अमेरिका हिँडेका ३ सय नेपाली मेक्सिकोमा अलपत्र, तस्करमार्फत २३ महिनामा मेक्सिकोसम्म
अमेरिका । अमेरिका प्रवेशको आशमा हवाई, स्थल र जलमार्ग हुँदै महिनौं लगाएर मेक्सिको पुगेका ३ सय बढी नेपाली अमेरिक र मेक्सिकोको सीमामा रोकिएका छन् । अमेरिकास्थित नेपाली दूतावासलाई प्राप्त जानकारी अनुसार मानव तस्करहरुको पछि लागेर उनीहरु २३ महिनामा त्यहाँ आइपुगेका हुन् । सामान्य पढे–लेखेकादेखि स्नातकोत्तर गरेकासम्मले अमेरिका आउन त्यस्तो बाटो रोजेका हुन् । उनीहरुले न्यूनतम ४० देखि अधिकतम ७५ लाख रुपैयाँसम्म खर्चेका छन् । सुरुमा २० देखि २५ लाख लाग्ने भन्ने तर पछि बाटोमा थप रकम माग्दै जानाले लागत रकम बढेको हो । त्रिविबाट स्नातकोत्तर गरेका तुल्सीपुर दाङका सुलभ भट्टराईले आफ्नो नाम सबै स्थानमा परिवर्तन गरेर आएको जानकारी दिए । उनले नागरिकतादेखि विद्यालय सर्टिफिकेटमा समेत नाम परिवर्तन गरेका छन् । उनी अमेरिका प्रवेश गरेको चार साता भइसके पनि उनकै टोलीमा रहेका कयौंले अमेरिका प्रवेश पाएका छैनन् । अमेरिकी राष्ट्रपति डोनाल्ड ट्रम्पले आप्रवासीप्रति कडा नीति लिदैं मेक्सिकोको सीमामा समेत कडाइ गरेकाले नेपाली र अन्य मुलुकका गैरकानुनी प्रवेश गर्न चाहनेलाई असहज भएको हो । कान्तिपुर दैनिकबाट ।
विश्व अर्थतन्त्रमा बढ्दो ‘ट्रम्पफोविया’, विकासशील देशलाई घाटा हुने निश्चित
वासिङ्टन। ट्रम्पको नीतिले अमेरिकी अर्थतन्त्रमा सकारात्मक प्रभाव छोड्नेमा लगानीकर्ताहरूको विश्वास रहे पनि यसले विश्व अर्थतन्त्रलाई भने नकारात्मक प्रभाव पार्न थालेको छ। व्यापार वृद्धि कम भएको छ, चीन कठिन चरित्रको सुधार कार्यान्वयन गर्ने अवस्थामा देखिएको छ र युरोप पनि राजनीतिक अस्थायित्वको अवस्थाबाट गुज्रिरहेको छ। यदि ट्रम्पले चुनावी अभियानमा व्यक्त गरेका कुरा नै लागू गर्न खोजे यीमध्ये सबै समस्यालाई झनै खराब बनाउने निश्चित छ। विश्व वित्तीय संकटबाट गुज्रिएको आठ वर्ष पूरा भएको छ । अर्थशास्त्रीहरू अझै पनि यसलाई टेको दिनका लागि संघर्ष गरिरहेका छन्। तर विश्वको शक्तिशाली देश अमेरिकाको अर्थतन्त्र नै थरापमा पर्न सक्ने कतिपय विश्लेशकले विश्लेषण गर्न थालेका छन्। अन्तर्राष्ट्रिय मुद्रा कोषले आगामी वर्ष विश्वव्यापी वृद्धि ३.४ प्रतिशत मात्रै हुने अनुमान लगाएका छन्। वित्तीय संकटपछिको समयमा विश्वव्यापी अर्थतन्त्र ५ प्रतिशतको हाराहारीमा वृद्धि भइरहेको छ। ट्रम्पले स्वतन्त्र व्यापार सम्झौता खारेज गर्ने र चिनियाँ तथा मेक्सिकोको सामानमा ठूलो परिमाणमा भन्सार लगाउने बताउँदै आएका छन् । यसो गर्नाले विश्वव्यापी वृद्धि २.२ प्रतिशतमा झर्नेछ र अर्को वर्ष २ प्रतिशत मात्रै हुने अक्सफोर्ड इकोनोमिक्सले जनाएको छ। ट्रम्पले मेक्सिको र चीनको सामानमा उच्च दरमा भन्सार लगाएमा अमेरिकामा आयात गरिने सामानको औसत १५ प्रतिशतको वृद्धि हुने जनाइएको छ। ट्रम्पले एक चीन नीतिका बारेमा दिएको अभिव्यक्ति र ताइवानी नेतृसँग गरेको कुराकानीले प्रमुख कूटनीतिक विवाद चर्काएको छ । ताइवानलाई बेइजिङले आफ्नै शत्रु प्रान्त मान्दै आएको छ । यो मुठभेडको अडानले दुवै मुलुकले आर्थिक अनिश्चितताको सामना गरिरहेको अवस्थामा महत्वपूर्ण व्यापारिक सम्बन्धमा दरार ल्याउन सक्छ। हाल चिनियाँ निर्यात ओरालो लाग्दो अवस्थामा देखिएको छ । यदि ट्रम्पले चुनावी अभियानमा दिएका अभिव्यक्तिसरह भन्सार लगाएमा कम्पनीले आर्जन गर्दै आएको नाफा ओरालो लाग्न सक्छ । हाल चीनले निर्यात गरेको सामग्रीबाट १० प्रतिशतको मात्रै नाफा पाउने गरेको छ । यदि ट्रम्पको प्रस्तावित भन्सार लागू भएमा चिनियाँ जीडीपी ५ प्रतिशतमा झर्न सक्ने देखिएको छ । अमेरिकामा ट्रम्पको उदयवाट दक्षिण एसिया र नेपालमा पनि यसका बाछिटा आई राष्ट्रवादी धार प्रबल हुनसक्ने सम्भावना देखिएको छ । यसै सन्दर्भमा डोनाल्ड ट्रम्पको उदय र उनका नीतिका कारण विश्वको सबैभन्दा ठूलो, खुला र उदारवादी अर्थतन्त्रमा अहिलेको धारभन्दा विपरीत दिशामा नीतिगत परिवर्तन हुँदा यसले विश्व अर्थतन्त्रमा कस्तो प्रभाव पार्छ भन्ने विषयमा विभिन्न अड्कलबाजी गरिएका छन् । संरक्षणवादी नीतिका कारण अन्तर्निर्भरतामा आधारित विश्व आर्थिक प्रणाली भत्किने र पुनः विश्वका राष्ट्रहरूबीच एकले जित्ने र अर्कोले हार्ने खेल (जिरो सम गेम) सुरु हुने सम्भावना पनि देखिएको छ, जसबाट कसैलाई फाइदा नहुने मात्र होइन, द्वन्द्व बढेर जाने र विश्वमा आर्थिक अस्थिरता पैदा भई आर्थिक संकटको अवस्था आउन सक्ने देखिन्छ । आफू पूर्ण प्रतिस्पर्धी हुन नसकेका विकासशील मुलुकलाई यसबाट नकारात्मक असर पर्न जान्छ र यसले विश्वको समग्र अर्थतन्त्रमा ठूलो प्रभाव पर्ने देखिन्छ । एजेन्सीहरुको सहयोगमा
तनहुँ जलविद्युत् आयोजनाको मुआब्जा वितरण, पहिलो दिन नै रु १७ करोड
काठमाडौं । तनहुँ जलविद्युत् आयोजनाको प्रभावित क्षेत्रका बासिन्दालाई रु एक करोड २४ लाख ३२ हजार मुआब्जा वितरण गर्न थालिएको छ । आयोजनाले आजदेखि मुआब्जा वितरणको प्रक्रिया सुरु गरेको हो । पहिलो दिनमा नै १७ प्रभावित घर परिवारलाई कामु प्रजिअ फणीन्द्रमणि पोखरेलले जामुनेकी ५१ वर्षीया रामप्यारी रानाभाटलाई रु नौ लाख ५६ हजार ९०० वितरण गरेर थालनी गर्नुभयो । आयोजना प्रभावितलाई निरन्तर रुपमा मुआब्जा वितरण गरिने आयोजनाका सञ्चारविज्ञ सचेन गौतमले राससलाई जानकारी दिए । कुल १४० मेगावाट क्षमताको सो आयोजनाका लागि प्रभावित क्षेत्र घरजग्गा, टहरा, रुखबिरुवा, फलफूल तथा खेत गरी एक हजार दुई सय २२ रोपनी जग्गाधनीलाई मुआब्जा वितरण गरिने छ । आयोजनाबाट तनहुँका भीमाद, कोटदबार, व्यास नगरपालिका, जामुने भन्ज्याङ, छाङ, रिसिङ, रानीपोखरी, माझकोट, काँहुशिवपुरलगायत क्षेत्र प्रभावित हुनेछन् । आयोजनाले न्यूनतम रु दुई लाखदेखि अधिकतम रु आठ लाखसम्म मुआब्जा वितरण गर्ने तयारी गरेको छ । पाखोबारी तथा खेतको फरक फरक मूल्य निर्धारण गरिएको छ । यसैबीच आयोजना निर्माणका लागि आज नै अन्तर्राष्ट्रिय बोलपत्र आह्वान गरिएको छ । आउँदो अक्टोबर(असोज–कात्तिक)सम्ममा ठेक्का सम्झौता गरेर आयोजनास्थलमा ठेकेदार परिचालन गर्ने तयारी आयोजनाको छ । पहिला खण्डमा आयोजनाको मुख्य बाँध तथा नदी फर्काउनका लागि अस्थायी बाँध निर्माण र दोस्रामा विद्युत्गृह, सुरुङ निर्माणका अतिरिक्त हाइड्रोमेकानिकल र इलेक्ट्रोमेकानिकल उपकरण आपूर्तिका लागि बोलपत्र आह्वान गरिएको सञ्चारविज्ञ गौतमले जानकारी दिए । पहिला चरणमा आयोजनाको मुख्य बाँध र नदी फर्काउनका लागि अस्थायी बाँध निर्माणका लागि भारतको जयप्रकाश एसोसिएट्स लि, सोङदा कर्पोरेसन, कालिका कन्ट्रक्सन जेभी, एससिसी डोकास इन्ट्रिगे्रडेड, चाइना गेजुवा ग्रुप लि र सिएमसी डी रेभेना इटालीले प्रतिस्पर्धामा भाग लिन पाउनेछन् । त्यसमा एसियाली विकास बैंक र युरोपियन इन्भेस्टमेन्ट बैंकको लगानी हुनेछ । यस्तै दोस्रा चरणमा विद्युत्गृह, सुरुङ निर्माण तथा हाइड्रोमेकानिकल तथा इलेक्ट्रोमेकानिकल उपकरण आपूर्तिका लागि एससिसी हिन्दूस्तान कन्ट्रक्सन कम्पनी लि, सिनो हाइड्रो कर्पोरेसन र सिएमसी डी रेभेन बोलपत्रमा भाग लिनका लागि छनोट भएका छन् । यसमा जापान अन्तर्राष्ट्रिय सहयोग नियोग (जाइका) को लगानी हुनेछ । यस्तै तेस्रा चरणमा प्रसारण लाइन तथा सबस्टेसन निर्माण र १७ गाविसमा विद्युतीकरणको पूर्वाधार तयारीको योजना छ । सोअन्तर्गत प्रसारण लाइनको क्षेत्र निर्धारणको काम सकिएको छ । सन् २०१७ देखि निर्माण सुरु भई सन् २०२२ सम्म आयोजना सम्पन्न हुने गरी कार्ययोजना तयार भएको छ । आयोजनाको कुल लागत रु ५० अर्ब रहेको छ । आयोजनाबाट वार्षिक ५९ करोड युनिट बिजुली उत्पादन हुने अध्ययनले देखाएको छ । रासस
एभरेष्ट बैंकलाई आस्वा सदस्यता प्राप्त, सम्पूर्ण शाखाबाट सेवा लिन सकिने
काठमाडौं । एभरेष्ट बैंकलाई नेपाल धितोपत्र बोर्डले धितोपत्र खरिद सम्बन्धी निर्देशिका २०७३ बमोजिम आस्वा सदस्यता प्रदान गरेको छ । यस प्रणालीबाट शेयर कारोबार गर्दा लगानी गरेको रकम लगानीकर्ताको खातामा नै रोक्का हुन्छ भने शेयर बाँडफाँड पश्चात् खाताबाट आवश्यक रकम कट्टा गरी बाँकी रकम खातामा फुकुवा गरिन्छ । बैंकले आस्वा सदस्यताअनुसार आफ्ना ग्राहकहरुलाई आफ्नो सम्पूर्ण शाखाहरुबाट सेवा प्रदान गर्ने छ । उक्त सेवा उपलब्ध गराएबापट बैंकले प्रति दरखास्त रु १०० मात्र शुल्क लिनेछ । एभरेष्ट बैंकले हाल आफ्ना ६१ वटा शाखाहरु, ५ एक्सटेन्सन काउन्टर, २४ राजस्व संकलन काउन्टर र ८५ एटिएम तथा बृहत बाह्य सन्जाल मार्फत उत्कृष्ट सेवाहरु प्रदान गर्दै आइरहेको छ ।
१२ वटा बाणिज्य बैंकले बढाए प्रति सेयर आम्दानी, १४ वटाले घटाए
काठमाडौं । पुस मसान्तसम्ममा १२ वटा बाणिज्य बैंकहरुले प्रति सेयर आम्दानी बढाएका छन् । त्यस्तै १४ वटै बाणिज्य बैंकहरुको प्रति सेयर आम्दानी घटेको छ । ठुला बैंकका रुपमा रहेका स्ट्याण्डर्ड चार्टर्ड बैंक, नबिल बैंक र एभरेष्ट बैंक भने प्रति सेयर आम्दानी बढाउन असफल भएका छन् । सबै भन्दा धेरै ५८ रुपैंयाँ ३१ पैसा प्रति सेयर आम्दानी नेपाल बैंकले गरेको छ । दोश्रो स्थानमा रहेको नबिल बैंकले ५६ रुपैंयाँ ८९ पैसा प्रति सेयर आम्दानी गरेको छ । यद्यपी यो आम्दानी गत आवको पुस मसान्तको भन्दा कम हो । सो अवधीमा नविलको प्रति सेयर आम्दानी ५७ रुपैंयाँ ५० पैसा थियो । त्यस्तै, स्ट्याण्डर्ड चार्टर्ड बैंकको प्रति सेयर आम्दानी पनि ५४ रुपैंयाँ ४५ पैसाबाट ३९ रुपैंयाँ ४८ पैसामा झरेको छ । एभरेष्ट बैंकको पनि ५७ रुपैंयाँ ४८ पैसाबाट घटेर ४२ रुपैंयाँ ९३ पैसामा झरेको छ ।उता, ग्लोबल आइएमई बैंक, नेपाल इन्भेष्टमेन्ट बैंक, हिमालयन बैंक, एनएमबी बैंक लगायतले भने प्रति सेयर बढाएका छन् । यी हुन प्रति सेयर आम्दानी बढाउन असफल बैंक नविल, स्ट्याडर्ड चार्टर्ड, एभरेष्ट, प्रभु, सानिमा, सिद्धार्थ, सिटिजन्स, एनसीसी, सिभिल, सेञ्चुरी, नेपाल एसबिआई, हिमालयन र एनआइसी एसिया, प्राइम कमर्सियल बैंक यी हुन प्रति सेयर आम्दानी बढाउने बैंक नेपाल इन्भेष्टमेन्ट, ग्लोबल आइएमई, कुमारी, माछापुछ्रे, मेगा, जनता, कृषि विकास बैंक, नेपाल बैंक, लक्ष्मी बैंक, एनएमबी, सनराईज र नेपाल बंगलादेश बैंक
मुक्तिनाथ विकास बैंकको केन्द्रीय कार्यालय काठमाडौंको कमलादीमा
काठमाडौं । मुक्तिनाथ विकास बैंक लिमिटेडको केन्द्रिय कार्यालय अब काठमाडौंको कमलादीमा स्थानान्तरण भएको छ । बैंकले पोखराको कास्कीमा रहेको आफ्नो केन्द्रीय कार्यालय बुधबार काठमाडौंको कमलादीमा स्थानान्तरण गरेको हो । नेपाल राष्ट्र बैंकका गभर्नर चिरञ्जीवी नेपालले एक कार्यक्रमबीच उक्त कार्यालयको उद्घाटन गरेका हुन् । सोही अवसरमा गभर्नर पदमा रही नेपालको वित्तीय क्षेत्रको विकासमा पुर्याएको योगदानको मूल्यांकन गर्दै १० जना पूर्वगभर्नरहरूलाई पनि सम्मान गरिएको बैंकले जनाएको छ । बैंकले हाल ४४ वटा आधुनिक बैंकिङ शाखा, ९ वटा सीमित बैंकिङ र ३ वटा एक्स्टेन्सन काउन्टरअन्तर्गत ५० वटा लघुवित्त डेस्क कार्यालयहरूबाट वित्तीय सेवा प्रदान गर्दै आएको छ । बैंकले हालसम्म कुल १५ अर्ब रुपैयाँ निक्षेप संकलन गरी १३ अर्ब रुपैयाँ कर्जा लगानी गरेको बैंकद्धारा जारी विज्ञप्तिमा उल्लेख छ ।
सिद्धार्थ बैंकको ३९ प्रतिशत बोनस सेयर पारित, सञ्चालक समितिमा ४ जना चयन
काठमाडौं । सिद्धार्थ बैंक लिमिटेडको गत आर्थिक वर्षको नाफाबाट सेयरधनीलाई ३९ प्रतिशत बोनस वितरण गर्ने प्रस्ताव पारित भएको छ । कम्पनीको बैंक सञ्चालक समितिको उक्त प्रस्तावलाई बिहीबार सम्पन्न बैंकको पन्ध्रौं वार्षिक साधारणसभाले पारित गरेको हो । यस अघि बैंकले जारी गरेको २५ प्रतिशत हकप्रद पछिको पुँजीको आधारमा ३९ प्रतिशत बोनस सेयर प्रदान गर्न लागेको बैंंकले जनाएको छ । साथै, सभाले संस्थापक समूहबाट संचालक समितिमा प्रतिनिधित्व गर्ने ४ जना संचालकहरुको निर्विरोध चयन गरेको छ । नव निर्वाचित संचालकहरु मनोजकुमार केडिया, नरेन्द्रकुमार अग्रवाल, वीरेन्द्रकुमार साह र दिनेश शंकर पालिखे रहेका छन् । त्यसैगरी उक्त साधारणसभाले सर्वसाधारण शेयरधनीको तर्फबाट ३ जना संचालकहरुको समेत निर्विरोध चयन गरेको छ । सर्वसाधारण शेयरधनीहरुको तर्फबाट निर्वाचित संचालकहरुमा महेशप्रसाद पोखरेल, हेमन्त ज्ञवाली र राजेशकुमार केडिया रहेका छन् । चालु आर्थिक वर्ष २०७३/७४ को पौष मसान्तसम्ममा बैंकले ७२ करोड रुपैयाँ खुद मुनाफा आर्जन गर्न सफल रहेको बैंकले जनाएको छ । सोही अवधिमा बैंकले कुल निक्षेप ७४ अर्ब ९३ करोड रुपैयाँ संकलन गरी ६२ अर्ब ६५ करोड रुपैयाँ कर्जा प्रवाह गर्न सफल भएको बैंकद्धारा जारी विज्ञप्तिमा उल्लेख छ । बैंकले हाल नेपालभर ६३ शाखा, ८२ एटिएम र विभिन्न ६९ स्थानमा शाखारहित बैंकिङ्ग सेवाको माध्यमबाट उच्चस्तरीय बैंकिङ्ग सेवा प्रदान गर्दै आएको छ ।
पाँच करोडको लागतमा पत्तालेमा बुद्धपार्क निर्माण हुँदै
सोलुखुम्बु । दृष्यावलोकनका लागि प्रख्यात सोलुखुम्बुको पत्तालेमा निर्माण गरिने बुद्धपार्क पूर्व मन्त्री एवम् नेपाली काँग्रेसका केन्द्रीय सदस्य बलबहादुर केसीले शिलान्यास गरेका छन् । केरुङ गाविसमा पर्ने पत्तालेमा बुद्धको मुर्ती स्थापनाका साथै बुद्ध धर्म सम्बन्धि अन्य संरचना निर्माण गरी धार्मिक पर्यटक भित्र्याउने लक्ष्यका साथ निर्माण सुरु सो योजनका लागि करिव रु पाँच करोड लाग्ने पार्क व्यवस्थापन समितिले जनाएको छ । पूर्व मन्त्री केसीले सो पार्क तल्लो सोलुमा पर्यटक ल्याउन कोसेढुङ्गा सावित हुने उल्लेख गर्दै पार्कसँगै पत्तालेमा भ्यू टावर निर्माण, स्थानीय परिकार खुवाउने, शेर्पा संस्कृतिअनुसार स्वागत सत्कार गर्नेजस्ता कार्यक्रम गर्न सुझाव दिए । बुद्धपार्क निर्माण गर्न लागिएको पत्ताले क्षेत्रमा प्रसिद्ध गौरीटाप, चाँगेस्थान मन्दिर तथा दृष्यावलोकनका लागि प्रसिद्ध थालेडाँडा अवस्थित छ । थालेडाँडाबाट सगरमाथा गौरीशङ्करलगायत एक दर्जन बढी हिमाल प्रस्ट देख्न सकिन्छ । काठमाडौँबाट २४० किमी लामो सडक पार गर्न सकिने पत्तालेमा हिउँदमा बाक्लो हिमपातसमेत हुने भएकाले हिउँदमा हिउँ खेल्ने पर्यटकको समेत घुइँचो लाग्ने गरेको छ । रासस
