पाकिस्तानमा गुडिरहेको रेलमा आगलागी, साठी भन्दा बढी यात्रुको मृत्यु
इस्लामाबाद । पाकिस्तानमा बिहीबार बिहान गुडिरहेको एउटा रेलमा आगलागी हुँदा साठी भन्दा बढी यात्रुको मृत्यु भएको छ । यस दुर्घटनामा अरु कैयौँ घाइते भएका स्थानीय यातायात अधिकारीहरुले जानकारी दिएका छन् । पाकिस्तानको कराँची शहरबाट रावलपिण्डीतर्फ गइरहेको तेजगाम एक्स्प्रेसको रेलमा बिहीबार बिहान आगलागी भएको प्रहरीको प्रतिवेदनमा जनाइएको छ । रेलमा रहेका यात्रुको सिलिन्डर विस्फोट भएका कारण उक्त आगलागी हुन पुगेको अनुमान गरिएको पाकिस्तानी सञ्चारमाध्यमहरूले जनाएका छन् । तर यसको आधिकारिक पुष्टि भने भएको छैन । अन्तर्राष्ट्रिय सञ्चारमाध्यमका अनुसार आगलागीको क्रममा रेलका ३ वटा डब्बा जलेका छन् । आगो नियन्त्रणमा आएकाले अन्य डिब्बा भने जल्न नपाएको बताइएको छ । यस घटनामा घाइते भएकाहरुको लियाकतपुरस्थित जिल्ला अस्पतालमा उपचार भइरहेको जनाइएको छ । घाइतेमध्ये केहीको अवस्था गम्भीर भएकाले मृतकको संख्या थप बढ्न सक्ने आशङ्का गरिएको पनि समाचारमा उल्लेख गरिएको छ । रासस/सिन्ह्वा
यस्तो छ हुण्डाईले सार्वजनिक गरेको स्यान्ट्रोको ‘एनिभर्सरी एडिसन’
काठमाडौँ । हुण्डाईले नयाँ हुण्डाई स्यान्ट्रोलाई बजेट फ्रेन्डली कारको रुपमा सार्वजनिक गरेको एक वर्ष पूरा भएको छ । यसै उपलक्ष्यमा कम्पनीले स्यान्ट्रोको ‘एनिभर्सरी एडिसन’हालसाल भारतीय बजारमा सार्वजनिक गरेको छ । हुण्डाई स्यान्ट्रोको यो स्पेसल एडिसन स्यान्ट्रो स्पोर्ट्स कै ट्रिम लेभलमा आधारित छ । त्यसैगरी म्यानुअल र एएमटी गरी दुई गियर अप्सनहरुमा उपलब्ध छ । स्यान्ट्रो एनिभर्सरी एडिसन मेकानिकली पहिले जस्तै रहेपनि सो मोडेलमा कस्मेटिक चेन्जेजहरु भने देख्न सकिन्छ । कस्मेटिक चेन्जेजहरुको रुपमा ग्लस ब्ल्याक कलरको रुफ, डार्क ग्रे कलर दिइएको व्हिल कभर, आउटसाइड रियर भ्यू मिरर्स र डोर ह्याण्डल्सलाई लिन सकिन्छ । यसका साथै बुट बेसमा र एनिभर्सरी एडिसनको बेजमा क्रोम फिनिस पनि देख्न सकिन्छ । यस मोडेलको इन्टेरियरमा पनि केहि परिवर्तन देख्न सकिन्छ । ड्यासबोर्डमा, इन्फोटेन्मेन्ट स्क्रिन वरिपरि, एसी भेन्ट्सका साइडमा र गियर स्टिकमा निलो रङ्गको इन्सर्ट्स दिइएको छ भने यसको फेब्रिक सिटको डिजाइनलाई पनि अपडेट गरिएको छ । यसमा समावेस भएको इञ्जिन १.१–लिटर ४–सिलिण्डर पेट्रोल इञ्जिन हो जसले ६९ एचपीको पावर र ९९ एनएमको टर्क प्रोड्युस गर्दछ । त्यसैगरी ५–स्पिड म्यानुअल र ५–स्पिड एएमटि गरी दुई गियर अप्सन्समा यो कार उपलब्ध हुने भएको छ । स्मरण रहोस्, एएमटि गियरबक्समा गियर चेन्ज गर्नका लागि क्लचको आवश्यकता पर्दैन । यो स्पेसल एडिसन ‘पोलस ह्वाइट’ र ‘अक्वा टिल’ गरी दुई कलर अप्सन्सहरुमा उपलब्ध रहेको छ । भारतिय बजारमा स्यान्ट्रो एनिभर्सरी एडिसन म्यानुअल गियर भर्जनलाई पाँच लाख १७ हजार रुपैयाँ मूल्य तोकिएको छ भने एएमटि भर्जनलाई चाहिँ पाँच लाख ७५ हजार रुपैयाँ मूल्य तोकिएको छ । नेपाली बजारमा भने हुण्डाई कारको आधिकारिक बिक्रेता लक्ष्मी इन्टरकन्टिनेन्टल प्रालिले सुरुवाती मूल्य २२ लाख ९६ हजार रुपैयाँ तोकेर हाल नेपाली बजारमा हुण्डाई स्यान्ट्रोको बिक्री वितरण गर्दै आइरहेको छ ।
करिब छ अर्ब लगानीमा मुग्लिन–पोखरा सडक चार लेनको बनाइने
काठमाडौं । दुई लेनको मुग्लिन–पोखरा सडक अब चार लेनको बन्ने भएको छ । सरकारले पाँच अर्ब ९० करोड रुपैयाँको लगानीमा उक्त राजमार्गलाई चार लेनकाे बनाउने भएको हो । राजमार्गलाई विस्तार गर्न यशियाली विकास बैंक (एडिबी)ले १९ करोड ५० लाख रूपैयाँ ऋण सहायता उपलब्ध गराउने भएको छ । एडिबीको प्रधान कार्यालय मनिलाबाट जारी प्रेस विज्ञप्तिअनुसार नेपालको आर्थिक विकासमा महत्वपूर्ण योगदान गर्ने उक्त राजमार्गको स्तरोन्नति अपरिहार्य भएकाले बैंकले उक्त ऋण रकम स्वीकृत गरेको हो । भारत र बङ्गलादेशसँग नेपाललाई जोड्ने उपक्षेत्रीय करिडोरका रुपमा रहेको उक्त राजमार्ग विस्तार भएपछि सवारी आवागमनमा सहजता हुनुका साथै स्थानीय उत्पादन बजारसम्म पुर्याउन सजिलो मात्र नभई ढुवानी खर्चमा समेत कमी आउने विश्वास बैंकले लिएको छ । ८१ किलोमिटर पोखरा–आबुखैरेनी सडक पहिलो चरणमा विस्तार गरिनेछ भने आठ किलोमिटर आबुखैरनी–मुग्लिन खण्ड त्यसपछि निर्माण गरिनेछ । एडिबीका अनुसार आगामी पाँच वर्षभित्र उक्त राजमार्ग चार लेनको बनाइसक्ने लक्ष्य छ । रासस
१७ कम्पनीको चार करोड ५७ लाख कित्ता बोनस सेयर सूचीकृत, प्राइम बैंककाे सबैभन्दा बढी
काठमाडौं । नेपाल धितोपत्र बोर्डमा १७ कम्पनीको चार करोड ५७ लाख ६३ हजार ६०७ कित्ता बोनस सेयर सूचीकृत भएको छ । चालु आर्थिक वर्ष २०७६/७७ को पहिलाे तीन महिनाको अवधिमै सो मात्राको बोनस सेयर धितोपत्र बजारमा थपिएको हो । सो अवधिमा ६ वटा बीमा, ३ वटा विकास बैंक, ३ वटा लघुवित्त वित्तीय, २ वटा वाणिज्य बैंक, १ फाइनान्स र अन्य २ वटा कम्पनीको ४ अर्ब ५७ करोड ६३ लाख ६० हजार ७८५ रुपैयाँ बोनस सेयर सूचीकृत भएको हो । बीमा समूहतर्फ सूर्या लाइफ इन्स्योरेन्सको १३ करोड ५८ लाख २८ हजार रुपैयाँ, प्रिमियर इन्स्योरेन्स कम्पनी(नेपाल)को ४९ करोड ५ लाख ६० हजार रुपैयाँ, नेपाल लाइफ इन्स्योरेन्सको एक अर्ब ९ करोड ९२ लाख ३२ हजार १६२ रुपैयाँ, सिद्धार्थ इन्स्योरेन्सको १३ करोड ४० लाख ८१ हजार ६५० रुपैयाँ, सगरमाथा इन्स्योरेन्स कम्पनीको ४६ करोड २९ लाख ३१ हजार रुपैयाँ र आईएमई जनरल इन्स्योरेन्सको ४ करो ८६ लाख रुपैयाँ बराबरको बोनस सेयर नेप्सेमा सूचिकृत भएको बोर्डले जनाएको छ । पूर्णिमा विकास बैंकको २ लाख ६२ हजार ५१६ कित्ता अर्थात २ करोड ६२ लाख ५१ हजार ६०० रुपैयाँ बराबरको नेप्से थपिएको छ । त्यस्तै, देव विकास बैंकको १२ लाख ९३ हजार ५२४ कित्ता र लुम्बिनी विकास बैंकको ३७ लाख ७१ हजार ९७२ कित्ता बोनस नेप्सेमा थपिएको छ । त्यसैगरी, लघुवित्ततर्फ नागबेली लघुवित्त वित्तीय संस्थाको एक लाख ४३ हजार ८०० कित्ता, मिथिला लघुवित्तको ६८ हजार ९४६ कित्ता र उन्नति माइक्रोफाइनान्स वित्तीय संस्थाको २ लाख २२ हजार ७५० कित्ता बोनस चालु आवको तीन महिना भित्र नेप्सेमा थपिएको हो । वाणिज्य बैंकतर्फ सेञ्चुरी कमर्शियल बैंकको १६ लाख ५० हजार अर्थात १६ करोड ५० लाख रुपैयाँ बराबरको बोनस सूचीकृत भएको छ । त्यस्तै, प्राइम कमर्शियल बैंकको एक अर्ब २८ करोड ५३ लाख २७ हजार ८०० रुपैयाँ बराबरको एक करोड २८ लाख ५३ हजार २७८ कित्ता बोनस बजारमा सूचीकृत भएको छ । जुन सो अवधिमा सूचीकृत बोनसमध्ये सबैभन्दा बढी हो । रिलायन्स फाइनान्सको गत भदौ २५ गते ८ लाख ९१ हजार ८७४ कित्ता बोनस नेप्सेमा थपिएको छ । फाइनान्सको १२ प्रतिशत अर्थात ८ करोड ९१ लाख ८७ हजार ४३५ रुपैयाँ बराबरको बोनस सूचीकृत भएको छ । हाइडोपावर कम्पनीतर्फ रादी विद्युत कम्पनी र अपी पावर कम्पनीले जारी गरेका क्रमशः ५/५ प्रतिशत बोनस नेप्सेमा थपिएको हो । जसमध्ये रादी विद्युत कम्पनीको २ लाख २५ हजार ५२५ कित्ता र अपी पावरको ५ लाख ६७ हजार कित्ता बोनस नेप्सेमा सूचीकृत भएको बोर्डले जनाएको छ।
मठ, मन्दिर र तालतलैया सफा गर्दै पर्यटन मन्त्री योगेश भट्टराई, भ्रमण वर्षको प्रवद्र्धन
जनकपुर । छठपर्व र नेपाल भ्रमण वर्ष २०२० प्रवद्र्धनका क्रममा आज संस्कृति, पर्यटन तथा नागरिक उडड्यनमन्त्री योगेश भट्टराई र प्रदेश नं २ का मुख्यमन्त्री लालबाबु राउतको अगुवाइमा जनकपुरका मठ, मन्दिर र तालतलैयामा सरसफाइको अभियान शुरु भएको छ । छठपर्व र नेपाल भ्रमण वर्ष २०२० प्रवद्र्धनका क्रममा आज केन्द्र र प्रदेश सरकारको आयोजनामा जनकपुरमा सर्वपक्षीय सहभागितामा चियापान कार्यक्रम राखिएको संस्कृति, पर्यटन तथा नागरिक उडड्यनमन्त्री भट्टराईका स्वकीय सचिव प्रेम गुरागाईँले जानकारी दिए । यस प्रकारको कार्यक्रम पहिलोपटक आयोजना गरिएको हो ।
ढुंगेगढी र कृषि उद्यमको मुख्यमन्त्रीले गरे अवलोकन, ‘पर्यटन र कृषि सरकारको प्राथमिकता’
हेटौंडा । ३ नम्बर प्रदेशका मुख्यमन्त्री डोरमणि पौडेलले प्रचार प्रसार गर्न सके मकवानपुरमा रहेको ऐतिहासिक ढुंगेगढी पर्यटकीय गन्तब्य बन्ने बताएका छन् । उक्त गढीको बुधबार स्थलगत अवलोकन गर्दै मुख्यमन्त्री पौडेलले ऐतिहासिकता झल्कने गरी ढुंगेगढीको बिकास गरिने पनि जानकारी दिए । प्रदेशमा ऐतिहासिकता झल्कने धेरै गढीहरु रहेको स्मरण गर्दै उनले भौगोलिक हिसाबले पनि सो गढीमा पर्यटक आकर्षण गर्न सकिने बताए । प्रदेश सरकारले यसको बिकासका लागि बिषेश महत्वका साथ योजनासहित अगाडि बढ्ने समेत उनको भनाई थियो । मकवानपुरढीदेखि करिब ५ किलोमिटर माथि कान्तिराजपथ नजिकै रहेको सो गढीमा अहिले पनि पर्यटकहरु घुम्न आउने गरेका छन् । यसअघि पनि प्रदेश सरकारको सहयोगमा सो स्थानमा ऐतिहासिक मन्दिर तथा बिश्राम स्थल निर्माणसमेत गरिएको छ । यसैगरी बुधबार नै मुख्यमन्त्री पौडेलले मकवानपुर गढी गाउँपालिकाका विभिन्न कृषि उद्यमहरुको अवलोकन गरेका छन् । मुख्यमन्त्री पौडेलले मकवानपुर गढी गाउँपालिकाका कामधेनु कृषि फर्म, देबकी एकीकृत कृषि फर्म, मकवानपुर एग्रो प्राली, कलश बहुउद्देश्यीय कृषि फर्म, तिमल्सिना कृषि फर्मको अवलोकन गरेका हुन् । किसानहरुलाई हौसला प्रदान गर्न उनीहरुको फर्ममा नै गएर समस्याका विषयमा जानकारी लिएका थिए । किसानहरुले लगाएको तरकारीका साथै भैंसी, गाई, टर्की तथा कुखुरा फर्महरु अवलोकन गरेका हुन् । उक्त अवसरमा स्थानीय किसानहरुले मुख्यमन्त्री पौडेलसंग कृषि उत्पादनको बजार ब्यबस्थित बनाउन माग गरेका थिए । यसैगरी फर्महरु स्थापना गरेपनि बाटो, पानी, बिजुली लगायतको समस्याका बारेमा पनि उनीहरुले मुख्यमन्त्री पौडेललाई जानकारी गराएका थिए । किसानहरुको जिज्ञासाको जवाफ दिदैं सरकारले सबै भन्दा कृषि क्षेत्रलाई महत्व दिने बताए । किसानले उत्पादन गरेका हरेक कृषि उत्पादनलाई सहजरुपमा बिक्री बितरण गर्न, सहजरुपमा उत्पादनका बिभिन्न भौतिक पूर्वाधार निर्माणमा सहयोग गर्ने उनको भनाई थियो । बुधबार नै मुख्यमन्त्री पौडेलले बिभिन्न निर्माणधीन भौतिक संरचनाहरुको समेत अवलोकन गरे । अवलोकनमा जिल्ला समन्वय समिति मकवापुरका प्रमुख रघुनाथ खुलाल, गढी गाउँपालिका अध्यक्ष बिदुर हुमागाईं, सहकारी संघका केन्द्रीय सदस्य बद्रि लम्साल, दुग्ध उत्पादक सहकारी संघका अध्यक्ष नारायण देबकोटा, रामजी सापकोटा, हेटौँडा उपमहानगरपालिकाका अधिकृत रामकृष्ण थापा, स्थानीय वडाहरुको अध्यक्षहरुलगायत सहभागी थिए ।
तराईवासीको महान पर्व छठ शुरु, आज नहाय खाय विधि गरिँदै
जनकपुरधाम । आस्थाको महापर्व छठअन्तर्गत आज पहिलो दिन नहाय–खाय विधि गरिँदैछ । चार दिनसम्म मनाइने छठपर्वअन्तर्गत पहिलो दिनमा नहाय–खाय विधि गरिन्छ । आजको दिनलाई अरबा–अरबाइन पनि भनिन्छ । व्रतीले भोजनमा माछा, मासु, लसुन, प्याज, कोदो, मसुर वस्तु परित्याग गरी आजकै दिनदेखि व्रत बस्ने परम्परा रहेको छ । छठपर्व अत्यन्त श्रद्धा र भक्तिपूर्वक मनाइन्छ । यसका लागि कात्तिक शुक्लपक्ष लाग्नेबित्तिकै व्रतीले सात्विक भोजनका साथै अपवित्र मानिने दाल, तरकारी र सागपात आदि खाने गरिँदैन । यस पर्वमा नैवेद्यका लागि आवश्यक गहुँ र गम्हरी ९धानको एक प्रकार, कालो रङको गर्भमै पाक्ने पवित्र अन्न० को व्यवस्था केही दिन पहिलेदेखि नै गरिएको हुन्छ । गम्हरीलाई साठी पनि भनिन्छ । छठपर्वमा साठी प्रकारको वस्तु चाहिने भनिन्छ, तिनमा गम्हरीलाई कुटेर त्यसको केही कमी रहन गएमा गम्हरीको प्रयोगले त्यसको पूर्ति भइहाल्ने लोकविश्वास रहेको छ । चामललाई पर्वका अवसरमा बनाइने नैवेद्यका लागि उपयोग गरिन्छ । आरोग्य लाभ मुख्य उद्देश्य भएको छठपर्व उत्सवको रूपमा मात्र नभई कठिन व्रत र उपवास गरिने तपस्याको रूपमा देखिन्छ । चोखोपना, संयम र पूर्ण ब्रह्मचर्यसाथ छठी माताको भक्तिपूर्ण आराधना गर्दा मात्र छठ पूजाको फल प्राप्ति हुने जनविश्वास रहेको पाइन्छ । छठपर्वको पूजन एवं तयारीका क्रममा छठ सामग्रीलाई जुठो गर्न नहुने र कुनै प्रकारको व्यवधान जानी वा नजानी गरिएमा अनिष्ट हुने निश्चित मानिएको छ । छठपर्व विशुद्धरूपमा प्रकति र पुरूषको पूजा हो । सन्तान प्राप्तिका लागि दैवी कृपाको अपेक्षा यस व्रतले गरेको छ । झट्ट हेर्दा यो सूर्यको पूजाझैँ देखिए पनि पुराणअनुसार यो मूल प्रकृतिको छैँठौँ अंशबाट उत्पन्न भएकी भगवती देवीको पूजा रहेको छ । देवी भागवतमा षष्ठी देवीले पुत्रहीनलाई पुत्र प्रदान, पत्नीहीनलाई पत्नी प्रदान, धनहीनलाई धन र कर्मवानलाई उत्तम फल प्रदान गर्ने उल्लेख गरिएको छ । यसै कारण यो पर्व साझा समानताको पर्वका रूपमा लोककरण भएको पाइन्छ ।
डोल्पावासीको कहर, फोन गर्न हिमाल चढ्नै पर्ने बाध्यता
जाजरकोट । जाजरकोटसँग सिमाना जोडिएको डोल्पा मुड्केचुला गाउँपालिका–६ का लेखबहादुर बुढा आफन्तसँग फोन गर्न कोठाना लेकमा जाने गर्छन् । तीन घण्टा उकालो हिँडेर गाउँभन्दा माथि हिमालमा पुग्नु उनको रहर नभई बाध्यता हो । आफन्तको खबर बुझ्न र घरको कुरा जानकारी गराउनका लागि दैनिक कोठाना जाने गरेको उनी बताउँछन् । उनले भने–“मजस्तै यहाँका सबै मानिस फोन गर्न तीन घण्टा हिमाल चढ्नैपर्ने बाध्यता रहेको छ, के गर्नु ? आफन्तको खबर सुन्न मन लाग्छ ।” त्यस्तै मुड्केचुला गाउँपालिकाका अध्यक्ष दत्तबहादुर शाही पनि सदरमुकामलगायत अन्य ठाउँमा फोन गर्नुपरेमा यही लेकमा पुग्ने गरेको बताउँछन् । दैनिक फोनमा धेरै काम पर्छ, त्यसैले कोठाना डाँडामा पुग्नु बाध्यता भएको उनको भनाइ छ । फोन नभएकाले स्थानीय सरकारका कामदेखि प्रहरी चौकीमा समेत सूचना आदान–प्रदान गर्न मुस्किल भएको छ । अग्लो हिमाल र अग्ला डाँडामा रहेको ठूला रुखको टुप्पोमा गएपछि त्रिपुराकोटमा रहेको टावरले सामान्य काम गर्ने भएकाले त्यहाँ गएर फोन गर्ने गरिएको नर्कुका सोमराज शाहीले बताए । फोन नहुँदा जहाँ पनि हिँडेर गई खबर गर्नुपर्दा निकै दुःख भोग्नुपरेको प्रहरी कार्यालय इलले जनाएको छ । जाजरकोटको सिमानासँग जोडिएको मुड्केचुला गाउँपालिका जुम्लाको सिमानासँग पनि जोडिएको छ । कठिन भूगोल रहेको यस क्षेत्रबाट सदरमुकाम जान दुई दिन लाग्ने गर्दछ । मुड्केचुला गाउँपालिकामा सामान्य कभरेज भएको नमस्तेको फोन दूरसञ्चार प्राधिकरण र चिनियाँ स्याटलाइट कम्पनी डिस्याटबीच भएको सम्झौता सकिएपछि उक्त चिनियाँ कम्पनीले स्याटलाइट बन्द गर्दा मुड्केचुला गाउँपालिका र काइके गाउँपालिकामा सञ्चार सेवा पूर्णरुपमा बन्द भएको छ । असोज २५ गते बन्द भएको नमस्तेको मोबाइल सेवा अझै सञ्चालन हुने कुनै छाँटकाँट देखिएको छैन । विगत लामो समयदेखि चिनियाँ स्याटलाइटमार्फत मोबाइल सेवा प्रदान गर्दै आएको दूरसञ्चार प्राधिकरणले स्याटलाइट बन्द भएपछि सेवा दिन सकेको छैन । सञ्चार सेवा अवरुद्ध भएसँगै यहाँका करीब १५ हजार नागरिक सञ्चारविहीन भएका छन् । चीनको डिस्याट कम्पनीसँगको सम्झौता सकिएका कारण बन्द भएको र अब केन्द्रीय कार्यालयको निर्णयानुसार नै सेवा सञ्चालन हुने दूरसञ्चार कार्यालय डोल्पाका निमित्त प्रमुख नवराज भट्टराईले जानकारी दिए । मुड्केचुला गाउँपालिकामा जोड्नका लागि ल्याइएको नेपाल टेलिकमका सामग्रीहरु रुकुमको त्रिवेणीमा करीब दुई वर्षदेखि थन्किएका छन् । भारतीय कम्पनीले जाजरकोटलगायत डोल्पाका अधिकांश ठाउँमा नेपाल टेलिकम टावर निर्माणको जिम्मा लिए पनि काम नगर्दा समस्या हुँदै आएको गाउँपालिका अध्यक्ष शाहीले जानकारी दिए । जतिपटक ताकेता गरे पनि टावर निर्माण कम्पनीले नटेरेको उनको भनाई छ । रासस
