आजसम्म सेयरधनी बने लक्ष्मी सनराइज र कालिञ्चोक दर्शनको लाभांश पाइने
काठमाडौं । लक्ष्मी सनराइज बैंक र कालिञ्चोक दर्शनको लाभांश सुरक्षित गर्ने आज मंसिर २९ गते अन्तिम दिन रहेको छ । साधारण सभा तथा लाभांश वितरण प्रयोजनार्थ यी २ कम्पनीले पुस १ गते बुकक्लोज गर्ने निर्णय गरेका छन् । त्यसैले आजसम्म नेपाल स्टक एक्सचेञ्जमा कारोबार भई कायम सेयरधनीहरुले लाभांश प्राप्त गर्न सक्नेछन् । लक्ष्मी सनराइज बैंकले पुस १४ गते कमलपोखरी, काठमाडौंमा बिहान ११ बजे २५औँ वार्षिक साधारण सभा बोलाएको छ । बैंकको सभाले गत आर्थिक वर्ष २०८१/८२ को नाफाबाट हाल कायम चुक्ता पुँजीको १० प्रतिशतका दरले २ अर्ब ४३ करोड ४६ लाख ५१ हजार रुपैयाँ बोनस सेयर र कर प्रयोजनका लागि ०.५३ प्रतिशतका दरले १२ करोड ८१ लाख ३९ हजार रुपैयाँ नगद गरी कुल १०.५३ प्रतिशत लाभांश प्रस्ताव पारित गर्नेछ । यस्तै, कालिञ्चोक दर्शनले पुस १५ गते काठमाडौंमा ११औँ वार्षिक साधारण सभा साढे ११ बजे बोलाएको छ । कम्पनीको सभाले गत आर्थिक वर्ष २०८१/८२ को नाफाबाट चुक्ता पुँजीको ५ प्रतिशत बोनस सेयर र कर प्रयोजनका लागि ०.२६ प्रतिशत नगद गरी कुल ५.२६ प्रतिशत लाभांश प्रस्ताव पारित गर्नेछ ।
खानेपानी मन्त्रालयका सचिवसहित १७ जनाविरुद्ध सर्वोच्चमा पुनरावेदन
काठमाडौं । अख्तियार दुरुपयोग अनुसन्धान आयोगले मेलम्ची खानेपानी आयोजनमा भएको भ्रष्टाचारमा विशेष अदालतद्वारा सफाइ पाएका खानेपानी मन्त्रालयका सचिव डा सञ्जय शर्माविरुद्ध सर्वोच्च अदालतमा पुनरावेदन दिएको छ । आयोगले आइतबार विज्ञप्ति जारी गरी मेलम्ची खानेपानी विकास समितिका तत्कालीन अध्यक्ष र खानेपानी मन्त्रालयका सचिवहरू भीम प्रसाद उपाध्याय, गजेन्द्र कुमार ठाकुर, मेलम्ची खानेपानी विकास समितिका तत्कालीन बोर्ड सदस्य रुद्रसिंह तामाङ, तत्कालीन बोर्ड सदस्य मुकुन्द प्रसाद पौडेल लगायत १७ जनाविरुद्ध अख्तियारले सर्वोच्च अदालतमा पुनरावेदन दिएको जनाएको छ । फैसला पुनरावलोकनका लागि आज सर्वोच्चमा गरिएको पुनरावेदनमा जेनजी सहिद परिवारको तर्फबाट सरकार तथा जेनजी आन्दोलनकारीबीचको सम्झौतामा हस्ताक्षर गरेका भोज विक्रम थापालाई विपक्षी बनाइएको छ । मेलम्ची आयोजना भ्रष्टाचारबारे अख्तियारले २०८० फागुनमा विशेष अदालतमा मुद्दा दायर गरेको थियो । भ्रष्टाचार मुद्दामा थापाविरुद्ध ३२ करोड ३५ लाख ६१ हजार ६६३ रुपैयाँ बिगो कायम गरी जरिवाना र कैद सजाय माग दाबी गरिएको थियो । विशेष अदालतले सफाइ दिएपछि अख्तियार सर्वोच्च गएको हो । विशेष अदालतले २०८१ भदौ १६ गतेको फैसलाबाट आंशिक सफाइ दिएकाले उल्लेखित फैसलाउपर चित्त नबुझेकाले आज सर्वोच्च अदालतमा पुनरावेदन निवेदन दर्ता गरिएको हो ।
एमाले महाधिवेशन: आज उम्मेदवारी दर्ता र अन्तिम नामावली प्रकाशन
काठमाडौं । नेकपा (एमाले) को ११ औँ राष्ट्रिय महाधिवेशनअन्तर्गत बन्दसत्रमा आज केन्द्रीय समितिका लागि उम्मेदवारसँग सम्बन्धित महत्वपूर्ण निर्वाचन कार्यतालिका कार्यान्वयन हुने भएको छ। निर्वाचन आयोगका अनुसार आज केन्द्रीय समितिका लागि उम्मेदवारहरूलाई दरखास्त फारम वितरण गरिनेछ भने सोही दिन उम्मेदवारी मनोनयन, दर्ता प्रक्रिया र उम्मेदवारको अन्तिम नामावली प्रकाशन गरिनेछ। साथै, मतदाता नामावली पनि आजै सार्वजनिक गरिने आयोगले जनाएको छ। निर्वाचन प्रक्रियालाई निर्धारित समयमै सम्पन्न गर्न आयोगले आवश्यक तयारी पूरा गरेको जनाएको छ। आज उम्मेदवारी दर्ता सम्पन्न भएपछि कुनै उजुरी वा दाबी विरोध परेमा त्यसको व्यवस्थापन गरेर अन्तिम नामावली सार्वजनिक गरिनेछ। आयोगका अनुसार भोलि मङ्गलबार बिहान ११ बजेदेखि साँझ ५ बजेसम्म केन्द्रीय समितिका सदस्य चयनका लागि मतदान हुनेछ। मतदान महाधिवेशनस्थलमै हुने र बन्दसत्रका प्रतिनिधिहरूले मताधिकार प्रयोग गर्नेछन् । एमालेको ११ औँ महाधिवेशनमार्फत अध्यक्ष, महासचिवसहित केन्द्रीय समिति चयन हुने भएकाले निर्वाचन प्रक्रियालाई पार्टीभित्र अत्यन्त चासोका साथ हेरिएको छ। नेतृत्व चयनसँगै पार्टीको आगामी राजनीतिक दिशा र सांगठनिक संरचना पनि निर्धारण हुने भएकाले बन्दसत्र र निर्वाचनलाई निर्णायक चरणका रूपमा लिइएको छ । महाधिवेशनको अन्तिम चरणमा प्रवेशसँगै उम्मेदवारहरूको दौडधुप, आन्तरिक छलफल र समर्थन जुटाउने गतिविधि पनि तीव्र बन्दै गएको छ ।
आगलागीका घटना बढे, २४ घण्टामा २२ स्थानमा आगलागी
काठमाडौं । राष्ट्रिय विपद जोखिम न्यूनीकरण तथा व्यवस्थापन प्राधिकरणका अनुसार शनिबार बिहान १० बजेदेखि आइतबार बिहानसम्म देशभर कूल २५ वटा विपद्जन्य घटना घटेका छन् । ती घटनामध्ये सबैभन्दा बढी अर्थात् २२ वटा घटना आगलागीसँग जोडिएका छन् । कतै डढेलो त कतै भान्सामा खाना पकाउने ग्याँस लिक हुँदा आगो लागेको छ । बिजुली सर्ट भएर, असावधानी एवम् जनचेतनाका अभावमा पनि आगो लागेको प्राधिकरणको विवरणमा उल्लेख छ । रौतहटमा ३, पाँचथर, झापा, कास्की र स्याङजाका २/२ स्थानमा आगलागीका घटना घटेका छन् । मोरङ, भोजपुर, उदयपुर, सर्लाही, काठमाडौं, स्याङजा, रुपन्देही, दाङ, अछाम र दार्चुलाका १/१ स्थानमा आगलागीका घटना घटेका छन् । हिउँदको समयमा आगो ताप्दा, सलाइको काटी खेलाउँदा र धानको कुन्युमा केटाकेटी खेल्दासमेत आगलागी भएको पाइएको छ । प्राधिकरणका अनुसार, काठमाडौंको दक्षिणकाली नगरपालिका–५ पूरानो दक्षिणकाली जंगलमा आगलागी भएको थियो । इलाका प्रहरी कार्यालय फर्पिङ टोली र स्थानीयको सहयोगमा डढेलो नियन्त्रण गरिएको थियो । पाल्पामा पहिरो, मोरङका २ स्थानमा जङ्गली हात्तीले आक्रमण गरेको छ । त्यसमध्ये मोरङको सुन्दरहरैचा नगरपालिका १२ मा हात्तीको आक्रमणमा परेर एकको मृत्यु भएको छ । विपद्मा परेर एक जनाको निधन र ४ जना घाइते भएका छन् । विपद्जन्य घटनाका कारण कूल ७२ लाख ९०० बराबरको क्षति भएको अनुमान गरिएको छ ।
विभागको कडाइ बढ्यो, १४ उद्योगमा निरीक्षण गर्दा २ उद्योगलाई जरिवाना
काठमाडौं । बजार अनुगमन तथा निरीक्षणलाई तीव्र पारिरहेको वाणिज्य, आपूर्ति तथा उपभोक्ता संरक्षण विभागले आइतबार काठमाडौंका विभिन्न १४ वटा उद्योग तथा फर्मको निरीक्षण गरेको छ । त्यसमध्ये २ वटालाई कारबाहीको दायरामा ल्याइएको विभागले जनाएको छ । कागेश्वरी मनोहरा-९ महानटारमा रहेको दाहाल गाई फार्मलाई विभागले ५ हजार रुपैयाँ जरिवाना गरेको छ । उपभोक्ता संरक्षण ऐन, २०७५ को दफा १५, दफा ३८ ‘घ’ बमोजिमको कसुरमा सोही ऐनको दफा ३९, १ ‘क’ बमोजिम कारवाही गरिएको विभागले जनाएको हो । यसैगरी कागेश्वरी मनोहरा-९ गोठाटारमा रहेको डिएनएस काष्ठ तथा फर्निचर उद्योगलाई व्यवसायसँग सम्बन्धित कागजात लिई ३ दिनभित्र विभागमा उपस्थित हुन निर्देशन दिइएको छ । विभागले अन्य १२ उद्योग वा फर्मलाई भने तत्काल सुधार गर्नुपर्ने केही राय सुझावसहित निर्देशन दिएको छ । विभागले सार्वजनिक बिदाको दिन बाहेक अन्य दिन देशव्यापी रूपमा स्थानीय प्रशासन समेतको सहयोगमा बजार अनुगमन तथा निरीक्षण गर्दै आएको छ । बजारमा स्वच्छता कायम राख्न, बिल बिजक जारी गराउन र कालोबजारी अन्त्यका लागि क्रियाशील भएको विभागले स्पष्ट पारेको छ । विभागको पछिल्लो विवरणअनुसार मङ्सिर २६ गते ११ वटा उद्योग र फर्मको अनुगमन गरेको थियो । मङ्सिर २५ गते २० वटा उद्योग वा फर्ममा अनुगमन गरेको थियो । सो दिन दावा सुज एण्ड फेसन सेन्टरलाई ५० हजार रुपैयाँ जरिवाना तिराएको थियो । त्यसैगरी मङ्सिर २४ गते १३ वटा फर्ममा अनुगमन गरेको थियो । सो दिन ४ वटा फर्मलाई ५० हजार रुपैयाँ जरिवाना तिराएको थियो । मङ्सिर २३ गते १५ वटा फर्ममा अनुगमन गरेको थियो भने मङ्सिर २२ गते १५ वटा फर्ममा अनुगमन गरी ३ वटा फर्मलाई ५० हजार रुपैयाँ जरिवाना तिराएको थियो ।
निर्वाचन खर्च पारदर्शी बनाउन बैंकिङ प्रणाली, सबै कारोबार बैंकबाट गर्नुपर्ने
काठमाडौं । निर्वाचन आयोगले आगामी फागुन २१ गतेका लागि तय गरेको प्रतिनिधिसभा सदस्य निर्वाचनका लागि तय गरेको र हाल राय सुझावका लागि सार्वजनिक गरेको निर्वाचन आचारसंहिता-२०८२ मा केही नयाँ व्यवस्था थप गरेको छ । खर्च वा आम्दानी सबै बैंक तथा वित्तीय संस्थामार्फत गर्नुपर्ने, सबै बिल तथा भरपाई राख्नुपर्ने लगायतका नयाँ व्यवस्था थप गरेको हो । निर्वाचनमा हुने खर्चको स्रोतको पारदर्शिता कायम गर्न यस्तो व्यवस्था गर्न लागिएको आयोगले जनाएको छ । आयोगले निर्वाचन खर्चसम्बन्धी आचरण शीर्षकमा राजनीतिक दल तथा उम्मेदवारले मनोनयन पत्र दर्ता निर्वाचनमा आफूले खर्च गर्ने अनुमानित रकम र सो को स्रोत समेत खुलाउनुपर्ने उल्लेख गरेको छ । उम्मेदवारले खर्च गर्दा बैंक तथा वित्तीय संस्थामा छुट्टै खाता खोली सोही खाताबाट गर्नुपर्नेछ । यस्तै निर्वाचन खर्चसम्बन्धी खर्च गर्दा निजको तर्फबाट खर्च गर्ने जिम्मेवार पदाधिकारी तोक्नुपर्नेछ । तोकिएका पदाधिकारीको नामसहितको विवरण निर्वाचन अधिकृतको कार्यालय तथा निर्वाचन कार्यालयमा जानकारी गराउनुपर्ने व्यवस्था गरिएको छ । प्रस्तावित आचारसंहितामा राजनीतिक दलले निर्वाचनसम्बन्धी खर्च गर्दा बैंक वा वित्तीय संस्थामा छुट्टै खाता खोली दलले तोकेको जिम्मेवार पदाधिकारीबाट सो खाताबाट मात्रै खर्च गर्नुपर्नेछ । यसैगरी २५ हजार रुपैयाँभन्दा बढी आर्थिक सहयोग प्राप्त गर्दा बैंक वा वित्तीय संस्था मार्फत नै गर्नुपर्ने जनाइएको छ । व्यक्ति वा संस्थाबाट स्वैच्छिक सहयोगका रुपमा नगद लिएमा सो रकम बुझेको रसिद वा भरपाई दिई बैंक वा वित्तीय संस्थामा जम्मा गराउनुपर्नेछ । खर्चको विवरणसमेत तथा बिल भरपाई राख्नुपर्नेछ । आम्दानी तथा खर्चको विवरण प्रचलित कानुन बमोजिम आयोगले तोकेका ढाँचामा जिल्ला निर्वाचन कार्यालय वा आयोगमा बुझाउनुपर्नेछ । आयोगले खर्चको बिल भरपाई तथा बैंक तथा वित्तीय संस्थामा रहेको खाताको विवरण पेस गर्न आदेश दिएमा सक्कल बिल भरपाई तथा बैंक वा वित्तीय संस्थाको खाताको विवरण पेश गर्नुपर्ने सो थप गरिएको व्यवस्थामा उल्लेख गरेको छ । निर्वाचन खर्चको विवरण निर्वाचन सम्पन्न भएपछि सार्वजनिक गरी प्रचलित निर्वाचनसम्बन्धी कानुनले तोकेको अवधिभित्र आयोग वा निर्वाचन कार्यालयमा पेस गर्नुपर्ने जनाइएको छ ।
एमालेको ११औँ महाधिवेशनको बन्दसत्रमा किन गठन गरिएन अध्यक्ष मण्डल ?
काठमाडौं । भृकुटीमण्डपमा जारी नेकपा (एमाले) को ११औँ राष्ट्रिय महाधिवेशनको बन्दसत्रमा यसपटक अध्यक्ष मण्डल गठन नगरिनु राजनीतिक वृत्तमा चासोको विषय बनेको छ । अघिल्ला महाधिवेशनहरुमा प्रायः अध्यक्ष मण्डल बनाएर बन्दसत्र सञ्चालन गर्ने अभ्यास रहे पनि यसपटक भने पार्टी अध्यक्ष केपी शर्मा ओलीकै प्रत्यक्ष अध्यक्षतामा बन्दसत्र अघि बढाइएको छ । नेतृत्वको यो निर्णयलाई पार्टीभित्रको शक्ति सन्तुलन, विधानको व्यवस्था र महाधिवेशनका संवेदनशील एजेन्डासँग जोडेर हेरिएको छ । एमालेको हाल कायम विधानअनुसार महाधिवेशन, राष्ट्रिय सम्मेलन तथा केन्द्रीय कमिटी बैठकजस्ता प्रमुख कार्यक्रमहरूको अध्यक्षता पार्टी अध्यक्षले गर्ने व्यवस्था छ । यही प्रावधानलाई आधार मानेर यसपटक छुट्टै अध्यक्ष मण्डल गठन गर्न आवश्यक नदेखिएको नेतृत्वको बुझाइ छ । पार्टीका एक नेताले भने, ‘विधानमै अध्यक्षको भूमिका स्पष्ट रहेकाले अध्यक्ष मण्डल बनाउनु अनिवार्य थिएन । त्यसैले अध्यक्षकै नेतृत्वमा बन्दसत्र सञ्चालन गर्ने निर्णय गरियो ।’ यस महाधिवेशनमा विधान संशोधन, केन्द्रीय कमिटीको संरचना, पदाधिकारी संख्या, नेतृत्व चयन प्रक्रिया र शक्ति सन्तुलनसँग जोडिएका विषयहरू प्रमुख एजेन्डाका रूपमा रहेका छन् । यस्ता संवेदनशील विषयमा बहस चलिरहेका बेला नेतृत्वले एकीकृत र स्पष्ट सन्देश दिन अध्यक्ष केन्द्रित सञ्चालन रोजेको बताइन्छ । अध्यक्ष मण्डल गठन हुँदा विभिन्न सदस्यहरूबाट फरक–फरक धारणा बाहिर आउने, निर्णय प्रक्रियामा ढिलाइ हुने र सन्देश अस्पष्ट हुने सम्भावना रहेको निष्कर्ष नेतृत्वले निकालेको स्रोतको दाबी छ । बन्दसत्रको कार्यसूची पनि अत्यन्तै बाक्लो रहेकाले समय व्यवस्थापन अर्को महत्वपूर्ण कारणका रूपमा प्रस्तुत गरिएको छ । सीमित समयभित्र धेरै प्रस्तावमाथि छलफल, संशोधन र निर्णय गर्नुपर्ने अवस्थाले निर्णय प्रक्रियालाई छरितो र प्रभावकारी बनाउने उद्देश्यले अध्यक्षकै अध्यक्षतामा सत्र सञ्चालन गरिएको बुझाइ छ । अध्यक्ष मण्डल हुँदा बोल्ने क्रम, निर्णयको प्रक्रिया र सहमतिमा पुग्न थप समय लाग्ने अनुभव अघिल्ला बैठकहरूबाट देखिएको नेताहरू बताउँछन् । विगतका अनुभवले पनि यसपटकको निर्णयलाई प्रभाव पारेको देखिन्छ । एमालेका अघिल्ला केही महाधिवेशन अध्यक्ष मण्डल भए पनि वास्तविक निर्णय शक्ति अध्यक्षकै हातमा केन्द्रित रहने गरेको, अध्यक्ष मण्डल औपचारिकतामा सीमित भएको आलोचना हुँदै आएको थियो । कतिपय अवस्थामा अध्यक्ष मण्डलभित्रकै मतभेदले बैठक अवरुद्ध हुने र विवाद सार्वजनिक हुने अवस्था समेत देखिएको थियो । यही पृष्ठभूमिमा यसपटक अध्यक्ष मण्डल नबनाउने निर्णय गरिएको एक नेताले बताए । तर यो निर्णयप्रति सबै नेताहरू एकमत भने छैनन् । पार्टीभित्रका केही समूहले अध्यक्ष मण्डल गठन नहुनुलाई नेतृत्वको अत्यधिक केन्द्रीकरण को संकेतका रूपमा व्याख्या गरेका छन् । उनीहरूका अनुसार अध्यक्ष मण्डल भएमा सामूहिक नेतृत्वको अभ्यास देखिन्थ्यो र विभिन्न धारहरूको प्रतिनिधित्व सुनिश्चित हुन्थ्यो । अध्यक्ष मण्डल नबनाउँदा बन्दसत्र अध्यक्ष केन्द्रित बनेको उनीहरूको टिप्पणी छ । यसबीच, पार्टी नेतृत्वले भने यस्तो आलोचनालाई अस्वीकार गर्दै आएको छ । नेतृत्व पक्षका नेताहरूका अनुसार अध्यक्ष मण्डल नबनाउनु लोकतान्त्रिक अभ्यास कमजोर बनाउनु नभई विधान अनुसारको नेतृत्व संरचना कार्यान्वयन गर्नु मात्र हो । ‘महाधिवेशन प्रतिनिधिहरूले आफ्नो धारणा राख्ने, संशोधन प्रस्ताव पेस गर्ने र मतदानमार्फत निर्णय गर्ने अधिकार सुरक्षित छ । अध्यक्ष मण्डल नबन्दा प्रतिनिधिहरूको भूमिका सीमित हुँदैन,’ एक नेताले भने । राजनीतिक विश्लेषकहरू भने यस निर्णयलाई एमालेभित्रको वर्तमान शक्ति संरचनासँग जोडेर हेर्छन् । उनीहरूका अनुसार अध्यक्ष ओली पार्टीभित्र निर्णायक भूमिकामा रहेकाले बन्दसत्रको सम्पूर्ण प्रक्रिया आफ्नै नेतृत्वमा राखेर सम्भावित असमझदारी र शक्ति संघर्ष नियन्त्रणमा राख्न खोजिएको देखिन्छ । विशेषतः विधान संशोधन र केन्द्रीय कमिटी संरचनासम्बन्धी प्रस्तावहरूमा मतभेद देखिइरहेका बेला अध्यक्ष मण्डल बनाएर जोखिम बढाउन नेतृत्व इच्छुक नभएको उनीहरूको विश्लेषण छ । समग्रमा, एमालेको ११औँ महाधिवेशनको बन्दसत्रमा अध्यक्ष मण्डल गठन नगरिनु विधानको व्यवस्था, समय व्यवस्थापन, विगतका अनुभव र वर्तमान शक्ति सन्तुलनको परिणामका रूपमा देखिन्छ । यस निर्णयले बन्दसत्रको सञ्चालन छरितो बनेको दाबी नेतृत्वले गरे पनि यसले पार्टीभित्र सामूहिक नेतृत्वको अभ्यासबारे बहस भने थप चर्काएको छ ।
बीवाइडीको हाइब्रिड पिकअप ‘सार्क- ६ ’को बुकिङ खुला, मूल्य करिब डेढ करोड
काठमाडौं । नेपालमा चिनियाँ विद्युतीय सवारीसाधन (ईभी) बीवाईडीको हाइब्रिड पिकअप शार्क- ६को बुकिङ खुला भएको छ । नेपालका लागि बीवाईडीको आधिकारिक विक्रेता साइमेक्स इंकका मार्केटिङ हेड समिद नकर्मीले जानकारी दिए। नेपालमा शार्क- ६ बीवाईडीको पहिलो हाइब्रिड गाडी हो । कम्पनीले गाडी ‘हाइटेक वीक’ मार्फत पहिलो पटक भित्र्याएको तर लन्च भने नगरेको जनाएको छ । यद्यपि बुकिङ भने गर्न सकिने कम्पनीको भनाइ छ । बीवाइडीको सार्क- ६ मा कम्पनीले ‘डीएमओ’ प्लेटफर्म प्रयोग गरेको छ । यसको अर्थ यो गाडी जस्तोसुकै कठिन सडक (अफरोड) मा पनि सहजै गुड्न सक्छ । यसमा १.५ लिटरको टर्बो फोर सिलिण्डर पेट्रोल इन्जिन र दुईवटा इलेक्ट्रिक मोटरको संयोजन छ । फ्रन्ट मोटरले १७० किलोवाट र रियर मोटरले १५० किलोवाट पावर दिन्छ । पेट्रोल इन्जिन र इलेक्ट्रिक मोटरको संयुक्त पावर ४३० हर्सपावर रहेको छ, जुन यो सेगमेन्टकै उत्कृष्ट मानिन्छ । यसको गति पनि लोभलाग्दो छ । बीवाइडी सार्कले ० देखि १०० किलोमिटरको गति मात्र ५.७ सेकेन्डमा तय गर्न सक्छ भने यसको अधिकतम गति १६० किलोमिटर प्रतिघण्टा रहेको छ । हाइब्रिड मोडल भएकाले यसमा रेन्जको कुनै समस्या छैन । यसमा बीवाइडीको सुरक्षित मानिने २९.५८ किलोवाट आवरको ‘ब्लेड ब्याट्री’ प्रयोग गरिएको छ । ब्याट्री मात्र प्रयोग गरेर १०० किलोमिटर गुड्न सकिन्छ । इन्धन र ब्याट्री दुवैको प्रयोग गर्दा यो पिकअपले एक पटकमा ८४० किलोमिटर को लामो यात्रा तय गर्न सक्छ । कम्पनीका अनुसार यसले १०० किलोमिटर गुम्न केवल ७.५ लिटर इन्धन खपत गर्छ । गाडीमा एप्पल कारप्ले, एन्ड्रोइड अटो, डिजिटल की र भ्वाइस कन्ट्रोल कनेक्टिभिटी रहेको छ । वायरलेस फोन चार्जर, हेडअप डिस्प्ले र रिमोट भेहिकल मेनेजमेन्ट सुविधा रहेको छ । यस्तै, ३६० डिग्री क्यामरा सिस्टम, अफरोड क्षमता र डाइमेन्सनको समेत सुविधा रहेको छ । पूर्ण रूपमा ४ बाई ४ सिस्टममा आधारित यो डबल क्याब पिकअपमा बालुवा, हिलो र हिउँ गरी ३ वटा ड्राइभ मोडहरू उपलब्ध छन् । साइमेक्स इंकले यसको आधिकारिक मूल्य ठ्याक्कै तोकिसकेको छैन । यद्यपि यो प्रिमियम र पावरफुल हाइब्रिड पिकअप खरिद गर्न चाहने ग्राहकले कम्तीमा १ करोड ५० लाख रुपैयाँ हाराहारी बजेट छुट्याउनु पर्ने कम्पनीको भनाइ छ ।
