयर मार्केट अलि अलि तल जाने र माथि आउने त भइ नै राख्छ। अहिले तपाईँले यो प्रश्न गर्दैगर्दा फेरि सेयर बजार माथि उकालो लाग्न सुरु भएको छ। त्यसकारण त्यो ममाथि अथवा मेरो नेतृत्वमाथि प्रश्न हो भनेर म मान्न सक्ने स्थिति मैले ठान्दिनँ। तर मैले निजी क्षेत्रसँग पनि र समग्र आर्थिक विकासलाई नै प्राथमिकताको एउटा मूल मुद्दा बनाएको स्थितिमा सेयर बजारमा अथवा आर्थिक कारोबार गर्ने कोही पनि समुदायले चिन्तित हुनुपर्ने कुनै कारण छैन।‘ प्रचण्ड प्रधानमन्त्री भएको केही दिनमै नेप्से ओरालो लागेर सर्किट ब्रेकर लगाई कारोबार बन्द भएको थियो। त्यही दिन कालो धन छानबिन गर्न बनाएको समिति धितोपत्र बोर्डले खारेज गरेपछि भोलिपल्टै सेयर बजार उकालो लागेको थियो। तर आज फेरि सेयर बजार झण्डै ४१ अङ्कले घटेको छ।
पाँच मन्त्री र चार राज्यमन्त्री थपिए, काँग्रेसले नयाँ मन्त्री पठाएन
काठमाडौँ, ३० साउन । प्रधानमन्त्री पुष्पकमल दाहालले आईतबार तेस्रो पटक मन्त्रिपरिषद् विस्तार गरेका छन् । राष्ट्रपति विद्यादेवी भण्डारीले राष्ट्रपति कार्यालयमा आयोजित एक विशेष समारोहमा पाँचजना मन्त्रीलाई पद तथा गोपनीयताको शपथ दिलाएका छन् । विस्तारित मन्त्रिपरिषद्मा जनार्दन शर्माले ऊर्जा, सुरेन्द्र कुमार कार्कीले सूचना तथा सञ्चार, हितराज पाण्डेले सङ्घीय मामिला तथा स्थानीय विकास, अजयशङ्कर नायकले कानुन, न्याय तथा संसदीय मामिलाको जिम्मेवारी पाएका छन् । नबनियुक्त मन्त्री धनीराम पौडेललाई कुनै पनि मन्त्रालयको जिम्मेवारी दिईएको छैन । प्रधानमन्त्री दाहालले आइतबार नैप्रधानमन्त्री तथा मन्त्रिपरिषद्को कार्यालय सिंहदरबारमा चारजना राज्यमन्त्रीलाई शपथ खुवाएका छन् । त्यसमा यसअनुसार श्रीप्रसाद जवेगु (सङ्घीय मामिला तथा स्थानीय विकास), सत्यनारायण भगत (ऊर्जा), राधिका तामाङ (कृषि विकास) र धनमाया विक (विना विभागीय)ले शपथ लिएका छन् ।
