चीनलाई ट्यारिफ लगाउने धम्की अमेरिकालाई महँगो पर्ने, के पछि हट्लान् ट्रम्प ?
काठमाडौं । अमेरिकाका नवनिर्वाचित राष्ट्रपति डोनाल्ड ट्रम्पले यसै महिना शपथ लिँदैछन् । निर्वाचनमा कमला ह्यारिसलाई पराजित गरेपछि उनले राष्ट्रपतिको पदभार ग्रहण गरेलगत्तै चीनलगायत केही देशमा कर लगाउने धम्की दिएका थिए । उक्त धम्की ट्रम्पलाई नै महँगो पर्न सक्ने जनाइएको छ । किनभने चिनियाँ कम्पनीका उत्पादनले अमेरिका भरिएको छ । तर, पदभार ग्रहण गरेपछि ट्रम्पले चीनमा कर लगाउने आफ्नो योजनाबाट पछि हट्न सक्छन् । ट्यारिफ एक प्रकारको कर हो । यसको अर्थ चीनबाट अमेरिकामा जुनसुकै सामान आउँछ, ट्रम्प सरकारले त्यो चिनियाँ कम्पनीबाट बढी कर लिनेछ । जसले गर्दा चिनियाँ कम्पनीले घाटा पूर्ति गर्न अमेरिकामा चर्को मूल्यमा सामान बेच्ने छ । यसले अमेरिकामा चिनियाँ कम्पनीहरूको बिक्रीलाई असर गर्न सक्छ । साथै अमेरिकीहरूलाई महँगो मूल्यमा चिनियाँ वस्तु खरिद पनि गर्नुपर्ने हुन्छ । ट्रम्पले स्थानीय कम्पनीहरूलाई प्रवर्द्धन गर्नका लागि चीनमा कर लगाउने कुरा गरिरहेका हुन् । तर चीनमा कर लगाउनुले उनका केही व्यापारिक साथीहरूलाई असन्तुष्ट पार्न सक्छ । तिनीहरूमध्ये सबैभन्दा नजिक एलन मस्क र फिल रफिन हुन्। मस्क र ट्रम्पको सम्बन्ध एलन मस्क कार निर्माण कम्पनी टेस्लाका मालिक हुन् । ट्रम्पको विजयपछि टेस्लाको सेयरमा उल्लेख्य वृद्धि भएको छ । यससँगै मस्कको पनि सम्पत्ति तीव्र गतिमा बढेको छ । उनी ४०० अर्ब डलरभन्दा बढीको सम्पत्ति भएको विश्वकै धनी व्यक्ति हुन् । मस्कले ट्रम्पलाई चुनाव जिताउन कडा मेहनत गरेका हुन् । उनले ट्रम्पको लागि प्रचार मात्र गरेनन्, आर्थिक सहयोग पनि गरे । तर, यसका लागि उनलाई पुरस्कृत पनि गरिएको छ । ट्रम्पले मस्कलाई अमेरिकी प्रशासनमा महत्त्वपूर्ण जिम्मेवारी सुम्पेका छन् । मस्क र चीनको सम्बन्ध हालै मस्कको कम्पनी टेस्लाले चीनमा कार बिक्रीमा उत्कृष्ट प्रदर्शन गरेको छ । टेस्ला कारको बिक्री विश्वव्यापी रूपमा घटेको बेला चीनमा भने वृद्धि भएको हो । डिसेम्बर २०२४ मा टेस्ला कारहरूको बिक्री एक महिना अघिको तुलनामा १२.८ प्रतिशतले बढेर ८३ हजार इकाइ पुगेको छ, जुन एक रेकर्ड हो । जहाँ सन् २०२४ मा टेस्लाले ३६.७ प्रतिशत कार चिनियाँ ग्राहकलाई उपलब्ध गराएको थियो । यस्तो अवस्थामा टेस्लाका लागि अमेरिकापछि चीन दोस्रो ठूलो बजार बनेको छ । रफिन र ट्रम्पको सम्बन्ध ८९ वर्षीय रफिन अमेरिकी व्यापारी व्यवसायी हुन् । उनी लस भेगासमा ट्रेजर आइल्याण्ड होटल र क्यासिनो, सर्कस सर्कस होटल र क्यासिनोका मालिक हुन् । यसबाहेक ग्रेहाउन्ड रेसिङ ट्र्याक, तेल उत्पादन, घरजग्गा आदिमा पनि उनको लगानी छ । फोर्ब्सका अनुसार रफिनको कुल सम्पत्ति २.७ बिलियन डलर छ । रफिन र ट्रम्पबीचको मित्रता पनि निकै गहिरो छ । चुनावका बेला रफिनले ट्रम्पलाई २० लाख डलर दान दिएका थिए । रफिन र ट्रम्प लामो समयदेखि व्यापार साझेदार पनि हुन् । रफिनको ट्रम्प इन्टरनेशनल होटल्समा साझेदारीसमेत छ । चीनसँग रफिनको सम्बन्ध रफिनको हार्पर ट्रक नामको कारखाना पनि छ । उनको यो कारखानाले एक ठाउँबाट अर्को ठाउँमा सामान लैजाने उपकरण बनाउँछ । यो ट्रक प्रायः गोदाम आदिजस्ता ठाउँहरूमा प्रयोग गरिन्छ । उनको कम्पनीले उपकरण बनाउनका लागि चीनबाट पार्टपुर्जा लिँदै आएको छ । मस्क र रफिनलाई हुने घाटा यदि ट्रम्पले चीनमा कर बढाएमा यसको प्रभाव मस्क र रफिनको व्यवसायमा देखिन सक्छ । किनभने भन्सार बढ्यो भने चीन पनि चुप लाग्दैन । उसले पनि कर बढाउन सक्छ । साथै, चीनमा काम गर्ने अमेरिकी कम्पनीहरूलाई पनि नियन्त्रण गर्नसक्ने सम्भावना हुन्छ । यदि यस्तो भयो भने मस्कको कम्पनी टेस्लाले चीनको स्थानीय कार निर्माता बीवाईडीसँग प्रतिस्पर्धा गर्न सक्छ, जुन अझै पनि चीनमा नम्बर एक छ । चीनले टेस्ला कारमा कर बढाउन सक्छ जसले मस्कलाई नोक्सान पुर्याउनेछ । योसँगै चीनले रफिन कम्पनीलाई पठाउने पार्टपुर्जाको मूल्य पनि बढाउन सक्छ । ट्यारिफवाला धम्की खारेज हुन सक्ने ट्रम्पले चीनमा करवृद्धि गरेमा चीनले पनि प्रतिक्रिया दिने उच्च सम्भावना छ । ट्रम्पका नजिकका साथी मस्क र रफिनमा यसले ठूलो प्रभाव पार्नेछ । ट्रम्पको यो निर्णयबाट उनीहरू आक्रोशित हुन सक्छन् । यस्तो अवस्थामा ट्रम्पले आफ्ना साथीहरूलाई कुनै नोक्सान नहोस् भनेर चीनमा कुनै शुल्क नलाग्ने वा स्थगित गर्न सक्ने सम्भावना उच्च छ ।
अमलेखगञ्जबाट चितवनको लोथरसम्म पेट्रोलियम पाइप लाइन विस्तार हुँदै
बागमती । बाराको अमलेखगञ्जबाट चितवनको लोथरसम्म पेट्रोलियम पाइपलाइन विस्तारको काम छिट्टै अगाडि बढाइने भएको छ । मोतीहारी–अमलेखगञ्ज पाइप लाइनको काम सकिएपछि चितवनको लोथरसम्म पाइप लाइन विस्तार गर्ने लक्ष्यसहित काम अघि बढाउन लागिएको हो । अमलेखगञ्जबाट चितवनको लोथरसम्म ६९ किलोमिटरमा निर्माण हुने सो पेट्रोलियम पाइप लाइनको काम अगाडि बढाउने विषयमा उच्चस्तरीय प्राविधिक टोलीबाट फिल्ड अध्ययनको काम सकिएर डिपिआर निर्माण भइरहेको नेपाल आयल निगमका प्रवक्ता इञ्जिनियर मनोज ठाकुरले जानकारी दिए । ‘नेपाल र भारत दुवै देशका उच्चस्तरीय प्राविधिक टोलीबाट अध्ययनको काम भइसकेको छ’, प्रवक्ता ठाकुरले भने, ‘टोलीले अध्ययन गरेर अहिले डिपिआर तयार गरिरहेको छ ।’ पाइप लाइन विस्तार गरी लोथरमा एक लाख लिटर पेट्रोलियम पदार्थ भण्डारण गर्नेगरी काम अघि बढ्ने उनको भनाइ छ । अमलेखगञ्जबाट लोथरसम्म पेट्रोलियम पाइप लाइन विस्तार भई सञ्चालमा आएपछि पश्चिमी र उत्तरी नेपालमा पेट्रोलियम पदार्थको अभाव नहुने उनको विश्वास छ । यसैगरी मोतिहारी–अमलेखगञ्ज पेट्रोलियम पाइप लाइन विस्तारको काम सकिएसँगै पाइप लाइनबाटै पेट्रोलियम पदार्थको आयात गर्न परीक्षण सुरु गरेको छ । मोतिहारी–अमलेखगञ्ज पेट्रोलियम पाइप लाइन विस्तारको सम्पूर्ण काम सकिएको र तत्काल परीक्षणका लागि पाइप लाइनबाटै पेट्रोल र मट्टितेल ल्याइएको नेपाल आयल निगम मधेस प्रादेशिक कार्यालय अमलेखगञ्जका प्रमुख प्रलयङ्कर आचार्यले जानकारी दिए । ‘पाइप लाइन परीक्षण गर्न तत्कालका लागि विस्तार गरिएको पाइप लाइनबाटै पेट्रोल पाँच हजार पाँच सय केएल र एक हजार केएल मट्टितेल ल्याएका छौँ’, उनले भने, ‘पाइप लाइनबाट ल्याइएको पेट्रोलियम पदार्थको परीक्षण भइरहेको छ ।’ त्यो सँगै पाइप लाइनबाटै पेट्रोलियम पदार्थको नियमित आयात गर्न आवश्यक तयारी भइरहेको उनको भनाइ छ । दुवै देशका प्रधानमन्त्रीले संयुक्त रूपमा पाइप लाइनको उद्घाटन गर्ने वा कसरी नियमित आयात सुरु गर्ने विषयमा छलफल भइरहेको जनाउँदै उनले जनवरी २०२५ देखि पाइप लाइनबाटै पेट्रोलियम पदार्थको नियमित आयात गर्ने भनिए पनि आवश्यक तयारी पूरा नभएकाले केही दिन ढिला हुने बताए । रासस
इजरायलले छनोट गरेका ५ संस्थाले केयरगिभरको स्वास्थ्य परीक्षण गर्न पाउने
काठमाडौं । उच्च अदालतले पाटनले केयरगिभरका रूपमा इजरायल जानेहरूको स्वास्थ्य परीक्षण गर्न छनोट भएका स्वास्थ्य संस्थाको पक्षमा आदेश जारी गरेको छ । दीर्घकालीन स्याहार केन्द्रमा जाने सहायक श्रमिक (केयरगिभर)को स्वास्थ्य परीक्षण गर्न छनोट भएका पाँच वटा स्वास्थ्य संस्थालाई काम गर्न रोक लगाउनुपर्ने भन्दै परेको रिटमा उच्च अदालतले अन्तरिम आदेश दिन अस्वीकार गरेको हो । यो आदेशसँगै ती संस्थाले इजरायल जाने केयरगिभरहरूको स्वास्थ्य परीक्षण गर्न पाउने भएका छन् । उच्च अदालतका न्यायाधीशद्वय लेखनाथ पौडेल र टीकाराम आचार्यको संयुक्त इजलासले रिट निवेदकको मागबमोजिम अन्तरिम आदेश जारी गर्न नपर्ने आदेश सुनाएको हो । स्वास्थ्य व्यवसायी दिवाकार गौतम, रमेश आचार्य, कृष्णप्रसाद बजगाईं र निराजन कँडेलले इजरायलद्वारा छनोट गरिएका ५ वटा स्वास्थ्य संस्थाहरू वैदेशिक रोजगार ऐन, नियमावली र कार्यविधिविपरीत भएको भन्दै ‘सेवाग्राहीले रोजेको संस्थाबाट स्वास्थ्य परिक्षण गराउनुपर्ने परमादेशको आदेश’ माग गर्दै पुस १६ गते उच्च अदालत पाटनमा रिट दायर गरेका थिए । पुस ४ गते काठमाडौंस्थित इजरायली दूतावासले श्रमिकको गुणस्तरीय स्वास्थ्य परीक्षणका लागि इजरायलको ‘जनसख्या तथा अध्यागमन प्राधिकरण (पिवा)बाट आफ्नो मापदण्ड पूरा गर्ने पाँच वटा स्वास्थ्य संस्थालाई अनुमति दिइएको जानकारी परराष्ट्र मन्त्रालयमार्फत श्रम, रोजगार तथा सामाजिक सुरक्षा मन्त्रालयलाई गराएको थियो । जसमा नेपाल मेडिसिटी अस्पताल, स्टार हस्पिटल, ह्याम्स हस्पिटल, मनमोहन मेमोरियल मेडिकल कलेज र क्रिस्टल डायग्नोस्टिक प्रालि रहेका छन् । यी स्वास्थ्य संस्थालाई पहिलो चरणमा पुस १७ देखि २३ गतेभित्र तोकिएको श्रमिकलाई स्वास्थ्य परीक्षण गर्न अनुमति दिइएको थियो । इजरायलले पहिलो चरणमा एक हजार जना सहायक श्रमिक लैजाने प्रक्रिया अगाडि बढाएको छ । नेपाल र इजरायलबीच भएको श्रम सम्झौताबमोजिम ३ वर्षदेखि इजरायलले तोकेको स्वास्थ्य संस्थाहरूबाट स्वास्थ्य परीक्षण भइरहेको छ । छनोट भएका स्वास्थ्य संस्थाहरू नेपाल सरकारबाट विशिष्ट श्रेणीको अनुमतिप्राप्त ‘ए’ र ‘बी’ ग्रेडको अन्तर्राष्ट्रियस्तरको अस्पताल र डायग्नोस्टिक ल्याब भएको जनाएको छ । वैदेशिक रोजगार ऐन तथा नियमावली २०६४ को ४५ को ‘ख’ ले सम्बन्धित मुलुकसँगको श्रम सम्झौता गरी स्वास्थ्य संस्थाहरू छान्न सक्ने व्यवस्था गरेको छ । नेपालका स्वास्थ्य संस्थाहरूले श्रमिकको स्वास्थ्य परीक्षणको गुणस्तरमा प्रश्न उठाउँदै गन्तव्य देशहरूले आफैंले अन्तर्राष्ट्रिय मापदण्ड पुगेको स्वास्थ्य संस्थामार्फत श्रमिकको स्वास्थ्य परीक्षण गराउँदै आइरहेका छन् । जसमा मलेसियाले ३६ वटा, साउदी अरेबिया, बहराइन, ओमान र कुवेत (गाम्का)ले १९ वटा, दक्षिण कोरियाले ५ वटा, कतारले एउटालाई श्रमिकको स्वास्थ्य परीक्षण गर्न अनुमति दिएको छ । वैदेशिक रोजगारीमा जाने श्रमिकको स्वास्थ्य परीक्षण कार्यका सुधारका लागि श्रम मन्त्रालयद्वारा स्वास्थ्य मन्त्रालयका अतिरिक्त सचिव डा. दिपेन्द्ररमण सिंहको नेतृत्वमा गठित उच्चस्तरीय विशेषज्ञ कार्यदलले श्रमिकको स्वास्थ्य परीक्षण गर्ने सूचीकृत स्वास्थ्य संस्थाहरूलाई अन्तर्राष्ट्रियस्तरको मापदण्डअनुसार स्तरिकृत गरी सबै देशका लागि एकरूपता बनाउन एकद्वार प्रणालीका लागि पहल गर्न सुझाव दिइएको छ । कार्यदलले अधिकांश स्वास्थ्य संस्थाहरूले नेपाल सरकारको मापदण्ड पूरा नगर्नुको साथै स्वास्थ्य परीक्षण नै नगरी श्रम स्वीकृतिका लागि मात्रै मेडिकल रिपोर्ट पेस गर्ने गरेको भन्दै सरकारको ध्यानाकर्षणसमेत गरेको थियो । गत वर्ष विशेषज्ञ टोलीले अनुगमन गर्दा न्यूनतम स्वास्थ्य मापदण्ड नपुगेको भन्दै ६७ स्वास्थ्य संस्थाको संस्थाको कारोबार रोक्का गरिदिएको थियो ।
जस्मिन पेन्ट्सले ५ करोडको आइपीओ निष्कासन गर्ने
काठमाडौं । जस्मिन पेन्ट्स लिमिटेडले ५ करोड बढीको साधारण सेयर आइपीओ जारी गर्ने भएको छ । कम्पनीले प्रतिसेयर अंकित मुल्य १०० रुपैयाँका दरले हुन आउने ५ लाख कित्ता बराबरको ५ करोडको सेयर निष्कासन गर्ने भएको हो । सेयर निष्कासनका लागि कम्पनीले सानिमा क्यापिटल लिमिटेडलाई बिक्रि प्रबन्धकको रुपमा नियुक्त गरेको छ । उक्त सम्झौता पत्रमा जस्मिन पेन्ट्स लिमिटेडका तर्फबाट कार्यकारी अध्यक्ष लक्ष्मणप्रसाद अर्याल र सानिमा क्यापिटल लिमिटेडका तर्फबाट प्रमुख कार्यकारी अधिकृत भिष्म राज चालिसेले हस्ताक्षर गरे ।
नारायणी डेभलपमेन्ट बैंकको केन्द्रीय कार्यालय भरतपुरमा सर्ने
भरतपुर । नारायणी डेभलपमेन्ट बैंकको केन्द्रीय कार्यालय चितवनको भरतपुरमा सर्ने भएको छ । बैंकको साधारण सभाले निर्णय गरेसँगै बैंकको केन्द्रीय कार्यालय भरतपुर महानगरपालिकाको वडा नं १० वाइपासरोड, स्थित जिल्ला सहकारी सघं चितवनको आधुनिक नवनिर्मित भवनमा सर्ने भएको हो । बैंकको केन्द्रीय कार्यालय हाल रत्ननगर नगरपालिकाको वडा नं. १ टाँडीमा रहेको छ । बैंकको कारोबारलाई अझ बढाउने अभिप्रायले केन्द्रीय कार्यालय सार्ने बैंकले जनाएको छ । साथै, बैंकको हाकिमचोकमा रहेको शाखामा कार्यालयले पनि स्थानान्तरण भएर सोही भवनबाट बैंकिङ सेवा दिने भएको छ । कार्यालय सार्नका लागी बैंकले भौतिक पूर्वाधार निर्माणको कार्य अन्तिम चरणमा पुर्याएको छ । ०५८ असोज १२ गते देखि सो बैंकले रत्ननगर नगरपालिका १, बकुलहर, टाँडी, चितवनमा केन्द्रीय कार्यालय र टाँडी, यज्ञपुरी, भरतपुर, नारायणगढ र पर्सामा शाखा कार्यालयहरू खोली बैंकिङ सेवा प्रदान गर्दै आएको थियो ।
नेपाल लाइफ क्यापिटलको साधारण सभा सम्पन्न, अध्यक्षमा कृष्णराज लामिछाने चयन
काठमाडौं । नेपाल लाइफ क्यापिटल लिमिटेडको एघारौं वार्षिक साधारणसम्पन्न भएको छ । उक्त एघारौं वार्षिक साधारण सभाबाट आव २०८०/८१ को लेखापरीक्षकको वार्षिक प्रतिवेदन पारित, आव २०८१/८२ को लागि लेखापरीक्षकको नियुक्ति तथा नयाँ संचालक समिति चयन भएको छ । संचालक समितिमा संस्थापक सेयरधनीहरुको तर्फबाट प्रतिनिधित्व गर्ने संचालक समिति सदस्यमा कृष्णराज लामिछाने, सुरेशकुमार अग्रवाल, अमितकुमार कयाल र प्रेमप्रसाद रेग्मी निर्विरोध चयन भएका छन् । साथै, वार्षिक साधारण सभा पश्चात् बसेको कम्पनीको संचालक समितिको बैठकले कृष्णराज लामिछानेलाई सर्वसम्मतिले संचालक समितिको अध्यक्ष चयन गरेको छ ।
सानाठूला भूकम्पका धक्का आइरहेका छन्, सबै सतर्क रहनुहोला : प्रधानमन्त्री
काठमाडौं । प्रधानमन्त्री केपी शर्मा ओलीले भूकम्पबाट सुरक्षित रहन सबैलाई आग्रह गरेका छन् । आज सामाजिक सञ्जालमा लेख्दै उनले भनेका छन्, ‘हिजोआज विभिन्न भागमा सानाठूला भूकम्पका धक्का आइरहेका छन् । सबै सतर्क रहनुहोला, सुरक्षित रहनुहोला ।’ आज बिहान ६ः५० बजे नेपाल र चीन (तिब्बत)को सीमा क्षेत्र केन्द्रबिन्दु भएको भूकम्पको धक्का काठमाडौं सहित देशका विभिन्न जिल्लामा पनि महसुस गरिएको थियो ।
ङादी ग्रुपको १.८५ अर्ब को हकप्रद सेयर बिक्री खुला, कसले आवेदन दिन पाउँछन् ?
काठमाडौं । ङादी ग्रुप पावरले आज पुस २३ गतेदेखि हकप्रद सेयर निष्काशन तथा बिक्री खुला गरेको छ । कम्पनीले हाल कायम चुक्ता पुँजी १ अर्ब ८५ करोड १२ लाख ७९ हजार रुपैयाँको १ सय प्रतिशत अर्थात् १ कित्ता सेयर बराबर नयाँ १ कित्ता अनुपातमा हकप्रद सेयर बिक्री खुला गरेको हो । कम्पनीले १ अर्ब ८५ करोड १२ लाख ७९ हजारको प्रतिकित्ता १ सय रुपैयाँ अंकित मूल्य दरका १ करोड ८५ लाख १२ हजार ७१२.२२५ कित्ता हकप्रद सेयर जारी गरेको हो । हकप्रद निष्काशनपश्चात् कम्पनीको चुक्ता पुँजी ३ अर्ब ७० करोड २५ लाख ५८ हजार रुपैयाँ पुग्नेछ । हकप्रद सेयर निष्काशन प्रयोजनार्थ कम्पनीले मंसिर १८ गते बुकक्लोज गरेको थियो । त्यसैले मंसिर १७ गतेसम्म नेपाल स्टक एक्सचेञ्ज (नेप्से)मा कारोबार भइ कायम सेयरधनीहरूले हकप्रद सेयरमा आवेदन दिन सक्नेछन् । कम्पनीको हकप्रद सेयरमा लगानीकर्ताहरूले माघ १४ गतेसम्म आवेदन दिन सकिनेछ । कम्पनीको सेयर निष्काशन तथा बिक्री प्रबन्धक सिद्धार्थ क्यापिटल रहेको छ । लगानीकर्ताले बिक्री प्रबन्धकका साथै सिद्धार्थ बैंकको विराटनगर, विरगञ्ज, नारायणघाट, पोखरा, बुटवल, नेपालगञ्ज, धनगढी र सुर्खेत शाखा कार्यालयबाट आवेदन दिन सक्नेछन् । साथै, नेपाल धितोपत्र बोर्डबाट अनुमति लिई आस्वा सेवामा आवद्ध बैंक तथा वित्तीय संस्थाहरूबाट सीआस्वा प्रणाली र मेरो सेयरमार्फत् आवेदन दिन सक्नेछन् । केयरएनपि डबल बी प्लस इस्यूअर रेटिङ्ग प्रदान गरेको छ । यसले समयमा वित्तीय दायित्व बहन गर्ने क्षमतामा मध्यम जोखिम रहेको संकेत गर्दछ ।
