बुधबार पनि बढ्यो सेयर बजार, नेप्से परिसूचकले नाघ्यो १८००
काठमाडौं, १९ असोज । यो साता सेयर बजार लगातार बढिरहेको छ । बुधबार पनि नेप्से परिसूचक ८ दशमलब १० अंकले बढेर १८०६ दशमलब ६० अंकमा पुगेको छ । यो साताभरिकै उच्च अंक हो । सो दिन १३२ कम्पनीको १० लाख कित्ता सेयर ९२ करोड ८४३ लाख रुपैयाँमा किनबेच भएको छ । मंगलबारको तुलनामा आज कारोबार रकममा भने गिरावट भएको छ । बुधबार बजारमा बैंक अफ काठमाडौं लुम्विनीको सबैभन्दा बढी २९ करोड रुपैयाँ बराबरको सेयर कारोबार भएको छ । सो दिन बैंकको सेयर मूल्य ७८७ रुपैयाँ रहेको छ । त्यस्तै, एभरेष्ट बैंकको १० करोड रुपैयाँको सेयर किनबेच भएको छ । सो दिन सबैभन्दा बढी कालिका माइक्रो क्रेडिट डेभलपमेन्ट बैंकका लगानीकर्ताले १० प्रतिशत कमाएका छन् । त्यस्तै, सेवा विकास बैंक, कुमारी बैंक र ज्योति विकास बैंकका लागानीकर्ताले करिब १० प्रतिशत कमाएका छन् । सबैभन्दा बढी सानिमा माइ हाइड्रोपावरका लागानीकर्ताले करिब ८ प्रतिशत गुमाएका छन् । सो दिन उत्पादनमूलक, हाइड्रोपावर र बीमा समूहको परिसूचक बाहेक अन्य बाकी समूहको परिसूचक उकालो लागेका छन् । होटल, बैंकिङ्, विकास बैंक, फाइनान्स र अन्य समूहको परिसूचक क्रमशः ५८, १३, ४.८३, ४.६१ र २ अंकले बढेका छन् ।
एप्पल वल्र्डको ‘दशैंतिहार डबल अफर’ योजना, टिभीदेखि स्कुटरसम्मको उपहार
काठमाडौं, १९ असोज । एप्पल वल्र्ड मोबाइलले मोबाइल खरीद गर्ने ग्राहकलाई “दशैंतिहार डबल अफर”उपहार योजना ल्याएको छ । राजधानीको दरबारमार्गस्थित मर्कन्टाइल प्लाजामा रहेको उक्त वल्र्ड मोबाइलले बडा दशैं तथा दिपावलीको अवसर पारेर उक्त योजना ल्याएको हो । एप्पल वल्र्डका मेनेजर आरपी सिंहका अनुसार एप्पल वल्र्डले ग्राहकहरुमध्ये एक जनालाई प्रथम पुरस्कार स्वरुप यामाहाको फसिनो स्कुटर, दोस्रो पुरस्कार सामसुङको ४० इञ्चको एलइडी टेलिभिजन र तेस्रो पुरस्कारमा हुवावेको पि९ स्मार्टफोन बितरण प्रदान गर्ने जनाएका छन् । यसैगरि, सान्त्वना पुरस्कार स्वरुप नेपालमा उपलब्ध सबै मोबाइल कम्पनीहरुका एक/एक सेट वितरण गरिने मेनेजर सिंहले बताए । विभिन्न मोबाइल कम्पनीहरुले दिएका विभिन्न अफर, स्क्र्याच, लक्की ड्र सँगै एप्पल वल्र्डले पनि आफ्ना ग्राहकहरुलाई थप अफर दिएर डबल अफर बनाएको सेल्स मेनेजर दिपिका थापा मगरले जानकारी दिइन् । यसका अलावा एलजीको एल६०, एलबेलो, इन्टेक्सको स्टार २ लगायताका बिभिन्न कम्पनीका भिन्न मोबाइल सेटमा ५० प्रतिशत सम्म छुट गरेको र यो छुट योजना स्टक रहुन्जेल सम्म लागू हुने एप्पल वल्र्डले जनाएको छ । एक्सक्लुसिभ सोरुम मार्फत लेटेस्ट र ब्राण्डेड मोबाइलको कारोबार र मोबाइल एक्सचेन्जमा ख्याती कमाएको एप्पल वल्र्डले ६० मिनेट केयर सर्भिस पनि सँचालनमा ल्याएको छ । दरबारमार्गस्थित मर्कन्टाइल प्लाजाको पहिलो तल्लामा रहेको मल्टिब्राण्ड सोरुमबाट मोबाइलको अनलाइन कारोबार पनि गरिरहेकोले समय अभाव हुनेहरुलाई अनलाइन मार्फत फाइदा लिन समेत आग्रह गरेको छ ।
प्रमोटर सेयर प्रमोटर बाहेकलाई बिक्री गर्न राष्ट्र बैंकले ल्यायाे अझ कडा नियम
काठमाडौं, १९ असोज । नेपाल राष्ट्र बैंकले बैंक तथा वित्तीय संस्थाको प्रमोटर सेयर प्रमोटरको विचमा मात्रै विक्री गर्नुपर्ने बाध्यकारी र प्रष्ट ब्यवस्था गरेको छ । यसअघि प्रमोटर सेयर प्रमोटर वाहेकलाई पनि विक्री गर्न सकिन्छ कि भन्ने अस्पष्ट ब्यवस्थाको कारण धितोपत्र वोर्ड र राष्ट्र बैंक विच सामन्जस्यता नहुने अवस्था आएपछि राष्ट्र बैंकले प्रष्ट ब्यवस्था गरेको हो । राष्ट्र बैंकले केही दिन अगाडि मात्रै सार्वजनिक गरेको एकिकृत निर्देशनमा प्रमोटर सेयर प्रमोटरका विचमा मात्रै कारोवार गर्न पाइने प्रष्ट ब्यवस्था गरेको छ । ‘मृत्यु भई वा प्रचलित कानुन बमोजिम पारिवारिक अंशवन्डा भई हक हस्तान्तरण भएको बाहेक अन्य अवस्थामा संस्थापकले आफ्नै समुहका संस्थापकलाई मात्र सेयर नामसारी वा बिक्री गर्नु पर्नेछ,’ एकिकृत निर्देशनको ‘संस्थापक तथा संस्थापक समुहको सेयर नामसारी वा बिक्री सम्बन्धमा’ जारी गरिएको निर्देशनको खण्ड (ग) मा उल्लेख गरिएको छ । राष्ट्र बैंकका अनुसार सो ब्यवस्था बमोजिम संस्थापक समुहमा सेयर नामसारी वा बिक्री हुन नसक्ने अवस्था भएमा मात्र अन्य व्यक्ति वा संस्थालाई यस निर्देशनका अधिनमा रही सेयर नामसारी वा बिक्री गर्न सकिने छ । यसरी संस्थापक समुहको सेयर नामसारी वा खरिद गरी लिने व्यक्ति वा संस्था संस्थापक समुहमा नै समावेश हुनेछन् । बैंक तथा वित्तीय संस्थाले आफ्ना सेयरधनीको सेयर खरिद/बिक्री वा नामसारी गर्नुपुर्व राष्ट्र बैंकको स्वीकृति लिनु पर्नेछ । स्वीकृतिको लागि सञ्चालक समितिको सिफारिस सहित यस बैंकमा आवेदन गर्नुपर्नेछ । यस्तै संस्थापक संस्थापक बीचमा सेयर खरिद/बिक्री भएमा प्रचलित कानुनको रित पु¥याई खरिद/बिक्री गरी सो को जानकारी १५ दिनभित्र यस बैंकलाई दिनु पर्नेछ । तर, चुक्ता पुँजीको दुई (२) प्रतिशतभन्दा बढी हुनेगरी संस्थापक सेयर खरिद गर्न चाहेमा संस्थापक संस्थापक बीचमा सेयर खरिद÷बिक्री गर्न वा हकप्रद शेयरको हक हस्तान्तरण गर्न राष्ट्र बैंकको स्वीकृति लिनुपर्नेछ । तर कर्जा सुचना केन्द्रको कालोसूचीमा परी सो सूचीबाट फुकुवा भएको मितिले कम्तीमा तीन वर्ष नपुगेको, सम्बन्धित बैंक तथा वित्तीय संस्थाको आन्तरिक वा बाह्य लेखापरिक्षकमा नियुक्त रहेको, सम्बन्धित बैंक तथा वित्तीय संस्थाको कानुनी वा अन्य सल्लाहकार पदमा बहाल भएको, सम्बन्धित बैंक तथा वित्तीय संस्थासँग कुनै किसिमको ठेक्का पट्टामा हिस्सेदार रहेको, प्रचलित कानुन बमोजिम कर चुक्ता नगरेको वा स्थायी करदाता लेखा नम्बर नियमित नगरेको, कुनै बैंक वित्तीय संस्थाको काम कारवाहीमा बेइमानी वा बदनियत गरेको कुरा अदालतबाट प्रमाणित भएको, धितोपत्र दलाल वा बजार निर्माता, सहकारी संस्था, सम्बन्धित बैंक वित्तीय संस्थाबाट कर्जा लिएको वा वित्तीय स्वार्थ रहेको जस्ता ब्यक्ति र संस्थालाई प्रमोटर सेयर विक्री गर्न भने प्रतिबन्द लगाइएको छ । यस्तै चुक्ता पुँजीको पन्ध्र प्रतिशत भन्दा कम सेयर लिएको सेयरधनीले थप सेयर नामसारी वा खरिद गरी लिँदा निजको स्वामित्वमा उक्त संस्थाको चुक्ता पुँजीको पन्ध्र प्रतिशत भन्दा बढी सेयर स्वामित्व हुने अवस्था भएको, वा फर्म, कम्पनीको हकमा विगत २ वर्षदेखि सञ्चित मुनाफामा सञ्चालनमा नरहेको जस्ता कैफियत भएकालाई पनि प्रमोटर सेयर विक्री गर्न पाइने छैन ।
चन्द्रागिरि केबलकार दशैँको टिकाको दिन बाहेक अन्य दिन सञ्चालनमा आउने
काठमाडौं, १९ असोज । साउन २४ गतेदेखि सञ्चालनमा आएको चन्द्रागिरि केबलकार विजयादशमी टिकाको दिन अर्थात असोज २५ गते एक दिन मात्र बन्द हुने कम्पनीले जनाएको छ । कम्पनीका अनुसार अन्य विदाका दिनमा बिहान ९ बजेदेखि साँझ ५ बजेसम्म केबलकार यथावत संचालनमा आउने छ । साथै सेवाग्राहीको सुविधाका लागि सञ्चालित रेष्टुरेन्ट, बार, बाल उधान लगायतका सेवाहरु समेत सुचारु हुनेछन् ।
आइएमएफको बैठकमा भाग लिन गभर्नर डा. नेपाल अमेरिका गए, टिका थाप्न नेपाल फर्कने
काठडमाडौं, १९ असोज । नेपाल राष्ट्र बैंकका गभर्नर डा. चिरंजीबि नेपाल अन्तर्राष्ट्रिय मुद्रा कोष (आइएमएफ) तथा विश्व बैंकको संयुक्त आयोजनामा अमेरिकाको वासिङ्गटन डिसीमा आयोजना हुने बैठकमा सहभागी हुन त्यसतर्फ प्रस्थान गरेका छन् । असोज २१ देखि २३ सम्म आयोजना हुने ‘विश्व बैंक तथा अन्तराष्ट्रिय मुद्राकोषको बार्षिक बैठक’ मा सहभागी हुन असोज १८ गते मंगलबार साँझ त्यसतर्फ प्रस्थान गरेका हुन् । आ–आफ्नो संस्थाहरुका नीति तथा कार्यक्रमका बारेमा छलफल गर्न आइएमएफ बोर्ड अफ गभर्नर्स तथा विश्व बैंकको बोर्ड अफ गभर्नर्स सामान्यतया बर्षमा एक पटक बैठक गर्ने परम्परा अनुसार यो कार्यक्रम आयोजना हुन लागेको हो । कार्यक्रममा १ सय ८८ सदस्य राष्ट्रका अर्थ मन्त्रालय, केन्द्रीय बैंक, प्राज्ञिक क्षेत्र तथा निजी क्षेत्रका प्रतिनिधिहरुको सहभागिता रहने छ । कार्यक्रममा सदस्य राष्ट्रका प्रतिनिधिहरुले विश्व अर्थ व्यवस्था, अन्तर्राष्ट्रिय विकास तथा क्षेत्रीय सहकार्य लगायतका आर्थिक विषयहरुमा छलफल गर्नेछन् । गभर्नर डा. नेपाल बार्षिक बैठकका साथै उक्त बैठकको साइडलाइनमा आयोजना हुने ३३ औं सार्क फाइनान्स ग्रुप बैठकमा समेत सहभागी हुनेछन् । दक्षिण एशियाली क्षेत्रीय सहयोग संगठन (सार्क( का सदस्य मुलुकहरुका गभर्नर र अर्थ सचिव सदस्य रहने सार्क फाइनान्सको बैठकमा सदस्य मुलुकहरुको आपसी हितका बारेमा छलफल हुनेछ । अमेरिकामा रहँदा डा. नेपाल विभिन्न सामूहिक छलफलका साथै अन्तराष्ट्रिय मुद्रा कोषका डेपुटी म्यानेजिङ्ग डाइरेक्टर लगायत कोषका विभिन्न विभागका अधिकारीहरूसँग द्विपक्षीय भेटवार्ताहरुमा समेत सहभागी हुने कार्यक्रम रहेको नेपाल राष्ट्र बैंकले जानकारी दिएको छ । कार्यक्रममा भाग लिन गभर्नर डा. नेपालका साथ गभर्नरको कार्यालयका निर्देशक राजेन्द्र पण्डित समेत त्यसतर्फ प्रस्थान गरेका छन् । कार्यक्रममा सहभागी भई गभर्नर डा. नेपाल असोज २४ गते नेपाल फर्कने कार्यक्रम रहेको छ । दसैंकाे टिकाकाे अघिल्लाे दिन उनी नेपाल अाइपुग्नेछन् ।
पहिरोले आँबुखैरेनी–मुग्लिन सडकखण्ड अवरुद्ध
गोरखा, १९ असोज । तनहुँको आँबुखैरेनी नगरपालिकास्थित ऐनापहरा नजिक पहिरो खसेपछि बुधबार बिहान ८ बजेदेखि पृथ्वी राजमार्गको आँबुखैरेनी–मुग्लिन सडकखण्ड अवरुद्ध हुँदै आएको छ । गएराति परेको वर्षाका कारण बिहान पहिरो झरेको हो । पहिरोमा यात्रुवाहक, मालवाहक गाडी परे/नपरेको यकिन भइसकेको छैन । इलाका प्रहरी कार्यालय आँबुखैरेनीका प्रहरी निरीक्षक रमेश श्रेष्ठका अनुसार अहिले पहिरो हटाउने काम भइरहेको छ । “सडकमा ठूलो पहिरो झरेको छ” उनले भने, “पहिरो हटाउन तीनवटा डोजर परिचालन गरेका छौँ ।” स्काभेटरको अभावले गर्दा पहिरो हटाउन समस्या भएको श्रेष्ठले बताए । पहिरोले सडक अवरुद्ध भएपछि पृथ्वी राजमार्गको आँबुखैरेनी–मुग्लिन खण्डमा लामो सवारी चाप परेको छ । पहिरोले पोखरा र गोरखा क्षेत्रको आवतजावत ठप्प हुँदा यात्रु अलपत्र भएका छन् । पहिरो खुलाउन कम्तीमा चार घन्टा लाग्ने श्रेष्ठले बताए । पहिरोले करिब २०० मिटर सडक अवरुद्ध बनाएको हो । रासस
सुर्या लाइफ इन्स्योरेन्सको सञ्चालकमा विशाल अग्रवाल नियुक्त
काठमाडौं, १९ असोज । सुर्या लाइफ इन्स्योरेन्स कम्पनीको सञ्चालकमा विशाल अग्रवाल नियुक्त भएका छन् । मंगलबार बसेको कम्पनी सञ्चालक समितिको बैठकले अग्रवाललाई आगामी एक कार्यकालका लागि सञ्चालकमा नियुक्त गरेको हो । अग्रवालको कार्यकाल असोज १८ गतेबाट शुरु भएको छ । नियुक्त भएको दिन देखि नै अग्रवालले इन्स्योरेन्सको सञ्चालकको जिम्मेवारी सम्हाली सकेका छन् ।
लगानीलाई प्रोत्साहन गर्ने नयाँ नीति, पूर्वाधार क्षेत्रको विकास गर्न मद्धत पुग्ने
काठमाडौं, १९ असोज । सन् २०२२ सम्म देशलाई विकाशोन्मुख राष्ट्रमा उपान्तरण गर्ने लक्ष्य सहित पूर्वाधार क्षेत्रको विकासमा लगानीलाई प्रोत्साहन गर्न सरकारले सार्वजनिक–निजी साझेदारी नीति २०७२ ल्याएको छ । नेपालमा पूर्वाधार सेवाको विकास तथा विस्तार गर्न सार्वजनिक पूर्वाधार तथा सेवाहरुको गुणस्तरीय दीगो विकासका लागि सार्वजनिक र निजी क्षेत्रको लगानी अभिवृद्धि गर्ने रणनीति नीतिले लिएको छ । केही समयअघि पारित भएको उक्त नीतिले नेपालको सामाजिक र आर्थिक विकासमा सहयोग मिल्ने अर्थ मन्त्रालयका सह सचिव लक्ष्मण अर्यालले बताए । मुलुकको सार्वजनिक पूर्वाधार तथा सेवाहरुको निर्माण, स्तरोन्नति, आधुनिकीकरण तथा सञ्चालनमा निजी क्षेत्रमा उपलब्ध आर्थिक स्रोत–साधन, व्यवसायीक कुशलता, उद्यमशीलता, क्षमता एवम् नविनतम प्रविधिको प्रयोग गरी आर्थिक विकासमा आर्कषण गरी स्तरीय सेवा प्रवाह गर्नका लागि नयाँ नीति आवश्यक भएको मन्त्रालयको धारणा छ । पर्याप्त तथा गुणस्तरयुक्त पूर्वाधारसेवाहरु उपलब्ध गराउन कुल गार्हस्थ्य उत्पादनको ३ देखि ४ प्रतिशत पूर्वाधार क्षेत्रमा गरिरहेको लगानीको व्यापक वृद्धिको लागि राज्यकोषमा आवश्यक सुधार तथा सरकारको एकल लगानीमात्र पर्याप्त नहुने हुँदा निजी क्षेत्रको लगानी गरी सार्वजनिक हितमा लगाउन नीति उपयोगी बन्ने बताइएको छ । सार्वजनिक पूर्वाधार तथा सेवाहरुको विकास, पुनर्निमाण तथा सञ्चालनको क्षेत्रमा आवश्यक पूँजी, साधन स्रोत निजी क्षेत्रबाट परिपूर्ति गर्न निजी लगानी आकर्षित हुने वातावरण सिर्जना गर्नु नीतिको मुख्य उद्देश्य भएको अर्यालले बताए । सार्वजनिक–निजी साझेदारी सम्बन्धी अन्तर्राष्ट्रिय रुपमा प्रचलित सिद्धान्त तथा मान्यताहरुलाई राज्यका सम्पूर्ण सम्भावित क्षेत्र, संयन्त्र, अङ्ग तथा निकायहरुको प्रवद्र्धन गर्ने नीतिले नीतिगत व्यवस्था गरेको छ । सार्वजनिक–निजी साझेदारी अवधारणा अनुरुप कार्यान्वयन गर्न सकिने पूर्वाधार र सेवाहरु पहिचान गरी प्राथमिकता निर्धारण गर्ने नीतिको रणनीति लिएको छ । पीपीपी मोडेलमा कार्य गर्नको लागि सार्वजनिक निकायले नीतिगत, कानुनी, संस्थागत र आर्थिक व्यवस्थाको माध्यमबाट निजी क्षेत्रको लगानीलाई सहज बनाउने वातावरण सिर्जना गर्नु नीतिको कार्यनीति रहेको छ । यस मोडेलअनुसार सार्वजनिक निर्माण तथा सेवा प्रवाहको लागि निजी निकायको एक निश्चित अंश लिई आफ्नो लगानीको प्रतिफल प्राप्त गर्ने आधार सुनिश्चित पहिलानै गरिनुपर्ने व्यवस्था नीतिले लिएको छ । पूर्वाधार निर्माण तथा सञ्चालनको समयमा कुनै भवितव्य तथा असामान्य अवस्था सिर्जना भई ठूलो नोक्सानी भएमा वा सम्झौता परिपालन गर्न असमर्थ भएमा त्यसबाट पर्ने जोखिम व्यहोर्न निश्चित मापदण्ड र आधार आयोजना सम्झौता गर्दाकै अवस्थामा सनिश्चित गरिन पर्ने नीतिमा उल्लेख गरिएको छ । निजी निकायले निर्माण तथा सञ्चालन गरेको पूर्वाधार सेवा सम्बन्धी आयोजना सम्झौतामा तोकिएको समयपछि त्यो सम्पत्ति, पूर्वाधार तथा सेवा सार्वजनिक निकायको स्वामित्व र सञ्चालनमा आउने छ । आयोजनाको सम्झौता अवधि स्पष्ट निर्धारण गरिएको हुनुपर्ने छ । पूर्वाधार क्षेत्रमा निजी क्षेत्रको पूर्ण तथा आंशिक लगानी हुनुपर्दछ । निजी निकायलाई पूर्वनिर्धारित मापनयोग्य मानक (बेञ्चमार्क) अनुुसारको कार्य सम्पादनसँग आवद्ध भुक्तानीको व्यवस्था भएको हुनपर्ने नीतिगत विशेषता रहेको छ । त्यसैगरी निजी क्षेत्रबाट पूर्ण वा आशिंक रुपमा आम्दानकिो जोखिम व्यहोर्ने व्यवस्था स्वीकार गर्नु वाध्यकारी विशेषता नीतिले लिएको छ । सार्वजनिक –निजी साझेदारीका आयोजनका स्वरुपहरुमा एकातिर निजी लगानी विनाको सार्वजनिक सम्पत्ति प्रयोग गरे वापत निकायले रोयल्टी र भाडा वापतको शुल्क वेहोर्ने वा नवेहोर्ने गरी निजी निकायलाई सञ्चालन तथा व्यवस्थापनको सम्पूर्ण जिम्मा दिइएको हुनेछ । त्यस्तै अधिकतम निजी लगानी लाग्ने आयोजनाको डिजाइन, निर्माण, स्वामित्व, सञ्चालन तथा स्वामित्व हस्तान्तरण सम्मका कार्यहरु आयोजनभित्र पर्ने नीतिले व्यवस्था गरेको छ । त्यसैगरी नयाँ नीतिले यी अवधारण अन्तर्गत अन्य स्वरुपहरुमा सेवा करार तथा साझेदारी करारको समेत व्यवस्था गरेको छ ।
