काठमाडौं । चालु आर्थिक वर्ष २०७८/७९ को पहिलो पाँच महिनामा (साउनदेखि मंसिरसम्म) आयात सँगै निर्यातमा समेत बृद्धि भएको छ । भन्सार विभागले सार्वजनिक गरेको तथ्यांक अनुसार आयातसँगै निर्यातमा बृद्धि भएको हो ।
विभागले सार्वजनिक गरेको तथ्यांक अनुसार पहिलो ५ महिनामा नेपालबाट भारत लगायत तेस्रो मुलकमा हुने निर्यात १०५.६१ प्रतिशतले बढेको छ । यस्तै गत आर्थिक वर्षको सोही अवधिको तुलनामा ५ महिनाको अवधिमा आयात ५९.५५ प्रतिशतले बढेको छ ।
५ महिनाको अवधिमा नेपालबाट १ खर्ब २ अर्ब ९२ करोड रुपैयाँ बराबरको सामान निर्यात भएको भन्सार विभागको तथ्यांकमा उल्लेख छ । गत आर्थिक वर्षको सोही अवधिमा नेपालबाट ५० अर्ब ५ करोड रुपैयाँ बराबरको सामान निर्यात भएको थियो ।
यस्तै चालु आर्थिक वर्षको पाँच महिनामा नेपालमा ८ खर्ब ३८ अर्ब ४० करोड ८२ लाख रुपैयाँको सामान आयात गरिएको छ । गत आवको सोही अवधिमा ५ खर्ब २५ अर्ब ४९ करोड रुपैयाँ बराबरको विदेशी वस्तुको आयात भएको थियो ।
यस्तै, चालु आवको ५ महिनामै नेपालको वैदेशिक व्यापार पनि ६३.५५ प्रतिशतले बढेको छ । चालु आवको ५ महिनामा नेपालको कुल वैदेशिक व्यापार ९ अर्ब ४१ अर्ब ३२ करोड ८८ लाख रुपैयाँ बराबरको पुगेको भन्सार विभागले जनाएको छ ।
गत आवको सोही अवधिमा नेपालको कुल वैदेशिक व्यापार ५ अर्ब ७५ अर्ब ५५ करोड रुपैयाँ बराबरको थियो ।
५ महिनाको तुलनामा व्यापार घाटा पनि ५४.७० प्रतिशले बढेको छ । ५ महिनामा नेपालले ७ खर्ब ३५ अर्ब ४८ करोड रुपैयाँ बराबरको वैदेशिक व्यापार घाटा व्यहोरेको छ । गत आवको सोही अवधिमा नेपालको कुल वैदेशिक व्यापार घाटा ४ खर्ब ७५ अर्ब ४४ करोड रुपैयाँ थियो ।
