७ अर्ब बढीको कारोबार, ५ कम्पनीको सेयरमा सकारात्मक सर्किट
काठमाडौं । बुधबार नेपाल स्टक एक्सचेन्ज (नेप्से) परिसूचक ७ अंकले बढ्दै २,६९६ बिन्दुमा पुगेको छ । नेप्सेले दिएको जानकारी अनुसार आज १४७ कम्पनीको सेयर मूल्य बढेको छ भने ९७ कम्पनीको घटेको छ । २ कम्पनीको सेयर मूल्यमा कुनै परिवर्तन आएको छैन । आज ३२९ कम्पनीको १ करोड कित्ता सेयर किनबेच हुँदा ७ अर्ब २६ करोड रुपैयाँ बराबरको कारोबार भएको छ । सबैभन्दा धेरै कारोबार न्यादी ग्रुप पावरको भएको छ । न्यादीको सेयर ५९ करोड रुपैयाँभन्दा बढीमा किनबेच भएको छ । त्यसपछि राधी विद्युत कम्पनीको ५० करोड, बलेफी हाइड्रोपावरको ४२ करोड, एनआरएन इन्फ्रास्ट्रक्चरको ४० करोड र हिमालयन पावरको ३१ करोड रुपैयाँभन्दा बढीको कारोबार भएको छ । आजको कारोबारमा कर्पोरेट डेभलपमेन्ट बैंक, बलेफी हाइड्रोपावर, नेपाल माइक्रो इन्स्योरेन्स, राधी विद्युत कम्पनी र क्रेस्ट माइक्रो लाइफको सेयर मूल्य १० प्रतिशतले वृद्धि भई सकारात्मक सर्किट लागेको छ । आज हाइड्रोपावर समूहमा लगानीकर्ताको आकर्षण देखिएको छ । सो समूह सबैभन्दा धेरै १.६३ प्रतिशतले बढेको छ । त्यसैगरी बैंकिङ ०.३९, विकास बैंक १.११, जीवन बीमा ०.०५, निर्जीवन बीमा ०.५५ र व्यापार समूह ०.११ प्रतिशतले वृद्धि भएका छन् । फाइनान्स ०.६७, होटल तथा पर्यटन ०.१६, लगानी ०.३५, उत्पादन ०.१६, माइक्रोफाइनान्स ०.०६ र अन्य समूह १.०७ प्रतिशतले घटेका छन् ।
कमजोर अर्थतन्त्रमा बिना तयारी विनिमय दर प्रणाली बजार छाड्दा मुलुक ठूलो संकटमा जाने
काठमाडौं । अहिले तत्काल भारतीय रुपैयाँसँगको स्थिर विनिमय दर हटाउँदा नेपालले उल्टै नोक्सानी बेहोर्नुपर्ने जोखिम देखिएको छ । मुलुकको अर्थतन्त्र कमजोर रहेको बेला बिना तयारी विनिमय दर प्रणाली बजार छाड्दा त्यसले मुलुकलाई ठूलो संकटमा धकेल्ने जोखिम रहेको विज्ञहरूले बताएका छन् । उनीहरूका अनुसार बजारले निर्धारण गर्नसक्ने विनिमयदर र त्यसबाट उत्पन्न हुने परिस्थितिको सामना गर्न अझै नेपाल तयार भएको छैन । विनिमयदर परिवर्तनपछि त्यसले पार्ने प्रभावहरूको गहिरोसँग अध्ययन हुन नसकेको, मुलुकको अर्थतन्त्र कमजोर रहेका कारण अहिल्यै मूल्य निर्धारण बजारबाट गर्न नहुने विज्ञहरूको बुझाइ छ । नेपाल राष्ट्र बैंकका पूर्वकार्यकारी निर्देशक नरबहादुर थापा विनिमयदर अस्थिर छाड्ने चरणमा नेपाल पुगिनसकेको बताउँछन् । उनका अनुसार त्यो स्थितिमा पुग्नलाई धेरै काम गर्न बाँकी छ, हचुवाका भरमै छाडियो भने देशमा ठूलो संकट निम्तिन सक्छन्। उनले भने, ‘हाम्रो अर्थतन्त्रले त्यो क्षमता अझै बनाउनै सकेको छैन । भारतसँग वार्षिक झन्डै १० खर्ब बराबरको व्यापार घाटा छ । त्यो व्यापार घाटाले के माग गर्छ भने नेपालको भारु विनिमय दर १६० होइन २०० हुनुपर्छ भन्छ । यद्यपि रेमिट्यान्समार्फत डलरहरू आइरहेको छ त्यसले भरथेग गरिरहेको छ । भारतसँग जुन व्यापार घाटा छ त्यसले नेपाली मुद्रा भारतीय मुद्रा कमजोर हुनुपर्छ भन्ने माग गर्दछ । हामी कल्पना गरौं १६० बाट २०० पुग्यो भने पेट्रोलियम पदार्थको मूल्य के हुन्छ ? ’ तर विनिमय दर बजारमा आधारित गर्ने भनेको आदर्शवादी कुरा रहेको बताउँदै थापाले यो अत्यन्तै राम्रो कुरा पनि भएको थापाले जनाए । थापाका अनुसार आर्थिक विकासको उच्चतम बिन्दुमा माथि जाने हो भने विनिमयदरलाई बजारमा छाड्नैपर्छ । त्यो पहिचानदेखि विकासको प्रतीक पनि रहको उनको बुझाइ छ । उनले भविष्यमा सरकार, राष्ट्र बैंकले ब्याजदरदेखि विनिमयदर बजारलाई नै नियन्त्रण नगरी छाडिदिनुपर्नेमा जोड दिए । उनका अनुसार त्यसले नै उचित निकास दिन्छ । त्यसले नै स्रोतको बाँडफाँड कुन क्षेत्रमा छ, त्यो मुलुकले लगानी गर्ने, बजारले लगानी गर्ने भन्ने दिशा निर्देश गर्छ । अर्का अर्थविद् चन्द्रमणि अधिकारी विनिमयदर परिवर्तन गर्नका लागि बजारलाई जिम्मा लगाउने बेला अझै नभएको बताउँछन् । उनका अनुसार हिजो आज र भोलीको अर्थतन्त्रको चरित्रको गहिरोसँग विश्लेषण हुन जरुरी छ । क्रस बोर्डर विनिमयदरलाई निर्धारण गर्ने तत्वहरु केके हुन् त्यसको ख्याल गरिनुपर्नेमा उनी जोड दिन्छन् । अधिकारीका अनुसार क्रस बोर्डर विनिमयदरलाई निर्धारण गर्ने तत्वहरु इस्पेकुलेटिभ, दीर्घकालिन तत्वहरुले काम गर्छन् । उनले भने, ‘विनिमय दरको भाउ निर्धारण गर्ने जिम्मा बजारलाई दिने बेला अझै भएको छैन । यो बेला उपयुक्त छैन । ६५ वर्ष अघि भारु विनिमयदर स्थीर बनाउनुको कारणहरु हेरिनुपर्छ । अर्थतन्त्रको त्यतिबेलाको चरित्र के थियो ? अहिलेको के छ ? भोलि अर्थतन्त्रमा आउने चरित्रको सम्भावनाहरु केके छन् ? विनियमय दरलाई निर्धारण गर्ने तत्वहरु समेत हेरिनुपर्छ ।’ उनका अनुसार ६ दशक अघि आयात निर्यातको व्यापारलाई हेर्ने हो भने कुल व्यापारमा निर्यातको अंश अझ बढी थियो । ८-१० प्रतिशत बढी निर्यात गर्न सकिँदैन । २००७ सालमा निर्यात १ अर्ब १२ करोड गर्दा आयात ८ करोड गरेका थियौं । जुन बेला विनिमय दर स्थीर गर्दा त्यो बेला अहिलेभन्दा नि बढी आयात नरहेको उनको भनाइ छ । अर्कोतिर सार्वजनिक ऋण बढिरहेको छ । त्यसको दायित्व ठूलो मात्रमा रहेको बताउँदै अर्थतन्त्र ठिक नभएको अवस्थामा नरहेको बेला अहिले बजारलाई विनिमय दरको भाउ निर्धारण गर्न छाड्दा त्यसले ठूलो जोखिम निम्ताउन सक्ने खतरा रहेको उनको बुझाइ छ । अर्थविद् अधिकारीका अनुसार अर्थतन्त्रमा क्षमता विस्तार हुन जरुरी छ । सन् २०३० सम्ममा मध्यम आयको राष्ट्र बन्ने भनेर नेपालले भनिररहेको छ । त्यो स्तरमा नेपाल पुग्नसके त्यसपछि विनिमय दर बजारमा छाड्ने विषयमा सोच्न सकिन्छ । अर्थविद अधिकारीका अनुसार विनिमय दर बजारलाई तोक्न दिन वैदेशिक व्यापार घटेर आउनुपर्छ । आर्थिक वृद्धिदरले मुद्रास्फीतिलाई उछिन्नुपर्छ । आर्थिक वृद्धिदरमा स्थायित्व हुनुपर्छ । उनले भने, ’वैदेशिक मुद्राको स्रोत के हाम्रो दिगो छ ? अन्तर्राष्ट्रिय भू–राजनीति, अनिश्चितता, तरलता, द्वन्द्वले भोलि हामीलाई रेमिट्यान्श घटाइदियो भने के होला ? हाम्रा मान्छेहरु फर्के भने के होला ? त्यतिबेला हाम्रो एक्सचेन्ज रेट कहाँ पुग्ला ? निर्यात बढिरहेको छ भनिरहेका छौं, के त्यो दिगो हो ?’ सरकारद्वारा गठित उच्चस्तरीय आर्थिक सुधार आयोगले भारु विनिमय दरको मूल्य निर्धारणका सन्दर्भमा अब बजारलाई छोड्न दिनुपर्ने आशयले सरकारलाई सुझाव दिएको थियो । आर्थिक सुधार आयोगको प्रतिवेदनअनुसार स्थिर विनिमय दर प्रणालीका कारण मौद्रिक नीतिको प्रभावकारितामा कमी रहेको स्थिति छ । यसैका कारण नेपाली अर्थतन्त्रमा व्याज दरमा बढी उतारचढाव आउने गरेको छ । व्याजदरमा आउने उच्च उतारचढाव, खास गरी व्याज दरको वृद्धिले दीर्घकालीन प्रकृतिको व्यवसायिक लगानी नकारात्मक ढंगले प्रभावित हुने गरेको छ । आन्तरिक उत्पादन बढाउन र निर्यात प्रवर्द्धन गर्न विनिमय दर नीतिले पनि महत्वपूर्ण भुमिका खेल्ने भन्दै आयोगले वास्तविक विनिमय दर अधिमूल्यन हुँदा निर्यात बढ्न नसक्ने र आयात बढी हुने गरेको बताएको छ । लामोसमयसम्म एउटै तहमा स्थिर विनिमय दर कायम गर्दा वास्तविक विनिमय दर अधिमूल्यन हुन जाने बताइएको छ । त्यसो त, विश्व बैंकले गरेका अध्ययनले नेपालको वास्तविक विनियम दर अधिमूल्यन भएको देखाएको छ । जब कुनै देशको मुद्रा बलियो हुन्छ । अर्थात, त्यो मुद्राले पहिलेभन्दा बढी विदेशी मुद्रा किन्नसक्छ । त्यसलाई विनियम दर अधिमूल्यन भनिने गरिएको छ ।
पूर्वप्रदेश प्रमुख राजेश अहिराजमाथि यौन दुर्व्यवहारको आरोप, प्रहरीले थाल्यो अनुसन्धान
काठमाडौं । मधेस प्रदेशका पूर्व प्रदेश प्रमुख राजेश झा (अहिराज) विरुद्ध यौन दुर्व्यवहारको आरोपमा प्रहरी अनुसन्धान अघि बढेको छ । काठमाडौं जिल्ला प्रहरी परिसर अन्तर्गत भद्रकालीस्थित महिला, बालबालिका तथा जेष्ठ नागरिक सेवा केन्द्र (महिला सेल) ले अहिराजविरुद्ध यौन दुर्व्यवहार सम्बन्धी उजुरीका आधारमा अनुसन्धान थालेको हो । परिसरका प्रवक्ता प्रहरी वरिष्ठ उपरीक्षक (एसपी) अपिलराज बोहराले उजुरी परेकाले आवश्यक अनुसन्धान भइरहेको जानकारी दिए । ‘दावी गरिएको घटनाको वास्तविकता के हो ? घटना भएको हो कि होइन ? निहित स्वार्थले आरोप लगाइएको पो हो कि भन्ने समेत हेर्दैछौं,’ उनले भने । हालसम्म अहिराजविरुद्ध औपचारिक रूपमा पक्राउ पुर्जी जारी भएकोरनभएको पुष्टि नभए पनि प्रहरीले सबै पक्षको बयान लिने र आवश्यक प्रमाण संकलनको प्रक्रिया अघि बढाएको जनाएको छ । राजेश अहिराज २०७६ सालमा मधेस प्रदेशका प्रदेश प्रमुखका रूपमा नियुक्त भएका थिए । राजनीतिक, प्रशासनिक र शैक्षिक क्षेत्रमा सक्रिय रहेका अहिराजमाथि लागेको आरोप पुष्टि भए–नभएको विषयमा प्रहरीले थप अनुसन्धान जारी राखेको छ ।
एभरेष्ट अस्पताललाई फोहोर व्यवस्थापन नगरेको भन्दै महानगरले तिरायो ५० हजार जरिवाना
काठमाडौं । काठमाडौं महानगरपालिकाले फोहर व्यवस्थापनमा लापरबाही गरेको भन्दै नयाँ बानेश्वरस्थित एभरेष्ट अस्पताललाई ५० हजार रुपैयाँ जरिवाना तिर्न आदेश दिएको छ । महानगरको वातावरण व्यवस्थापन विभागले अस्पतालबाट हानीकारक फोहर उचित तरिकाले व्यवस्थापन नगरेको, पटक–पटकको सूचनालाई बेवास्ता गरेको भन्दै ‘काठमाडौं महानगरपालिका वातावरण तथा प्राकृतिक स्रोत ऐन २०७७’ अनुसार जरिवाना गर्ने निर्णय गरेको हो । विभाग प्रमुख सरिता राईका अनुसार अस्पतालबाट निस्कने रासायनिक, औद्योगिक, स्वास्थ्यजन्य तथा अन्य जोखिमपूर्ण फोहर असावधानीपूर्वक व्यवस्थापन गरिएको भेटिएको थियो । ऐनको व्यवस्था अनुसार पहिलो पटक जथाभावी फोहर फाल्ने, राख्ने वा निष्कासन गरेमा ५० हजारदेखि १ लाख रुपैयाँसम्म जरिवाना गर्न सकिन्छ । सोही अपराध दोहोरिएमा पहिलेको जरिवानाको दोब्बर गरी कानुनी प्रक्रिया अघि बढाउने र अस्पतालको इजाजतसमेत खारेज गर्न सकिने प्रावधान छ । काठमाडौं महानगरपालिकाले फोहर व्यवस्थापनमा संवेदनशीलता अपनाउन सबै अस्पताल र स्वास्थ्य संस्थाहरुलाई सचेत गराउँदै पटक–पटक अवज्ञा भएमा कडाभन्दा कडा कारबाही गरिने चेतावनी दिएको छ ।
फोल्डेबल आईफोन अर्को वर्ष लन्च हुनसक्ने ! मूल्य कति पर्ला ?
काठमाडौं । सामसुङले आफ्ना फोल्डेबल फोनहरूको छैटौं पुस्ता बनाइसकेको छ । त्यसैगरी, ओप्पो,वनप्लस र गुगलले पनि आ–आफ्ना फोल्डेबल फोनहरू बजारमा ल्याइसकेका छन् । तर अहिलेसम्म एप्पलजस्तो ठूला ब्राण्डको फोल्डेबल फोनबारे कुनै ठोस जानकारी आएको छैन । यसबीचमा समाचारहरू आएका छन् कि सामसुङले एप्पलको सम्भावित फोल्डेबल फोनसँग जोडिएको एक ठूलो समस्या समाधान गरिदिएको छ । मानिसहरू एप्पलको फोल्डेबल फोनको तीव्र पर्खाइमा छन् । एप्पल प्रायः सबै कामहरू धैर्यपूर्वक र फरक तरिकाले गर्ने कम्पनीको रूपमा चिनिन्छ । एप्पलको फोल्डेबल फोन अन्य कम्पनीहरूका फोनभन्दा कति फरक र उत्कृष्ट होला भनी मानिसहरू उत्सुक छन् । सामसुङले दियो समाधान एप्पलले आफ्ना विभिन्न डिभाइसहरूमा सामसुङ, एलजी र बीओईको डिस्प्ले प्रयोग गर्छ । रिपोर्टअनुसार एप्पल चाहँदैन कि उसको फोल्डेबल फोनमा 'क्रीज' (बीचमा देखिने मोडिएको रेखा) देखियोस् । यो समस्या सामसुङले समाधान गर्न सफल भएको बताइएको छ । समाचारहरू अनुसार एप्पलको फोल्डेबल फोनमा ५.५ इन्चको ओलेड कभर डिस्प्ले हुनेछ । फोन खोल्दा यो ७.८ इन्चको हुनेछ । यो एक किताबको आकारको फोन हुनेछ । यो सामसुङको आगामी जेड फोल्ड ८ भन्दा पूरै फरक हुनेछ । अर्को वर्ष आउला त ? दावी गरिएको छ कि फोल्डेबल फोनको क्रीज समस्या समाधान गरेपछि अब एप्पलले उत्पादनमा ध्यान केन्द्रित गर्न सक्नेछ । विज्ञहरू आशा गरिरहेका छन् कि अर्को वर्षको सेप्टेम्बरमा हामीले नयाँ फोल्डेबल आईफोन देख्न सक्नेछौं । अर्कोतर्फ केही जानकारहरूको भनाइ छ कि आफ्नो २० औं वार्षिकोत्सवको अवसरमा एप्पलले यस्तो डिभाइस सार्वजनिक गर्न चाहन्छ । कति पर्न सक्छ मूल्य ? फोल्डेबल आईफोनको मूल्यबारे अहिले नै निश्चित केही भन्नु हतार हुनेछ, तर केही जानकारहरूका अनुसार यसको मूल्य २००० डलर (२७ हजार ५०० रुपैयाँ) भन्दा बढी हुन सक्छ । अहिलेको ट्यारिफ र बजार परिस्थितिका कारण यसको मूल्य अझै बढी हुन सक्छ । यति त पक्का छ कि एप्पलले आफ्ना फोल्डेबल फोनको राम्रै मूल्य ग्राहकबाट लिनेछ । केही समयअघि एप्पलले भिजन प्रो बजारमा ल्याएको थियो, जसको मूल्य ३ हजार डलर (४ लाख १३ हजार रुपैयाँ) भन्दा बढी थियो । यस्तोमा फोल्डेबल आईफोनको मूल्य अनुमान लगाउन सकिन्छ ।
रास्वपाको केन्द्रीय समिति बैठक बिहीबार बस्ने
काठमाडौं । राष्ट्रिय स्वतन्त्र पार्टी (रास्वपा) ले आगामी महाधिवेशन, संगठन सुदृढीकरण र समसामयिक राजनीतिक अवस्थाबारे छलफल गर्न केन्द्रीय समिति बैठक आह्वान गरेको छ । कार्यबाहक सभापति डीपी अर्यालको आह्वानमा बिहीबार दिउँसो २ बजे बनस्थलीस्थित पार्टी केन्द्रीय कार्यालयमा बैठक बस्ने कार्यक्रम तय गरिएको छ । कार्यबाहक प्रवक्ता मनिष झाका अनुसार बैठकमा अघिल्लो बैठकका निर्णय, पार्टी गतिविधि, सदस्यहरूको रिपोर्टिङ तथा समसामयिक घटनाक्रममाथि गहिरो छलफल हुने छ । साथै महाधिवेशनको कार्यतालिका, ब्लुप्रिन्ट कार्यदल, लिडरशिप एकेडेमी, संगठन सबलीकरण तथा प्रशिक्षण कार्यक्रमको विशेष प्रस्तुति पनि बैठकको एजेन्डामा समावेश गरिएको छ । रास्वपाले पार्टीभित्रको सांगठनिक संरचना मजबुत बनाउन र जनतामाझको उपस्थिति अझ प्रभावकारी बनाउने रणनीति अन्तर्गत यी कार्यक्रम अघि सारेको जनाएको छ ।
ओपनएआईले सामाजिक सञ्जाल प्लेटफर्म ल्याउँदै, फेसबुक र इन्स्टाग्रामलाई टक्कर दिने !
काठमाडौं । सामाजिक सञ्जाल प्लेटफर्मको रूपमा फेसबुक, इन्स्टाग्राम, एक्स (पूर्व ट्वीटर) र टीकटोक जस्ता एप्सले बजारमा प्रभुत्व जमाएका छन् । तर चाँडै नै ओपनएआईले यी एपहरूलाई चुनौती दिन सक्छ । ओपनएआई जसले लोकप्रिय एआई टुल च्याटजीपीटी विकास गरेको हो । मिडिया रिपोर्टहरूका अनुसार ओपनएआई एक यस्तो सामाजिक सञ्जाल प्लेटफर्ममा काम गरिरहेको छ, जसमा एआई सुविधाहरू समावेश गरिनेछन् । भनिन्छ- यो एउटा यस्तो एप हुनेछ जसले फेसबुक-इन्स्टाग्रामजस्ता प्लेटफर्मलाई टक्कर दिनेछ । यो एप पनि च्याटजीपीटीमा आधारित हुनसक्छ । एलन मस्कलाई पनि टक्कर ! द भर्जको एक रिपोर्टअनुसार ओपनएआई पनि एक्सजस्तै सामाजिक सञ्जाल निर्माण गर्ने योजनामा छ । एक्स पहिले ट्वीटर थियो, जसलाई एलन मस्कले किनेर नाम परिवर्तन गरेका हुन् । भनिन्छ, ओपनएआईले यसको प्रोटोटाइप (नमूना) तयार गरिसकेको छ, जसमा च्याटजीपीटीको क्षमताहरू समावेश छन् । एपमा पब्लिक फिड पनि हुनेछ, जहाँ मानिसहरूले आफ्ना भावना अभिव्यक्त गर्न सक्नेछन् । ओपनएआईका सीईओ साम अल्टम्यान यस प्रोजेक्टप्रति गम्भीर रहेको बताइएको छ । उनले विभिन्न व्यक्तिहरूसँग एपबारे सल्लाह लिइरहेका छन् र उद्योग क्षेत्रका केही विशेषज्ञहरूबाट पनि प्रतिक्रिया मागिएको छ । तर अहिलेसम्म यो स्पष्ट छैन कि कम्पनीले नयाँ एप सार्वजनिक गर्नेछ वा च्याटजीपीटीमै सामाजिक सञ्जालको फिचर समावेश गर्नेछ । फेसबुक-इन्स्टाग्रामभन्दा फरक हुने एप रिपोर्टहरू अनुसार ओपनएआईले विकास गरिरहेको एप फेसबुक र इन्स्टाग्रामभन्दा फरक अनुभव दिनेछ । फेसबुक र इन्स्टाग्राममा एआईको प्रयोग गरिएको भए पनि ओपनएआईको एपमा एआई सामाजिक अनुभवहरूको केन्द्रमा हुनेछ । यसमा जनसाधारणभन्दा बढी एआईको प्रभाव देखिनेछ । मेटा पनि तयारीमा भनिन्छ मेटालाई पनि ओपनएआईबाट हुने चुनौतीको आभास भइसकेको छ । त्यसैले फेब्रुअरीमै खबर आएको थियो कि मेटा एआई एपमा काम गरिरहेको छ । यदि दुवै एप सार्वजनिक भएमा ती आपसमा प्रत्यक्ष प्रतिस्पर्धामा आउनेछन् । यसले प्रयोगकर्ताहरूलाई एआई-सामाजिक सञ्जालको नयाँ संसारमा छिरी प्रयोग गर्ने अवसर दिनेछ । नयाँ सुविधाहरू आउनेछन्, जसले प्रयोगकर्ताको अनुभव दुईगुना बनाउनेछ । ओपनएआईको चुनौती मस्कलाई भारी ओपनएआईबाट आइरहेको चुनौती एलन मस्कलाई मन परेको देखिँदैन । उनले साम अल्टम्यान र ओपनएआईको पटक–पटक आलोचना गरिसकेका छन् । एलन मस्कले अल्टम्यानको कम्पनी किन्ने प्रयास पनि गरेका थिए । त्यसको जवाफमा अल्टम्यानले एक्स (पूर्व ट्वीटर) किन्ने प्रस्ताव दिएका थिए ।
फोनपे र टपअप गरौं, आइफोन १६ जितौं : कुमारी बैंक
काठमाडौं । कुमारी बैंक लिमिटेडले नयाँ वर्ष २०८२ को अवसरमा 'टपअप र फोनपे डाइरेक्ट गरौं, बम्पर उपहार जितौं !' नामक उपहार योजना सार्वजनिक गरेको छ । यो योजनामा सहभागी भई ग्राहकहरूले आकर्षक बम्पर उपहारसहित साप्ताहिक मोबाइल रिचार्ज जित्ने मौका पाउनेछन् । बैंकका अनुसार, योजनाअन्तर्गत सहभागी हुन ग्राहकले कम्तीमा १०० रुपैयाँको मोबाइल टपअप र ५०० रुपैयाँको फोनपे डाइरेक्ट कारोबार अफर अवधिभित्र पूरा गर्नुपर्नेछ । त्यसपछि ग्राहकहरू बम्पर उपहार आइफोन १६ जित्न स्वतः योग्य हुनेछन् । यो योजना वैशाख १ गतेदेखि ३१ गतेसम्म सञ्चालन हुनेछ । अफर अवधिभर प्रत्येक हप्ता १०० जना ग्राहकले १०० रुपैयाँ बराबरको मोबाइल रिचार्ज उपहारस्वरूप प्राप्त गर्नेछन् । योजना समाप्तिपछि एक जना विजेताले बम्पर उपहारका रूपमा आइफोन १६ जित्ने अवसर पाउनेछ । कुमारी बैंकले ग्राहकलाई डिजिटल बैंकिङ सेवा तर्फ आकर्षित गर्ने उद्देश्यले ल्याइएको यो योजनाले मोबाइल टपअप र फोनपे डाइरेक्ट प्रयोगलाई थप प्रवद्र्धन गर्ने विश्वास लिएको छ । बैंकका अनुसार, कुमारी स्मार्ट मोबाइल बैंकिङ एपमार्फत सुरक्षित, सहज र भरपर्दो डिजिटल कारोबारलाई प्रोत्साहन दिने यो योजना बैंकको डिजिटल पहुँच विस्तार गर्ने रणनीतिक प्रयास हो ।
