टरेन तरलता अभाव, घटेन ब्याजदर
काठमाडौं । जेठ ३ गते मेगा बैंक नेपालले २५००० हजारको मुद्धति खातामा १२ प्रतिशत ब्याज दिने र त्यसको भुक्तानी १५/१५ दिनमा गर्ने सार्वजनिक सूचना प्रकाशित गर्यो । नेपाल बैंकर्स एसोसियसनका अध्यक्ष समेत रहेका मेगा बैंकका प्रमुख कार्यकारी अधिकृत अनिल शाह भन्छन–हामीले १२ प्रतिशत ब्याजदरमा मुद्धति खातामा निक्षेप आव्हान गर्नु भनेको तरलता अभाव टरेको छैन भन्ने प्रमाण हो, तरलताको अभाव क्रमशः घटिरहेको छ तर अपेक्षा गरे अनुसार निक्षेप वृद्धि भैरहेको छैन् ।’ बाणिज्य बैंकहरु संस्थागत निक्षेप कर्ता भन्दा पनि व्यक्तिगत निक्षेप कर्ताहरुलाई आकर्षित गर्न लागिपरेको शाह बताउँछन् । ‘साना साना तर दिगो प्रकृतिका व्यक्तिगत निक्षेप कर्तालाई आकर्षित गर्ने प्रयास गरिरहेका छौं, संस्थागत निक्षेप कर्ताले जुनसुकै समयमा ठुलो रकम झिक्न सक्ने भएकाले व्यक्तिगत निक्षेप कर्तालाई प्राथमिकतामा राखेका हौं’, शाहले भने । स्थानिय तहको निर्वाचनले तरलता अभावको समस्या टर्ने आंकलन गरिएपनि त्यस्तो नदेखिएको पनि उनले बताए । उता, सानिमा बैंकका प्रमुख कार्यकारी अधिकृत भुवन दाहालले पनि बजारमा तरलता अभाव कायमै रहेको बताए । ‘निक्षेप बढेको छैन्, तर कर्जाको मात्रा बढिरहेकै छ, स्थानिय तहको निर्वाचनमा बजारमा पैसा आउँछ भन्ने आंकलन थियो तर खासै सकारात्मक प्रभाव देखिएन’, दाहालले विकासन्युजसँग भने । अहिले पनि निक्षेप भन्दा कर्जाको मात्रा बढिरहेको पनि दाहालले बताए । ‘मौद्रिक नीतिको मध्यावधि समिक्षाले केहि राहत दिएको छ तर पनि असारसम्ममा सिडी रेसिया ८० प्रतिशतमा ल्याइसक्नुपर्ने भएकाले बैंकहरु हच्किएका पनि छन् ।’, दाहालले भने । दाहालका अनुसार बैशाखसम्ममा बाणिज्य बैंकहरुमा १९ खर्ब ५५ अर्ब निक्षेप संकलन भएको छ भने १६ अर्ब ६५ करोड कर्जा प्रवाह भएको छ । बैशाखसम्म आइपुग्दा बाणिज्य बैंकहरुको सिडी रेसियो ८५ दशमलब १७ प्रतिशत पुगेको छ । गत चैतमा १९ खर्ब ५० अर्ब निक्षेप थियो भने कर्जा १६ खर्ब ५६ अर्ब थियो । त्यसबेला सिडी रेसियो पनि ८४ दशमलब ९२ प्रतिशत थियो । तर नेपाल राष्ट्र बैंकका प्रवक्ता नारायण पौडेलले भने बैंकिङ प्रणालीमा ४८ अर्बको तरलता रहेको बताए ।
हुन्डाइ मोटरद्धारा लक्ष्मी इन्टर कन्टिनेन्टललाई ‘रिजनल एक्सिलेन्स अवार्ड’ प्रदान
काठमाडौं । नेपालका लागि हुन्डाइ मोटरको आधिकारिक बिक्रेता लक्ष्मी इन्टरकन्टिनेन्टलले सन् २०१६ को ‘रिजनल एक्सिलेन्स अवार्ड’ पाएको छ । हुन्डाइ मोटर कम्पनीले ५० वर्ष पार गरेको अवसर कोरियामा आयोजना गरेको ‘ग्लोबल डिष्ट्रिब्युसन कन्भेन्सन’ को अवसरमा सो अवार्ड प्रदान गरिएको हो । लक्ष्मी ग्रपका अध्यक्ष गणेशबहादुर श्रेष्ठले उक्त अवार्ड ग्रहण गरेका छन् । २७ देखि ३० बैशाखसम्म उक्त कन्भेन्सनमा १३२ मुलुकबाट २८४ सहभागी थिए । ‘फिप्टी इयर्स एन्ड मोर’ नाराका साथ आयोजना भएको सम्मेलनमा कम्पनीका तर्फबाट ५० वर्षको अनुभव र भावी योजना ‘शेयर’ गरिएको थियो । ‘सिइओ कन्फरेन्स’को अवसरमा हुन्डाइ मोटरले ‘टप टायर अटोमोटिभ ब्रान्ड’ बन्ने घोषणा गरेको छ । त्यसका लागि विश्वभरका उपभोक्तालाई ‘हाइ भ्यालु’ सेवा दिने कम्पनीले जनाएको छ ।
यति एयरलायन्स र संयुक्त राष्ट्र संघबीच साझेदारी, नेपालमा दिगो विकास हासिल गर्ने
काठमाडौं । यति एयरलायन्स र नेपालस्थित संयुक्त राष्ट्र संघको कार्यालयले नेपालमा दिगो विकासका लक्ष्य हासिल एवम् प्रवद्र्धन गर्नका लागि नयाँ साझेदारीको सुरुवात गरेका छन् । यस सम्झौता अन्तर्गत राष्ट्र संघ र यति एयरलायन्सले दिगो विकास लक्ष्य सम्बन्धी जनचेतना जगाउनका साथै आवश्यक सरोकारवालाहरुको परिचालन साथै यसको कार्यन्वयनका लागि सम्बन्धित सरोकारवालाहरु संयुक्त रुपमा पहल गर्नेछन् । साथै, यस सहकार्यले वातावरण परिवर्तन अनुकुल, गरिबीन्युनीकरण र लैङ्गिक समनता लगायतका क्षेत्रसँग सम्बिन्धत लक्ष्य हासिल गर्ने उड्डयन र पर्यटनको क्षेत्रमा नयाँ र दिगो व्यवसायिक मोडेलको खोजी अवलम्बन एवम् प्रर्वद्धन गर्नेछ । नेपाल लगायत राष्ट्रसंघका सदस्य राष्ट्रहरुले सन् २०१५ को सेप्टेम्बरमाअवलम्बनगरिएको दिगो विकास लक्ष्य र एजेण्डा २०३० ले विश्व व्यापी लक्ष्य हासिल गर्नै निजी क्षेत्रलाई एक महत्वपूर्ण साझेदारको रुपमा लिएको छ । दिगो विकास लक्ष्य कार्यन्वयन प्रक्रिया अगाडि बढाउनका लागि साधन स्रोत प्रवृत्ति र नयाँ कार्यका सुरुका लागि निजी क्षेत्रको उल्लेखनीय भूमिका रहेको छ । ललितपुरको पुल्चोक स्थित युएन हाउसमा भएको समझदारी पत्रमा युनडीपी नेपालका निर्देशक रेनो मेयर र यति एयरलायन्सका प्रमुखकार्यकारी अधिकृत उमेशचन्द्र राईले हस्ताक्षर गरेका थिए । ‘नेपालमा विश्वव्यापी लक्ष्यका लागि यति एयरलायन्सलाई पहिलो निजी क्षेत्रको साझेदारको रुपमा पाँउदा राष्ट्रसंघ खुसी र उत्साहित भएको छ । यसले नेपालको विकासमा निजी क्षेत्रको भूमिका रहेको सन्देश दिएको छ ।’ युनडीपी नेपालका निर्देशक रेनो मेयरले भने ‘दिगो विकास लक्ष्य सरकार र राष्ट्रसंघको मात्र जिम्मेवारी नभई निजी क्षेत्र र नागरिक समाजलगायत सबै नागरिकके जिम्म्ेवारी हो । यही लक्ष्य हासिल गर्ने सरोकारवालाहरुबीच सबै तहका कार्यक्रमको योजना, कार्यन्वयन र अनुगमनको चरणमा हुने सामूहिक साझेदारीले नै यी लक्ष्य प्राप्तिमा निर्भर रहन्छ ।’
सिभिल बैंककोे छैठौं वार्षिक साधारण सभा सम्पन्न, युनिक र हामा मर्चेन्टलाई प्राप्ति गर्ने
काठमाडौं । सिभिल बैंक लिमिटेडले छैठौं वार्षिक साधारण सभा सम्पन्न गरेको छ । बिहीबार सम्पन्न कम्पनीको साधारण सभाले आ.व.२०७२/७३ को नाफाबाट शेयरधनीहरुलाई २.८८% बोनस शेयर तथा कर प्रयोजनको लागि ०.१५१६% नगद लाभांश बितरण गर्ने निर्णय पारित गरेको छ । साथै, सभाले युनिक फाईनान्स लिमिटेड र हामा मर्चेन्ट फाईनान्स लिमिटेडलाई सिभिल बैंकले प्राप्ति गर्ने निणर्य गरेको छ । बोनश शेयर जारी तथा युनिक फाईनान्स लिमिटेड र हामा मर्चेन्ट फाईनान्स लिमिटेडलाई प्राप्ति गरे पश्चात कायम हुन आउने चुक्ता पूँजीको ३० प्रतिशत प्रस्ताव गरेकामा सभाले सो लाई संसोधन गरी ४० प्रतिशत हकप्रद शेयर निष्काशन गर्ने भएको छ । साथै हकप्रद शेयर निष्काशन तथा बाँडफाँड गर्नको लागि आवश्यक पर्ने सम्पूर्ण काम कारवाही गर्न संचालक समितिलाई अख्तियार प्रदान गर्ने प्रस्ताव पारित गरेको छ । सोहि सभाले संस्थापक लगानीकर्ताहरुको समुहको तर्फबाट संचालक समितिमा सृजना शाक्य तामाङ्गलाई बाँकी अवधिको लागी गरेको नियूक्तिलाई अनुमोदन गरेको छ । सभाले पारित गरेको बोनस शेयर प्राप्ति र हकप्रद शेयर पछि बैंकको चुक्ता पूँजी नेपाल राष्ट्र बैंकले तोकेको समयमा पूरा हुने बैंकले जनाएको छ । बैंकले चालु आर्थिक वर्षको चैत्र मसान्तसम्म ३३ अर्ब ८१ रुपैयाँ निक्षेप संकलन गरी ३१ अर्ब २ करोड रुपैयाँ कर्जा प्रवाह गरेको छ ।
महानगरका सडकमा एक घण्टा भन्दा बढि पार्किङ गर्नेलाई पाँच हजार जरिवाना
काठमाडौं । काठमाडौं महानगरपालिकाले न्युरोड क्षेत्रका सडकमा एक घण्टा भन्दा बढि समय सवारी साधन पार्किङ गर्न निषेध गरेको छ । महानगरपालिकाले जेठ १ गतेदेखि नै न्युरोड, पाको र सुन्धारा क्षेत्रका सडक आसपासमा एक घण्टा भन्दा बढि समय पार्किङ गर्ने सवारी साधनलाई एक हजारदेखि पाँच हजारसम्म जरिवना असुल्न सुरु गरेको हो । ‘न्युरोडका सडकमा दिनभरी पार्किङ गर्न पाइन्न, एक घण्टा भन्दा बढि समय पार्किङ गर्नेहरुको सवारी साधन महानगरपालिकाले उठाउँछ र एक हजारदेखि पाँच हजार जरिवाना असुल्छ’, काठमाडौं महागरपालिकाका प्रवक्ता ज्ञानेन्द्र कार्कीले विकासन्युजसँग भने । त्यसका लागि महानगरपालिकाले सो क्षेत्रका सडक किनारामा पार्किङ हुने सवारी साधनमा टाइम कार्ड प्रयोगमा ल्याएको छ । सवारी साधन पार्किङ गर्दा महानगरपालिकाले पार्किङमा राखिएको समय उल्लेख गरेर स्टिकर टास्छ । एक घण्टा भन्दा बढि समयसम्म उक्त सवारी साधन सोही स्थानमा भेटिए महानगरपालिकाका कर्मचारीले उठाउनेछन् । त्यसरी उठाइएका मोटरसाइकलसँग एक हजार र चार पाँग्रे मोटरसँग पाँच हजार जरिवाना असुल्न थालिएको प्रवक्ता कार्कीले बताए । महानगरपालिकाले शंकरदेव क्याम्पस आसपास, पुतलीसडक क्षेत्र र महावौद्धमा पनि एक घण्टे पार्किङ योजना कार्यान्वयन गराउने तयारी गरेको कार्कीले बताए । उपत्यकाको कोर सिटी क्षेत्रका सडकलाई व्यवस्थित गर्न पार्किङमा कडाई गरिएको कार्कीले बताए । ‘सडकलाई पार्किङ जोन बन्न दिँदैनौं, काम हुनेले एक घण्टामा सकेर आफ्नो सवारी साधन लैजान सक्छन, सडकलाई दिनभरी सवारी साधन पार्किङ गर्ने स्थल बन्न दिँदैनौं’, कार्कीले भने ।
तामाकोशी–५ जलविद्युत् आयोजनाको निर्माण शुरू, १३ अर्ब रुपैयाँ लगानीमा ८७ मेगावाट विद्युत उत्पादन हुने
काठमाडौं । दोलखा जिल्लामा ८७ मेगावाट क्षमताको तामाकोशी–५ जलविद्युत् आयोजनाको निर्माण शुरू भएको छ । नेपाल विद्युत् प्राधिकरणले तामाकोशी जलविद्युत् कम्पनी खडा गरी केही हप्ता अघिदेखि उक्त आयोजनाको निर्माण शुरू गरेको हो । माथिल्लो तामाकोशी जलविद्युत् आयोजनाको विद्युत्गृहमा प्रयोग भई टेलरेसबाट निस्केको पानीलाई लामाबगरको जगतबाट भूमिगत सुरुङमार्फत सुरीदोभान नजिक अर्को भूमिगत विद्युत्गृह निर्माण गरी विद्युत् उत्पादनका लागि आयोजना शुरू गरिएको तामाकोशी–५ का आयोजना प्रमुख नसिव प्रधानले बताए । उनका अनुसार माथिल्लो तामाकोशी जलविद्युत् आयोजनाको मुख्य सिभिल ठेकेदार सिनो हाइड्रोले नै तामाकोशी–५ को पनि भूमिगत इण्टेक बनाउने कार्य थालिसकेको छ । माथिल्लो तामाकोशी जलविद्युत् आयोजनाको टेलरेसको पानीलाई ६४ दशमलव ८९ मिटर ट्राञ्जिशन टनेल तथा भूमिगत ‘इण्टर कनेक्शन’ इण्टेक बनाई ५ दशमलव ६ मिटर व्यास भएको ८ दशमलव २ किलोमिटर लामो सुरुङ निर्माण गरी १ सय ६० मिटर हेडबाट ४ ओटा युनिटमा पानी खसाली विद्युत् उत्पादन गर्ने डिजाइन रहेको आयोजना प्रमुख प्रधानले जानकारी दिए । विदेशी कन्सल्ट्याण्ट ल्हामेरले आयोजनामा परामर्श सेवा प्रदान गरिरहेको आयोजनाले बताएको छ । आयोजनाको कुल लागत करीब १३ अर्ब रुपैयाँ रहेको बताइएको छ । स्रोतका अनुसार तामाकोशी–५ प्रतियुनिट विद्युत् उत्पादन लागतका हिसाबले सस्तो आयोजना हो । बाँध निर्माण नगरी तथा न्यून प्राकृतिक क्षति तथा आयोजनाको सम्पूर्ण संरचना भूमिगत निर्माण हुने भएकाले आयोजनाको निर्माण सस्तोमा हुने आयोजनासम्बद्ध कर्मचारीहरू बताउँछन् । आयोजनाको विस्तृत प्रतिवेदन (डीपीआर)अनुसार २५ मेगावाट क्षमताको ४ ओटा युनिट जडान गरिने योजना रहेको छ । आयोजनाको प्रवर्द्धक तामाकोशी जलविद्युत् कम्पनीको प्रबन्धपत्रअनुसार दोलखालीले पाउने १० प्रतिशत शेयरसहित विपन्नलाई २ प्रतिशत शेयर सुनिश्चित गरिएको आयोजना प्रमुख प्रधानले जानकारी दिए । आयोजनाबाट साविकको गौरीशङ्कर, लामाबगर, लादुक, बुलुङ, खारे, ओराङ र सुरी गरी ७ गाविसलाई प्रत्यक्ष असर पुग्ने बताइएको छ । उत्पादित विद्युत्लाई १३२ केभी सिङ्गल सर्किट प्रसारण लाइनमार्फत माथिल्लो तामाकोशीको सबस्टेशनमा जोडिनेछ ।
पुननिर्माणको बजेट १ खर्ब ४६ अर्ब
काठमाडौं । आगामी आर्थिक बर्षमा भूकम्पपछिको पुननिर्माणका लागि एक खर्ब ४६ अर्बको बजेट विनियोजन हुने भएको छ । राष्ट्रिय योजना आयोगले उपलब्ध गराएको एक खर्ब ४६ अर्बको सिलिङमा राष्ट्रिय पुननिर्माण प्राधिकरणले पुननिर्माणको कार्यक्रम धमाधम बनाईरहेको छ । ‘प्राधिकरणले एक खर्ब ४६ अर्बको बजेट सिलिङ पाएको छ, आजै कार्यक्रम बनाएर पेश गर्दछौं’, प्राधिकरणका सहायक प्रवक्ता डा. भिष्म कुमार भुषालले विकासन्युजसँग भने । प्राधिकरणले चालु तथा पुँजीगत खर्चका लागि सो बजेट प्राप्त गरेको हो । चालु आर्थिक बर्षमा भूकम्पपछिको पुननिर्माणका लागि एक खर्ब ४० अर्ब ६६ करोड रुपैंयाँ विनियोजन गरिएको थियो । गत आवमा भने पुननिर्माणका लागि ८४ अर्ब रकम विनियोजन गरिएको थियो । निजी आवास निर्माण, पुरातात्विक सम्पदाको पुननिर्माण तथा विद्यालय, स्वास्थ्य संस्था लगायतका पुर्वाधार निर्माणलाई प्राथमिकतामा राखेर बजेट निर्माण भैरहेको सहायक प्रवक्ता डा. भुषालले बताए । ‘निजी आवास, पुरातात्विक सम्पदा, विद्यालय तथा स्वास्थ्य संस्थाहरुलाई उच्च प्राथमिकतामा राखेर बजेट निर्माण भएको छ, यी क्षेत्र भूकम्प पछिको पुननिर्माणका लागि उच्च प्राथमिकतामा राखिँदै आएका छन’, डा. भुषालले भने ।
सगरमाथा क्षेत्रबाट एक सिजनमै २ अर्ब भन्दा बढीको कारोबार, २ हजार जना पुग्दैछन सर्वोच्च शिखरमा
काठमाडौं । सगरमाथा क्षेत्रबाट हरेक वर्षको बसन्त ऋतुमा मात्रै २ अर्ब भन्दा बढीको आर्थिक कारोबार हुने गरेको छ । वर्षेनी पर्यटकीय पर्यटनमा जाने र आरोहण गर्ने तथा आर्थिक गतिविधि बढ्ने क्रम बढिरहेको संस्कृति, पर्यटन तथा नागरिक उड्डयन मन्त्रालय अन्तर्गतको पर्यटन विभागले जानकारी दिएको छ । विभागका अनुसार वार्षिक ३०/३५ करोड रुपैयाँ त सगरमाथा चुम्ने उद्देश्यले गएका आरोहीले तिरेको रोयल्टीबाटै संकलन हुने गरेको छ । शेर्पा भरिया, गाइड, सरकारी सम्पर्क अधिकृत, आरोहण दलले खानपान, आवश्यक सामान, टोलीसँगको सञ्चार, उद्दारसहितका विषयमा हुने खर्चको कारण हरेक सिजनमै २ अर्ब भन्दा बढीको कारोबार हुने गरेको पर्यटन मन्त्रालयबाट सम्पर्क अधिकृतको रुपमा खटिएका ज्ञानेन्द्र श्रेष्ठले बताए । उनका अनुसार कतिपर्य विदेशी पर्यटकले त आरोहण पछि गर्ने आरामको नाममा गर्ने खर्च, आरोहणप्रतिको सन्तोषका कारण गर्ने हेलिकोप्टर चार्टर गर्ने, स्तरीय होटलमा बस्ने, सहयोगी र गाइडलाई दिने खर्चको सीमा १ लाख डलरसम्म हुने गरेको छ । सामान्यतया एउटा विदेशीले कम्तिमा ३५ हजार देखि १ लाख डलरसम्म खर्च गरेर सरमाथाको आरोहणमा जाने गरेका छन् । एकजना विदेशी आउँदा ९ जनाले रोजगारी पाउँछन भन्ने सरकारी तथ्यांकलाई आधार मान्ने हो भने पनि पर्यटक र त्यससँग जोडिएका अन्य निकायले गर्ने खर्चको आधारमा यो तथ्य निकालिएको हो । यसर्थ, समग्र अर्थतन्त्रकै कारोबारमा यो रकम भने हरेक वर्ष २ अर्ब भन्दा बढी हुने दाबी श्रेष्ठको छ । नेपालमा हुने हिमाल आरोहण तथा पर्वतीय गतिविधि साहसिक पर्यटनको लागि रुचाइएको छ । नेपालमा भएको यो साहसिक गतिविधि विश्वमै कहलिएकोले पनि यहाँ हुने खर्च भन्दापनि विदेशीको ड्रीम प्रोजेक्ट पूरा हुनु नै सबैभन्दा ठूलो उपलब्धी हुने पनि श्रेष्ठको बुझाई छ । पर्वतारोहणका क्षेत्रमामा क्रियाशील विभिन्न एजेन्सी तथा सरकारी अधिकारीका अनुसार नेपालले हिमाल आरोहण तथा यससँग सम्बन्धित आर्थिक क्रियाकलापबाट हुने आम्दानी पनि उल्लेख्य हुन्छ । सगरमाथा र आसपासका क्षेत्रका होटलले गर्ने आम्दानी तथा विभिन्न वायुसेवा कम्पनीले गर्ने कारोबारको एकीन तथ्यांक निकाल्न सकिएको अबस्थामा यो क्षेत्रले वास्तविक र अझै ठूलो रकमको कारोबार देखिने पनि पर्यटन व्यवसायीको भनाइ छ । व्यवसायीका अनुसार यो वर्षको बसन्त ऋतुमा मात्रै हुने यो दुई अर्ब भन्दा बढीको कारोबार हरेक वर्ष अप्रीलदेखि मे महिनाभरमा हुने पर्यटकीय गतिविधिकै निरन्तरता हो । नेपालमा सगरमाथा आरोहणको निम्ति अप्रिल र मे हिमाल आरोहणका लागि मुख्य सिजन हो । यो बेला पर्यटक आगमन पनि अन्यसमयको तुलनामा २५ देखि ३० प्रतिशतसम्मले बृद्धि हुने गरेको नेपाल पर्यटन बोर्डको भनाइ छ । पछिल्लो समय हिमालको आरोहणमा भारतीय तथा चिनियाँ पर्यटकको पनि निकै उत्साह बढ्न थालेको छ । केही वर्ष अगाडिसम्म अमेरिका, युरोप तथा मध्यएसियाका पर्यटक बढी आउने गरेका थिए । अहिले यी सँगै छिमेकी मुलुक र अन्य पर्यटक पनि आउन थालेका छन् । एजेन्सी छनोटदेखि गार्भेज डिपोजिट फिर्ता नभएसम्म खर्चेखर्च हिमाल आरोहणमा जाने पर्यटकले एजेन्सी छनोट गर्नेदेखि आरोहणपश्चात लिइने गार्भेज डिपोट फिर्तासम्म खर्चेखर्च हुने गरेको छ । तथा पर्यटन विभागबाट हिमाल आरोहणमा जाँदा लिनुपर्ने आरोहण अनुमतिमा प्रतिव्यक्ति ११ हजार डलर खर्चर्नुपर्छ । यो रकम अघिल्लो वर्षसम्म प्रतिटोली २५ हजार डलर थियो । त्यसपछि एजेन्जीले लिने एकमुष्ट रकम अर्को सबैभन्दा ठूलो खर्च हो । आरोहणमा जाँदा आवश्यक सामग्र, शेर्पा, गाइड, भरीया, सहयोगी, सरकारी अधिकारीसम्मलाई खर्च गर्दै आरोहणमा जानुपर्छ । आरोहणमा पाँच सय, लाभाविन्त २ हजार सगरमाथा आरोहणमा यो वर्ष करिब ५ सय जना हुने पर्यटन मन्त्रालयको अनुमान छ । आरोहणका लागि पर्यटन विभागबाट अनुमति लिएर गएका टोलीबाहेक थप १५ सय जना पनि सगरमाथा आधारशिविरमा पुगिसकेका छन् । यहाँबाट माथि जाने क्रममा भने भरीया, सरर्दार, शेर्पा, गाइई, सम्पर्क अधिकृत, उद्दार टोलीसहितको टीम हुने भएकोले पनि ५ सयजनाले गर्ने आरोहणमा २ हजार जनासम्म पुग्ने गरेका छन् । पर्यटन विभागका अनुसार अग्ला हिमाल आरोहण गर्दा टेन्ट, डोरी, अक्सिजन सिलिन्डर, खानेकुरा, औषधी तथा बन्दोबस्तीका अन्य सामान पुर्याउने क्रममा नै ठूलो जनशक्ति लाग्नुपर्छ । विभागले यो जनशक्ति सगरमाथाको उचाइमा पुगेको अवस्थामा उचाई कामदारका रुपमा प्रमाणपत्र पनि दिने गरेको छ । सरकारले हिमाललाई व्यवसायीकरण गरी आर्थिक लाभ उठाउने उद्देश्यले हाल चार सय वटा हिमाल आरोहणका लागि खुला गरेको छ । नेपलमा आरोहणयोग्य नै करिब १३ सय हिमाल रहेको भएपनि बाँकी हिमाल भने खुला भएको छैन ।
