किसान माइक्रोफाइनान्सले ६१ प्रतिशत बोनस र ३९ प्रतिशत हकप्रद जारी गर्ने
काठमाडौं, ४ असोज । किसान माइक्रोफाइनान्स वित्तिय संस्थाले सेयरधनीलाई ६१ प्रतिशत बोनस सेयर दिने भएको छ । साथै, कर प्रयोजनको लागि फाइनान्सले ३ दशमलब २१ प्रतिशत नगद लाभांश दिने निर्णय गरेको छ । त्यसका साथै कम्पनीले ३९ प्रतिशत हकप्रद सेयर निष्कासन गर्ने निर्णय लिएको छ । उक्त निर्णय सोमबार बसेको ७४औँ सञ्चालक समितिको बैठकले गरेको हो । बैठकको निर्णयलाई नेपाल राष्ट्र बैंकले स्वीकृति तथा बैंकको आगामी साधारणसभाले पारित गरेपछि लगानीकर्ताले सो मात्रामा लाभांश पाउने छन् । हाल कम्पनीको चुक्ता पूँजी २ करोड रुपैयाँ रहेको छ भने बोनस सेयर पश्चात बैंकको पूँजी ३ करोड २२ लाख रुपैयाँ पुग्ने छ । मंगलबार फाइनान्सको प्रतिकित्ता सेयर ४ हजार ५३ रुपैयाँमा कारोबार भइरहेको छ ।
अरनिको डेभलपमेन्ट बैंकले १७ प्रतिशत बोनस सेयर दिने
काठमाडौं, ४ असोज । अरनिको डेभलपमेन्ट बैंकले सेयरधनीलाई १७ प्रतिशत बोनस सेयर दिने भएको छ । साथै, बैंकले कर प्रयोजनको लागि ०.८९ प्रतिशत नगद लाभांश दिने निर्णय गरेको छ । उक्त निर्णय सोमबार बसेको बैंक सञ्चालक समितिको बैठकले गरेको छ । बैठकको निर्णयलाई नेपाल राष्ट्र बैंकले स्वीकृति तथा बैंकको आगामी साधारणसभाले पारित गरेपछि लगानीकर्ताले सो मात्रामा लाभांश पाउने छन् । हाल बैंकको चुक्ता पूँजी २४ करोड २५ लाख रुपैयाँ रहेको छ भने बोनस सेयर पश्चात बैंकको पूँजी २८ करोड ३७ लाख रुपैयाँ पुग्ने छ । मंगलबार बैंकको प्रति कित्ता सेयर ४५३ रुपैयाँमा कारोबार भइरहेको छ ।
गहुेश्वरी, मुक्तिनाथ र मितेरीको ५०/५० प्रतिशत हकप्रद
काठमाडौं, ४ असोज । गुहेश्वरी मर्चेन्ट बैंकिङ्ग एण्ड फाइनान्सले निस्कासन गर्न लागेको ५० प्रतिशत हकप्रद सेयर आगामी २१ असोजदेखि विक्री खुल्ला हुने भएको छ । विक्री खुल्ला हुने भनिएको दिन शुक्रवार परेको छ भने दशै विदाको अन्तिम दिन पनि सोही दिन परेको छ । कम्पनीले १४ लाख ६८ हजार ६ सय ९७ कित्ता हकप्रद निस्कासन गर्न लागेको हो । हकप्रद विक्री बन्द अगामी २५ कात्तिकमा हुनेछ । हकप्रद सेयर निस्कासनको लागि कम्पनीले एनआइबिएल क्यापिटललाई विक्री प्रबन्धकमा नियुक्त गरिसकेको छ भने कम्पनीका शाखा कार्यालय, एनआइविलको कार्यालय तथा उसले तोकेका संकलन केन्द्रहरुवाट पनि हकप्रद भर्न पाइने भएको छ । यस्तै मुक्तिनाथ विकास बैंकले दिन लागेको ५० प्रतिशत हकप्रद सेयर निस्कासन पनि २१ असोजदेखि नै हुदैछ । सो बैंकको हकप्रद भर्ने अन्तिम म्याद पनि आगामी २५ कात्तिक तोकिएको छ । बैंकको विक्री प्रबन्धक एनआइविएल क्यापिटल छ । हकप्रद भर्नको लागि एनआइविएल क्यापिटलको केन्द्रीय कार्यालय लाजिम्पाट वा मुक्तिनाथ विकास बैंकका शाखा कार्यालयहरुवाट सकिने जानकारी दिइएको छ । मुक्तिनाथले ४१ लाख ९२ हजार १ सय ६३ कित्ता हकप्रद सेयर निस्कासन गर्न लागेको हो । मितेरी डेभलपमेन्ट बैंकले पनि ५० प्रतिशत हकप्रद सेयर निस्कासन गर्न लागेको छ । सो बैंकको हकप्रद विक्री आगामी १ कात्तिकदेखि खुल्ला हुनेछ भने विक्री बन्द आगामी ५ मंसिरमा हुदैछ । मितेरीको हकप्रद सेयर विक्री प्रबन्धकमा प्रभु क्यापिटल रहेको छ । बैंकले १० लाख ५६ हजार ३ सय ६९ कित्ता हकप्रद सेयर निस्कासन गर्न लागेको हो । हकप्रद भर्नको लागि प्रभु क्यापिटलको कार्यालय कमलादी तथा बैंकका शाखा कार्यालयहरु तोकिएका छन् ।
मोबाइल मेला २०७३ भव्य रुपमा सम्पन्न, दशैंसम्म मोबाइल खरिद गर्दा भारी छुट
काठमाडौं ४ असोज । ललितपुरको लगनखेलस्थित ललितपुर मल तथा ललितपुर मोबाइल कम्प्लेक्सले आफ्नो प्रथम वार्षिकोत्सवको अवसर पारेर भदौ २४ गतेदेखि असोज ३ गतेसम्म आयोजना गरेको मोबाइल एक्स्पो २०७३ सोमबारदेखि सम्पन्न भएको छ । यस एक्स्पोमा ग्राहकहरुले उल्लेखरुपमा विभिन्न ब्राण्डका मोबाइल फोनहरु खरिद गरेका थिए भने उपहारहरु पनि प्राप्त गर्न सफल भएका थिए । मोबाइल कम्प्लेक्सले मोबाइल एक्स्पोको अवसर पारेर सार्वजनिक गरेका विभिन अफरहरु ग्राहकहरुको मागलाई ध्यानमा राखेर असोज महिनाभरी लागू गर्ने भएको छ । उत्कृष्ट मोबाइल हबको रुपमा संचालनमा रहेको कम्प्लेक्सले नेपालीहरुको महान चाडको अवसरमा सबै किसिमका अफरहरु निरन्तरता दिने जनाएको छ । कम्प्लेक्सका अध्यक्ष पुरुषोत्तम बस्नेतले ग्राहकहरुको अत्यधिक मागका कारण मोबाइल एक्स्पोमा दिईएको विभिन्न अफरहरु असोज महिनाभरी लागू गरिएको बताए । उनले भने–नेपालीहरुले दशैंको अवसर पारेर नयाँ मोबाइल फोन किन्ने गरेको हुँदा उनीहरुलाई अधिक सुविधा दिन असोज ३० गतेसम्म न्यूनतम ७ प्रतिशतदेखि ४० प्रतिशतसम्म छुट दिनेछौं । कम्प्लेक्सले एउटा स्मार्टफोन किन्दा अर्को मोबाइल सित्तैमा अफर पनि निरन्तर जारी राख्ने भएको छ । एउटा स्मार्टफोन किन्दा अर्को फोन सित्तैमा अफरअन्तर्गत ह्वावेको पी ८ लाइट, ह्वावे अनर फोर एक्स, ह्वावे जी सेभेन प्लस, लाभा एक्स एट, सामसंग ग्यालेक्सी एस सिक्स, ग्यालेक्सी एस सेभेन तथा ग्यालेक्सी नोट फाइभ स्मार्टफोन खरिद गरेमा रु. ५,००० मूल्य बराबरको डिटिसी टच फोन निशुल्क दिईने छ । त्यसैगरी विभिन्न मोबाइल फोन कम्पनीहरुले सार्वजनिक गरेका अफरहरु पनि मोबाइलको खरिदमा लागू हुनेछ । मोबाइल कम्पनीलहरुले मोबाइल खरिदमा दिने नगद छुटदेखि बम्पर अफरसम्मका योजना पनि साथै लागू हुनेछ ।
एनसेल दशैं मेलासँगै रमायो बुटवल
काठमाडौ, ३ असोज । एनसेलले सोमबार बुटवलको सिद्घेश्वरी मैदान, दीपनगरमा विभिन्न मनोरञ्जनात्मक कार्यक्रमले भरिपूर्ण एनसेल मेलाको आयोजना गरेको छ । कम्पनीले रि—ब्राण्डिङ्ग पश्चातन जिकिंदै गरेको चाडपर्वको अवसर पारेर आफ्ना ग्राहक तथा शुभचिन्तकसँग खुशीयाली साट्न र शुभकामना आदानप्रदान गर्न उक्त मेलाको आयोजना गरेको हो । मेलाबिहान ११ बजे शुरु भएको थियो र दिउसो २ बजेबाट नै रमझम र रौनक बढेको थियो । मौसम गरम भएता पनि विभिन्न स्टहरुमा दर्शकहरुको उत्साहजनक सहभागिता जनाएको एनसेलले जनाएको छ । मेलामा चर्चित कलाकार तथा सांगीतिक समुहको प्रस्तुतीहरु, गेम स्टलहरु, किडस् जोन र फुड स्टलहरु मेलाकाविषेश आर्कषणहरु थिए । चर्चित कलाकार सुगमपोख्रेल, शिव परियार, मिलनअमात्य,लाउरे, डिजे रुपेश र सांगीतिक समुहएक्स व्याण्डको प्रस्तुतीहरुले दर्शकहरुलाई भरपुर मनोरञ्जन दिदै नाच्न र झुम्नप्ररित गरेकाथिएभने हाँस्यकलाकार सन्दिप क्षेत्रीको प्रस्तुतीले दर्शकहरुलाई आफ्नो हाँस्यव्यङ्ग्यबाट भरपुर मनोरञ्जन प्रदान गरेका थिए । त्यसैगरी कार्टुन्जक्रु र युभिएन्जल्स्को प्रस्तुतीेदर्शकहरुले मन पराएका थिए । मेलाको प्रत्येक स्टलमा आगन्तुकहरुको बाक्लै भीड लागेको थियो । चंगा चेट प्रतियोगितामादर्शकहरुले रमाईलो गरे भने एनसेल हाईटेक जोनमादर्शकहरुले ‘भर्चुअल रियालिटी’ को अनुभव गरेका थिए र मगसट फोटो बुथमा सबै उमेरका आगन्तुकहरुको फोटो खिचाउन भीड लागेको थियो । सिद्घेश्वरी मैदानमामयुर नाच,लाखे नाच रदशैं पिंङले मेला अझ रोचक बनाएको थियो । मेलामा दर्शकहरुले एनसेलको सेवा तथा सुविधामा आकर्षक अफरका साथै डेटा सेवा, थ्रिजीको गति र अन्य डिभाइसहरु एनसेल एक्पिरियन्स् जोनमा चलाएर टेष्ट गर्न सकिने व्यवस्था पनि मिलाईएको थियो । सुट द रावण, मिनी बास्केटबल, बाउन्स एण्ड स्कोर र स्कोर द रियल गोल लगायतका गेम स्टलहरुमा युवाहरुकोे भिड देखिन्थ्यो । मनोरञ्जनका साथसाथै गेम स्टलहरुमा दर्शकले विभिन्न गिफ्टहरु पनि पाएका थिए । मेलाकै अवसर पारेर एनसेलले आफ्नो ‘च्यानललोयल्टि’ योजनाअन्तर्गत सिम कार्ड, रिचार्ज कार्ड र अन्यप्रोडक्टहरु ग्राहक सम्म पुर्याउने लुम्बिनीअन्चलकाआफ्ना १० वटा आधिकारिक रिटेलरहरुलाई उपहारप्रदान गरेको छ । रिटेलरहरुले गरेको बिक्रीकाआधारमाउनीहरुलाई एससिडी टिभी, ल्यापटप र प्रिन्टर लगायतकाविभिन्नउपहारहरु प्रदानगरिएको थियो ।
राजधानीका विद्यालयमा श्रृंखलावद्ध बम बिस्फोट
काठमाडौं, ४ असोज । राजधानीका विभिन्न विद्यालयहरुमा बम बिस्फोटन भएको छ । बौद्धको आकाशद्धिप बोर्डिङ स्कुल र मनकामना उच्च माबिमा बम बिस्फोट भएको छ भने बौद्धकै राई स्कुल र इस्टपोल स्कुलमा बम फेला परेको छ । त्यस्तै, ललितपुरको रेडियन्ट स्कुलमा पनि बम फेला परेको छ । ती बमहरुलाई नेपाली सेनाको बम डिस्फोजल टोलीले निष्क्रिय बनाएको छ । त्यस्तै डल्लुको कञ्चनजंगा इन्टिग्रेटेड स्कूलमा पनि बम फेला परेको छ । विहान ६ः१५ बजे बम भएको सूचना स्थानीय प्रहरीले पाएको स्वयम्भु बृत्तका प्रहरी सहायक निरिक्षक केके श्रेष्ठले बताए । घटनस्थलमा दुई लिटरको नयाँ प्रेसर कुकरमा ब्याट्री बाहिरबाट जोडेर सेफ्टी भल्भमार्फत तार भित्र छिराएको अवस्थामा भेटिएका थिए ।
निजगढ बिमानस्थलको निर्माण यसै बर्षदेखि, मुआब्जा वितरण सुरु हुँदै
काठमाडौं, ४ असोज । सरकारले निजगढ अन्तराष्ट्रिय बिमानस्थलको निर्माण यसै आर्थिक बर्षबाट सुरु गर्ने भएको छ । सो बिमानस्थलका लागि चालु आर्थिक बर्षमा सरकारले एक अर्ब ५० करोेड रुपैंयाँ बजेट बिनियोजन गरेको छ । अघिल्लो बर्ष बिनियोजीत ५० करोड बजेटबाट पनि खर्च नभएको रकम जोडेर तत्कालै मुआब्जा वितरणको तयारीमा नेपाल नागरिक उड्डयन प्राधिरण लागेको हो । जग्गा अधिग्रहणका लागि ३५ दिने सूचना निकालिसकिएको छ । सो सूचनाको म्याद समाप्ता भएर स्थानिय सहमतिका आधारमा १५ दिन म्याद थप गरिएको बारा क्षेत्र नम्बर ६ का सांसद पुरुषोत्तम पौडेलले जानकारी दिए । ‘३५ दिने म्याद सकिएर १५ दिन थप गरिएको छ, अबको केहि दिन भित्रै मुआब्जा वितरणको काम सुरु हुन्छ’, सांसद पौडेलले विकासन्युजसँग भने । बिमानस्थल निर्माण क्षेत्रमा ११० बिगाह नम्बर जमिनमा १२० परिवारको बसोबास रहेको छ । सोमध्ये ८० परिवारले मात्रै मुआब्जाका लागि विवरण बुझाएका छन् । बाँकी ४० परिवारले जमिन सट्टा भर्नाको माग गरेको पनि पौडेलले जानकारी दिए । नम्बरी जमिन बाहेक करिब ६ सय बिगाह ऐलानी जमिनमा १४२१ परिवार बसेका छन् । उनीहरुलाई मुआब्जा वितरणका लागि कानुनी व्यवस्था नरहे पनि सरकारले बिशेष निर्णय गरेर मुआब्जा वा सट्टा भर्नामा जमिन दिनेछ । नागरिक उड्डयन प्राधिरणले यसै बर्षभित्र मुआब्जा र डिपिआर तयार पार्ने जिम्मेवारी पाएको छ । त्यसका लागि समयमै काम सम्पन्न गर्ने योजना बनेको प्राधिकरणका महानिर्देशक सञ्जिव गौतमले बताए । प्राधिकरणले एक खर्ब २१ अर्ब रुपैंयाँ खर्चेर निजगढ अन्तराष्ट्रिय बिमानस्थलको पहिलो चरणको निर्माण सम्पन्न गर्ने योजना अघि सारेको छ । संस्कृति पर्यटन तथा नागरिक उड्डयन मन्त्रीको अध्यक्षतामा बस्ने प्राधिकरण सञ्चालक समितिको बैठकले ६ बर्षभित्रै निर्माण सम्पन्न हुनेगरि पहिलो चरणको योजना पास गरेको हो । यसरी निर्माण गरिएको बिमानस्थलले बर्षेनी एक करोड ५० लाख यात्रुलाई सेवा दिन सक्ने नागरिक उड्डयन प्राधिकरणका महानिर्देशक सञ्जिव गौतमले बताए ।
एनसीसी बैंकको प्रमुख कार्यकारी अधिकृतमा रमेशराज अर्याल नियुक्त, मर्जपछिकाे व्यवस्थापन मुख्य चुनाैति
काठमाडौं, ४ असोज । नेपाल क्रेडिट एण्ड कमर्श (एनसीसी) बैंकको प्रमुख कार्यकारी अधिकृतमा रमेशराज अर्याल नियुक्त भएको छन् । भदौ ३० गते बसेको बैंक सञ्चालक समितिको बैठकले असोज १ गतेदेखि लागू हुने गरी अर्याललाई ४ वर्षको लागि प्रमुख कार्यकारी अधिकृतको जिम्मेवारी दिएको स्राेतले बतायाे । गत पुस १४ गतेदेखि अर्याल उक्त बैंकको कामु प्रमुख कार्यकारी अधिकृतका पदमा कार्यरत थिए । उनी सोही बैंकमा विगत २० वर्षदेखि कार्यरत छन् । औपचारिक अध्ययनतर्फ एमबीए गरेका अर्यालले एनसीसी बैंकमा फाइनान्स, आन्तरिक लेखापरिक्षण, मानव संशाधन विभागका साथै लामो अवधि कम्पनी सचिवको जिम्मेवारी समेत समालेका थिए । उनले करिव साढे ६ वर्ष तत्कालिन ग्रिनलेज बैंक (हाल स्ट्याण्डर्ड चार्टर्ड बैंक नेपाल)मा काम गरेको थिए । मर्जपछिको एनसीसी बैंककाे समाल्नु नै मुख्य चुनौति हुनेछ । एनसीसी बैंकमा अन्य चार विकास बैंक मर्ज हुँदैछन् । मर्जको सबै प्रक्रिया पुरा भएको छ भने असोज २८ गतेबाट एकिकृत कारोबार गर्ने भएको छन् । असोज २८ गते एनसीसी बैंकको स्थापना दिन हो । मर्जपछि यस बैंकको चुक्ता पुँजी ४ अर्ब ६८ करोड रुपैयाँ हुने भएको छ । मर्ज हुनुपूर्व सबै संस्थाको कुल चुक्ता पुँजी ५ अर्ब ६६ करोड रुपैयाँ भएपनि मर्ज स्वाप रेसियोका कारण ४ अर्ब ६७ करोड ९० लाख रुपैयाँ मात्र हुने भएको छ । मर्जपछि लगत्तै बैंकले करिब ३५ प्रतिशत बोनस सेयर दिएर दिने र अपुग रकमको लागि हकप्रद सेयर जारी गरी पुँजी ८ अर्ब पुर्याउने बैंकको तयारी छ । मर्जपछि बैंकको निक्षेप ५८ अर्ब, कर्जा ४७ अर्ब रुपैयाँ, शाखा ९७ वटा र कर्मचारी १०२८ जना हुने भएको छ ।
