सिन्धुलीगढी घुमेर हेर्दा सुन्तलीमाई कतिमा राम्रो दरबार…
लेखक कुनै बेला गायक कृष्णविक्रम थापाले गाएका थिए, ‘सिन्धुलीगढी घुमेर हेर्दा सुन्तलीमाई कतिमा राम्रो दरबार, र्मायो नि मायाले र्मायो..।’ यही गीतले चिनायो सिन्धुलीगढीलाई । सिन्धुलीगढी २२० बर्षदेखि वीरताको इतिहास बोकेर त्यतिकै ठिंग उभिइरहेको छ । एक छिन फर्कौं इतिहासतिर । विक्रम संवत् १८२४ सालमा अंग्रेज फौजलाई तत्कालीन बीर गोर्खाली फौजले हराएको थियो यस स्थलमा । कहिल्यै पराजित नभइ संसारमा साम्राज्य खडा गर्दै हिँडेको बेलायतलाई हराएको पनि यस बर्ष २५० बर्ष पुगेछ । इतिहास लेख्नेहरु भन्छन्, यस स्थलमा गोर्खालीले बलले भन्दा बुद्धिले लडाईं लडेका थिए । त्यसैले उनीहरुले कम्पतान किनलकको नेतृत्वको अंग्रेजी फौजलाई परास्त गर्न सके । महाभारत डाँडामा रहेको यो स्थल सामरिक दृष्टिले पनि महत्वपूर्ण छ । अंग्रेज फौज तराइ हुँदै आएका थिए । गोर्खाली सेना पहाडको टुप्पामा किल्ला जमाएर बसेका थिए । अंग्रेजहरु जसै उकालो अगाडि बढे, गोर्खालीले अरिंगालको गोलामा ढूंगा हानिदिए । ढुंगाले लागेर बिच्किएका अरिंगा अंग्रेजी फौजमाथि खनिए । त्यतिखेर त्यस भेगमा अल्लो, सिस्नु प्रसस्त पाइन्थ्यो, अहिले पनि पाइन्छ । त्यही सेउलाले अरिंगाललाई धपाउन खोज्दा अंग्रेज फौजलाई झन् पोल्यो । भनिन्छ, त्यतिखेर अंग्रेजी फौज ‘झिँगै (अरिंगाललाई सायद उनीहरुले फ्लाइ भने होलान्) बैरी, पातै (अल्लो सिस्नु) बैरी, मान्छेको त के कुरा गर्नु’ भन्दै लडाईं छाडेर भागेका थिए । त्यतिखेर किनलकको नेतृत्वमा आएको २४०० अंग्रेज फौजलाई गोर्खालीले परास्त गरेको इतिहास छ । गोर्खाली सेनाको नेतृत्व वंशु गुरुङले गरेका थिए । अंग्रेजी फौजको यो संसारमै पहिलो हार थियो । यस स्थलमा त्यतिखेर अंग्रेजी फौजलाई परास्त नगरेको भए अहिलेको नेपालको नक्साको आकार कस्तो हुन्थ्यो भनेर अनुमान मात्र गर्न सकिन्छ । सिन्धुलीगढी इतिहास बोकेको स्थल भएकाले आफैंमा हरेक नेपालीको गन्तब्य स्थल हुँदै हो, त्यसमा पनि यसको अवस्थिति, हावापानी, यातायातको सुगकमता र प्राकृतिक वातावरणले समेत यसलाई प्रदेश नम्बर ३ को एक मात्र गन्तब्य बन्न सक्ने सम्भावना छ । काठमाडौंबाट धुलिखेल हुँदै बिपी राजमार्ग भएर सिन्धुलीगढी पुग्न सकिन्छ । सुनकोशी तिरैतिर भएर जाने नागवेली सडक आफैंमा एउटा गन्तब्य हो । काठमाडौंबाट सार्बजनिक सवारी साधनमा ४ घन्टामा सिन्धुलीगढी पुग्न सकिन्छ । आफ्नै सवारी साधन हुनेहरु ३ घण्टामै पुग्न सक्छन् । पूर्वी तराईबाट आउँदा पूर्वपश्चिम राजमार्गको बर्दिबासबाट बढीमा दुई घन्टामा सिन्धुलीगढी पुग्न सकिन्छ । महाभारत डाँडमा रहेको यस स्थलबाट तराईका फाँट र उत्तरका हिमालको रमणीय दृश्य हेर्न सकिन्छ । गढी डाँडोमा पुग्ने बित्तिकै सबैको फुरुङ्ग हुन्छ । तराईमा चर्को गर्मी हुने बेला यहाँ आउनेहरु शितल अनुभूति गर्न सक्छन् । यहाँ कहिल्यै गर्मीको अनुभूति हुँदैन । चिसो, मन चंगा बनाउने हावाले पर्यटकलाई लोभ्याउँछ । गढीमा सधैं हुस्सुले लुकामारी खेलिरहेको हुन्छ । सिन्धुलीगढी वरपरका गाउँ जुनार उत्पादनका लागि प्रसिद्ध छन् । हिमालतिर फकिएका उच्च पहाडमा हुने रसिलो जुनारले सिन्धुली जिल्लालाई मुलुकमा मात्रै हैन विदेशमा समेत चिनाएको छ । जुनरको विकास र विस्तारमा जापान सरकारले समेत लगानी गरेको छ । सिन्धुलीगढी पुग्ने हरेक ब्यक्तिले खनियाँखर्क, सोलाभञ्ज्याङमा जुनार किन्न पाउँछन् । अलि पर घुम्न जानेहरुले चपौली, खनियाँखर्क लगायतका गाउँमा आफ्नै हातले जुनारसुन्तला टिपेर खान पाउँछन् । सिन्धुलीगढी जानेहरुलाई लक्षित गरेर खनियाँ खर्कमा केही होटल खुलेका छन् । समृद्ध सिन्धुली अभियानले पर्यटन बोर्ड र सिन्धुली उद्योग बाणिज्य संघसँगको सहकार्यमा गढीवरपरका गाउँबस्तीमा होमस्टे संचालन गर्न तालिम दिएको छ । महोत्सवका बेलासम्म ती होमस्टेसमेत संचालनमा आउने छन् । गढीपरिसरमा सिद्धबाबाको मन्दिर दर्शन गर्न पाइन्छ । त्यहाँ रहेको ११२ वर्ष पुरानो घण्टी मदिन्दरको आकर्षण हो । गढीवरपर वनभोज स्थल बनाइएको छ । तराइबाट समेत यहाँ बनभोज खान धेरै ब्यक्ति आउँछन् । गढीको संरक्षणमा पछिल्लो समय निकै प्रयास भएको छ । मुलक संघीयतामा गएपछि सिन्धुलीगढी कमलामाइ नगरपालिकाको स्वामित्वमा आएको छ । नगरपालिकाले गढीको संरक्षणका लागि गुरुयोजना बनाउने तयारी गरेको छ । यसअघि वेवारिसेजस्तै रहेको गढीमा अहिले तारबार गर्ने तयारी भएको छ । वीपी राजमार्गको सोलाभञ्ज्याङबाट गढी पुग्ने बाटोलाई स्तरीकरण गरिएको छ । अहिले सिँढी उक्लिएर १० मिनटमा र आफ्नै सवारी साधन लिएर ५ मिनटमा गढी पुग्न सकिन्छ । गढी संरक्षणमा पछिल्लो समय नेपाली सेनाले समेत चासो देखाएको छ । सेनाले त्यस क्षेत्रको सरसफाइ गर्नुका साथै इतिहास झल्काउने विभिन्न सामग्रीलाई होर्डिङ बोर्ड बनाएर राखेको छ । विभिन्न ऐतिहासिक स्थलको जानकारी दिने साइनेज बनाएर ती ठाउमा राखिएको छ । सेनाले बनाएको ऐतिहासिक सिन्धुलीगढीबारेको बृत्तचित्र घुम्न आउनेहरुलाई दैनिक देखाउने ब्यवस्था मिलाइएको छ । यही स्थलमा हरेक बर्ष विजयको झण्डा फहर्याएको सम्झनामा गढीमा हर्षोल्लासपूर्वक विजयोत्सव मनाउने गरिएको छ । विजयोत्सव सुरु गर्दा कात्तिक २४ गतेलाई विजय हासिल गरेको दिन भनेर सुरु गरिएको थियो । पछि मिति भने केही फरक देखिएको छ । अंग्रेज फौजका केही सदस्यलाई रातु खोलाले बगाएको कुरा इतिहासमा पाइन्छ । त्यसैले त्यो मिति असोजतिर हुने अनुमान केही इतिहासकारको छ । अझै मिति भने यकिन हुन सकेको छैन । जे होस् विजयोत्सव मनाउन सुरु भएको छ । दशैं चैतमा पर्ने भनेर असोज–कात्तिकमा सारे जस्तै असोजमा चाडबाड पर्ने हुनाले सबै काम सकेर कात्तिक अन्तिममा बिजयोत्सव मनाउनु उपयुक्त छ । संयोगले यस बर्ष अंग्रेजलाई हराएको २५० बर्ष पूरा हुँदैछ । यस्तो अबसर न पहिले आएको थियो, न पछि आउने छ । त्यसैले यस बर्षको महोत्सवलाई भब्य बनाउने समृद्ध सिन्धुली अभियानले राइड टु सिन्धुलीगढी साइकल यात्रा, कला शिविरलगायतका कार्यक्रम गर्दैछ । काठमाडौंलाई सिन्धुलीसम्म जोड्ने गरी अभियानले गत बर्षदेखि गर्दै आएको साइकल यात्रामा यस बर्ष १५० जनाभन्दा बढी सहभागी हुँदैछन् । साइकल यात्राको उद्घाटन उपराष्ट्रपछि नन्दबहादुर पुनले गर्नु हुनेछ । सिन्धुलीगढीमा हुने विजयोत्सवमा राष्ट्रपति विद्यादेवी भण्डारी सहभागी हुनु हुनेछ । राष्ट्रप्रमुख र उपप्रमुखले ऐतिहासिक सिन्धुलीगढीमा हुने विजयोत्सवलाई महत्व दिएर सहभागिता जनाउने कुराले यसको गरिमालाई अझै बढाएको छ । हरेक नेपाली एक पटक आफ्नो पूर्खाले बीरता देखाएको इतिहास बुझ्न एक पटक सिन्धुलीगढी पूग्नै पर्छ । यस इतिहासलाई पर्यटनसँग जोड्न समृद्ध सिन्धुली अभियानले राइड टु सिन्धुलीगढीलाई ब्रान्डिङ गरेर एडभेन्चर यात्रामा रमाउने विदेशीलाई समेत सहभागी गराउने योजना बनाएको छ । गत बर्ष ८२ जना साइकल यात्री सहभागी भएकामा यस बर्ष ११० भन्दा बढीले सहभागीताका लागि नाम दर्ता गराउनुले यसको महत्व अझ बढेको छ । यस बर्ष ४ जना विदेशी समेत साइकल यात्रामा सहभागी हुनेछन् ।
मदिरा पिउनुहुन्छ ? त्यसो भए ब्राण्ड होइन गुणस्तर हेर्नुस्, सरकारले ल्याउँदैछ यस्तो मापदण्ड
काठमाडौं । के तपाईं मदिरा (रक्सी) पिउनुहुन्छ ? यदि हो भने ख्याल गर्नुहोस् तपाईंले पिउने मदिरा कत्तिको स्वच्छ छ ? पहिले रक्सीको गुणस्तर, प्याकेजिङ र लेबल हेर्नुपर्छ । मदिरा आफैमा अस्वस्थ्यकर पेय पदार्थ हो । यद्यपी सरकारले मदिरामा स्वच्छता ल्याउन यसको मापदण्ड तयार पारेको छ । मिसावटयुक्त रक्सी सेवनले उपभोक्ताको स्वास्थ्यमा असर पुर्याउने भएकाले खाद्य प्रविधि तथा गुण नियन्त्रण विभागले मापदण्ड जारी गर्न लागेको हो । बजारमा ‘ब्राण्ड’ र ‘लोकल’ भनेर थुप्रै मदिरा कम्पनीहरुले आफ्नो उत्पादन बिकाउन प्रचार गरिरहेका हुन्छन् । मिसावटका कारण रक्सी पिउने मानिस बिरामी हुनथालेपछि यसको मापदण्ड बनाइएको विभागका प्रवक्ता पूर्णचन्द्र वस्तीले बताए । मादण्डको मस्यौदा तयार पारेर विभागले कृषि विकास मन्त्रालय पठाएको उनले जानकारी दिए । उनले भने, ‘सुरुमा यो मापदण्डमाथी सम्बन्धित मन्त्रालयमा छलफल हुन्छ । त्यसपछि यसलाई राजपत्रमा प्रकाशित गर्न सिफारिस गरिन्छ ।’ के छ रक्सीको मापदण्ड ? मुलभुतरुपमा सबै मदिराका लेबलमा स्वास्थ्यसम्बन्धी कुनै पनि भ्रामक कुरा दाबी गर्न प्रतिबन्ध लगाइएको छ । त्यस्तै लेबलमा उत्पादन र उपभोग्य मिती खुलाउन अनिवार्य गरिएको छ । मदिरामा इथाइल अल्कोहलको मात्रा ३६ देखि ५० प्रतिशत (आयातनको आधारमा, २० डिग्री सेल्सियस तापक्रममा) सम्म तोकिएको छ । लेबलमा उल्लेख गरिएभन्दा ३ प्रतिशत घटबढमा छुट दिइएको छ । मदिराको उत्पादन तथा कारोबार कोडेक्सले निर्धारण गरेको आचारसंहिताका प्रावधान अनुसार हुनुपर्छ । रक्सीको लेबलमा अन्य खाद्यान्न जस्तै उत्पादकको परिचय, दर्ता नम्बर, खूद परिमाण र उपभोग्य मिती अनिवार्य गरिएको छ । विभागले मदिरा अन्तर्गत ह्विस्की, रम, ब्राण्डी, भोड्का र जीनलाई राखेको छ । यी विभिन्न प्रकारका मदिराहरुलाई छुट्टाछुट्टै परिधी दिइएको छ । ह्विस्की कुनै पनि अन्न वा स्टार्चजन्य खाद्य पदार्थहरुलाई जीव रासायनिक प्रकृयाबाट किन्वन पछि डिस्टिलेसन गरि ह्विस्की तयार पारिन्छ । यसमा चारित्रिक स्वाद तथा बास्ना हुनुपर्नेछ । म्याचर्ड (परिपक्व) भनि लेखिएको ह्विस्कीलाई कम्तीमा १ वर्षसम्म ओकको भाडा भण्डारण गरिएको हुनुपर्छ । ह्विस्कीमा क्लोरल हाइड्रेट, अमोनियम क्लोराइड, डाइजेपाम, पाराडिहाइड लगायत कुनैपनि अन्य किसिमका नशालु साइकोट्रपिक तथा क्याफिन पदार्थहरु बर्जित गरिएको छ । रम उखुको रस/उखुको अन्य उत्पादन, सुगर बिट वा सुगरबिट मोलासिसजन्य खाद्य पदार्थलाई किण्वन गरी डिस्टिलेसन प्रकृयाबाट रम तयार पारिन्छ । मापदण्डमा रम सब जिरो तापक्रमसमेतमा पनि थिग्रो वा कुनै पनि प्रकारका सस्पेन्डेड पदार्थ रहित हुनुपर्ने उल्लेख छ । म्याचर्ड (परिपक्व) भनि लेखिएको रमलाई कम्तीमा १ वर्षसम्म काठको भाडा भण्डारण गरिएको हुनुपर्छ । काठको भाडोमा परिपक्व गरिएको रममा काठको स्वभाविक रंग आउनुपर्छ । यसमा केरामेल बाहेक अन्य रंग प्रयोग गर्न पाइनेछैन । रममा कुनैपनि थिग्रेको वा तैरेको वस्तु हुनुहुदैन । रममा क्लोरल हाइड्रेट, अमोनियम क्लोराइड, डाइजेपाम, पाराडिहाइड लगायत कुनैपनि अन्य किसिमका नशालु साइकोट्रपिक तथा क्याफिन पदार्थहरु बर्जित गरिएको छ । भोड्का आलु, अन्न, मोलासिस वा किन्वन हुने कार्बोहाइड्रेटजन्य पदार्थलाई किण्वन गरी डिस्टिलेसनमार्फत न्यूट्रल स्पिरिटबाट भोड्का तयार पारिन्छ । यसमा पनि अन्य मदिराझैं क्लोरल हाइड्रेट, अमोनियम क्लोराइड, डाइजेपाम, पाराडिहाइड लगायत कुनैपनि अन्य किसिमका नशालु साइकोट्रपिक तथा क्याफिन पदार्थहरु प्रतिबन्ध लगाइएको छ । ब्राण्डी अंगुर वा अन्य कुनै फलफुलको किण्वत रसलाई डिस्टिलेसन गरी ब्राण्डी तयार पारिन्छ । ब्राण्डी तीन प्रकारका छन् : अंगुरको ब्राण्डी, फलफुलको ब्राण्डी र ब्लेन्डेड ब्राण्डी । यसलाई १ हजार लिटर भन्दा कम क्षमता भएको ओकको भाडामा परिपक्व गरिएको ब्राण्डी कम्तीमा ६ महिना भण्डारण गरिएको अनिवार्य हुनुपर्दछ । यसमा क्लोरल हाइड्रेट, अमोनियम क्लोराइड, डाइजेपाम, पाराडिहाइड लगायत कुनैपनि अन्य किसिमका नशालु साइकोट्रपिक तथा क्याफिन पदार्थहरुको मिसावटलाई प्रतिबन्ध लगाइएको छ । जीन जुनिपर बेरीको वाष्पशील तत्वको स्वाद भएको न्यूट्रल स्प्रिटबाट जीन तयार गरिएको हुन्छ । यो संग्लो हुनुपर्छ र स्वच्छ पानीमा राख्दा धमिला हुनुहुदैन । यसमा क्लोरल हाइड्रेट, अमोनियम क्लोराइड, डाइजेपाम, पाराडिहाइड लगायत कुनैपनि अन्य किसिमका नशालु साइकोट्रपिक तथा क्याफिन पदार्थहरुको मिसावटलाई प्रतिबन्ध लगाइएको छ ।
प्रभु इन्स्योरेन्सको १९.२० प्रतिशत बोनस र ४६ प्रतिशत हकप्रद सेयर पारित
काठमाडौं । प्रभु इन्स्योरेन्स लिमिटेडको सेयरधनीलाई चुक्ता पुँजीको १९.२० प्रतिशत बोनस सेयर वितरण गर्ने निर्णय पारित भएको छ । साथै, कम्पनीको सो मात्राको बोनस पश्चात ४६ प्रतिशत हकप्रद सेयर निष्कासन गर्ने कम्पनी सञ्चालक समितिको निर्णय पारित भएको छ । उक्त निर्णयलाई कात्तिक २१ गते बसको कम्पनीको २२ औं वार्षिक साधारण सभाले पारित गरेको छ । सभाले पारित गरे बमोजिम कम्पनीले १९.२० प्रतिशत बोनस पश्चात कायम हुने पुँजीमा ४६ प्रतिशत हकप्रद सेयर निष्कासन गर्न पाउने भएको छ । कम्पनीको पुँजी वृद्धिको लागि सो मात्राको बोनस र हकप्रद सेयर निष्कासन गर्न लागेको हो । हाल कम्पनीको चुक्ता पुँजी ६८ करोड ८४ लाख रुपैयाँ रहेको छ । सो मात्राको बोनस तथा हकप्रद शेयर वितरण पश्चात कम्पनीको चुक्ता पुँजी १ अर्ब ५० लाख रुपैयाँ नाघ्ने कम्पनीद्धारा जारी विज्ञप्तिमा उल्लेख छ । कम्पनीले आर्थिक वर्ष ०७३÷०७४ मा खुद मुनाफा १६ करोड ४७ लाख ५५ हजार रुपैयाँ आर्जन गरेको थियो । सो अवधिमा कम्पनीले ८३ करोड १७ लाख रुपैयाँ बीमाशुल्क आर्जन गरेको थियो । साथै, चालु आर्थिक वर्षको प्रथम त्रैमासिक सम्ममा २५ करोड ३५ लाख २ हजार रुपैयाँ बीमाशुल्क आर्जन गरेको छ । जुन अघिल्लो आर्थिक वर्षको तुलनामा ४ दशमलब ६५ प्रतिशतले बृद्धि भएको कम्पनीले जनाएको छ ।
भूकम्प पीडितले अब निर्ब्याजी ३ लाख ऋण पाउने, ऋणको अवधी बढीमा ५ वर्ष हुने
काठमाडौं । नेपाल राष्ट्र बैंकले भूकम्प पीडितलाई सामूहिक जमानिमा ३ लाख रुपैयाँ निर्ब्याजी कर्जा उलपब्ध गराउन बैंक तथा वित्तीय संस्थालाई निर्देशन दिएको छ । केन्द्रीय बैंकले वाणिज्य बैंक, विकास बैंक र वित्त कम्पनीलाई मंगलबार निर्देशन जारी गरी भूकम्प पीडितहरुको घर निर्माणका लागि सामूहिक जमानिमा निब्र्याजी ऋण उपलब्ध गराउने कार्यविधि बमोजिम काम गर्न भनेको छ । निब्र्याजी कर्जा उपलब्ध गराउने बैंक तथा वित्तीय संस्थाले ऋणीसंग शुल्क लिन नपाउने, ऋणीले कर्जा सुरक्षा निगमबाट सुरक्षण गरेको हुनुपर्ने, निब्र्याजी कर्जाको भुत्तानी अवधि न्युनतम ३ वर्षदेखि ५ वर्षसम्म मात्र हुने राष्ट्र बैंकले जनाएको छ । भूकम्प पीडितलाई दिने निब्र्याजी कर्जालाई बैंक तथा वित्तीय संस्थाले विपन्नमा गणना गर्न पाउने व्यवस्था गरेको छ । कर्जाको लागतमा २ प्रतिशत थप गरी ब्याज दर कायम गरिने केन्द्रीय बैंकले जानकारी दिएको छ । मन्त्रिपरिषदले गत बैशाख २९ गते कार्यविधि स्वीकृत गरेको हो ।
एनआईसी एशिया बैंकको थप दुई शाखा जोशीपुर र जाजरकोटमा
काठमाडौं । एनआईसी एशिया बैंकको थप दुई नयाँ शाखाहरु जोशीपुर र जाजरकोटमा विस्तार भएको छ । मंगलबार बैंकले एक समारोहकाबीच उक्त दुई शाखाको उद्घाटन गरेको छ । जोशीपुर शाखाको उद्घाटन गाउँपालिकाका कार्यकारी अधिकृत नारायण बहादुर बिष्ट तथा अध्यक्ष रामकृष्ण चौधरीले समग्र रुपमा गरेका हुन् । त्यसैगरी भेरी नगरपालिकाका मेयर चन्द्रप्रकाश घर्तीले जाजरकोट शाखाको उद्घाटन गरेका हुन् । साथै, बैंकले अन्य विभिन्न स्थानहरुमा चाँडै नै थप शाखा संचालन गर्ने योजना अगाडि सारेको छ ।
स्वावलम्बन लघुवित्त विकास बैंकको कात्तिक २८ गतेदेखि बुक क्लोज
काठमाडौं । स्वावलम्बन लघुवित्त विकास बैंकको कात्तिक २८ गतेदेखि मंसिर १५ बुक क्लोज हुने भएको छ । कम्पनीले वार्षिक साधारणसभामा जाने प्रयोजनको लागि उक्त दिन बुक क्लोज गर्न लागेको हो । यस बैंक आगामी मंसिर १५ गते आफ्नो १६औँ वार्षिक साधारणसभामा जाँदै छ । सभामा कम्पनीले ३१ प्रतिशत लाभांश दिने कम्पनी सञ्चालक समितिको प्रस्ताव लैजाँदै छ ।
अनलाइन सेयर कारोबार २०७५ साल जेठपछि मात्रै
काठमाडौं । नेपाल स्टक एक्सचेञ्ज(नेप्से)ले अनलाईन सेयर कारोबार २०७५ साल जेठबाट मात्रै आरम्भ हुने स्पष्ट पारेको छ । नेप्सेका नवनियुक्त प्रमुख कार्यकारी अधिकृत चन्द्रसिहं साउँदले मंगलबार पत्रकार सम्मेलन मार्फत २०७५ जेठ अघि अनलाईन सेयर कारोबार सम्भव नभएको स्पष्ट पारेका हुन् । ‘यो अन्त्यन्तै प्राबिधिक र जटिल काम हो, केहि समय अदालतको मुद्धा मामिलाले पनि अड्कायो, अब २०७५ जेठमा मात्रै अनलाइन सेयर कारोबारको परिक्षण आरम्भ हुन्छ’, साउनले पत्रकार सम्मेलनमा भने । यस अघिका प्रमुख कार्यकारी अधिकृत सिताराम थपलियाले आज अर्थात कात्तिक २१ देखि अनलाइन सेयर कारोबार आरम्भ गर्ने घोषणा गरेका थिए । अदालतले मुद्धा टुंगो लगाएपछि नेप्से सञ्चालक समितिले २०७४ साल बैशाख ६ गतेदेखि लागु हुनेगरि १४ महिनाभित्र अनलाइन सेयर कारोबारको सिस्टम उपलब्ध गराउनुपर्ने समझौता वाइसिओ प्रालीसँग गरेको थियो । सो सम्झौता अनुसार भारतीय कम्पनीले आगामी जेठ महिनाभित्रै अनलाइन सेयर कारोबारको प्रणाली उपलब्ध गराउनेछ भने नेप्सेले परिक्षण कारोबार आरम्भ गर्नेछ । अनलाइन सेयर कारोबारका लागि नेप्सेले सफ्टवेयर निर्माण कर्ता कम्पनीलाई १६ वटा मोडलको सूचि उपलब्ध तयार पारेको छ । सोमध्ये हालसम्म् ६ वटा मोडलको सूचि दिईसकिएको नेप्सेले जानकारी दिएको छ । बाँकी १० वटा मोडल भने केहि समय भित्रै क्रमशः उपलब्ध गराउँदै जाने र सोही अनुसार सफ्टवेयर निर्मार्ता कम्पनीले तयार पर्ने बताईएको छ । नेप्सेले अनलाइन सेयर कारोबारका लागि आवश्यक पर्ने हार्डवेयर भने प्राप्त गरिसकेको छ । नेप्सेले गैर आवासिय नेपालीहरुलाई सेयरमा लगानी गर्ने वातावरण बनाउने, मार्जिन कारोबारका लागि सहजीकरण गर्ने, समयमै साधारण सभा नगर्ने सूचिकृत कम्पनीहरुलाई साधारण सभा गर्न लगाउने लगायतका योजना अघि सारेको छ । त्यस्तै, निर्जिवन बीमा र जीवन बीमा कम्पनीको परिसूचक छुट्याउने योजना बनिरहेको पनि प्रमुख कार्यकारी अधिकृत साउँदले जानकारी दिए । नेप्सेले केहि दिन अघि मात्रै विकास बैंक समुहबाट लघुवित्त कम्पनीहरुलाई अलग गरेर छुट्टै परिसूचक बनाएको थियो ।
सिटिजन्स बैंकको ६६औं शाखा महोत्तरीको औरहीमा
काठमाडौं । सिटिजन्स बैंक इन्टरनेसनल लिमिटेडले आफ्नो ६६औं शाखा महोत्तरीको औरहीमा संचालनमा ल्याएको छ । मंगलबार यस बैंकका सहायक प्रमुख कार्यकारी अधिकृत बोधराज देवकोटाले बैंकिङ्ग कारोबारको सुरुवात गरेका हुन् । हाल यस बैंकको ६६ वटा शाखा, ६२ वटा एटिएम काउन्टर र ९७ वटा शाखा रहित आधुनिक बैंकिङ्ग सेवाहरुबाट करिव ३ लाख ५० हजार ग्राहकहरुलाई सेवा प्रदान गर्दै आएको छ । उक्त समारोहमा सामाजिक उतरदायित्व कार्यक्रम अन्तर्गत बैंकले प्रसाद सिंह उच्च माध्यमिक विद्यालयलाई २ थान कम्प्यूटर सहयोग स्वरुप हस्तान्तरण गरेको छ । उक्त हस्तान्तरण बैंकका सहायक प्रमुखकार्यकारी अधिकृत बोधराज देवकोटा र औरही नगरपालीकाका मेयर सुनिल यादवले संयुक्त रूपमा गरेका छन् ।
