बैंकमा संस्थागत निक्षेप ४८ प्रतिशत, सर्वसाधारणकाे बचतमा अझै व्याज बढाउन बैंकहरु माथि दवाव
काठमाडौं । बैंकिङ प्रणालीमा रहेको कुल निक्षेप मध्ये करिब आधा मात्र व्यक्तिगत बचत रहेको छ । बैंकिङ क्षेत्रमा कुल २४ खर्ब १० अर्ब ३८ करोड रुपैयाँ मध्ये १२ खर्ब ७६ अर्ब १६ करोड रुपैयाँ व्यक्तिगत निक्षेप रहेको नेपाल राष्ट्र बैंकले जनाएको छ । कुल निक्षेपकाे ४८ प्रतिशन बचत संस्थागत रहेकाे छ । नेपाल राष्ट्र बैंकले बैंक तथा वित्तीय संस्थाहरूलार्इ संस्थागत निक्षेप ४५ प्रतिशतमा झर्न निर्देशन दिएकाे छ । समग्र वित्तीय प्रणालीमा नै ४८ प्रतिशत निक्षेप संस्थागत भएकाेले बैंकहरूलार्इ संस्थागत निक्षेप ४५ प्रतिशतभन्दा कम बनाउन र सर्बसाधारणकाे निक्षेप ५५ प्रतिशत भन्दा माथि लैजानु चुनाैतिपूर्ण काम भएकाे छ । सर्वसाधारण निक्षेपकर्तालाई अझै व्याज बढाउन बैंकहरु माथि दवाव पर्ने देखिएको छ । गत साउनमा मात्रै ७ अर्ब रुपैयाँ बढी व्यक्तिगत निक्षेप थपिदा पनि संस्थागत निक्षेपकाे हिस्सा उच्च देखिएकाे छ । साउन मसान्तसम्ममा बीमा कम्पनी, कर्मचारी संचय कोष र नागरिक लगानी कोषको गरी ३ खर्ब ५३ अर्ब ९४ करोड रुपैयाँ बैंकिङ प्रणालीमा छ । विदेशी निक्षेप ९६ अर्ब रुपैयाँ पुगेको नेपाल राष्ट्र बैंकले जनाएको छ । सरकारी संस्थानको २ खर्ब ४५ अर्ब ९५ करोड, गैरसरकारी संस्थाको १ खर्ब ९३ अर्ब ८० करोड, अन्तर बैंक निक्षेप ८१ अर्ब र गैरनाफा मुलक संस्थाको ८९ अर्ब ४१ करोड रुपैया निक्षेप रहेको राष्ट्र बैंकले जनाएको छ । समीक्षा अवधिमा बैंक तथा वित्तीय संस्थाको निक्षेप १.३ प्रतिशतले बढेको छ । अघिल्लो वर्षको सोही अवधिमा यस्तो निक्षेप ०.१ प्रतिशत मात्र बढेको थियो । वार्षिक बिन्दुगत आधारमा ०७४ साउन मसान्तमा बैंक तथा वित्तीय संस्थाको निक्षेप १५.३ प्रतिशतले बढेको छ । ०७४ साउनमा बैंक तथा वित्तीय संस्थाहरूको कुल निक्षेपमा चल्ति, बचत र मुद्दतीको अंश क्रमशः ७.८, ३५.३ र ४३.२ प्रतिशत छ । अघिल्लो वर्र्षको सोही महिनामा यस्तो अंश क्रमशः ८.५, ४३.८ र ३०.५ प्रतिशत थियो । निक्षेप बढेपछि बजारमा तलरताको अवस्थामा सुधार आएको छ । तरलता बढी भएपछि राष्ट्र बैंकले रिर्भस रिपोमार्फत ६ अर्ब रुपैयाँ बजारबाट उठाइसकेको छ ।
सानिमा बैंकले शुरु गर्यो मोबाइल दक्षिणा योजना, असोज ११ गतेदेखि लागू
काठमाडौं । सानिमा बैंकले मोबाइल दक्षिणा योजना शुरु गरेको छ । बैंकले मोबाइल बैंकिङ्ग कारोबारलाई प्रबर्धन गर्न आफ्ना ग्राहकहरुको लागि यो योजनको सुरुवात गरेको हो । यो योजना मार्फत ग्राहकहरुले यस दशैंमा टिका लगाई दक्षिणा दिन सानिमा बैंकको सजिलो ई-बैकिंग मार्फत फण्ड ट्रन्सफर, टपअप/रिचार्ज, ईसेवा लोड वा बिल पेमेन्ट गरी कारोबार गर्ने ग्राहकहरु मध्येबाट हरेक दिन एक जना भाग्यशाली बिजेतालाई सामसुङ्ग जे७६ मोवाइल फोन उपहार दिइने बैंकले जनाएको छ । यस योजना असोज ११ देखि १६ गते सम्मका लागि लागू हुनेछ । साथै, बिजेताको छनोट मोबाइल बैंकिङ्ग सेवा साझेदार कम्पनी एफ१ सफ्ट इन्टरनेशनल प्रा.लिको सहकार्यमा लक्की ड्र बाट हुने बैंकले जनाएको छ ।
‘आईएमई छक्का-पञ्जा’अफर अन्तर्गत ठकुरीले पाए ६ लाखको जीवन बीमा
काठमाडौं । आईएमईको ‘आईएमई छक्का–पञ्जा’अफर अन्तर्गत दोस्रो १५ दिनको जीवनबीमा आईएमई सेवाग्राही मोहेदिनमिया ठकुरीले प्राप्त गरेका छन् । ठकुरीले यस अफर अन्तर्गत ६ लाख रुपैयाँको जीवन बीमा पाएका छन् । सफ्टवेयर पद्वतिमा आधारित छनोट कार्यक्रममा कतार स्थित कतार युएईबाट नेपालमा पैसा पठाउने ठकुरी भाग्यशाली विजेता छनोट भएका हुन् । भाग्यशाली विजेता ठकुरी वा नीजले सिफारिस गरेको व्यक्तिले आईएमई लाइफ इन्स्युरेन्सको ६ लाख रुपैयाँ बराबरको जीवन बीमा प्राप्त गर्नेछन् । यही भदौ १२ गतेदेखि संचालनमा ल्याईएको सेवाग्राही मूखी प्रवद्र्धनात्मक कार्यक्रममा देश विदेशका लाखौँ सेवाग्राही सहभागी भई दैनिक ‘लक्की ड्र’मा ९०० सय जना आईएमई पे क्यास मार्फत् पुरस्कृत भइसकेका छन् । मङ्गसिर ३ गतेसम्म १२ हप्ता संचालन हुने यस सेवाग्राहीमूखी कार्यकममा पैसा पठाउने सेवाग्राही मध्येबाट ट्रान्जेक्शन नम्बर र नामका आधारमा सफ्टवेयर पद्वतिमा आधारित रही विजेता छानिने कम्पनीले जनाएको छ ।
एनबी ईन्सुरेन्सको ८० प्रतिशत हकप्रद सेयर पारित, पुँजी ९७ करोड २० लाख पुग्यो
काठमाडौं । एनबी ईन्सुरेन्स कम्पनी लिमिटेडको ८० प्रतिशत हकप्रद सेयर पारित भएको छ । उक्त सञ्चालक समितिको निणर्यलाई असोज १० गते बसेको बैंकको २०औं बार्षिक साधारणसभाले पारित गरेको हो । हाल कम्पनीको चुक्ता पुँजी ५४ करोड रुपैयाँ रहेको छ । ८० प्रतिशत हकप्रद सेयर पश्चात बैंकको चुक्ता पुँजी ९७ करोड २० लाख रुपैयाँ पुगेको बैंकले जनाएको छ । हालसम्म बैंकले २२ वटा शाखा कार्यालय, २ वटा सम्पर्क कार्यालय र ८ वटा सेवा काउण्टर गरी कूल ३२ स्थानबाट बीमा सेवा प्रदान गरिरहेको छ । सभामा अध्यक्षले कम्पनीले चालु आबको असोज ७ गतेसम्ममा करिब १४ करोड रुपैयाँ प्रिमियम संकलन गरी लगानीमा ७३ करोड ६७ लाख रुपैयाँ पुर्याउन सफल भएको बैंकले जनाएको छ ।
खाद्य संस्थानले ल्याएका खसी बोका बिक्री भएन
काठमाडौ । नेपाल खाद्य संस्थानले अहिलेसम्म ८४५ खसी तथा बोका र ५७७ च्याङ्ग्रा बिक्री गरेको छ । दशैँका बेलामा मासुको मूल्य नियन्त्रण गर्न संस्थानले काठमाडौँ उपत्यका बाहिरबाट यहाँ एक हजार ८४३ खसी, बोका तथा च्याङ्ग्रा ल्याएकामा सबै बिक्री भइसकेका छैनन् । संस्थानले दाङ र हेटौँडाबाट एक हजार ५०० खसी तथा मुस्ताङबाट एक हजार च्याङ्ग्रा ल्याउने भने पनि बिक्री नभएपछि अरु ७०० खसी, बोका तथा च्याङ्ग्रा ल्याएको छैन । संस्थानले प्रतिकिलो बोका ४५०, खसी ४५५ र च्याङ्ग्रा ६७५ रूपैयाँ मूल्य निर्धारण गरी यही असोज ५ गतेदेखि आजसम्म बिक्री वितरण शुरु गरेको थियो । बिक्री नभएका करिब ४०० खसी, बोका तथा च्याङ्ग्रा बिक्री गर्न अष्टमीसम्म समय अवधि थप गरिएको संस्थानका वाग्मती अञ्चल प्रमुख भेषनाथ न्यौपानेले जानकारी दिए । अहिले गोदाममा खसीबोका तथा च्याङ्ग्रा खरिद गर्न आउनेको चहलपहल देखिएको छैन ।
नबिल बैंकको ३० प्रतिशत बोनस सेयर र १८ प्रतिशत नगद लाभांश दिने प्रस्ताव पारित
काठमाडौं । नबिल बैंकको १८ प्रतिशत नगद लाभांश र ३० प्रतिशत बोनस सेयर दिने प्रस्ताव पारित भएको छ । असोज १० गते बसेको बैंकको ३३ औं वार्षिक साधारण सभाले बैंकको संचालक समितिको उक्त प्रस्तावलाई पारित गरेको हो । बैंकले आर्थिक वर्ष २०७३/७४ को मुनाफाबाट आफ्ना सेयधनीलाई सो मात्राको लाभांश दिने भएको छ । बैंकले यस आ.व. २०७३/७४ मा ३ अर्ब ६१ करोड रुपैयाँ मुनाफा आर्जन गरेको बैंकले जनाएको छ । अघिल्लो वर्षको तुलनामा बैंकको मुनाफामा २५.८ प्रतिशत वृद्धि भएको छ । त्यस्तै, साेही अवधिमा बैंकको संचालन मुनाफा ५ अर्ब ४६ करोड रुपैयाँ रहेको छ । उक्त रकम अघिल्लो वर्षको तुलनामा २८.४ प्रतिशतले बढी हो । साथै, कार्यक्रममा नेपाल राष्ट्र बैंकको निर्देशन अनुसार बैंकको पुँजी यसै बर्ष ८ अर्ब ०४ करोड रुपैयाँ पुगेको बैंकका अध्यक्ष शम्भुप्रसाद पौड्यालले बताए ।
चिलिमे कम्पनीले पायो ५८५ क्षमताका दुई आयोजनाको लाइसेन्स
काठमाडौ । स्वदेशी लगानीमा नै जलविद्युत् आयोजना निर्माण गर्न सकिन्छ भन्ने धारणा स्थापित गराएको चिलिमे जलविद्युत् कम्पनी िलिमटेडले ५८५ मेगावाट क्षमताका दुई अायोजनाको अनुमतिपत्र (लाइसेन्स) पाएको छ । विद्युत् विकास विभागले चिलिमेलाइ गोरखामा रहेको ४२० मेगावाट क्षमताको बूढीगण्डकी प्रोक र बझाङकाे सेती नदी तेस्रोको अध्ययन अनुमति दिएको हो । कम्पनीले हाल रसुवागढी, माथिल्लो सान्जेन, सान्जेन, मध्य भोटेकोशी जलविद्युत् आयोजना निर्माण गरिरहेको छ । ती आयोजना सन् २०१८ को डिसेम्बरसम्ममा निर्माण गरिने भएका छन् । रसुवागढी १११ मेगावाट, मध्य भोटेकोशी १०२ मेगावाट, माथिल्लो सान्जेन १४.८ मेगावाट र सान्जेन ४२ मेगावाट क्षमताका आयोजना हुन् । कम्पनीले निर्माण गरिरहेका र अध्ययन अनुमतिपत्र पाएका आयोजनाको कुल क्षमता ८५५ मेगावाट हुनेछ । चिलिमेकाे शेयर उच्च स्थानमा छ । नेपाल स्टक एक्चेन्जका अनुसार हाल चिलिमेको प्रतिकित्ता शेयर मूल्य ७९८ रूपैयाँ पुगेको छ । विभागका महानिर्देशक नवीनराज सिंहले गत भदौ २६ गते बूढीगण्डकी प्रोक र गत असोज १ गते सेती नदीको अध्ययन अनुमतिपत्र कम्पनीलाई दिइएको जानकारी िदए । दशैँलगत्तै यी दुई आयोजनाको अध्ययन शुरु गर्ने कम्पनीका प्रबन्ध निर्देशक दामोदरभक्त श्रेष्ठले बताए । उनले निर्माणाधीन आयोजना निर्माणको अन्तिम चरणमा पुग्न लागेको र नयाँ आयोजनाको समेत अध्ययन अनुमतिपत्र पाएपछि कम्पनीको बजार मूल्य समेत बढ्ने र शेयर बजारमा समेत सकारात्मक प्रभाव पर्ने विश्वास कम्पनीको छ भने । ती आयोजना आगामी दुई वर्षभित्र अध्ययन शुरु गरेर निर्माण शुरु गर्ने लक्ष्य कम्पनीको छ । चिलिमे कम्पनीले ती आयोजनाका निर्माणका लागि फरकफरक कम्पनी स्थापना गर्नेछ । बूढीगण्डकी प्रोकको लागत ५० अर्ब र सेतीको २५ अर्ब रूपैयाँ लाग्ने अनुमान गरिएको छ । ती आयोजनामा नेपाल विद्युत् प्राधिकरण, चिलिमे कम्पनी, कर्मचारी सञ्चय कोष, नागरिक लगानी कोष, बीमा संस्थान र अन्य विभिन्न बैंक तथा वित्तीय संस्थाले लगानी गर्ने र सम्बन्धित जिल्ला र गाँउपालिका तथा प्रभावित क्षेत्रका नागरिकले समेत लगानी गर्ने छन् । रासस
आर्थिक वृद्धि खुम्चिएर ४.७ प्रतिशतमा सीमित हुने एडीबीको प्रक्षेपण, बाढी र डुवान मुल कारण
काठमाडौं । विकास साझेदार एसियाली विकास बैंक (एडीबी) ले यो वर्ष नेपालको आर्थिक वृद्धि खुम्चिने प्रक्षेपण गरेको छ । बैंकले मंगलबार नेपालको आर्थिक परिदृष्य अधावधिक सार्वजनिक गर्दे आर्थिक वृद्धि खुम्चिएर ४.७ प्रतिशतमा सीमित हुने अनुमान गरेको छ । तराईमा आएको बाढी र डुवानले ठुलो धनजनको क्षति भएको निष्कर्ष निकाल्दै एडीबीले यो वर्ष नेपालको आर्थिक वृद्धि खुम्चिने भनेको हो । गत वर्ष आर्थिक वृद्धि दर बढेर ६.९ प्रतिशत भएको थियो । सरकारले चालु आवमा ७.२ प्रतिशत वृद्धिको लक्ष्य लिएको छ । बाढीले ठुलो क्षति गरेको भन्दै एडीबीले यो वर्ष कृषि क्षेत्रको वृद्धि ५.३ बाट खुम्चिएर २.४ प्रतिशतमा झर्ने प्रक्षेपण गरेको छ । यस्तै बाढी र डुवानले धानलगायत अन्य बालीमा क्षति पुगेको एडीबीले उल्लेख गरेको छ । यस्तै औद्योगिक क्षेत्र ६.६ प्रतिशतले विस्तार हुने एडीबीको अनुमान छ । ऊर्जाको नियमित आपूर्ति र निर्माण सामाग्रीको सहज उपलब्धताले आर्थिक औद्योगिक क्षेत्र विस्तार हुने अनुमान एडीबीको छ । यस्तै सेवा क्षेत्र पनि साढे ५ प्रतिशतले विस्तार हुने देखिएको छ । वित्तीय क्षेत्र विस्तार, पर्यटनमा सुधार र खुद्रा तथा थोक व्यवसायमा भएको सुधारका कारण सेवा क्षेत्रको अवस्था राम्रो हुने देखिएको हो । यस्तै यो वर्ष उपभोक्ता मूल्यवृद्धि दर बढेर साढे ६ प्रतिशत पुग्ने एडीबीको अनुमान छ । हाल मुल्यवृद्धि ३ प्रतिशत भन्दा कम छ । निर्वाचन र वित्तीय हस्तान्तरणले मूल्यवृद्धिमा केही चाप बढने अनुमान एडीबीको छ । स्थानिय तहमा भएको वित्तीय हस्तान्तरणले यो वर्ष पुँजीगत खर्च बढ्ने एडीबीले जानकारी दिएको छ । राजश्व संकलन कुल ग्राहस्र्थ उत्पादनको २३.४ प्रतिशत पुगे पनि वित्तीय घाटा बढेर ५.२ प्रतिशत पुगेको छ । निकासीको तुलनामा आयात चुलिएपछि व्यापार घाटा बढ्दै गएको एडीबीले जानकारी दिएको छ । विदेश जाने कामदारको संख्यामा आएको कमीले रेमिट्यान्स आप्रवाहमा कमी आउने अनुमान एडीबीको छ । रेमिट्यान्स आप्रवाहमा कमी र व्यापार घाटाले नेपालको वाह्य क्षेत्र अस्थिर र सुस्त हुने देखिएको छ । सेवा क्षेत्रको निकासी राम्रो रहेको एडीबीको ठहर छ । कुल सेवा क्षेत्रको ६६ प्रतिशत निकासी र १४ प्रतिशत आयात हुने गरेको छ । नेपालको सेवा क्षेत्रको पुर्वाधार, संस्थागत, कानूनी र प्रक्रियागत अवरोध भएपनि नेपालले सेवा क्षेत्रको संभावना पुरै लक्ष्य हासिल गर्ने एडीबीले बताएको छ । यस्तै अर्को विकास साझेदार विश्व बैंकले पनि यो वर्ष आर्थिक वृद्धि दर खुम्चिएर ४.६ प्रतिशत हुने अनुमान गरेको छ । विश्व बैंकले पनि आर्थिक वृद्धि खुम्चिनुमा तराईमा भएको बाढी र डुवानलाई मुख्य कारण मानेको छ ।
