बालेन बाबु भन्दै ओलीले दिए बधाई, भने- ५ वर्षे कार्यकाल निर्विघ्न र सफल रहोस्
काठमाडौं । झापा प्रतिनिधिसभा सदस्य निर्वाचन क्षेत्र नं. ५ मा राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहसँग पराजित भएपछि नेकपा (एमाले) का अध्यक्ष केपी शर्मा ओलीले उनलाई बधाई दिएका छन् । ओलीले बालेन शाहलाई मादल उपहार दिएको तस्बिर सामाजिक सञ्जाल फेसबुकमा सार्वजनिक गर्दै उनको कार्यकाल सफल रहोस् भनी शुभकामना व्यक्त गरेका छन् । उनले लेखेका छन्, 'बालेन बाबु, विजयका लागि तपाईंलाई बधाई । तपाईंको पाँच वर्षे कार्यकाल निर्विघ्न र सफल रहोस्। हार्दिक शुभकामना ।'
देशभरका १६५ वटै क्षेत्रमा मतगणना जारी, अहिलेसम्म ५८ क्षेत्रको परिणाम सार्वजनिक
काठमाडौं । प्रतिनिधिसभा सदस्य निर्वाचनअन्तर्गत देशका सबै १६५ निर्वाचन क्षेत्रमा प्रत्यक्षतर्फको मतगणना सुरु भएको छ । निर्वाचन आयोगका अनुसार उच्च हिमाली क्षेत्रका मतपेटिका ढुवानीमा मौसमले अवरोध गरेपछि केही स्थानमा मतगणना सुरु गर्न ढिलाइ भएको थियो । पछिल्लोपटक हेलिकप्टरमार्फत ढुवानी गरिएका सङ्खुवासभा र गोरखाका मतपेटिकाको गणना शनिबार बिहानदेखि सुरु भइसकेको छ । त्यस्तै मुगुमा मानिसले बोकेर मतपेटिका ल्याइएपछि दिउँसो ४ बजेदेखि मतगणना सुरु भएको आयोगले जनाएको छ । निर्वाचन आयोगका सहायक प्रवक्ता कुलबहादुर जिसीका अनुसार हालसम्म ५८ निर्वाचन क्षेत्रको मतगणना सम्पन्न भइसकेको छ र सम्बन्धित निर्वाचन अधिकृतको कार्यालयले त्यसको विवरण आयोगको प्रणालीमा प्रविष्टि गरिसकेको छ । प्राविधिक कारणले केही स्थानबाट तथ्यांक प्रविष्टिमा सामान्य ढिलाइ हुने गरेको उनले बताए । प्रत्यक्षतर्फ मतगणना सम्पन्न भएका क्षेत्रमा समानुपातिकतर्फको मतगणना पनि सुरु गरिएको छ । आयोगका अनुसार समानुपातिकतर्फ हालसम्म करिब ३ लाख ७० हजार मत गणना भइसकेको छ र त्यसको विवरण प्रणालीमा अद्यावधिक भइरहेको छ । आयोगले प्रत्यक्षतर्फ आइतबार बेलुकीसम्म १६५ वटै निर्वाचन क्षेत्रको अन्तिम मतपरिणाम सार्वजनिक गर्ने लक्ष्यसहित मतगणना तीव्र रूपमा जारी रहेको जनाएको छ ।
बालेनको नेतृत्वमा नयाँ सरकार
काठमाडौं । प्रतिनिधिसभाको निर्वाचनमा राष्ट्रिय स्वतन्त्र पार्टीले करिब दुई तिहाई नजिकको मत पाउने निश्चित भएको छ । निर्वाचन आयोगले शनिबार साँझसम्म सार्वजनिक गरेको मतपरिणाम अनुसार राष्ट्रिय स्वतन्त्र पार्टी प्रत्यक्षतर्फ ७१ प्रतिशत सिट जित्ने भएको छ । प्रत्यक्षतर्फ १६५ सांसद पदका लागि भएको निर्वाचनमा राष्ट्रिय स्वतन्त्र पार्टीले १२१ पदमा निर्वाचन क्षेत्रमा जित हासिल गर्ने देखिएको छ । पूराना र ठूला पार्टीहरु मध्ये नेपाली कांग्रेसले करिव २१ निर्वाचन क्षेत्रमा, नेकपा एमाले ११ निर्वाचन क्षेत्रमा, नेपाली कम्युनिष्ट पार्टीले ७ निर्वाचन क्षेत्रमा जित्ने सम्भावना छ । त्यस्तै पूर्व मेयर हर्क साङपाङले नेतृत्व गरेको श्रम संस्कृति पार्टीले ३ निर्वाचन क्षेत्रमा जित्ने सम्भावना देखिन्छ । राष्ट्रिय प्रजातन्त्र पाटीका ज्ञानेन्द्रबहादुर शाही र स्वतन्त्र उम्मेदवार एव पूर्व मन्त्री महाविर पुनले १÷१ क्षेत्रमा जीत हासिल गरेका छन् । समानुपातिक तर्फ पनि राष्ट्रिय स्वतन्त्र पार्टीले झण्डौ ५५ प्रतिशत मत पाउने देखिएको छ । प्रत्यक्ष र समानुपातिक गरी यस पार्टीले १७० भन्दा बढी सीटमा विजय हासिल गर्ने देखिएको छ । यो मत भनेको स्पष्ट बहुमतका लागि आवश्यक १३८ भन्दा धेरै बढी र दुई तिहाइ अर्थात १८४ भन्दा केही कम सिट हुनेछ । निर्वाचनपछि प्रधानमन्त्री, राष्ट्रपति, उपराष्ट्रपति, सभामुख, उपसभामुख सबै पदमा राष्ट्रिय स्वातन्त्र पार्टीको प्रतिनिधि हुने निश्चित रहेको छ । तर, राष्ट्रिय सभामा यस पार्टीको उपस्थिति शून्य भएका विधयक पारित गराउने सवालमा पुराना प्रमुख तीन दलसँगको साझेदारी अनिवार्य देखिएको छ । बालेन क्रान्ति नेपाली राजनीतिमा नयाँ तरिकाले उदाएका बालेन्द्र शाह (बालेन)ले अत्यधिक जनविश्वास पाएका छन् । निर्वाचनको पूर्व सन्ध्यामा राष्ट्रिय स्वतन्त्र पार्टीले बालेनलाई तत्काल वरिष्ठ नेता स्वीकार गर्ने र उनलाई भावी प्रधानमन्त्री सम्झौता गरेको थियो । बालेनलाई भावी प्रधानमन्त्री बनाउने भएपछि राष्ट्रिय स्वतन्त्र पार्टी र यसको निर्वाचन चिन्ह घण्टीको समर्थनमा ब्यापक जनसमर्थन देखिएको थियो । ‘अबकी बार, बालेन सरकार’को नारा देशभर गुञ्जिएको थियो । राजनीतिक र सामाजिक विषयमा र्याप गीतका माध्यमबाट मनोरञ्जन र व्याङ्य गर्दै अगाडि बढेको बालेनले २०७० देखि २०७९ सम्म इन्जिनियरिङ पेशा अपनाएका थिए । २०७९ सालमा भएको स्थानीयत तहको निर्वाचनमा स्वतन्त्र रुपमा काठमाडौं महानगरपालिकाका मेयरमा निर्वाचित भएपछि उनको चर्चा देशविदेशमा हुन थालेको थियो । मेयरको रुपमा ४ वर्ष काम गर्दै गर्दा समग्रमा बजेट कार्यान्वनमा कमजोर देखिए पनि बालेनले महानगरको सरसफाइ, फुटपाथ व्यवस्थापन, सार्वजनिक स्कूलहरुमा सुधार, स्वास्थ्य क्षेत्रमा गरेका सुधारको धेरै प्रशंशा भएको थियो । उनको नेतृत्वमा अनधिकृत रुपमा मिचिएका हजारौं रोपनी सार्वजनिक जग्गा महानगर पालिकाको स्वामित्वमा ल्याउने, पार्किङ व्यवास्थपन गर्ने, सार्वजनिक शौचालयको व्यवस्थापन गर्ने कार्यको पनि धेरैले तारिफ गरेको थिए । सबैभन्दा महत्वपूर्ण विषय बालेनले भ्रष्टाचार गर्दैनन् भन्ने सन्देश उनी मेयर भएको समयमा नेपालीमाझ सञ्चार भएको छ । थोरै बोल्ने, संस्थागत विकासमा जोड दिने, आलोचनाभन्दा काम गरेर देखाउने मेयरको रुपमा पनि उनले अलगै पहिचाहन बनाएको थिए । भाषण धेरै गर्ने राजनीतिक संस्कारबाट वाक्क भएको नेपाली समाझमा उनी कम बोल्ने नेताका रुपमा स्थापित भएका छन् । चुनावी अभियानका क्रममा बालेन देशका झण्डै ५० जिल्ला भ्रमण गरे पनि उनले ६ स्थानमा मात्र भाषण गरे । भाषणमा उनले राष्ट्रिय अन्तराष्ट्रिय मुद्दा उठाएनन, मात्र स्थानीय मुद्दामा उनी बोलेका थिए । विपक्षी दल र तिनका नेतालाई गाली गर्ने राजनीतिक संस्कारलाई उनले तिलाञ्जली नै दिएका छन् । मेयर भएदेखि नै सञ्चार माध्यममा अन्तर्वार्ता नदिएका बालेनले निर्वाचनको समयमा समेत सञ्चार माध्यमहरुमा अन्तरवार्ता समेत दिएनन् । तर, बालेन क्रेज यति धेरै रह्यो कि निर्वाचनभर नेपाली र विदेशी सञ्चार माध्यमहरुले सबैभन्दा बढी स्थान उनै बालेनलाई दिएका थिए । विश्व प्रशिद्ध समाचार एजेन्सी रोयटर्स, न्यूयोक टाइम्स जस्ता सञ्चार माध्यममा बालेनको स्टोरीहरु प्रटक पटक प्रकाशित भए । सामाजिक सञ्जालमा बालेन सबैभन्दा लोकप्रिय नेताको रुपमा स्थापित छन् । प्रधानमन्त्री केपी शर्मा ओली र उनको सरकारले असहयोग गरेपछि तत्कालिन मेयर बालेनले तत्कालीन प्रधानमन्त्री ओलीलाई सामाजिक सञ्जालबाट पटक–पटक चुनौति दिँदै आएका थिए । अन्ततः बालेन झापाको ५ नम्बर निर्वाचन क्षेत्रमा पूर्व प्रधानमन्त्री तथा नेकपा एमालेका नेता केपी ओलीसँग निर्वाचनमा भिड्न नै पुगे । र, ओलीको भन्दा झण्डै चार गुणा बढी मत ल्याएर विजय हासिल गरे । बालेनले कुल ६८ हजार ३४८ मत पाउँदा ओलीले १८ हजार ७३४ मत मात्रै पाए । निर्वाचनअघि नै बालेनको राजनीतिक दबाब यति बलियो थियो कि त्यसको सामना गर्न केपी शर्मा ओली आफ्नो निर्वाचन क्षेत्रमा मात्र सीमित भएका थिए । घण्टीको दबाबले प्रमुख दलका नेताहरु सबै आफूलाई कसरी सुरक्षित गर्ने भनेर पुरै निर्वाचन क्षेत्रमा सीमित भएका थिए । बालेनकै क्रेजले रास्वपाले देशभर लहर ल्यायो । अब रास्वपाले नयाँ सरकार गठन गर्नेछ । जसको प्रधानमन्त्री बन्नेछन् बालेन । अब बन्ने सरकारको बालेनले कसरी गर्नेछन् त्यो भने हेर्न बाँकी छ ।
रौतहट–४ मा रास्वपाका पौडेल विजयी
काठमाडौं । रौतहट प्रतिनिधिसभा सदस्य निर्वाचन क्षेत्र नं ४ मा राष्ट्रिय स्वतन्त्र पार्टी (रास्वपा) का उम्मेदवार गणेश पौडेल विजयी भएका छन् । निर्वाचन अधिकृत उद्धव ढोडारीका अनुसार अन्तिम मतपरिणामअनुसार पौडेलले ३६ हजार ८७६ मतसहित विजयी भएका हुन् । उनका निकटतम प्रतिस्पर्धी नेपाली कांग्रेसका देवप्रसाद तिमल्सेनाले १५ हजार ८६५ मत प्राप्त गरे । यस्तै, नेपाली कम्युनिष्ट पार्टीका रामकुमार भट्टराईले ९ हजार ७७८, नेकपा एमालेका रामजी साहले ३ हजार ४७८ र जनता समाजवादी पार्टी नेपालका राजकुमार दासले १ हजार ६२ मत प्राप्त गरे । यस क्षेत्रमा एक लाख १० हजार ३१४ मतदाता रहेकामा ७३ हजार ३९७ मत खसेका थिए ।
जिम्मेवारी ठूलो छ, शिर निहुराउन नपर्ने गरी काम गर्नेछु- डा. स्वर्णिम वाग्ले
काठमाडौं । राष्ट्रिय स्वतन्त्र पार्टी (रास्वपा) का उपसभापति तथा तनहुँ क्षेत्र नम्बर १ बाट निर्वाचित प्रतिनिधिसभा सदस्य डा. स्वर्णिम वाग्लेले जनताबाट प्राप्त जनमतले मुलुकलाई नयाँ दिशातर्फ लैजाने बताएका छन् । निर्वाचित भएपछि कार्यकर्तामाझ संक्षिप्त सम्बोधन गर्दै उनले मतदाताले दिएको विश्वासलाई शिरोधार्य गर्दै अगाडि बढ्ने र त्यो भरोसा कुनै हालतमा टुट्न नदिने प्रतिबद्धता व्यक्त गरे। ‘जिम्मेवारी ठूलो छ, ’ उनले भने, ‘तनहुँ त आफ्नै ठाउँ भइहाल्यो । दुई पटक यहाँबाट विजयी गराइदिनुभयो। यसको महत्त्व, यहाँका जनताको आशा र भरोसालाई म कहिल्यै लत्याउने छैन । ’ डा. वाग्लेले तनहुँका जनताले शिर निहुराउन नपर्ने गरी काम गर्ने दृढता व्यक्त गर्दै जनताको अपेक्षालाई परिणाममा बदल्ने गरी आफू सक्रिय रहने बताए । उनले प्राप्त जनादेशलाई केवल व्यक्तिगत जीत नभई परिवर्तनको संकेतका रूपमा लिएको पनि उल्लेख गरे ।
तनहुँ-२ मा रास्वपाका श्रीराम न्यौपाने ३२ हजार ६८७ मतसहित विजयी
काठमाडौं । तनहुँ प्रतिनिधिसभा सदस्य निर्वाचन क्षेत्र नं २ मा पनि राष्ट्रिय स्वतन्त्र पार्टी (रास्वपा) का उम्मेदवार श्रीराम न्यौपाने विजयी भएका छन् । आज साँझ सम्पन्न मतगणना अनुसार ३२ हजार ६८७ मत प्राप्त गरी न्यौपाने निर्वाचित भएका हुन् । निर्वाचन अधिकृत भेषराज पौडेलका अनुसार प्रतिस्पर्धी नेपाली काङ्ग्रेसका शङ्कर भण्डारीले १४ हजार १३४ प्राप्त गरे । यस्तै, नेकपा (एमाले) का केदार सिग्देलले ११ हजार ६६८ र नेपाली कम्युनिष्ट पार्टीका सोमबहादुर थापाले १ हजार ९५३ मत प्राप्त गरे । यस क्षेत्रमा कुल १ लाख २७ हजार ५१५ मतदाता रहेकामा ६३ हजार १८६ मत खसेका थिए । यहाँ क्षेत्र नं १ बाट रास्वपाका उपसभापति डा. स्वर्णिम वाग्ले निर्वाचित भइसकेका छन् ।
जुम्लामा ज्ञानेन्द्र शाही विजयी, रास्वपाकी विनीताले ल्याइन् ४२१ मत
काठमाडौं । प्रतिनिधिसभा सदस्य निर्वाचन अन्तर्गत जुम्लामा राष्ट्रिय प्रजातन्त्र पार्टी (राप्रपा) का उम्मेदवार ज्ञानेन्द्र शाही १४ हजार ८१६ मतसहित विजयी भएका छन् । मुख्य निर्वाचन अधिकृत कार्यालयका सहायक निर्वाचन अधिकृत हरिकृष्ण तिमिल्सिनाका अनुसार शाही नेपाली कम्युनिस्ट पार्टीका उम्मेदवार नरेश भण्डारीसँग ३ हजार १८१ मतान्तरसहित निर्वाचित भएका हुन् । यहाँ भण्डारीले ११ हजार ६३५ मत प्राप्त गर्दा नेकपा (एमाले) का शान्तिलाल महतले ४ हजार ५१८, नेपाली कांग्रेसका दीपबहादुर शाहीले ७ हजार १४३ मत प्राप्त गरेको सहायक निर्वाचन अधिकृत तिमिल्सिनाले बताए । यहाँ रास्वपाकी विनीता कठायतले ४२१, प्रलोपाका मनऋषि धितालले ११२, नेमकिपाका बृषबहादुर रावतले ४०० प्राप्त गरे । जिल्लामा विभिन्न पार्टीका नौ र एक स्वतन्त्र उम्मेदवार प्रतिस्पर्धामा थिए ।
चितवन-१ मा ४५ हजार बढी मतान्तरले रास्वपाका हरि ढकाल विजयी
काठमाडौं । चितवन निर्वाचन क्षेत्र नम्बर १ बाट प्रतिनिधिसभा सदस्यमा राष्ट्रिय स्वतन्त्र पार्टी (रास्वपा) का हरि ढकाल फराकिलो मतान्तरसहित निर्वाचित भएका छन् । उनले नेपाली कांग्रेसका उम्मेदवार राजेन्द्रप्रसाद बुर्लाकोटीलाई ४५ हजार १७५ मतान्तरले पराजित गर्दै शानदार जीत हासिल गरेका हुन् । अन्तिम मतपरिणामअनुसार ढकालले ५८ हजार २०८ मत प्राप्त गरे भने उनका निकटतम प्रतिद्वन्द्वी बुर्लाकोटीले १३ हजार ३३ मत मात्रै पाए । यसैगरी नेकपा एमालेका दावा दोर्जे लामाले १० हजार ८९९ मत प्राप्त गरे भने नेकपाका कृष्ण पन्तले ४ हजार ८१ मत ल्याएका छन् । राष्ट्रिय प्रजातन्त्र पार्टी (राप्रपा) का बलराम खनालले २ हजार ३०२ मत प्राप्त गरेका छन् । ढकाल यसअघि २०७९ सालको प्रतिनिधिसभा निर्वाचनमा पनि यही क्षेत्रबाट निर्वाचित भएका थिए । त्यतिबेला उनले नेपाली कांग्रेसका विश्व पौडेल र नेकपा एमालेका सुरेन्द्र पाण्डेलाई पराजित गरेका थिए । त्यसबेला ढकालले ३४ हजार १८९ मत ल्याउँदा पाण्डेले २६ हजार ६०८ र पौडेलले २४ हजार ९९० मत प्राप्त गरेका थिए ।
