सीईडीबी हाइड्रोको आईपीओ बाँडफाँड भोलि, २ लाख ३४ हजार बढीले सेयर पाउने
काठमाडौं । सीईडीबी हाइड्रोपावरले निष्काशन गरेको प्राथमिक सेयर (आईपीओ)को भाेलि बैशाख ३१ गते बाँडफाँड भएको छ । सेयर निष्काशन तथा बिक्री प्रबन्धक सनराइज क्यापिटलका अनुसार आईपीओ बाँडफाँड भाेलि (बैशाख ३१ गते) बिहान ११ बजे अनलाइन मार्फत हुने भएकाे हाे । क्यापिटलका अनुसार कूल आवेदकमध्ये रितपूर्वक आवेदन दिने २ लाख ३४ हजार १९५ जनाले कम्पनीको सेयर हात पार्ने भएका छन् । उनीहरुलाई १०/१० कित्ताको दरले २३ लाख ४१ हजार ९५४ कित्ता सेयर बाँडफाँड गरिने क्यापिटलले जनाएको छ । कम्पनीले सर्वसाधारणमा २३ लाख ४१ हजार ९५४ कित्ता सेयर निष्काशन गरेको थियो । जसमा सर्वसाधारण तर्फबाट १०.५२ गुणा बढी आवेदन परेकाे थियाे । सेयरमा परेको कूल आवेदनमध्ये १६ लाख ८५ हजार ६२७ जनाले २ करोड ४६ लाख ५७ हजार ३५ कित्ता सेयरको लागि दिएको आवेदन योग्य रहेको छ भने १६ लाख ३७ हजार ६५९ कित्ता सेयरका लागि ४८ हजार ३२२ जनाले दिएका आवेदन भने रद्द भएको क्यापिटलले जनाएको छ । कम्पनीले गत बैशाख १७ गतेदेखि २१ गतेसम्म सर्वसाधारणमा २३ लाख ४१ हजार ९५४ कित्ता सेयर निष्काशन गरेको थियो । जसमा सर्वसाधारण तर्फबाट १०.५२ गुणा बढी आवेदन परेकाे थियाे । कुल २५ लाख १८ हजार २३० कित्ता सेयरमध्ये संस्थाले म्युचुअल फण्डलाई १ लाख २५ हजार ९११ कित्ता र कर्मचारीलाई ५० हजार ३६५ कित्ता सेयर छुट्याइएकाे थियाे । र, बाँकी रहेकाे २३ लाख ४१ हजार ९५४ कित्ता सेयर सर्वसाधारणमा निष्काशन गरेको थियो । (सच्याईएको)
शिखर इन्स्योरेन्सको खुद नाफा १० प्रतिशतले बढ्यो, खुद बीमाशुल्क एक अर्ब माथि
काठमाडौं । शिखर इन्स्योरेन्स कम्पनीले चालु आर्थिक वर्षको तेस्रो त्रैमाससम्ममा ३६ करोड ३३ लाख रुपैयाँ खुद नाफा कमाएको छ । जुन गत आर्थिक वर्षको तुलनामा १०.२६ प्रतिशतले बढी हो । कम्पनीले गत आर्थिक वर्षको चैत मसान्तसम्ममा ३२ करोड ९५ लाख रुपैयाँ मात्रै खुद नाफा कमाएको थियो । कम्पनीको नाफासँगै खुद बीमाशुल्क पनि ११.९७ प्रतिशतले बढेर एक अर्ब ८ करोड २४ लाख रुपैयाँ पुगेको छ । जुन गत आर्थिक वर्षको चैत मसान्तसम्ममा ९६ करोड ६८ लाख रुपैयाँ आर्जन गरेको थियो । समिक्षा अवधिमा कम्पनीको वार्षिक प्रतिसेयर आम्दानी २७.५५ रुपैयाँ, प्रतिसेयर नेटवर्थ २१०.९४ रुपैयाँ र मूल्य आम्दानी अनुपात ६८.७४ गुणा रहेको छ । हाल कम्पनीको चुक्ता पुँजी १ अर्ब ७५ करोड रुपैयाँ रहेको छ । त्यस्तै, जगेडा कोषमा ६१ करोड ७६ लाख रुपैयाँ, बीमा कोषमा १ अर्ब २३ करोड ८९ लाख रुपैयाँ र महाविपत्ती कोषमा ९ करोड ४३ लाख रुपैयाँ सञ्चित रहेकाे छ । चैत मसान्तसम्ममा कम्पनीले २ लाख ११ हजार ९९६ वटा बीमालेख जारी गरी २ अर्ब ९६ करोड ५७ लाख रुपैयाँ कुल बीमाशुल्क आर्जन गरेको छ । इन्स्योरेन्सले १६ हजार ९१४ दाबीबापत १ अर्ब ७३ करोड रुपैयाँ भुक्तानी गरेको छ भने ९ हजार २८६ दाबी वापत १ अर्ब ४२ करोड रुपैयाँ भुक्तानी गर्न बाँकी रहेको छ ।
२९ अर्ब बढीको धितोपत्र जारी गर्न बोर्डको अनुमति, ३ खर्ब १८ अर्ब रुपैयाँको सेयर सूचीकृत
काठमाडौं । नेपाल धिताेपत्र बाेर्डले चालु आर्थिक वर्ष २०७७/७८ काे पहिलाे ९ महिनामा कुल २९ अर्ब २१ करोड रुपैयाँ बराबरको धितोपत्र निष्काशन गर्न अनुमति दिएकाे छ । बाेर्डले गत चैत मसान्तसम्ममा विभिन्न कम्पनीलाई साधारण सेयर (आईपीओ), डिबेन्चर, म्युचुअल फण्ड र हकप्रद गरी साे मात्राकाे धितोपत्र निष्काशन गर्न अनुमति दिएकाे हाे । समीक्षा अवधिमा बाेर्डले ११ अर्ब ५९ करोड रुपैयाँ बराबरको साधारण सेयर (आईपीओ), ११ अर्ब ८४ करोड रुपैयाँ बराबरको डिबेन्चर, ३ अर्ब ३० करोड रुपैयाँ बराबरको म्युचुअल फण्ड र २ अर्ब ४८ करोड रुपैयाँ बराबरको हकप्रद सेयर गरी कुल २९ अर्ब २१ करोड रुपैयाँ बराबरको धितोपत्र निष्काशन गर्न अनुमति दिएको हाे । त्यस्तै, आर्थिक वर्ष २०७७/७८ को नौ महिनासम्ममा २ खर्ब १९ अर्ब ९५ करोड रुपैयाँ बराबरको विकास ऋणपत्र, ३९ अर्ब ४७ करोड रुपैयाँ बराबरको साधारण सेयर, ३८ अर्ब ११ करोड रुपैयाँ बराबरको बोनस सेयर, १४ अर्ब ५५ करोड रुपैयाँ बराबरको डिबेन्चर, ३ अर्ब ९२ करोड रुपैयाँ बराबरको हकप्रद सेयर र २ अर्ब ८५ करोड रुपैयाँ बराबरको म्युचुअल फण्ड गरी कुल ३ खर्ब १८ अर्ब ८५ करोड रुपैयाँ बराबरको थप धितोपत्र सूचीकृत भएका छन् । २०७६ चैत मसान्तमा १२५१.५ रहेको नेप्से सूचकाङ्क २०७७ चैत मसान्तमा २७१४.८ पुगेको छ । २०७७ असार मसान्तमा यस्तो सूचकाङ्क १३६२.४ रहेको थियो । २०७७ चैत मसान्तमा धितोपत्र बजार पुँजीकरण ३७ खर्ब ५८ अर्ब ९८ करोड रुपैयाँ पुगेको छ । २०७७ असार मसान्तमा बजार पुँजीकरण १७ खर्ब ९२ अर्ब ७६ करोड रुपैयाँ रहेको थियो । २०७७ चैतमा नेपाल स्टक एक्सचेन्ज लिमिटेडमा सूचीकृत कम्पनीहरूको संख्या २१८ रहेको छ । सूचीकृत कम्पनीहरुमध्ये १४५ बैंक तथा वित्तीय संस्था र बीमा कम्पनी रहेका छन् भने ३८ जलविद्युत् कम्पनी, १९ उत्पादन तथा प्रशोधन उद्योग, ५ होटल, ४ व्यापारिक संस्था, ४ लगानी कम्पनी र ३ अन्य समूहका रहेका छन् । २०७७ असारमा सूचीकृत कम्पनीहरूको संख्या २१२ रहेको थियो । सूचीकृत कम्पनीहरूमध्ये बैंक तथा वित्तीय संस्था र बीमा कम्पनीको धितोपत्र बजार पुँजीकरणको हिस्सा ६९.३ प्रतिशत रहेको छ । त्यसैगरी जलविद्युत कम्पनीको हिस्सा ७.९ प्रतिशत, लगानी कम्पनीको ७.८ प्रतिशत, उत्पादन तथा प्रशोधन उद्योगको हिस्सा ३.६ प्रतिशत, होटेलको हिस्सा १.७ प्रतिशत, व्यापारिक संस्थाको हिस्सा ०.६ प्रतिशत तथा अन्य समूहका कम्पनीहरुको हिस्सा ९.१ प्रतिशत रहेको छ । नेपाल स्टक एक्सचेन्ज लिमिटेडमा २०७७ चैतसम्ममा सूचीकृत ५ अर्ब ६७ करोड शेयरको चुक्ता मूल्य ५५७ अर्ब ७० करोड रुपैयाँ रहेको छ ।
