भारतीय कर्मचारीको ‘सहुलियत भ्रमण’ मा नेपाल, ५ लाखभन्दा बढी भारतीय कर्मचारीलाई यस्तो सुविधा
काठमाडौं १३, कात्तिक । भारत सरकारले आफ्ना कर्मचारीलाई उपलब्ध गराउने सहुलियतपूर्ण भ्रमण गन्तव्यको सूचीमा नेपाल पनि समावेश गर्ने भएको छ । अन्य विकसित मुलुकले झैं भारतले पनि आफ्ना कर्मचारीलाई वर्षमा केही दिन विदेश भ्रमणमा पठाउने र त्यसका लागि सुविधा उपलब्ध गराउने गरेको छ । प्रतिवर्ष ५ लाखभन्दा बढी भारतीय कर्मचारीले त्यस्तो सुविधा लिने गरेका छन् । भ्रमण सूचीमा नेपाल थिएन । नेपालका तर्फबाट आग्रह भएपछि भारतले सूचीमा राख्ने आश्वासन दिएको छ । गुणस्तरीय पर्यटकको संख्या वृद्धि गर्न नेपाल सरकारले त्यस्तो सूचीमा पार्न आग्रह गरेको थियो । परराष्ट्रमन्त्री प्रकाशशरण महतले यसले नेपालको पर्यटनमा फाइदा पुग्ने बताए । भारतले अन्य मुलुकबाट पनि नेपाल प्रवेश गर्न सक्ने सुविधासमेत उपलब्ध गराउन लागेको छ । चीनले आफ्ना कर्मचारीलाई नेपाल भ्रमणका लागि सहुलियत दिँदै आएको छ । नेपालको आग्रहबिनै चीनले दुई वर्षअघि सूचीमा नेपाललाई राखेको थियो । चिनियाँ कर्मचारीको नेपाल भ्रमणमा रुचि बढ्ने र युरोप अमेरिकाभन्दा सस्तो पनि हुने भएपछि उनीहरूको नेपाल मोह बढेको थियो । अघिल्लो वर्ष मंसिर र पुस महिनामा चीनका करिब पाँच सय सरकारी अधिकारीले नेपालको भ्रमण गरेको जानकारी परराष्ट्र मन्त्रालयसँग छ । अनौपचारिक रूपमा पर्यटक भएर आउनेहरूको सूची भने सरकारसँग हुँदैन । परिणाम चाँडै देखिनेछ ःमहत दिल्लीमा बिहीबार सम्पन्न नेपाल(भारत संयुक्त आयोगको बैठकमा नेपाली प्रतिनिधि मण्डलको नेतृत्व गरेर फर्केका परराष्ट्रमन्त्री महतले बैठक सफल र उपलब्धिमूलक रहेको बताए । ‘विगतमा भएका सम्झौता, आयोजना एवं सहयोगको कार्यान्वयनमा भारतीय पक्षबाट पनि सकारात्मक जवाफ पाएका छौं, यसको परिणाम चाँडै देखिन्छ,’ उनले भने । विगतमा सहमति भएर पनि कार्यान्वयनमा आउन नसकेका कैयौं आयोजना र सम्झौता कार्यान्वयनका लागि दुवै पक्षबाट जुटेको सहमतिको माइन्युटमा हस्ताक्षर गरिएको पनि उनले बताए । अघिल्लो बैठकमा जस्तै यसपटक संयुक्त वक्तव्य जारी नभएका बारे उनले भने, ‘हस्ताक्षर गरेर माइनुट साटासाट गरिसकेपछि किन आवश्यक रह्यो र संयुक्त वक्तव्य उल्लेख छ । कन्तिपुर दैनिकबाट ।
भारतीय दलालले भन्दा बामपन्थीले के राम्राे गरे ?
रामेश्वर खनाल जिन्दगी भर बामपन्थीहरूले भारतीय विस्तारवाद मुर्दावाद भनेर सिकाए । २०२६ सालमा सात कक्षा पढ्दा जवर्जस्ती जुलुसमा लैजान खोजे । त्यो शान्त तानसेन शहरमा जहाँ त्यो बेला गाइजात्राको रातमा देखाइने बास्सा (वाल्यकालमा त्यो शव्द बुझिएन होला, तर परिवारमा कसैको मृत्यू भएको छ भने उनको सम्मानमा गरिने सांस्कृतिक कार्यक्रम; यस्तै कार्यक्रम कालान्तरमा मैले इटालीका गाउँहरूमा देखें) बाहेक अरू केहि नदेखेकाले जान्न भन्यौं । धन्न कुटाई खाइएन । साना थियौं, माफी पायौं । तर ठूलाहरूले पाएको दुखको वर्णन करिव एक वर्ष सुन्यौं । गाउँ थियो, टिभी रेडियो थिएन, त्यहि भएर श्रुतिकथ्य रमाइलो लग्थ्ग्यो । वामपन्थ त्यसपछि झांगियो । कहिले सुस्ता, कहिले कालापानी, कहिले लिपुलेक । सर्वत्र भारत विरोध । जो भारतसंग राम्रो सम्बन्ध राख्न पर्छ भन्थे ती दलाल कहलिए । अझै कहलिन्छन । अहिले सब दलाल ठहरै भए । भारतीय विस्तारवाद मुर्दावाद भन्नेहरूले सारा नेपाल र नेपालका विदेशस्थित कार्यालयहरूमा विदा दिए । अनि हामी बिदा बस्ने भयौं । म बिदा पहिला पनि बसिन । अहिले पनि बस्दिन । मेरोलागि शरीरले दिएसम्म विदा हुँदैन । बहुत दुखले एउटा सामान्य प्रश्न मात्र राखेको छु । भारतीय दलाल मुर्दावाद भनेर नारा लगाउन सिकाएको तपाइँहरूले हो । अहिले तपाइँहरूले ती दलालले गरेको भन्दा राम्रो काम गर्नुभो ? की नराम्रो ? प्रत्येक वामपन्थीले आफ्ना नेतालाइ यो प्रश्न सोद्धा राम्रै हुन्थ्यो । (खनालकाे फेसबुकबाट)
पुनःनिर्माणमा प्रभावकारी तवरले वित्तीय परिचालन गरिने
काठमाडौं, १२ कात्तिक । राष्ट्रिय पुनःनिर्माण प्राधिकरण विकास सहायता समन्वय तथा सहजीकरण समितिले समितिको कार्यविधि तथा संरचना तयार गरेर वित्तीय स्रोत परिचालन गर्ने निर्णय गरेको छ । समितिको शुक्रबार बसेको पहिलो बैठकले समितिको प्रत्येक दुई महिनाको कम्तीमा एकपटक बैठक गरेर पुनःनिर्माण कार्यलाई थप गति दिने गरी आगामी बैठकमा निर्णय गरिने प्राधिकरणले जनाएको छ । बैठकमा प्राधिकरणका प्रमुख कार्यकारी अधिकृत तथा समितिका संयोजक सुशील ज्ञवालीले पुनःनिर्माणमा भएका प्रगति र त्यसमा देखा परेका चुनौतीबारे प्रस्तुति गरेको प्राधिकरणका प्रवक्ता रामप्रसाद थपलियाले जानकारी दिए । बैठकमा सहभागीले समितिको गठन भई यसप्रकारको संरचनाको व्यवस्थाले आगामी समयमा वैदेशिक सहायता परिचालन, समन्वय तथा सहजीकरणका लागि विभिन्न सुझाव प्रस्तुत गरेका थिए । प्रवक्ता थपलियाका अनुसार बैठकमा भारतीय सरकारका प्रतिनिधि, चिनियाँ दूतावासका अधिकारी, विश्व वैंक र एसियाली विकास बैंकका नेपालस्थित प्रमुख, नेपाल उद्योग वाणिज्य महासङ्घ, गैरसरकारी संस्था सङ्घका प्रतिनिधि, अन्तर्राष्ट्रिय गैरसरकारी संस्थाका प्रतिनिधि, अर्थ मन्त्रालय, महालेखा नियन्त्रकको कार्यालय, राष्ट्रिय योजना आयोग, परराष्ट्र मन्त्रालयका उच्च अधिकारीको सहभागिता थियो । उनीहरुले समितिको गठनले भूकम्पपश्चात्को पुनःनिर्माण तथा पुनःस्थापनामा भइरहेको वैदेशिक लगानीलाई प्रभावकारी र पारदर्शी बनाउनुका साथै थप वित्तीय स्रोत परिचालनमा सहयोग पुर्याउने विश्वास लिएको थियो । पुनःनिर्माण तथा पुनःस्थापना कार्यका निम्ति भूकम्पलगत्तै भएको अन्तर्राष्ट्रिय सम्मेलनमा व्यक्त भएकामध्ये हालसम्म करिब दुइ खर्ब ७८ अर्ब रुपैयाँ सहयोगका निम्ति विभिन्न सरकार एवम् दातृ निकायसँग सम्झौता सम्पन्न भइसकेको छ । रासस
प्रभु बैंकको नयाँ शाखा तनहुँको दुलेगौडामा सञ्चालन
काठमाडौं, १२ कात्तिक । प्रभु बैंकले शुक्रबारदेखि आफ्नो नयाँ शाखा तनहु जिल्लाको दुलेगौडामा सञ्चालन गरेको छ । उक्त स्थानमा बैंकले नयाँ शाखा कार्यालय स्थापना गरी सञ्चालनमा ल्याएको हो । एक समारोहका बिच उक्त शाखा कार्यालयको उद्घाटन एक समारोहका बिच नेपाल राष्ट्र बैंकका कार्यकारी निर्देशक शिवनाथ पाण्डेले गरेका हुन् । मर्जरको क्रममा एकै स्थानमा दोहोरिन गएका बैंकका शाखा कार्यालयहरु मध्ये पोखरा शाखा(साविक ग्राण्ड बैंक नेपाल लि.) कार्यालयलाई दुलेगौडामा स्थानान्तरण गरिएको हो । यसका साथै मर्जरको क्रममा दोहोरिन गएका अन्य शाखा कार्यालयहरु पनि क्रमशः स्थानान्तरण गर्दै जाने बैंकको योजना रहेको छ । शाखा कार्यालयहरु स्थानान्तरण भई नयाँ ठाउँमा बैंकका शाखा कार्यालयहरु सञ्चालन हुँदा बैंकको सेवा विस्तारित हुनुका साथै उक्त स्थानका ग्राहकहरुले सरल, सहजरुपमा सम्पूर्ण बैंकिङ्ग सुविधाहरु प्राप्त गरी लाभान्वित हुने बैंकले विश्वास लिएको छ ।
बर्डफ्लुबाट सतर्क हुन भारतीय सरकारको आह्वान
नयाँ दिल्ली, १० कात्तिक । भारतको सङ्घीय सरकारले स्वास्थ्य सन्देश जारी गरी बर्ड बर्डफ्लुबाट सतर्क हुन आह्वान गरेको छ । बुधबार जारी सन्देशमा पंक्षीहरुसँग सकेसम्म टाढा रहन सवैलाई आग्रह गरिएको छ । मरेका र बिरामी पंक्षीको व्यवस्थापन गर्दा निकै सतर्कता अपनाउन पनि सन्देशमा विषेश जोड दिइएको छ । गतहप्ता मात्रै नयाँ दिल्ली र मध्यप्रदेशको चिडियाखानामा बर्ड फ्ल्युबाट केही चराहरु मरेका थिए । रासस/सिन्ह्वा
अनुगमन टोलीद्धारा एकसय ६० किलो प्रदूषित मिठाइ नष्ट
भक्तपुर, १२ कात्तिक । तिहार नजिकिएपछि जिल्ला प्रशासन कार्यालयको अनुगमन टोलीले अखाद्य वस्तु प्रयोग गरिएका र प्रदूषित देखिएका एकसय ६० किलो मिठाई नष्ट गरेको छ । टोलीले विभिन्न स्थानका मिठाई पसलमा गरेको अनुगमनमा भण्डारण गरी बिक्रीका लागि राखिएको कमिला र झिँगा डुबेका र फाहोर मिठाई भेटिएपछि नष्ट गरेको हो । अनुगमन टोलीले भक्तपुर नगरपालिका– ४ कमलविनायकमा रहेको विनायक मिठाई भण्डारले बिक्रीका लागि भण्डारण गरेको लाल मोहन, रसबरी, रातो चमचम, सेतो चमचमलगायतका मिठाईमा कमिला, झिगा, भुसुना र साङ्लो डुबेको भेटेपछि नष्ट गरेको खाद्य तथा गुणनियन्त्रण विभागका शङ्कर भण्डारीले बताए । उक्त मिठाई भण्डारले आवश्यक न्यूनतम मापदण्डसमेत पूरा नगरेको पाइएको उनको भनाइ थियो । जिल्ला प्रशासनका प्रशासकीय अधिकृत रवीचन्द्र मिश्रले उक्त मिठाई पसलको भान्छामा सिलबन्दी गर्न लागेपछि सञ्चालकले विरोध गरेका थिए । केहीसमय विवाद भएपछि सो टोली सिलबन्दी नगरी फर्किएको थियो । टोलीले कमलविनायकमा रहेको शाक्य मिठाई पसलबाट अखाद्य रङ्ग मिसिएको मिठाई नियन्त्रणमा लिएर नष्ट गरेको छ । कमलविनायकमै रहेको काफ्ले मिठाई भण्डार र सूर्यविनायकमा रहेको लक्ष्मी मिठाई भण्डारमा अनुगमनको क्रममा मूल्यसूची नभएको, आन्तरिक राजस्व कार्यालयमा दर्ता नभएको, नाप तौलका उपकरण प्रमाणीकरण नगरेको पाएपछि ती पसलका व्यापारीलाई सचेत गराएको छ । बजार अनुगमनमा जिल्ला प्रशासन कार्यालय, र खाद्य तथा गुण नियन्त्रण विभागका कर्मचारी प्रहरी, स्थानीय उपभोक्ता, अधिकावादी एवम् सञ्चारकर्मीको सहभागिता थियो । रासस
प्रभु इन्स्योरेन्सको १७ प्रतिशत बोनस पास, ५० प्रतिशत हकप्रद सेयर निष्काशन हुने
काठमाडौं, १२ कात्तिक । प्रभु इन्स्योरेन्स लिमिटेडको सेयरधनीलाई चुक्ता पूँजीको १७ प्रतिशत बोनस दिने निर्णय पास भएको छ । शुक्रबार सम्पन्न बैंकको २१औँ वार्षिक साधारणासभाले बोनस पश्चात ५० प्रतिशत (२ः१) हकप्रद शेयर निष्काशन गर्ने बैंक सञ्चालक समितिको प्रस्ताव समेत पारित गरेको छ । साथै उक्त सभाले गत आर्थिक वर्षको आर्थिक प्रतिवेदन पनि पास गरेको छ । बोनस तथा हकप्रद शेयर वितरण पश्चात कम्पनीको चुक्ता पुँजी ५७ करोड ७५ लाख ५२ हजार रुपैयाँ हुनेछ । कम्पनीले आर्थिक वर्षमा १४ करोड ९३ लाख २ हजार रुपैयाँ खुद मुनाफा आर्जन गर्न सफल भएको कम्पनीद्धारा जारी विज्ञप्तिमा उल्लेख छ । कम्पनीले आर्थिक वर्ष ०७२/०७३ मा ७६ करोड १७ लाख ९३ हजार रुपैयाँ बीमाशुल्क आर्जन गरेको थियो । साथै चालु आर्थिक वर्षको प्रथम त्रैमासिक सम्ममा २४ करोड २७ लाख ५५ हजार रुपैयाँ बीमा शुल्क आर्जन गरेको कम्पनीले जनाएको छ । जुन अघिल्लो आर्थिक वर्षको तुलनामा १० दशमलब ३० प्रतिशत बृद्धि भएको छ । कम्पनीले बिगत वर्षदेखिनै मुलुकका दुर्गम जिल्लाहरुमा कृषि शाखाहरुको स्थापना गरि बीमा सेवा विस्तार गरेको छ ।हाल मुलुकभर कम्पनीका केन्द्रिय कार्यालय सहित १९ शाखा तथा उपशाखाहरु संचालनमा रहेका छन् । आगामी दिनमा कम्पनीको सेवा विस्तारको लागि आवश्यक क्षेत्र पहिचान गरि शाखा बिस्तार गर्ने तथा कम्पनीलाई आवश्यकता अनुसार अझ बढी आधुनिकिकरण गर्दै लैजाने कम्पनीको योजना रहेको छ । भविष्यमा आफ्ना ग्राहकहरुलाई स्तरीय सेवा दिने तथा शेयरधनी महानुभावहरुलाई अधिकतम प्रतिफल दिने लक्ष्य लिएको छ ।
एनएमबी बैंकको सिइओ पाैडेलकाे कार्यकाल चार महिना थप, चैतदेखि लागू हुने गरी केसी नियुक्त
उपेन्द्र पाैडेल काठमाडौं, १२ कात्तिक । एनएमबी बैंक लिमिटेडले प्रमुख कार्यकारी अधिकृत उपेन्द्र पाैडेलकाे कार्यकाल करिब चार महिना अवधिकाे लागि थप गरेकाे छ । उनकाे कार्यकाल मंसिर ८ गते सकिदै थियाे । विहीबार बसेकाे बैंक सञ्चालक समिति बैठकले पौडेलको कार्यकाल फागुन मसान्तसम्म थप गरेकाे हाे। साथै बैंकले अागामी चैत १ गतेदेखि लागू हुने गरी सुनिल केसीलाई प्रमुख कार्यकारी अधिकृत(सिइओ) नियुक्त गरेको छ । केसी हाल बैंकको डेपुटी सिइओ पदमा कार्यरत छन् । पौडेलले विगत १७ वर्षदेखि एनएमबीको प्रमुख कार्यकारी अधिकृतका रुपमा जिम्मेवारी सम्हाल्दै आएका छन् । मर्चेण्ट बैंकिङ एण्ड फाइनान्सका रुपमा स्थापना भएको एनएमबी उनकै नेतृत्वमा बाणिज्य बैंकमा स्तरोन्नति भएको थियाे । अाफ्नाे कार्यकालमा सन्ताेषजनक काम भएकाे पाैडेलले बताए । अाफ्नै नेतृत्वमा प्राविधिक रूपमा बैंककाे चुक्ता पूँजी ८ अर्ब रूपैयाँ हुने हुनले बताए । शुरू भएका केही काम सम्पन्न हुने क्रममा रहेकाेले र ती कार्य सम्पन्न गर्न सजिलाेकाे लागि बैंकले थाेरै समय थप गरेकाे उनले बताए। पाैडेल हाल नेपाल बैकर्स संघकाे अध्यक्ष समेत छन् । अागामी मंसिर पहिलाे साता हुन लागेकाे संघकाे साधारणासभाले नयाँ नेतृत्व चयन गर्दैछ । सुनिल केसी को हुन केसी ? केसीले सन १९९० मा स्ट्याण्डर्ड चाटर्ड बैंकबाट बैंकिङ करिअर सुरु गरेका थिए । त्यसपछि उनी एक वर्ष तत्कालिन एनआइसी बैंकमा आवद्ध भए । त्यसको केहि समयपछि नै केसी पुनः स्ट्याण्डर्ड चाटर्ड बैंकमै फर्किए । दुई पटक गरेर उनले स्ट्याण्डर्ड चाटर्ड बैंकमा १८ बर्ष काम गरेका थिए । एनएमबी बैंकमा भने उनी ८ वर्ष अघि डिजिएमका रुपमा प्रवेश गरेका थिए र जीएम हुँदै हाल डेपुटी सिईओका रुपमा काम गरिरहेका छन् । केसीले भारतबाट एमबीए गरेका छन् । बैंकभित्र ट्रेजरी, कर्पाेरेट बैकिङ, फाइनान्स, अपरेशन लगायत क्षेत्रमा बढी काम गरेकाे अनुभव उनीसँग छ ।
