कार आयात ६ प्रतिशतले बढ्यो, स्टकका कारण ईभी आयातमा मन्दी
काठमाडौं । चालु आर्थिक वर्ष २०८२/८३ को पहिलो ९ महिना अर्थात् साउनदेखि चैतसम्ममा नेपालको अटो बजार मिश्रित देखिएको छ । भन्सार विभागले सार्वजनिक गरेको पछिल्लो तथ्यांक अनुसार ९ महिनाको अवधिमा कुल ११ हजार ३१३ युनिट कार, जीप र भ्यान आयात भएका छन् । यो संख्या गत आर्थिक वर्षको सोही अवधिको तुलनामा करिब ६ प्रतिशत अर्थात् ६०४ युनिटले बढी हो । गत वर्ष चैत मसान्तसम्म १० हजार ७०९ युनिट सवारी साधन भित्रिएका थिए । आयात बढेसँगै राज्यको ढुकुटीमा पनि उल्लेख्य योगदान पुगेको छ । समिक्षा अवधिमा कुल २० अर्ब ६७ करोड रुपैयाँ बराबरका सवारी साधन आयात हुँदा सरकारले १९ अर्ब १८ करोड रुपैयाँ राजस्व संकलन गरेको छ । कार आयातमा वृद्धि देखिए पनि पछिल्लो समय लोकप्रियता कमाइरहेको विद्युतीय कार (ईभी) को आयातमा भने गिरावट आएको छ । भन्सार विभागको तथ्यांक अनुसार चालु आवको ९ महिनामा ईभी आयात करिब १० प्रतिशतले घटेको छ । गत वर्ष यसै अवधिमा ७ हजार ९६७ युनिट ईभी भित्रिएकोमा यस वर्ष त्यो संख्या घटेर ७ हजार १७३ युनिटमा खुम्चिएको छ । चालु वर्ष भित्रिएका १६ अर्ब ६६ करोड मूल्य बराबरका ईभीबाट सरकारले १० अर्ब ११ करोड रुपैयाँ राजस्व प्राप्त गरेको छ । ईभी आयात घट्नुको मुख्य कारण बजेट अगाडि कर बढ्ने डरले व्यवसायीहरूले पहिले नै करिब ६ हजार युनिट स्टक राख्नु र ती कारहरू अझै बिक्री भइनसक्नुलाई मानिएको छ । साथै, यस वर्ष पेट्रोल कारको आयातमा देखिएको वृद्धले पनि ईभीको बजार हिस्सामा केही प्रभाव पारेको छ । यस अवधिमा भित्रिएका विद्युतीय सवारी साधनमध्ये मध्यम क्षमताका कारको बढी देखिएका छन् । जसमा ५० किलोवाटसम्मका २ हजार ५०६ युनिट, ५१ देखि १०० किलोवाटसम्मका ४ हजार ८३ युनिट, १०१ देखि २०० किलोवाटसम्मका ५७४ युनिट, २०१ किलोवाटमथिका ८ युनिट तथा अनएसेम्बल गरिएका ५० किलोवाटसम्मका २ युनिट रहेका छन् । यसरी हेर्दा नेपाली बजारमा अझै पनि ५१ देखि १०० किलोवाट क्षमताका विद्युतीय कारहरू उपभोक्ताको रोजाइमा बढी परेको देखिन्छ ।
सिंहदरबारबाटै न्युयोर्कको मन्त्रीस्तरीय सत्रमा अर्थमन्त्रीको सम्बोधन: हरित अर्थतन्त्र र ऋण व्यवस्थापनमा जोड
काठमाडौं । संयुक्त राष्ट्र संघको आर्थिक तथा सामाजिक परिषद् अन्तर्गत न्युयोर्कस्थित राष्ट्र संघीय मुख्यालयमा आयोजित विकासका लागि वित्त सम्बन्धी मन्त्रीस्तरीय सत्रलाई अर्थमन्त्री डा. स्वर्णिम वाग्लेले सम्बोधन गरेका छन् । काठमाडौंस्थित सिंहदरबारबाट भर्चुअल माध्यममार्फत प्रमुख वक्ताका रूपमा सहभागी हुँदै अर्थमन्त्री वाग्लेले अल्पविकसित तथा विकासोन्मुख राष्ट्रहरूले सामना गरिरहेका वित्तीय चुनौती र जलवायु वित्तको न्यायोचित वितरणमा जोड दिए । मन्तव्यका क्रममा उले दिगो विकास लक्ष्य हासिल गर्नका लागि विश्वव्यापी वित्तीय संरचनामा सुधार आवश्यक रहेको औंल्याउँदै नेपाल जस्ता मुलुकका लागि सहुलियतपूर्ण ऋण र वैदेशिक लगानीको महत्त्वबारे विश्व समुदायको ध्यानाकर्षण गराए । विशेषगरी महामारी पछिको आर्थिक पुनरुत्थान र बढ्दो ऋणको भारलाई सम्बोधन गर्न अन्तर्राष्ट्रिय वित्तीय संस्थाहरूले थप लचिलो र सहयोगी भूमिका निर्वाह गर्नुपर्नेमा उनको विशेष जोड थियो । मन्त्री वाग्लेले नेपालले अवलम्बन गरेका आर्थिक सुधारका प्रयासहरू साझा गर्दै हरित अर्थतन्त्र र समावेशी विकासका लागि अन्तर्राष्ट्रिय साझेदारी अपरिहार्य रहेको उल्लेख गरे ।
विदेशको कमाइ अब सोझै खल्तीमा, स्ट्राइपसँगको साझेदारीले फ्रिल्यान्सरलाई ढुक्क
काठमाडौं । नेपालमा बसेर वैदेशिक सेवामा संलग्न फ्रिल्यान्सर र डिजिटल उद्यमीहरूका लागि भुक्तानी संकलनको पुरानो झन्झट अन्त्य भएको छ । खल्ती बाइ आइएमईले आइएमई लिमिटेड र विश्वप्रसिद्ध भुक्तानी गेटवे स्ट्राइपसँग साझेदारी गर्दै अन्तर्राष्ट्रिय भुक्तानी सोझै मोबाइल वालेटमा प्राप्त गर्न सकिने नयाँ व्यवस्था सुरु गरेको छ । यस रणनीतिक साझेदारीसँगै अब नेपाली प्रयोगकर्ताले विदेशबाट हुने भुक्तानी सुरक्षित, भरपर्दो र रियल-टाइम (तत्काल) प्राप्त गर्न सक्नेछन् । यसअघि विदेशबाट पैसा आउन हप्तौं कुर्नुपर्ने समस्यालाई यसले पूर्ण रूपमा समाधान गरेको कम्पनीको दाबी छ । भुक्तानी प्राप्त गर्न प्रयोगकर्ताले खल्ती एपभित्रै गएर भुक्तानी अनुरोध पठाउनु पर्नेछ । भुक्तानी गर्ने विदेशी कम्पनी वा व्यक्तिले स्ट्राइप गेटवेमार्फत एसीएच र सेपा भिजा, मास्टरकार्ड एप्पल पे र गुगल पे तथा ई-बैंकिङ माध्यमबाट रकम पठाउन सक्नेछन् । यसरी पठाइएको रकम प्रयोगकर्ताको खल्ती वालेटमा तुरुन्तै जम्मा हुनेछ । नेपालको डिजिटल जनशक्तिले लामो समयदेखि अन्तर्राष्ट्रिय भुक्तानी संकलनमा भोग्दै आएको अवरोध हटाउन यो पहलले भूमिका खेल्ने अपेक्षा गरिएको छ । खल्ती बाइ आइएमई लिमिटेडका प्रमुख कार्यकारी अधिकृत प्रवीण रेग्मीले यसलाई नेपालको फिनटेक क्षेत्रको महत्त्वपूर्ण माइलस्टोनको रूपमा उल्लेख गरे । 'यो साझेदारीले नेपाली डिजिटल ट्यालेन्टहरूका लागि विश्वव्यापी रूपमा कमाउने र सो रकम तत्काल प्राप्त गर्ने ढोका खोलेको छ', रेग्मीले भने, 'स्वदेशी डिजिटल वालेटले परिष्कृत र एकीकृत अन्तरदेशीय कारोबारमा सहजता प्रदान गर्दा नेपालको डिजिटल अर्थतन्त्र विस्तारमा ठूलो योगदान पुग्नेछ ।' यो भुक्तानी संरचना नियामकको मापदण्ड बमोजिम सुरक्षित र भरपर्दो बनाइएको कम्पनीले जनाएको छ ।
