अर्जेन्टिनाले विश्व कप खेल्न नपाउने सम्भावना
काठमाडौं, १९ कात्तिक । अर्जेन्टिनाले सन २०१८ मा रुसमा आयोजना हुने विश्व कप फुटबल प्रतियोगीता खेल्न नपाउने सम्भावना बढेको छ । अर्जेन्टिनाका प्रशिक्षक एड्गार्डो बाउजा स्वयंले नै अर्जेन्टिना विश्व कप छनौटका लागि चुनौतीपुर्ण अवस्थामा पुगेको खुलासा गरेका हुन् । फिफाले विश्व कप छनौट खेलिरहेको बोलिभियाले अयोग्य खेलाडी खेलाएको आरोपमा कारवाही गरेपछि अर्जेन्टिनाको विश्वकप खेल्ने सम्भावनामा कम भएको हो । बोलिभियाले चिलीलाई बराबरीमा रोकेको थियो भने पेरुलाई २ गोलले पराजित गरेको थियो । तर फिफाले बोलिभियालाई चिली र पेरुसँग ३ गोलले पराजित भएको नजिता घोषणा गरिदिएको छ । यसले चिलीलाई थप २ अंक प्राप्त भएको छ र ऊ पाँचौं नम्बरमा उक्लिएको छ । दक्षिण अमेरिकी समुहबाट चार मुलुकले आगामी विश्वकप खेल्न पाउनेछन् । तर हालसम्म अर्जेन्टिना सो समुहको ६ औं नम्बरमा रहेको छ । अब अर्जेन्टिनाले चार खेल खेल्न बाँकी रहेको छ । जसमा ब्राजिल र कोलम्बिया जस्ता बलिया प्रतिष्पर्धीसँगको खेल्नुपर्नेछ । नोभेम्र १० मा अर्जेन्टिनाले ब्राजिल र १५ तारिखका दिन कोलम्बियासँग प्रतिष्पर्धा गर्नेछ ।
रानीदेखि धरानसम्मको सडक चारलेनको बन्ने
मोरङ, १९ कात्तिक । विराटनगरको जोगवनी नाकादेखि धरानसम्मको कुल ५० किलोमिटर सडक चार लेनको निर्माण हुने भएको छ । दुहवी र इटहरीबजार क्षेत्रका धेरै घर संरचनाहरु सडक फराकिलो बनाउनेक्रममा भत्काउनु पर्ने देखिएपछि प्रस्तावित ६ लेन सडकलाई घटाएर चार लेनमा निर्माण गर्न लागिएको हो । सडक आयोजना प्रमुख दीपक भट्टराईले सरकारको निर्णय आउन अझै बाँकी रहेपनि स्थानीयवासीको असहयोगले ६ लेन सडक निर्माण हुने सम्भावना न्यून रहेको बताए । सो सडकलाई ६ लेनको बनाउने प्रस्ताव गरिए पनि विभिन्न कारणले चार लेन मात्रै बन्ने भएको हो । सडक विस्तार हुँदा दुहवीका पक्की र कच्ची गरी एक सय ७७ घर र इटहरीको मूलचोकबाट दक्षिणतर्फका केही घर भत्काउनुपर्छ । यी दुवै स्थानमा ठूलाठूला पक्की घर रहेका छन् । योजनाअनुसार ६ लेन सडक विस्तार गर्दा आयोजनाले सडकको केन्द्रबाट दायाँबायाँ २५/२५ मिटर विस्तार गर्ने योजना बनाएर काम अघि बढाए पनि जग्गा अपुग भएपछि डिजाइन परिवर्तन गरेर पछि केन्द्रबाट दायाँबायाँ १५/१५ मिटर मात्र विस्तार गर्ने कार्य गरिरहेकाले अब सडक ६ लेनको होइन चार लेनमा मात्र सीमित हुनेमा कुनै शङ्का छैन । मुुलुककै व्यापार विस्तार तथा भारत र तेस्रो मुलुकसँगको आयात निर्यातका लागि अहिले जोगवनीबाट विराटनगर हुँदै धरानसम्म ६ लेन सडक विस्तार गर्ने सरकारको योजना थियो । भारतसँग सीमा जोडिएका सबै नाकाका सडकलाई ६ लेनमा विस्तार गर्ने सरकारको लक्ष्य पनि रहेको छ । जोगवनीदेखि विराटनगरको पहडगछ लगायतका क्षेत्रमा ६ लेनको सडक हुने आयोजनाले भन्दै आएपनि सो मार्गमा पर्ने दुहवी र इटहरीको मुख्य बजार क्षेत्रको सडकको दायाँबायाँ रहेको भवन भत्काउने विवादका कारण सो सम्भावना न्यून हुँदै गएको हो । सडकमा दायाँबायाँ तीनरतीन लेन हुने र मध्य भागमा दुईतिर सडक विभाजित गर्ने क्रङ्किटका डिभाइडरको संरचनासँगै सडकको दुवैतिर बिरुवा रोपेर हरियाली पारिने योजना रहेको छ । सडकसँगै पैदल यात्रीका लागि फुटपाथ र ढलसमेत रहने योजना छ । तर मुख्य बजार क्षेत्रमा भने जग्गा अभावले गर्दा हरियाली नहुने र फुटपाथ पनि साँघुरो हुने सम्भावना बढेको देखिन्छ । सडक आयोजना प्रमुख दीपक भट्टराईका अनुसार दुहवीबजार क्षेत्रमा अहिले भएको सडकको जग्गाबाहेक अरू दुई बिघा जग्गा चाहिन्छ र त्यहाँ बनेका घर पनि भत्काउनु पर्नेभएकाले जग्गा उपलब्ध गराइदिन भनी सडक विभागलाई पत्रचार गरिसकेको छ । उनका अनुसार बजार क्षेत्रको केही जग्गा नगरपालिकाको समेत स्वामित्वमा रहेको र कतिपय जग्गा व्यक्तिको व्यक्तिगत रहेकाले घरजग्गाभन्दा घर भत्काउँदा ठूलो क्षति हुनेहुँदा यसबारे सरकारको निर्णय नआएकाले दुहवीबजार क्षेत्रमा ठेक्का लगाउन बाँकी छ । सरकारले घरजग्गाको मुआब्जा दिने वा अन्य कुनै वैकल्पिक उपाय गर्ने त्यसबारे निर्णय आएपछि मात्र सो क्षेत्रको सडक निर्माणसम्बन्धी ठेक्का लगाउन सकिने धारणा आयोजना प्रमुख भट्टराइको छ । सडक विस्तारका लागि चालु आवमा दुहवीको उत्तरदेखि इटहरीको मूल चौकभन्दा केही दक्षिणसम्मको ठेक्का लागेको छ । दुहवीदेखि इटहरी र विराटनगरबजार क्षेत्रको सडक निर्माणका लागि यस वर्ष दुई अर्ब २३ करोडमा ठेक्का लागेको हो । यसअघि विराटनगरको रानीदेखि १५ किलोमिटर सडक दुई अर्ब ८२ करोडमा ठेक्का लागेको थियो । विराटनगरदेखि इटहरीसम्मको २९ किलोमिटर सडक ठेक्का लागिसकेको छ । ठेक्का लागिसकेको सडकमध्ये २०६९र०७० देखि अघिल्लो वर्षसम्म लागेको १५ किलोमिटर सडकमध्ये सातवटा प्याकेजमा ठेक्का लागेको थियो । अघिल्लो वर्षसम्म ठेक्का लागेको १५ किलोमिटरको सातवटा प्याकेजमध्ये तीनवटा प्याकेजको ६० प्रतिशत र चारवटाको २० प्रतिशत काम सकिएको प्रमुख भट्टराईको भनाइ छ । रासस
अझै सुरु भएन ललितपुरको गोल्डेन टेम्पलको पुनःनिर्माण
ललितपुर, १९ कात्तिक । गत वर्षको भूकम्पमा चर्किएको हिरण्यवर्ण महाविहार (गोल्डेन टेम्पल) को डेढ वर्ष बित्दासमेत पुनःनिर्माण सुरु हुन सकेको छैन । मुख्य मन्दिरमा केही नभए पनि परिसरका भवन चर्किएको हिरण्यवर्ण महाविहार संरक्षण समितिका अध्यक्ष विकाशरत्न धाख्वाले बताए । उनले भने, “छानाहरु पूरै नखसे पनि खस्केका छन् ।” झिँगटी र इँटाहरु खस्केको र भित्ता पनि चर्किएको उनले बताए । भूकम्पका समयमा सानो चर्किएको ठाउँमा पनि पराकम्पनले गर्दा ठूलो भएको छ । परिसर ९मुख्य मन्दिर दायाँ–बायाँको भवन०मा पहिलो र दोस्रो तलामा मर्मत गरेर मजबुत बनाउनुपर्नेछ । तेस्रो तलामा भत्काएर नै गर्नुपर्ने उनले बताए । उनले भने, “पहिलेको स्वरुपमा कुनै परिवर्तन नआउने गरेर पुनःनिर्माण गर्नुपर्ने छ ।” भारतीय दूतावासले सहयोग गर्ने प्रतिबद्धता जनाए पनि सरकारी प्रक्रिया लामो हुँदा सहयोग लिन कठिनाइ भएको उनले बताए । पुरातत्व विभागले स्वीकृति दिएपनि पुनःनिर्माण प्राधिकरणले स्वीकृत नगर्दा ढिलाइ भइरहेको उनले बताए । उनले भने, “सबै निकायबाट स्वीकृति लिएर चाँडो पुनःनिर्माण गरेर हामी पहिलेको स्वरुपमा फर्काउन लागेका छौँ ।” यो महाविहार सबैभन्दा ठूलो सर्वसङ्घ ९सदस्यहरु० भएको महाविहार भएको स्थानीयवासीको दाबी छ । रासस
भक्तपुरका भूकम्प पीडितसँग कात्तिक २५ देखि अनुदान सम्झौता
भक्तपुर, १९ कात्तिक । भक्तपुरका भूकम्प प्रभावितलाई अर्को सातादेखि पहिलो किस्ताको अनुदान रकम ५० हजार वितरण गरिने भएको छ । सङ्घीय मामिला तथा स्थानीय विकास मन्त्रालय अन्तर्गतको केन्द्रीय आयोजना इकाई कार्यालयले स्थानीय निकायमार्फत भूकम्प प्रभावितलाई पहिलो किस्ता रकम वितरणका लागि अनुदान सम्झौता गर्न गाउँगाउँमा सूचना जारी गरिएको छ । भूकम्पीय आवास पुनःनिर्माण परियोजना, जिल्ला आयोजना कार्यान्वयन समितिका संयोजक एवम् स्थानीय विकास अधिकारी ध्रुप्रसाद कोइरालाले लाभग्राहीको अन्तिम नामावली जिल्लाको ६ वटै नगरपालिकामार्फत वडा कार्यालयमा बिहीबार टाँस गरिएको बताए । उनले भने–“लाभग्राहीको अन्तिम नामावली बिहीबार सबै नगरपालिकामार्फत वडा कार्यालयमा टाँस गरिएको छ, अब सात दिनपछि अनुदान सम्झौता सुरु हुन्छ ।” लाभग्राहीको नामसहितको सूचना टाँस गरिएकोमा गैरभूकम्पप्रभावित वा दुईवटा घर भएका भूकम्प प्रभावितको नाम परेको भए उजुरी दिन र वास्तविक भूकम्प प्रभावितको नाम नपरेको भए गुनासोको फाराम भर्न उनले सबैलाई आग्रह गरे । आगामी कात्तिक २५ गतेदेखि नामावली भएका र उजुरी वा दाबी विरोध नपरेका भूकम्प प्रभावितसँग अनुदान सम्झौता गरिने समितिका उपसंयोजक दीपक पाठकले जानकारी दिए । अनुदान सम्झौता भएको पाँच दिनपछि नगरपालिकाले तोकेको बैंकबाट अनुदान रकम लिन सकिने व्यबस्था गरेको उनले बताए । दोस्रो किस्ता वितरण गर्नुअघि नै प्राधिकरणको संयन्त्रले मालापोत कार्यालयमार्फत र गाउँगाउँमा पुनः सर्वेक्षण गर्दा दुईवटा घर भएका वा गैरभूकम्प प्रभावितले अनुदान रकम लिएको पाइएमा त्यस्ता व्यक्तिलाई कारबाही गरी जरिवानासहित रकम फिर्ता गराइने बताए । भक्तपुरमा अहिलेसम्म २४ हजार नौसय दुईजना भूकम्प प्रभावितको पहिचान भएको समितिका उपसंयोजक पाठकले जानकारी दिए । मध्यपुरथिमि नगरपालिका–१, २, ३, ५, ६, ७, ९ र १० वडाबाट नामावली आउन बाँकी भएपनि अन्य पाँचवटा नगरपालिकाबाट भने अन्तिम नामावली आइसकेको छ । यसअनुसार भक्तपुर नगरपालिकामा ६ हजार आठ सय ८८, नगरकोट नगरपालिकामा चार हजार नौ सय १९, अनन्तलिङ्गेश्वर नगरपालिकामा तीन हजार ५४, चाँगु नगरपालिकामा पाँच हजार दुई सय ८४, सूर्यविनायक नगरपालिकामा तीन हजार ६ सय १७ र मध्यपुरथिमि नगरपालिकामा एक हजार एक सय ४० जना लाभग्राहीको पहिचान भएको छ । अनुदान लिन भूकम्प प्रभावित लाभग्राहीले आफ्नो वडा कार्यालयमा नागरिकताको सक्कल, नागरिकताको प्रतिलिपि तीन थान, लालपुर्जाको प्रतिलिपि तीन थान, तस्बिर तीन थान र भूकम्प प्रभावित भएको परिचयपत्रको प्रतिलिपि तीन थान साथमा लैजानुपर्नेछ । रासस
भूकम्पपीडितहरु शिविरमै गलैंचा बुन्न थाले, ८० परिवारका महिलाले गलैंचा बुन्न थाले
काठमाडौं १९, कात्तिक । पहिराले गाउँ फर्कन नसक्ने अवस्था सिर्जना भएपछि घर खर्च चलाउन भूकम्पपीडितले शिविरमै व्यवसाय सुरु गरेका छन् । भूकम्पको डेढ वर्ष बित्दा पनि सरकारले पुनर्वास व्यवस्था नगरेपछि छाप्रोमै पीडितले गलैंचा बुनेर जीवन गुजारा गर्न थालेका हुन् । जिल्लाको मध्य भेकका गाउँबाट आएका झन्डै ८० परिवारका महिलाले गलैंचा बुन्न थालेका हुन् । भूकम्पले बस्ती चिराचिरा परेपछि भागाभाग गर्दै स्थानीय बाँसखर्क भन्ने स्थानमा छाप्रो हालेर बसेको पीडितहरू घर बनाउन गाउँ फर्कन सकेका छैनन् । ‘के गर्नु र जीवन चलाउनैपर्यो,’ शिविरकी सिर्जना तामङले भनिन्, ‘गलैचा बुनेर महिनाको आठ हजारसम्म कमाउँछु ।’ सेलाङ ७ बाट विस्थापित सिर्जनाका पति मजदुरी गर्छन् । आम्दानीले बिहान बेलुकीको गुजारा चलाउन कठिन भएपछि उनले दुई छोरीलाई पनि गलैंचा बुन्न लागेकी छन् । उनका अनुसार गलैंचा बुन्न सिक्नेहरू पनि धेरै छन् । स्थानीय चेवे गाउँकी माइली तामाङका अनुसार गलैंचा बुन्ने व्यवसाय विस्थापितको जीवन धान्ने माध्यम बनेको छ । उनी भन्छिन्, ‘सरकारले पहिरो नजाने ठाउँ देखाएन, अब केही नगरी गुजारा नचल्ने भयो । विदेशी प्राविधिक सहयोगमा सुदूरपश्चिमकी एक महिलाले सुरु गरेको उक्त कारखाना माइली र सिर्जना मात्र होइनन्, विस्थापित सबैजसो महिलाको आयआर्जनको थलो बनेको छ । कान्तिपुर दैनिकबाट ।
भारतीय राष्ट्रपति जानु अगाडि नै एमाले जनकपुुरमा, शुभकामना कार्यक्रम लिएर एमाले मधेश प्रवेश
काठमाडौं १९, कात्तिक । प्रमुख प्रतिपक्षी दल नेकपा एमालेले बिहीवार दुई नम्बर प्रदेश कमिटीको आयोजनामा जनकपुरमा दसैं, तिहार र छठसहितको पर्वका अवसरमा शुभकामना कार्यक्रम सम्पन्न गरेको छ । शुक्रबार जानकी मन्दिरमा दर्शन तथा अभिनन्दन कार्यक्रममा सहभागी हुन भारतीय राष्ट्रपति प्रणव मुखर्जी जानु एक दिनअघि एमालेले गरेको यो कार्यक्रमलाई धेरैले अर्थपूर्णरुपमा हेरेका छन् । अध्यक्ष केपी शर्मा ओली नपुगेपनि कार्यक्रममा दुई वरिष्ठ नेतासहित दोस्रो र तेस्रो तहका अधिकांश नेताहरु उपस्थित भएका थिए । मधेस आन्दोलनका क्रममा मधेसवादी दलहरुले जनकपुरस्थित कांग्रेस तथा एमाले पार्टी कार्यालयमा पटक पटक आक्रमण समेत गरेका थिए । मधेसविरोधी भन्दै एमाले कार्यकर्ताहरु पनि उनीहरुको तारो बन्न पुगेका थिए । एमाले दुई नम्बर प्रदेश कमिटीको आयोजनामा भएको यो कार्यक्रममा करिब १५ हजार एमाले कार्यकर्ता र सर्वसाधरणको उपस्थिति रहेको एमालेका सचिव तथा प्रचार विभाग प्रमुख योगेश भट्टराईले जानकारी दिए । एमालेले यो कार्यक्रमलाई छठको अवसरमा शुभकामना आदान प्रदान गर्नका लागि आयोजना गरिएको दाबी गरेको छ । तर यो कार्यक्रमको तयारी भने दुई नम्बर प्रदेशले दसैँअघिबाटै थालेको थियो । राजनीतिक नाम नदिई शुभकामना आदानप्रदान कार्यक्रम भनिएपनि एमालेले यो कार्यक्रममार्फत मधेसमा आफ्नो बलियो पकड रहेको सन्देश जनकपुरबाट मधेसी दल र भारतलाई समेत दिन खोजेको छ । राष्ट्रपति मुखर्जीको जनकपुर भ्रमणको सुरक्षाव्यवस्थासहितको तयारी गर्न भारतबाट आएका अधिकारी र काठमाडौंस्थित भारतीय दूतावासका अधिकारीहरु जनकपुरमै रहेका बेला एमालेले यो शुभकामना कार्यक्रममार्फत ‘बुझिने शैली’ मा स्पष्ट सन्देश दिन खोजेको देखिन्छ । एमाले अध्यक्ष केपी शर्मा ओली नेतृत्वको सरकारलाई मधेसविरोधी भन्दै भारतकै डिजाइनमा कांग्रेस र माओवादीले ढालेको आरोप एमालेवृत्तले लगाइरहेका सन्दर्भमा आजको जनकपुरको कार्यक्रममार्फत धेरै भ्रम चिर्न सफल भएको दाबी एकजना एमाले नेताको छ । मिथिला भवन प्राङ्गणमा भएको आजको कार्यक्रममा वरिष्ठ नेताहरु झलनाथ खनाल, माधव नेपाल, महासचिव ईश्वर पोखरेल, उपमहासचिव घनश्याम भुसाल, सचिवहरु योगेश भट्टराई, गोकर्ण विष्ट, प्रदीप ज्ञवाली र नागेन्द्र चौधरीसहितका नेताहरु सहभागी थिए । कार्यक्रमस्थलबाट सचिव भट्टराईले अब एमाले मधेसकेन्द्रित अभियानमा लागेको जानकारी दिए । ‘भारतीय राष्ट्रपयि आउने कार्यक्रमसँग यसको कुनै साइनो सम्बन्ध छैन । हामीले पार्टीलाई तराई–मधेसमा नेकपा संगठन विस्तारमा केन्द्रित गर्दैछौं’, सचिव भट्टराईले भने, ‘एमालेबारेमा तराई–मधेसमा सिर्जना गरिएका भ्रमलाई तोड्ने काम जनकपुरबाट सुरु भएको छ । कारोबार दैनिकबाट ।
राष्ट्र बैंकले फाटेका नोट नलिने, नयाँ नोट एक महिनामै थोत्रो बनाएर नल्याउन राष्ट्र बैंकको आग्रह
काठमाडौं १९, कात्तिक । दशैंतिहारका बेला संरक्षण नगरी झुत्रो पारेका नोटलाई नेपाल राष्ट्र बैंक सिद्धार्थनगर शाखा भैरहवाले तत्काल सटही नगर्ने जनाएको छ । दशैंतिहार बीचको एक महिनामा सिद्धार्थनगर शाखाले ३ अर्ब २५ करोडका नयाँ नोट वितरण गरेको थियो ।उक्त रकम लुम्बिनी अञ्चलसहित रोल्पा र प्युठान गरी ८ जिल्लाका ४ सय २४ वटा बेंक तथा वित्तीय संस्थामार्फत वितरण गरिएको छ । नयाँ नोट एक महिनामै फटालेर बैंकमा तत्काल जम्मा वा सटही गर्न नल्याउन बेंक एवं वित्तीय संस्थालाई आग्रह गरिएको नेपाल राष्ट्र बैंक सिद्धार्थनगर शाखाका निर्देशक रेवतीप्रसािद नेपालले जानकारी दिए । अन्य महिनामा उक्त शाखाबाट मासिक औसत डेढ अर्ब पुराना नोटहरु वितरण हुने गरेको निर्देशक नेपालले बताए । अन्नपूर्ण पोष्टबाट ।
भारतको रोजगारीमा बेवास्ता, ११० मुलुकमा रोजगारी खुलेपनि धेरै नेपाली पुग्छन भारत
काठमाडौं १९, कात्तिक । भारत र नेपालबीचको सम्बन्ध छिमेकी राष्ट्रमा मात्रै सीमित छैन, रोटीबेटीको साइनोले झन प्रगाढ बनाएको छ । हुन पनि नेपाली र भारतीय नागरिक रोजगारीको शिलशिलामा एक अर्काका देशमा पुग्नु कुनै नौलो होइन । भारतबाट पनि काम खोज्दै नेपाल आउनेको सङ्ख्या कमी छैन । अर्को कुरा कुटुमेली साइनो, धर्म, संस्कारले पनि भारत र नेपालबीचको सम्बन्धलाई अझै नजिकाएको छ । भारत एक त छिमेकी मुलुक अर्को खुला सिमानाका कारण नेपाली र भारतीय नागरिकलाई काम खोज्दै एक अर्काका देश आतेजाते गर्न सजिलो पनि छ । पूर्वको काकडभिट्टादेखि पश्चिमको कञ्चनपुरसम्मका २२ वटा नाकाबाट दिनहुँ हजारौँ नेपाली काम खोज्दै भारतको विभिन्न सहरमा पुग्छन् । कोही मौसम अनुसार सानोतिनो रकम कमाएर फर्किन्छन् पनि । रोजगारी खोज्दै भारत जाने चलन धेरै पुरानो हो । पछिल्लो समयमा सरकारले खाडी मुलुकहरू, मलेसियालगायत ११० वटा मुलुकमा रोजगारीका लागि खुला गरेको छ । खुला गरिएका देशको रोजगारी धेरै युवालाई भारतको रोजगारीको विकल्प भएको छ । तर सुदूरपश्चिम र मध्यपश्चिम नेपालका नागरिकलाई खाडी मुलुकको रोजगारीभन्दा भारतकै रोजगारी काम लागेको छ । यस क्षेत्रमा प्रत्येक घरबाट कम्तीमा एकजना रोजगारीका लागि भारत गएको भेटिन्छन तर यति ठूलो सङ्ख्या रोजगारीका लागि पुगेका देशमा नागरिकको सुरक्षाका लागि कुनै निकाय नै छैन । त्यसो त भारतबाट पनि थुप्रै नेपाली रोजगारीका लागि नेपाल आएका छन तर उनीहरूको सुरक्षाका लागि भारतले पनि कुनै नीति बनाएको देखिँदैन । मलेसिया, खाडीलगायतका ११० मुलुकमा पुगेकालाई सुरक्षित गर्न र उनीहरूको रोजगारीलाई व्यवस्थित र मर्यादित गराउन श्रम तथा रोजगार मन्त्रालय, वैदेशिक रोजगार विभाग र वैदेशिक रोजगार प्रवर्द्धन बोर्डको गठन गरिएको छ तर सुदूरपश्चिम र मध्यपश्चिमबाट रोजगारीका लागि भारतमा यति नै नेपाली गएका छन् । तिनीहरूका सुरक्षाका लागि कुनै नीति नै छैन । गोरखापत्र दैनिकबाट ।
