नेप्से परिसूचक ३२ अंकले वृद्धि, सबैभन्दा बढी नेपाल लाइफ इन्स्योरेन्सको सेयर कारोबार
काठमाडौं, २९ पुस । यो साता सेयर बजारमा नेप्से परिसूचक पहिलो दिनको तुलनामा ३२ दशमलब ४१ अंकले बढेर अन्तिम दिन १४७९.८६ अंकमा पुगेको छ । बजारमा नेप्से परिसूचकमा सुधार आएता पनि कारोबार रकममा भने अझै सुधार आउन सकेको छैन । साताभर जम्मा एक अर्ब ७३ करोड ७९ लाख ९९ हजार रुपैयाँ बराबरको सेयर कारोबार भएको छ । सातामा पाँचै दिन कारोबार भएको बजारमा १४८ कम्पनीको एक करोड ३३ हजार सात सय ८० कित्ता सेयरहरु खरिद बिक्री भएका छन् । प्रतिशतका आधारमा उक्त कारोबार रकम गत साताको भन्दा १९ दशमलब ७४ प्रतिशत कम हो । गत साता १४७ कम्पनीहरुको कारोबार भएको थियो । जस अनुसार १८,५५१ कारोबारबाट दुई अर्ब १६ करोड ५३ लाख ७६ हजार रुपैयाँ बराबरका ४५ लाख ४९ हजार एक सय ५० कित्ता सेयरहरु खरिद बिक्री भएका थिए । बजारमा होटल र विकास बैंक समूहको परिसूचक बाहेक बाँकी समूहको परिसूचक उकालो लागेका छन् । सबैभन्दा बढी बीमा समूहको परिसूचक २७५ दशमलब ६७ अंकले उकालो लागेको छ । त्यस्तै, वाणिज्य बैंक, जलविद्युत र वित्त समूहको परिसूचक क्रमशः ३८.२३, २८.४९ र २५.६२ अंकले उकालो लागेका छन् । होटल र विकास बैंक समूहको परिसूचक क्रमशः ४१ र ०.२६ अंकले ओरालो लागेका छन् । अन्य बाँकी समूहका परिसूचक भने सामान्य अंकले बढेका छन् । ‘क’ वर्गका कम्पनीहरुको कारोबार मापन गर्ने सेन्सेटिभ इन्डेक्स पहिलो दिनको तुलनामा ७.३४ अंकले बढेर ३१९.९६ अंकमा आईपुगेको छ । यस साता सबैभन्दा बढी नेपाल लाइफ इन्स्योरेन्सको सेयर कारोबार भएको छ ।इन्स्योरेन्सको १३ करोड ४८ लाख रुपैयाँको सेयर किनबेच भएको छ । त्यसैगरी नविल व्यालेन्स फण्ड १ को २५ लाख ४८ हजार कित्ता सेयर किनबेच भएको छ ।
भृकुटीमण्डपमा नेपाली मोह, दैनिक बिक्छन् १५ सयदेखि २ हजार जोर जुत्ता
काठमाडौं, २९ पुस । भृकुटीमण्डपको खुल्ला चौरमा निर्माण गरिएको अस्थायी ट्रसमा एउटा गेट छ । त्यो गेटबाट भित्र प्रवेश गर्ने र बाहिर निस्कनेहरुको संख्या ठुलै देखिन्छ । त्यो हो बिग सेल मेलाको प्रवेश र एक्जिट गेट । त्यहाँ पुस पुस १४ गतेदेखि नेपाली जुक्ता चप्पलको बिग सेल मेला लागिरहेको छ । मेलामा शिखर, कोशेली, बिएफ डिअर हिल, क्रसरोड, टाकुरा, सफ्टच, इजी, स्काई, फुटल्याण्ड, शुल्याण्ड जस्ता चर्चित नेपाली ब्राण्डका जुत्ता चप्पल पाइन्छन् । नेपाली जुत्ता घर प्रालीले आयोजना गरेको मेलामा दैनिक ३ देखि ५ हजार अवलोकन कर्ता आईरहेका छन् । मेला हेर्ने मात्रै आइरहेका छैनन् मानिसहरु, जुत्ता चप्पल किनिरहेका पनि छन् । ‘यहाँ आउने मध्ये ५० प्रतिशत भन्दा धेरैले जुत्ता किन्ने गरेका छन’, फुटवेयर म्यानुफ्याक्चर्स एसोसियसनका अध्यक्ष तथा कोशेली सुजका प्रबन्ध निर्देशक रबिन कुमार श्रेष्ठले भने । बिग सेल मेलामा निःशुल्क प्रवेशको सुबिधा उपलब्ध छ । १५० रुपैंयाँ देखि १० हजार रुपैंयाँ मूल्यका जुत्ता चप्पल रहेको भएपनि उपभोक्ताको रुचीमा भने एक हजार देखि १५०० मूल्यका जुत्ता पर्छन् । अधिकांश कम्पनीले ३० देखि ३५ प्रतिशतसम्म छुट दिएका छन् । त्यसमा केहि कम्पनीले ७५ प्रतिशतसम्मको छुट समेत दिईरहेका छन् । मेलामा सहभागी सबै जसो कम्पनीहरुले जाडो यामलाई लक्षित गरि नयाँ डिजाइनका जुत्ताहरु ल्याएका छन् । मेलाको २ साता बितिसक्दा पनि उपभोक्ताहरुको चाप घटेको छैन् । नेपाली जुत्ता उद्योगहरुबाट उत्पादित गुणस्तरिय जुत्ता चप्पलहरु बार्षिक रुपमा निश्चित समयको लागी बिशेष छुट र सहुलियत सहित आश्चर्यजनक प्रतिस्पर्धि मुल्यमा बिक्रि बितरण गरि नेपाली जुत्ता चप्पलहरुको प्रत्यक्ष प्रयोगकर्ता बढाउनु मेलाको प्रमुख उद्धेश्य भएको नेपाली जुत्ता घरका अध्यक्ष रामकृष्ण प्रसाई बताउँछन् । नेपाली ब्राण्ड लगाउन प्रोत्साहन गर्नुका साथै नेपाली ब्राण्ड प्रवद्र्धनमा टेवा पुग्ने र उपभोक्तालाई नेपाली ब्राण्ड लगाउन बानी बसाल्न मेलामा सिमित डिजाईनका जुत्ता तथा चप्पलहरु लागत भन्दा पनि कम मुल्यमा बिक्रि गरिदै आएको छ । शिखर सुज, बिएफ डियरहिल सुज, स्काइ सुज, क्रस रोड, कोसेली छाला जुत्ता, टाकुरा सुज, शु ल्याण्ड, सप्mट टच, फुटल्याण्ड, ईजी सुज् र टम टेलर ब्राण्डले सहभागीता जनाएका छन् । मेलामा अफिसियल जुत्ता, क्याजुअल जुत्ता, स्पोर्टस जुत्ता, बुटहरु, स्कुल तथा कलेजका युनिफर्म जुत्ताका साथै जेन्टस तथा लेडिज स्याण्डलहरु उपलब्ध छन् । यो मेलामा दुई लाखभन्दा बढी आगन्तुकहरुले अवलोकन गरी ५० हजार जोर भन्दा बढी जुत्ता चप्पलहरु बिक्रि हुने लक्ष्य रहेको छ । नेपाली ब्राण्डका जुत्ता तथा चप्पलहरुमा ६ महिनाको वारेन्टी सुबिधा पनि छ । राष्ट्रिय नाचघर जमलमा मुख्य सोरुम सहित आप्mनो स्थापनाको ४ बर्षको अबधिमा नेपाली जुत्ता घरले द्रुत गतिमा सेवा विस्तार गरिरहेको छ । हाल महाराजगञ्ज चक्रपथ, ललितपुरको कुमारीपाटी, नमस्ते सुपरमार्केट पुल्चोक र बुद्धमल बालाजुमा गरी ५ वटा बिक्री कक्ष सञ्चालन गर्दै आएको छ ।
बजारमा सुनको चरम अभाव, अडर लिन सकिदैन, तस्करलाई पोत्साहान गर्दै सरकार
काठमाडौं, २९ पुस । टंगालकी दुर्गा घिमिरे आफ्नी छोरीलाई सुनको चुरा बाला किन्न नक्सालस्थित देव कर्नर गइन् । उनलाई बजारमा सुन अभाव भएकाले एक महिनाभन्दा यता बाला बनाउन नसक्ने भनि फर्काइयो । कपनका रामबाबु आफ्नो छोराका पास्नीका लागि आवश्यक गहना बनाउन सुन पसल गएका थिए । उनले पनि आफ्नो छोराको साइजको बाला, मुन्द्रीलगायतका गहना नपाउपछि थोरै हो अडर लिइदिनुस् भने तर, व्यवसायीले सुन आउने निश्चित छैन, अडर लिँदा अपठ्यारो पर्छ भनि अडर लिएनन् । बजारमा सुन नभएको भन्दै स्थापित व्यवसायीहरुले ग्राहकलाई फर्काइ रहेका छन् भने साना तथा रातारात धनी हुन खोज्ने व्यवसायीले तस्करीकै सुन किनेर उल्टो उपभोक्तासँग बढी रकम असुली रहेका छन् । धेरै गहना पसलेहरुले ग्राहकहरु सुन किन्न जाँदा पनि शसकिंत भएर हेर्ने र उसलाई आवश्यता छ भनी थाहापाएपछि बढी मूल्य तिर्न बाध्य गराएर सुन विक्री गर्ने गरेका छन् । बजारमा सुनको चरम अभाव भएको छ । आयातित कोटाले बजार माग धान्न नसकेपछि बजारमा सुनको चरम अभाव भएको हो । पुस लागेदेखिनै अभाव हुन थालेपछि मसान्तसम्म आइपुग्दा सुन अभावका कारण व्यवसायीहरु गहनाको अडरै लिन नसक्ने अवस्थामा पुगेको नेपाल सुनचाँदी व्यवसायी महासंघका पूर्व अध्यक्ष तेजरत्न शाक्यले बताए । ‘बैंकहरुसँग सुन छैन, अडर लिन सकिएको छैन, ग्राहकहरुलाई त्यतिकै फर्काउनु परेको छ,’ सुन नपाएसम्म अडर लिन सकिदैन ।’ हाल बजारमा दैनिक ४५ देखि ५० किलोसम्म सुनको माग छ, तर सरकारी कोटा अनुसार १५ किलोमात्र सुन आउँछ, अनि कसरी बजार धान्न सकिन्छ, उनले प्रतिप्रश्न गरे । ‘दैनिक ५ देखि ७ किलोसम्म पुराना सुन आएपनि त्यतिले बजार धान्दैन,’ उनले भन्छन् ‘बजारमा अभाव भएको मौका तस्करहरुले छोप्ने गर्छन ।’ तस्करहरुलाई प्रोत्साहन सरकार आफैले गरिरहेको आरोप महासंघले लगाएको छ । औसतमा हामीलाई दैकि ३० किलो सुन आवश्यक पर्ने महासंघको हिसाव छ । जबजब बजारमा सुनको अभाव हुन्छ तबतब सुन तस्करहरु मौलाउँदै गएको र सुनको उनको भनाइ छ । ‘सरकारले सुन आयातको दीर्घकालीन उपाय व्यवसायी आफैलाई आवश्यकता अनुसार ल्याउन नछाडेसम्म तस्करीहरुले यसरीनै मौका छोपी रहने उनले बताए । यहि मौका छोपेर अहिले बजारमा प्रतितोला सुनमै ३ हजार रुपैयाँभन्दा बढी लिएर कारोबार भइरहेको शाक्यले बताए । ‘धेरै आवश्यकता हुनेले सुन नपाएपछि र गहनाको लागि अडर समेत नलिएपछि उपभोक्ताहरु आफ्नो गर्जो टार्नको लागि बढी रकम तिर्न वाध्य भएका हुन् ।
ललितपुर मोबाइल कम्प्लेक्समा मोबाइल एक्स्पो हुँदै, मोबाइल खरिदमा विभिन्न छुट र उपहार
काठमाडौं, २९ पुस । लगनखेलस्थित ललितपुर मलमा रहेको ललितपुर मोबाइल कम्प्लेक्सले अंग्रेजी नयाँ वर्षको अवसर पारेर मोबाइल एक्स्पो आयोजना गर्न लागेको छ । आफ्ना ग्राहकहरुलाई मोबाइल खरिदमा विभिन्न छुट र उपहारसहित नयाँ वर्षलाई उत्सवमय बनाउन यहि माघ १४ गतेदेखि मोबाइल एक्स्पो आयोजना गर्न लागेको हो । मोबाइल किनौं बुझेर, उपहार छानौं रोजेर भन्ने मुल नाराका साथ यहि माघ १४ गतेदेखि माघ २२ गतेसम्म मोबाइल एक्स्पो आयोजना गर्न लागेको हो । ललितपुर मोबाइल कम्प्लेक्समा ग्राहकहरुले विभिन्न ब्राण्डका स्मार्टफोन, ग्याजेट, एसेसरिज तथा मोबाइल मर्मतको सेवा प्राप्त गर्न सक्नेछन् । मोबाइल कम्प्लेक्समा न्यूनतम ९०० रुपैयाँदेखि १ लाख ४० हजार रुपैयाँसम्मका विभिन्न ब्राण्डका फोनहरु उपलब्ध रहेका छन् । कम्प्लेक्सले आफ्ना ग्राहकहरुका लागि अंग्रेजी नयाँ वर्षको अवसरलाई आकर्षक बनाउन यो योजना ल्याएको कम्प्लेक्सका अध्यक्ष पुरुषोत्तम बस्नेतले जानकारी दिएका छन् । “हामीले यो कम्प्लेक्समा ग्राहकलाई ब्राण्डेड मोबाइल मात्र बिक्री गर्ने हुँदा ग्राहकहरु हामी कहाँ नियमित आउने गर्दछन्,” उनले भने, “यो अंग्रेजी नयाँ वर्षमा सबै मोबाइल खरिदकर्ताहरुलाई आकर्षक उपहारसहित खुशी बनाउन चाहन्छौं ।”
भूकम्पपीडित लाभग्राहीको सर्वेक्षण र प्रमाणीकरण माघ मसान्तमा सकिने
काठमाडौं, २९ पुस । भूकम्पपीडित लाभग्राहीको स्थलगत सर्वेक्षण र प्रमाणीकरण माघ मसान्तमा सक्ने राष्ट्रिय पुनःनिर्माण प्राधिकरण केन्द्रीय गुनासो सुनुवाई समितिले निर्णय गरेको छ । समितिको बिहीबार बसेको बैठकले सहरी विकास मन्त्रालय केन्द्रीय आयोजना कार्यान्वयन एकाइलाई यससम्बन्धी जिम्मेवारी दिने निर्णय गरेको प्राधिकरणका सह-प्रवक्ता डा भीष्मकुमार भुसालले जानकारी दिए । “समितिमा आएका लाभग्राहीमा पर्ने १८ हजार ५००, गैर लाभग्राहीमा पर्ने ३० हजार ९२५, स्थलगत सर्वेक्षण गर्नुपर्ने १७ हजार ६५४ र स्थलगतरुपमै प्रमाणित गर्नुपर्ने तीन हजार ४३२ गुनासा फछ्र्यौट गर्ने सिफारिस बैठकले गरेको छ”–उनले भने । यसका लागि सङ्घीय मामिला तथा स्थानीय विकास मन्त्रालय अन्तर्गतको केन्द्रीय आयोजना कार्यान्वयन एकाइलाई निर्देशन दिएको प्राधिकरणले जनाएको छ । यस सम्बन्धी काम सकी सम्बन्धित गाविस वा नगरपालिकामा नामावली प्रकाशन गर्न बैठकले निर्देश गरेको छ । भूकम्पबाट अति प्रभावित १४ जिल्लामा १९ हजार ८६६ घर प्रवलीकरणका लागि प्राप्त भएकाले त्यससम्बन्धी निर्णय अर्को बैठकले गर्ने भएको छ । पुनःनिर्माणमा जागरण चलाउने, स्थानीय जनसहभागिता जुटाउने, स्वयम्सेवक परिचालन गर्ने, समाज एकीकरण गर्ने, प्रचारप्रसार गर्ने जस्ता कामका लागि गैर नाफामूलक सामाजिक संस्थाबाट सहकार्यका लागि प्रस्ताव आह्वान गरिने भएको छ । विभिन्न विश्वविद्यालय अन्तर्गतका इन्जिनियरिङ सङ्कायका सिभिल इन्जिनियरिङ अन्तिम वर्षमा अध्ययनरत विद्यार्थीलाई यही माघ २१ देखि फागुन २० सम्म एक महिना स्वयम्सेवकका रुपमा पुनःनिर्माण अभियानमा खटाइदिन अनुरोध गर्ने निर्णय पनि बैठकले गरेको सह-प्रवक्ता भुसालले बताए ।
बसपार्क बनाउन एक रोपनी जग्गा निःशुल्क प्रदान
सोलुखुम्बु, २९ पुस । स्थानीय दूधकुण्ड नगरपालिका- ६ कुलनारायण श्रेष्ठले बसपार्क निर्माणका लागि दूधकुण्ड नगरपालिकालाई एक रोपनी एक आना जग्गा निःशुल्क प्रदान गरेका छन् । सदरमुकामस्थित दोर्पुबजारमा हाल प्रतिआना तीन लाख पर्ने रु ५१ लाख मूल्य बराबरको सो जमिन दाता श्रेष्ठले उपलब्ध गराएका हुन् । नगरपालिकाले हाल जिरो प्वाइन्टको रुपमा प्रयोग गरिरहेको स्थान अत्यन्तै साँघुरो भएकोले खुल्ला स्थानमा जिरो प्वाइन्ट बनाइएकाले आवागमनका लागि सहज भएको छ । नगपालिकाले जग्गादाता श्रेष्ठलाई नगर परिषद्का अवसरमा सम्मान समेत गरेको छ । श्रेष्ठले जग्गा उपलब्ध गराएर बसपार्क निर्माण गर्न सहज भएको नगरपालिकाका कार्यकारी अधिकृत गुणराज भटराईले बताए । रासस
बचत गर्न नयाँ बैंकमा फाइदा, ऋण लिन पुराना बैंकमा फाइदा
काठमाडौं, २९ पुस । बैंकबाट ऋण लिदै हुनुहुन्छ ? वा आफुसँग भएको पैसा डिपोजिट गर्ने सोँचमा हुनुहुन्छ ? ख्याल गर्नुहाेस्-तपाईका लागि निक्षेप राख्न र ऋण लिन छुट्टा छुट्टै बैंक उपयुक्त हुन सक्छन् । यतिबेला निक्षेप राख्न नयाँ बाणिज्य बैंक उपयुक्त देखिएका छन् । नयाँ बाणिज्य बैंकहरुले उच्च ब्याज दरमा निक्षेप आव्हान गरिरहेका छन् । तपाईले नयाँ बैंकमा मुद्दति निक्षेप राख्नुभयो भने दुई अंकसम्मको ब्याजदर प्राप्त गर्न सक्नुहुनेछ । तर तपाईलाई ऋण लिन भने पुराना बाणिज्य बैंक उपयुक्त देखिन्छन् । पुराना बैंकले न्युन ब्याजदरमा ऋण अफर गरिरहेका छन् । यी हुन धेरै ब्याज दिने बैंक अधिकांश नयाँ बैंकले मुद्दति निक्षेपमा उच्च ब्याजदर दिईरहेका छन् । जसमा सिभिल बैंक, जनता बैंक, मेगा बैंक लगायत पर्छन् । यी सबै नयाँ बैंक हुन् । जनता बैंक नेपालले पुस १७ गतेदेखि १०० दिन अवधिको मुद्दती खातामा १० प्रतिशत ब्याज दिने योजना ल्याएको छ । मेघा बैंकले १० प्रतिशत ब्याज नै दिने भनेको छ । त्यस्तै सिभिल बैंकले १११ दिने मुद्दति खातामा ११ दशमलव १ प्रतिशत व्याज दिने योजना अघि सारेको छ । पुराना र स्थापित बैंकहरुले भने निक्षेपकर्तालाई ८ प्रतिशतभन्दा कम व्याज दिदै आएका छन् । ऋण लिन पुराना बैंक पैसा बचत गर्न नयाँ बैंक फाइदा जनक छ । तर ऋण लिन पुराना बैंक बैंकबाट फाइदान हुन्छ । नयाँ बैंकले नयाँ कर्जाको लागि १४/१५ प्रतिशत व्याज लिन थालेका छन् । तर पुराना बैंकले ९ प्रतिशतभन्दा कम व्याजदरमा पनि कर्जा दिईरहेको छन् । पुराना बैंकहरुले एक अंकको ब्याजदरमा ऋण दिइरहेका छन् । यसरी एक अंकको ब्याजदरमा ऋण दिने बैंकहरुमा नेपाल बैंक, राष्ट्रिय बाणिज्य बैंक, ग्लोबल आइएमई बैंक, स्ट्याण्डर्ड चाटर्ड बैंक, नेविल बैंक, नेपाल इन्भेष्टमेन्ट बैंक लगायत रहेका छन् । स्ट्याण्डर्ड चार्टर्ड बैंक नेपालले ७ दशमलव २५ प्रतिशतमा घर कर्जा दिदै आएको छ । साथै घर बनाउन कर्जा लिन ग्राहकलाई २० हजार अनुदान समेत दिने स्कीम ल्याएको छ । राष्ट्रिय बाणिज्य बैंकले व्यवसायिक कर्जा साढे ७ देखि ८ प्रतिशतमा दिईरहेको छ भने हाउजिङ तथा रियल स्टेट कर्जा ९ देखि १० प्रतिशतमा दिईरहेको छ । बैंकले साढे ७ प्रतिशत ब्याजदरमा अटो लोन दिईरहेको छ । नेपाल बैंकले पनि न्युन ब्याजदरमा ऋण प्रवाह गरिरहेको छ । बैंकले ९ प्रतिशतमा घर कर्जा दिईरहेको छ भने व्यवसायिक ऋण साढे ८ प्रतिशतमै दिईरहेको छ । नयाँ बैंकले नयाँ कर्जाको व्याज १४/१५ प्रतिशत पुर्याएका छन् । ग्लोबल आईएमई बैंकले शुक्रबार जारी गरेको व्याजदरको सम्बन्धी सूचनामा कर्जाको अधिकतम व्याज १५ दशमलव ५ प्रतिशत पुगेको जनाएको छ । व्याजदर महँगो भएको समयमा बैंकतथा वित्तीय संस्थाहरुले कर्जा प्रोसेशिङ शुल्क १ देखि २ प्रतिशतसम्म लिन थालेका छन् । नयाँ बैंकहरु निक्षेप आकर्षित गर्ने होडबाजीमा लागिरहेका बेला स्थापित तथा पुराना बाणिज्य बैंकहरुले कम ब्याजदरमा धमाधम ऋण प्रवाह गरिरहेका छन् ।
सूर्या लाइफ इन्स्योरेन्सको सञ्चालकमा डा. बिनोद आत्रेय नियुक्त
काठमाडौं, २९ पुस । सूर्या लाइफ इन्स्योरेन्सको सञ्चालकमा डा. बिनोद आत्रेय नियुक्त भएका छन् । बिहीबार बसेको कम्पनीको सञ्चालक समितिको बैठकले आत्रेयलाई आगामी चार वर्षे कार्यकालका लागि सञ्चालक नियुक्त गरेको हो । आत्रेयले नियुक्त पाएकै दिन देखि कम्पनीको कार्यभार सम्हाल्नेछन् । उनीले नेपाल राष्ट्र बैंकमा ३० वर्ष काम गरेर कार्यकारी निर्देशक पदबाट अवकाश पाएका थिए । राष्ट्र बैंकमा रहदा उनले नेपाल बैंकमा करिव ३ वर्ष प्रमुख कार्यकारी अधिकृतको जिम्मेवारी समालेका थिए । हाल उनी व्यवसायिक घराना विशाल ग्रुप निकट भएर विभिन्न कम्पनीको जिम्मेवारी समाल्दै आएका छन् । डा आत्रेय हाल इमर्जी नेपाल लिमिटेड कम्पनीको प्रमुख कार्यकारी अधिकृत समेत छन् ।
