बजार पुँजीकरणले नाघ्यो ३४ खर्ब ६ अर्ब, सात महिनामै ९० प्रतिशतले बढ्यो
काठमाडौं । चालु आर्थिक वर्षको सात महिनामा बजार पुँजीकरण ९० प्रतिशतले बढेको छ । गत असार मसान्तको तुलनामा माघ मसान्तसम्मको बजार पुँजीकरण ८९.९९ प्रतिशतले बढेर ३४ खर्ब ६ अर्ब १७ करोड रुपैयाँ पुगेको छ । जबकी २०७७ असार मसान्तमा बजार पुँजीकरण १७ खर्ब ९२ अर्ब ७६ करोड रुपैयाँ रहेको थियो । त्यस्तै, एक वर्षको अवधिमा नेप्से परिसूचक ८७.७३ प्रतिशतले बढेको छ । २०७६ माघ मसान्तमा १३४६ रहेको नेप्से परिसूचक २०७७ माघ मसान्तमा बढेर २५२६.९ बिन्दुमा पुगेको छ । २०७७ माघमा नेप्सेमा सूचीकृत कम्पनीहरूको संख्या २१६ रहेको छ । सूचीकृत कम्पनीमध्ये १४५ बैंक तथा वित्तीय संस्था र बीमा कम्पनी रहेका छन् भने ३७ जलविद्युत् कम्पनी, १९ उत्पादन तथा प्रशोधन उद्योग, ४/४ होटल तथा व्यापारिक संस्था र ७ अन्य समूहका रहेका छन् । २०७७ असारमा सूचीकृत कम्पनीहरूको संख्या २१२ रहेको थियो । सूचीकृत कम्पनीमध्ये बैंक तथा वित्तीय संस्था र बीमा कम्पनीको धितोपत्र बजार पुँंजीकरणको हिस्सा ७२.१ प्रतिशत रहेको छ । त्यसैगरी जलविद्युत कम्पनीको हिस्सा ६.२ प्रतिशत, उत्पादन तथा प्रशोधन उद्योगको हिस्सा ४.१ प्रतिशत, होटेलको हिस्सा ०.८ प्रतिशत, व्यापारिक संस्थाको हिस्सा ०.५ प्रतिशत तथा अन्य समूहका कम्पनीहरुको हिस्सा १६.२ प्रतिशत रहेको छ ।
नेप्सेमा २ खर्ब रुपैयाँ बढीको धितोपत्र सूचीकृत, आईपीओ मात्रै ३५ अर्ब ३७ करोड
काठमाडाैं । नेपाल स्टक एक्स्चेञ्ज(नेप्से)मा थप २ खर्ब ९ अर्ब ४४ करोड रुपैयाँ बराबरको धितोपत्र सूचीकृत भएका छन् । नेपाल राष्ट्र बैंकका अनुसार चालु आर्थिक वर्ष २०७७/७८ को सात महिना अर्थात माघ मसान्तसम्ममा साे परिणामकाे धितोपत्र नेप्सेमा सूचीकृत भएकाे हाे । जसमध्ये १ खर्ब ५० अर्ब रूपैयाँ बराबरको विकास ऋणपत्र, ३५ अर्ब ३७ करोड रुपैयाँ बराबरको साधारण सेयर(आईपीओ), १३ अर्ब ७१ करोड बराबरको बोनस सेयर, ७ अर्ब रुपैयाँ बराबरको डिबेन्चर २ अर्ब ७१ करोड रुपैयाँ बराबरको हकप्रद सेयर र ६५ करोड रुपैयाँ बराबरको म्युचुअल फण्ड नेप्सेमा सूचीकृत भएका हुन् । समीक्षा अवधिमा नेपाल धितोपत्र बोर्डले २५ अर्ब ३ करोड रूपैयाँ बराबरकाे धितोपत्र निष्काशन गर्न अनुमति दिएको छ । जसमध्ये १० अर्ब ९३ करोड रूपैयाँ बराबरको साधारण सेयर, १० अर्ब ६४ करोड रूपैयाँ बराबरको डिबेन्चर, १ अर्ब ९६ करोड रूपैयाँ बराबरको हकप्रद सेयर र १ अर्ब ५० करोड रूपैयाँ बराबरको म्युचुअल फण्ड रहेका छन् ।
दुई दिनमै ५० प्रतिशत बढी बिक्री भयो सनराइज ब्लूचीप फण्डको इकाई
काठमाडौं । सनराइज क्यापिटलले बिक्रीमा ल्याएको सनराइज ब्लूचीप फण्डको दोस्रो दिनसम्म इकाई खरिदको लागि कुल इकाईको ५०.६ प्रतिशत इकाई बिक्री भइसकेको छ । क्यापिटलका अनुसार सोमबार साँझसम्ममा २२ हजार जना आवेदकहरुबाट कुल इकाईको ५०.६ प्रतिशत इकाई बिक्री भइसकेको बिक्री प्रबन्धक सनराइज क्यापिटलले जानकारी दिएको छ । क्यापिटलले चैत १ गतेदेखि प्रतिइकाई १० रुपैयाँ अंकित दरमा १ अर्ब रुपैयाँ बराबरको १० करोड इकाई बिक्रीमा ल्याएको हो । फण्डले १५ प्रतिशत इकाई कोष प्रवर्धक सन्राइज बैंकलाई सुरक्षित गरी बाँकी रहेको इकाई सर्वसाधारणहरुलाई बिक्री गर्न लागेको हो । उक्त फण्डमा न्यूनतम १०० देखि १ करोड इकाईसम्म आवेदन दिन पाउने व्यवस्था रहेको छ । इकाई खरीदका लागि आवेदन दिन छिटोमा चैत ४ गते अर्थात अब दुई दिन बाँकी रहेको क्यापिटलले जनाएको छ । यस योजनाको प्रक्षेपित वार्षिक प्रतिफल २२.३८ प्रतिशत प्रक्षेपण समेत गरेकोले ढुक्क भएर लगानी गर्न सकिने क्यापिटलले जनाएकाे छ । सम्बन्धित समाचार ‘सनराइज ब्लूचीप फण्ड’मा लगानी गर्नेले वार्षिक २२% प्रतिफल पाउने
