महानगरभित्र घर बनाउँदा यी ७ सर्त अनिवार्य पालना गर्नुपर्ने
काठमाडौं । काठमाडौं महानगरपालिकाभित्र पूर्वाधार निर्माण वा मर्मत गर्दा विभिन्न सात सर्त अनिवार्य पालना गर्नुपर्ने भएको छ । उक्त काम गर्दा नागरिकलाई समस्या पर्ने भएकाले अनिवार्यरूपमा सर्त लागू गरिएको कामपाले जनाएको छ । उक्त कार्य अघि बढाउँदा कामपाले सातबुँदे सर्त अनिवार्य गरेको छ । निर्माण कार्य गर्दा आवतजावतमा असुविधा पार्न नहुने, धुँवा धुलो उड्न नदिन छेकबार लगाउनुपर्ने, कामसम्बन्धी सङ्केत पाटी राख्नुपर्ने, सकेसम्म रातको समयमा काम गर्नुपर्ने, काम गर्दा अनावश्यक सामग्री थुपार्न नपाइने, काम सकिएपछि दुरुस्त अवस्थामा सडक छोड्नुपर्नेलगायत विषय रहेको कामपाको भौतिक पूर्वाधार महाशाखा प्रमुख राम थापाले जानकारी दिए । तोकिएको सर्त पालना नगरे फोहरमैला व्यवस्थापन ऐन, २०६८ र वातावरण संरक्षण ऐन, २०७६ का आधारमा फोहर गर्नेलाई ५ हजारदेखि ५० हजारसम्म जरिवाना गरिने, अनधिकृतरूपमा राखिएका सामान उठाएर लगिने प्रमुख थापाले स्पष्ट पारे । ‘बर्खाको पानी र डुबानको सम्भावित समस्या समाधान गर्न नदीको बहाव क्षेत्रका अवरोध हटाउन, विकास निर्माणका क्रममा सडक र सडक पेटीमा छोडिएका अवरोध हटाउन राजधानी सहरलाई नै कुरूप पार्ने गरी जताततै छरिएर राखिएको तार व्यवस्थापनको विषयमा पनि एकापसमा समन्वय आवश्यक छ,’ उनले भने । त्यसैगरी समन्वयबिना ढल निर्माण, बर्खाको पानीले हुने डुबानले समस्याग्रस्त बस्ती व्यवस्थापन, बिजुलीका पोलमा हुने आगलागी समस्या समाधान, सामुदायिक कुकुर व्यवस्थापन, सहरी सुन्दरता र व्यवस्थापनमा पनि नागरिकलाई महसुस हुने गरी नतिजा ल्याउने काम हुन नसकेको उनको भनाइ छ । ‘सडक किनाराका पोलमा यत्रतत्र रहेका ७० प्रतिशत तार काम नलाग्ने भए पनि समन्वयको अभावले अनावश्यक तार काट्न सकिएको छैन, काट्दा कसको तार काटिन्छ र कसको सेवा रोकिन्छ भन्ने थाहा छैन त्यसैले समन्वयबिना पूर्वाधार निर्माण सम्भव छैन,’ उनले भने । कोरिडोरका अण्डरपासलाई खुला गराउने, नदी किनाराका अनधिकृत संरचना हटाउने विषयमा छलफल गरी अघि बढाउन पर्ने उनले बताए । सहरलाई सुन्दर र व्यवस्थित बनाउन उपत्यकाभित्रका बागमती, विष्णुमती, मनोहरा, धोबीखोलालगायत नदी किनाराका अनधिकृत संरचना सहकार्य गरी हटाउन आवश्यक रहेको पनि बताए । उपत्यकाका नदी किनारामा ३ हजार ४५९ परिवार बसोबास गर्छन् । यीमध्ये कामपाभित्र मात्रै २ हजार १६० परिवार रहेको बताइएको छ ।
मोटरसाइकलको ठक्करबाट चितुवाको मृत्यु
काठमाडौं । म्याग्दीमा गए राति मोटरसाइकलको ठक्करबाट चितुवाको मृत्यु भएको छ । बेनी नगरपालिका–१ रत्नेचौरको घैयारामा बागलुङबाट आउँदै गरेका सुशील खत्रीको बा८प ४०७२ नंको मोटरसाइकलको ठक्करबाट चितुवाको मृत्यु भएको हो । सडक पार गर्दै गरेको चितुवा मोटरसाइकलसित ठोक्किएपछि घटनास्थलमै मृत्यु भएको डिभिजन वन कार्यालय म्याग्दीका प्रमुख मनोज रानाभाटले जानकारी दिए । चितुवाको टाउको ठोक्किएको थियो । करिब ४० किलोको चितुवाको उमेर २ वर्ष अनुमान गरिएको रानाभाट बताउँछन् । मोटरसाइकल चालक खत्रीको अवस्था भने सामान्य रहेको जिल्ला प्रहरी कार्यालयले जनाएको छ । वनजङ्गलमा लागेको डढेलोका कारण अहिले चितुवाको बासस्थान खलबलिएको प्रमुख रानाभाटको भनाइ छ ।
विभिन्न संस्थासँग दाँजेर उपयुक्त बैंकिङ्ग सेवा लिनुहोस् : राष्ट्र बैंक
काठमाडौं । बैंक तथा वित्तीय संस्थाबाट सेवा लिनु अघि विभिन्न संस्थासँग दाँजेर लिनुपर्ने नेपाल राष्ट्र बैंकले बताएको छ । वित्तीय चेतनाका लागि प्रकाशन गरेको सूचनामा राष्ट्र बैंकले कसैको बहकाउमा सेवा लिन नहुने बताएको हो । ‘बैंक तथा वित्तीय संस्थाबाट कुनै पनि सेवा लिनुअघि सोसँग सम्बन्धित सम्पूर्ण सर्त तथा सोबापत लाग्ने सम्पूर्ण शुल्कका बारेमा बुझेर र विभिन्न संस्थाका सेवाहरू दाँजेर आफूलाई उपयुक्त हुने सेवा मात्र लिनुपर्दछ, कसैको बहकाउमा लागेर सम्पूर्ण जानकारी नलिई यस्ता सेवा लिनुहुँदैन,’ राष्ट्र बैंकले भनेको छ । बैंक तथा वित्तीय संस्थाले सेवाग्राहीलाई वित्तीय सेवासम्बन्धी सर्त, शुल्क, हर्जाना, जरिवाना, कमिसन आदिका बारेमा सरल एवम् स्पष्ट भाषामा निःशुल्क रूपमा जानकारी दिनुपर्ने राष्ट्र बैंकले जनाएको छ । ग्राहकलाई सम्पूर्ण विषय सरल भाषामा बुझाएर मात्र व्यावसायिक सम्बन्ध स्थापना गर्नु बैंक तथा वित्तीय संस्थाको दायित्व भएको राष्ट्र बैंकले बताएको छ । वित्तीय सेवाका सर्त तथा शुल्कका बारेमा प्रश्न गर्दा स्पष्ट जानकारी नपाइएमा सम्बन्धित संस्थाका गुनासो सुन्ने अधिकारीसमक्ष गुनासो दर्ता गर्न राष्ट्र बैंकले आग्रह गरेको छ ।
नेपाल फाइनान्सले घरजग्गा र फ्ल्याट बेच्दै
काठमाडौं । नेपाल फाइनान्सले गैह्रबैंकिङ्ग सम्पत्ति लिलाम बिक्री गर्ने भएको छ । फाइनान्स कम्पनीले आफ्नो नाममा रहेको गैह्र बैंकिङ्ग सम्पत्ति घरजग्गा लिलामीमा बिक्री गर्ने भएको हो । फाइनान्सले काठमाण्डौंको साविक जोरपाटी गा.वि.स. ८ स्थित कित्ता नम्बर १०९ को क्षेत्रफल ४१६ वर्गमिटर भएको जग्गा र भक्तपुरको साविक दधिकोट गा.वि.स. ९ स्थित कित्ता नं. २७०५ को क्षेत्रफल ३-३-०-० भएको जग्गा र सो जग्गामा बनेको घर बिक्री गर्ने भएको हो । साथै, काठमाण्डौं महानगरपालिका १४ कुलेश्वर स्थित कित्ता नम्बर २४९ को ओरियण्टल विल्डर्स एण्ड डेभ्लपर्सद्वारा निर्मित फल्याट पनि बिक्रीमा राखिएको छ । सो फ्ल्याटको क्षेत्रफल १ हजार ११४ वर्गफिटको तेस्रा तल्लामा छ । उक्त गैह्र बैंकिङ्ग सम्पत्ति खरिद गर्न इच्छुक व्यक्ति र फर्मरकम्पनी तथा संघ संस्थाहरुले १५ दिन अर्थात् बैशाख २० गतेसम्म शिलबन्दी बोलपत्र पेश गर्नुपर्नेछ । उक्त गैह्रबैंकिङ्ग सम्पत्ति जे जस्तो अवस्थामा छ सोही अबस्थामा गोप्य शिलबन्दी बोलपत्र मार्फत बिक्री गरिने बताएको छ । साथै, साथ आफूले कबोल गरेको अंकको कम्तीमा १० प्रतिशत रकम दाखिला गर्नुपर्ने जनाएको छ । शिलवन्दी बोलपत्र १६ औं दिन अर्थात् बैशाख २१ गते केन्द्रिय कार्यालय कमलादीमा खोलिने छ ।
फर्स्ट माइक्रोफाइनान्सको नाफा १७ प्रतिशत बढ्यो, पूँजी १.१४ अर्ब पुग्यो
काठमाडौं । फर्स्ट माइक्रोफाइनान्स लघुवित्त वित्तीय संस्थाले चालू आर्थिक वर्षको तेस्रो त्रैमासमा खुद नाफा १७ प्रतिशत बढेर १९ करोड ४५ लाख रुपैयाँ आर्जन गरेको छ । गत आर्थिक वर्षको सोही अवधिमा लघुवित्तले १६ करोड ६१ लाख रुपैयाँ खुद नाफा आर्जन गरेको थियो । चैत मसान्तसम्म लघुवित्तको खुद ब्याज आम्दानी ३.४२ प्रतिशत बढेर ३१ करोड ७६ लाख रुपैयाँ कमाएको छ । गत वर्षको सोही अवधिमा लघुवित्तले ३० करोड ७१ लख रुपैयाँ खुद ब्याज अँमदानी गरेको थियो । यस अवधिमा लघुवित्तको सञ्चालन नाफा १०.६८ प्रतिशत बढेर २७ करोड ७९ लाख रुपैयाँ पुगेको छ । चालू वर्षको ९ महिनाको अवधिमा लघुवित्तको नेट फी एण्ड कमिसन आम्दानी १७.७५ प्रतिशत घटेर ३ करोड ७५ लाख रुपैयाँ र कूल सञ्चालन आम्दानी ०.६८ प्रतिशत घटेर ३५ करोड ५१ लख रुपैयाँमा झरेको छ । समीक्षा अवधिमा लघुवित्तको चुक्ता पूँजी १९ प्रतिशत बढेर १ अर्ब १४ करोड ७७ लाख रुपैयाँ र जगेडा कोष ०.२८ प्रतिशत बढेर ४३ करोड ३० लाख रुपैयाँ पुगेको छ । लघुवित्तको सापटी रकम १७.६४ प्रतिशत घटेर ७ अर्ब ७८ करोड ८९ लाख रुपैयाँ र कर्जा १४.१४ प्रतिशत घटेर ८ अर्ब ९२ करोड २९ लाख रुपैयाँमा झरेको छ । समीक्षा अवधिमा लघुवित्तको ब्याज आम्दानी र सञ्चालन नाफा बढेपछि खुद नाफा बढेको हो । तर, यस अवधिमा लघुवित्तको प्रतिसेयर आम्दानी भने सामान्य घटेको छ । समीक्षा अवधिमा लघुवित्तको प्रतिसेयर आम्दानी ३७ पैसा घटेर २२.६० रुपैयाँमा सीमित भएको छ । यस्तै, लघुवित्तको प्रतिसेयर नेटवर्थ १३७.७३ रुपैयाँ रहेको छ भने मूल्य आम्दानी अनुपात २३.८५ गुणा रहेको छ ।
ब्याज आम्दानी बढेसँगै निफ्राको नाफा अर्ब क्लबमा, अधिकांश सूचकमा फड्को मार्याे
काठमाडौं । नेपाल इन्फ्रास्ट्रक्चर बैंक (निफ्रा)ले चालू आर्थिक वर्षको तेस्रो त्रैमासमा खुद नाफा ६७.२८ प्रतिशत बढेर १ अर्ब १६ करोड १८ लाख रुपैयाँ आर्जन गरेको छ । गत वर्षको सोही अवधिमा बैंकले ६९ करोड ४५ लाख रुपैयाँ खुद नाफा आर्जन गरेको थियो । बैंकको ब्याज आम्दानी र सञ्चालन नाफा बढेका कारण ९ महिनाको अवधिमै अर्ब क्लबमा प्रवेश गरेको हो । चैत मसान्तसम्म बैंकको खुद ब्याज आम्दानी ५५.२२ प्रतिशत बढेर २ अर्ब ४४ लाख रुपैयाँ कमाएको छ । गत वर्षको सोही अवधिमा बैंकले १ अर्ब २९ करोड १३ लाख रुपैयाँ मात्रै खुद ब्याज आम्दानी गरेको थियो । विवरण अनुसार अघिल्लो वर्षको तुलनामा यस वर्ष अधिकांश सूचकमा सुधार गरेको छ । समीक्षा अवधिमा बैंकको खुद फि तथा कमिशन आम्दानी ३५५.०३ प्रतिशत बढेर १ करोड ७४ लाख रुपैयाँ, कूल सञ्चालन आम्दानी ५६.११ प्रतिशत बढेर २ अर्ब २ करोड १८ लाख रुपैयाँ, सञ्चालन नाफा ६७.३१ प्रतिशत बढेर १ अर्ब ६५ करोड ९७ लाख रुपैयाँ र बैंकको वितरणयोग्य नाफा ९१ करोड ६१ लाख रुपैयाँ पुगेको छ । यस अवधिमा बैंकको चुक्ता पूँजी २१ अर्ब ६० करोड रुपैयाँ, जगेडा कोष ४१ प्रतिशत बढेर १ अर्ब ९८ करोड ५८ लाख रुपैयाँ, निक्षेप ९९ प्रतिशत बढेर ७९ करोड ६८ लाख र कर्जा ८४.८६ प्रतिशत बढेर २२ अर्ब ८ करोड ४० लाख रुपैयाँ पुगेको छ । समीक्षा अवधिमा बैंकको नाफा बढेसँगै प्रतिसेयर आम्दानीमा पनि वृद्धि भएको छ । चैत मसान्तसम्म बैंकको प्रतिसेयर आम्दानी २.८८ रुपैयाँ बढेर ७.१७ रुपैयाँ पुगेको छ । साथै, बैंकको प्रतिसेयर नेटवर्थ १०९.१९ रुपैयाँ रहेको छ भने मूल्य आम्दानी अनुपात ३०.६३ गुणा रहेको छ ।
ईङवा हाइड्रोले बैशाख १३ गतेदेखि सर्वसाधारलाई आईपीओ बिक्री गर्दै
काठमाडौं । ईङवा हाइड्रोपावरले बैशाख १३ गतेदेखि सर्वसाधारण लगानीकर्ताका लागि आईपीओ निष्काशन तथा बिक्री खुला गर्ने भएको छ । कम्पनीले जारी पूँजी ६० करोड रुपैयाँको २० प्रतिशत अर्थात् १२ करोड रुपैयाँ बराबरको आईपीओ सर्वसाधारण लगानीकर्तालाई बिक्री गर्ने भएको हो । कम्पनीले प्रतिकित्ता १ सय रुपैयाँ अंकित मूल्य दरका १२ लाख कित्ता र आयोजना प्रभावित क्षेत्रका स्थानियलाई बिक्री गर्दा बाँकी रहेको २ लाख ९३ हजार १६० कित्ता थप गरी कूल १४ लाख ९३ हजार १६० कित्ता सेयरमा सर्वसाधारण लगाीकर्तालाई बिक्री गर्नेछ । जसमध्ये १ लाख २० हजार कित्ता वैदेशिक रोजगारीमा रहेका नेपाली, २९ हजार ८६३ कित्ता कर्मचारी र ७४ हजार ६५८ कित्ता सामूहिक लगानी कोषलाई बिक्री गरी बाँडफाँट गरिसकेको छ । बाँकी रहेको १२ लाख ६८ हजार ६३९ कित्ता सेयरमा सर्वसाधारण लगानीकर्ताले आवेदन दिन सक्नेछन् । कम्पनीको आईपीओमा न्यूनतम १० कित्तादेखि अधिकतम २० हजार कित्तासम्म खरिद गर्न सक्नेछन् । कम्पनीको आईपीओमा लगानीकर्ताले बैशाख १७ गतेसम्म आवेदन दिन सकिनेछ । कम्पनीको आईपीओ निष्काशन तथा बिक्री प्रबन्धक नेपाल एसबिआई मर्चेण्ट बैंकिङ्ग रहेको छ । लगानीकर्ताले स्वीकृत प्राप्त सम्पूर्ण सि–आस्बा सदस्य बैंक तथा वित्तीय संस्थाका शाखा कार्यालय र मेरो सेयरबाट कम्पनीको सेयर खरिद गर्न सकिनेछ । केयर रेटिङ्ग नेपालले कम्पनीलाई केयर एनपी डबल बी इस्यूअर रेटिङ्ग प्रदान गरेको छ । यसले कम्पनीको वित्तीय दायित्व बहन गर्ने क्षमतामा मध्यम जोखिम रहेको संकेत गर्दछ ।
सिटिजन्स सुपर ३० फण्ड आजदेखि बिक्री खुला, १ करोड इकाई खरिद गर्न पाइने
काठमाडौं । सिटिजन्स क्यापिटलले आज बैशाख ६ गतेदेखि बन्दमुखी म्युचुअल फण्ड निष्काशन तथा बिक्री खुला गरेको छ । कम्पनीले सिटिजन्स म्युचुअल फण्ड अन्तर्गत सञ्चालन हुने सिटिजन्स सुपर ३० फण्ड निष्काशन गरेको हो । प्रतिइकाई १० रुपैयाँ अंकित मूल्य दरका १० करोड इकाईमध्ये १५ प्रतिशत अर्थात् १ करोड ५० लाख इकाई कोष प्रबद्र्धक सिटिजन्स बैंक र बाँकी ८ करोड ५० लाख इकाईमा सर्वसाधारणले आवेदन दिन सक्नेछन् । क्यापिटलको फण्डमा छिटोमा बैशाख १० गतेसम्म आवेदन दिन सक्नेछन् । यदि सो समयमा पूर्ण आवेदन नपरेमा बैशाख २० गतेसम्म म्याद थप हुनेछ । लगानीकर्ताले न्यूनतम १ सय इकाईदेखि अधिकतम १ करोड इकाईसम्म खरिद गर्न सक्नेछन् । उक्त फण्डमा धितोपत्र बोर्डबाट स्वीकृती प्राप्त गरेका सम्पूर्ण सि–आस्बा सदस्य बैंक तथा वित्तीय संस्थाहरु र तोकिएका शाखा कार्यालयहरुबाट आवेदन दिन सकिनेछ । फण्ड निष्काशन तथा बिक्री प्रबन्धकमा सिटिजन्स क्यापिटल रहेको छ ।
