रास्वपाले मनोनयन दर्ता गर्न पुगेका उम्मेदवारको टिकट खोस्यो, कैलाली-४ मा खेमराज बने उम्मेदवार
काठमाडौं । राष्ट्रिय स्वतन्त्र पार्टी (रास्वपा)ले कैलाली–४ मा खेमराज कोइरालालाई टिकट दिएको छ । यसअघि हरि रेग्मीलाई दिएको टिकट खोसेर रास्वपाले कोइरालालाई दिने निर्णय गरेको हो । मंगलबार रेग्मी मनोनयन दर्ताका लागि निर्वाचन कार्यालय पुगिसकेका थिए । तर, एकाएक रास्वपाले कोइरालालाई टिकट पठाउँदै मनोनयन दर्ता गर्न निर्देशन दिएको हो । रास्वपाले जिल्ला निर्वाचन कार्यालय कैलालीलाई लेखेको पत्रमा भनिएको छ, ‘उपरोक्त सम्बन्धमा कैलाली क्षेत्र नम्बर ४ मा राष्ट्रिय स्वतन्त्र पार्टीको नाममा जारी गरिएको उम्मेदवारको नाम परिवर्तन गर्नुपर्ने आन्तरिक निर्णय भएको हुँदा निज उम्मेदवार हरि रेग्मीको नाम खारेज गरी खेमराज कोइरालालाई राष्ट्रिय स्वतन्त्र पार्टीको आधिकारिक उम्मेदवार कायम गरिदिन हुन अनुरोध गर्दछु ।’
बैतडीबाट पूर्वउद्योगमन्त्री दामोदर भण्डारीले गरे मनोनयन दर्ता
काठमाडौं । पूर्वउद्योग वाणिज्य तथा आपूर्तिमन्त्री एवं एमाले केन्द्रीय सदस्य दामोदर भण्डारीले बैतडीबाट मनोनयन दर्ता गराएर चुनावी मैदानमा होमिएका छन् । मंगलबार बिहान उनले मनोनयन दर्ता गराएर चुनावी मैदानमा होमिएका हुन् । दुईपटक उद्योगमन्त्री भइसकेका भण्डारीलाई यसपटक चौतर्फी घेराबन्दी छ । उनले नेपाली कांग्रेसका चतुरबहादुर चन्द, रास्वपाका हरिमोहन भण्डारी र नेकपाका परमानन्द भट्टसँग प्रतिस्पर्धा गर्नेछन् । भण्डारी २०७० सालको संविधान सभा, २०७४ र २०७९ को प्रतिनिधि सभा निर्वाचनमा बैतडीबाट विजयी भएका थिए । भण्डारीले २०७९ मा भएको प्रतिनिधिसभा निर्वाचनमा ३३ हजार ६११ मत ल्याएका थिए । उनका निकटतम् प्रतिद्वन्द्वी नेपाली कांग्रेस र माओवादी केन्द्रबीचको गठबन्धनका नरेन्द्र कुँवरले ३२ हजार ८० मत ल्याएका थिए ।
कांग्रेसको आधिकारिकता विवाद : सर्वोच्चले दिएन अन्तरिम आदेश, दुवै पक्षलाई छलफलमा बोलायो
काठमाडौं । सर्वोच्च अदालतले नेपाली कांग्रेसको आधिकारिकता विवादमा परेको रिटमा अन्तरिम आदेश दिन अस्वीकार गरेको छ । सर्वोच्च अदालतका न्यायाधीश सुनिलकुमार पोखरेलको इजलासले अन्तरिम आदेश दिन अस्वीकार गरेको हो । यससँगै गगनकुमार थापालाई कांग्रेसको सभापतिमा कामकाज गर्ने बाटो खुला भएको छ । थापा समूहले विशेष महाधिवेशन गरेर नयाँ नेतृत्व चयन गरेको थियो । उक्त नेतृत्वलाई निर्वाचन आयोगले मान्यता दिएपछि त्यसविरुद्ध तत्कालीन सभापति शेरबहादुर देउवासमेत २ जनाको तर्फबाट सर्वोच्चमा रिट दायर भएको थियो । सर्वोच्चले निर्वाचन आयोगको निर्णयमा कारण देखाऊ आदेश जारी गर्दै कांग्रेसका दुवै पक्षलाई छलफलमा बोलाएको छ । फागुन २१ मा हुने प्रतिनिधिसभा निर्वाचनको प्रत्यक्षतर्फको उम्मेदवारको टिकटमा थापाले नै हस्ताक्षर गरेर टिकट वितरण गरेका छन् ।
राजन भट्टराईले गरे काठमाडौं- ४ मा उम्मेदवारी दर्ता
काठमाडौं । काठमाडौं क्षेत्र नम्बर ४ मा नेकपा एमालेका नेता राजन भट्टराईले उम्मेदवारी दर्ता गराएका छन् । उनले मंगलबार उम्मेदवारी दर्ता गराएका हुन् । नेता भट्टराई यसअघि दुईपटक गगन थापासँग पराजित भएका थिए । थापाले सर्लाही- ४ बाट उम्मेदवारी दिने भएपछि भट्टराई अन्तिम समयमा उम्मेदवार बन्न आइपुगेका हुन् । सो क्षेत्रमा कांग्रेसले सचिन तिमल्सिना र रास्वपाले पुकार बमलाई उम्मेदवार बनाएको छ ।
काठमाडौं–४ मा कांग्रेसबाट सचिन तिमल्सिनाले गराए उम्मेदवारी दर्ता
काठमाडौं । काठमाडौं क्षेत्र नम्बर ४ मा नेपाली कांग्रेसका सचिन तिमल्सिनाले उम्मेदवारी दर्ता गराएका छन् । उनले मंगलबार (आज) उम्मेदवारी दर्ता गराएका हुन् । सचिव तिमल्सिना काठमाडौं महानगर- ३०, ज्ञानेश्वरका बासिन्दा हुन् । यसअगाडि उक्त ठाउँमा कांग्रेस सभापति गगन थापाले चुनाव लड्दै आएका थिए । यस क्षेत्रबाट पछिल्ला तीन निर्वाचनमा उनी लगातार निर्वाचित भएका थिए । तिमल्सिना थापा निकट मानिन्छन् । सभापति थापा भने सर्लाही–४ बाट चुनाव लड्दैछन् ।
जेनजी सरकारका चार मन्त्री चुनावी मैदानमा
काठमाडौं । आगामी निर्वाचनको सरगर्मी सुरु भएसँगै पूर्वमन्त्रीहरू पनि कम्मर कसेर चुनावी मैदानमा उत्रिएका छन् । कोही नयाँ पार्टीबाट त कोही आफ्नै पुरानो विरासत जोगाउन लागि परेका छन् । काठमाडौं क्षेत्र नम्बर ३ मा यसपटक निकै रोचक प्रतिस्पर्धा हुने भएको छ । निवर्तमान भौतिक पूर्वाधार तथा यातायातमन्त्री एवं उज्यालो नेपाल पार्टीका अध्यक्ष कुलमान घिसिङले यस क्षेत्रबाट चुनाव लड्ने भएका छन् । चुनावमा होमिनकै लागि उनले मन्त्री पदबाट राजीनामा दिएका थिए । घिसिङलाई टक्कर दिन राष्ट्रिय स्वतन्त्र पार्टी (रास्वपा) बाट राजुनाथ पाण्डे मैदानमा उत्रिएका छन् । काठमाडौं महानगरपालिकाको प्रहरी प्रमुखबाट राजीनामा दिएर पाण्डे राजनीतिमा होमिएका हुन् । दुई एक्सन ओरिएन्टेड व्यक्तित्वहरूबीचको यो प्रतिस्पर्धालाई निकै चासोका साथ हेरिएको छ । निवर्तमान सञ्चार तथा सूचना प्रविधिमन्त्री जगदीश खरेलले ललितपुर क्षेत्र नम्बर २ बाट उम्मेदवारी दर्ता गरेका छन् । उनी राष्ट्रिय स्वतन्त्र पार्टी (रास्वपा) मा प्रवेश गरी चुनावी मैदानमा होमिएका हुन् । यस्तै, निवर्तमान शिक्षामन्त्री महावीर पुनले म्याग्दीबाट चुनाव लड्ने भएका छन् । मंगलबार बिहान मनोनयन दर्ता गर्न पुन म्याग्दीको निर्वाचन अधिकृतको कार्यालयमा पुगेका थिए । उनले स्वतन्त्र उम्मेदवारी दिएका हुन् । त्यसअघि उनले शिक्षामन्त्रीको पदबाट राजीनामा दिएका थिए । यसैगरी, सिराहा निर्वाचन क्षेत्र नम्बर १ मा राष्ट्रिय स्वतन्त्र पार्टी (रास्वपा) को तर्फबाट बब्लु गुप्ता चुनावी मैदानमा होमिएका छन् । उनले उम्मेदवारी दर्ता गराइसकेका छन् । जेनजी आन्दोलनपछि बनेको अन्तरिम सरकारमा उनी खेलकुदमन्त्री बनेका थिए । उनले निर्वाचनमा सहभागी हुनका लागि खेलकुदमन्त्री पदबाट राजीनामा दिएका थिए। पूर्वस्वास्थ्य र शिक्षामन्त्रीहरू चुनावी मैदानमा, क-कसले दिए उम्मेदवारी ?
५ बजेसम्म २ हजार ६५५ जनाको उम्मेदवारी दर्ता
काठमाडौं । प्रतिनिधिसभा सदस्यको प्रत्यक्षतर्फका लागि मंगलबार साँझ ५ बजेसम्म कुल २ हजार ६५५ जनाको उम्मेदवारी दर्ता भएको निर्वाचन आयोगले जनाएको छ । आयोगका अनुसार कुल दर्ता भएका उम्मेदवारमध्ये महिलाको संख्या भने ३०३ रहेको छ । उमेदवारी दर्ता गर्ने पुरुष उम्मेदवार २ हजार ३५२ जना रहेको आयोगका सहप्रवक्ता कुलबहादुर जिसीले जानकारी दिए । उनका अनुसार साँझ ५ बजेसम्म मुख्य निर्वाचन अधिकृत तथा निर्वाचन अधिकृतको कार्यालयभित्र प्रवेश गरिसकेका उम्मेदवारले उम्मेदवारी दर्ता गर्न पाउनेछन् । आयोगका अनुसार केही जिल्लामा उम्मेदवारी दर्ता प्रक्रिया रातिसम्म चल्ने सम्भावना रहेको छ ।
सिटिजन्स सन्तुलित योजनाको इकाइ बाँडफाँड सम्पन्न
काठमाडौं । सिटिजन्स क्यापिटल लिमिटेडद्वारा प्रवर्द्धन गरिएको सिटिजन्स सन्तुलित योजनाको इकाइ बाँडफाँड सम्पन्न भएको छ । सिटिजन्स बैंक इन्टरनेशनल लिमिटेड कोष प्रवर्द्धक रहेको यस सामूहिक लगानी कोषअन्तर्गत सञ्चालन हुने योजनाको इकाइ बाँडफाँड माघ ४ गते सम्पन्न गरिएको हो । सिटिजन्स म्युचुअल फन्ड अन्तर्गत सञ्चालन हुने बन्दमुखी योजनाअनुसार प्रतिइकाइ १० रुपैयाँका दरले कुल १० करोड इकाइ निष्कासन गरिएको थियो । जसमध्ये बीज पुँजी वापत न्यूनतम १ करोड ५० लाख इकाइ अर्थात् १५ करोड रुपैयाँ बराबरको इकाइ कोष प्रवर्द्धक सिटिजन्स बैंक इन्टरनेसनल लिमिटेडलाई सुरक्षित राखी बाँकी ८ करोड ५० लाख इकाइ सर्वसाधारणका लागि निष्कासन गरिएको थियो । उक्त योजनाको इकाइ पुस ४ गतेदेखि पुस १८ गतेसम्म निष्कासन तथा बिक्री खुला गरिएको थियो । सो अवधिमा मागभन्दा बढी आवेदन प्राप्त भएपछि प्रचलित कानुन बमोजिम योजनाको आकार २५ प्रतिशतले वृद्धि गरी कुल १ अर्ब २५ करोड रुपैयाँ बराबरको १२ करोड ५० लाख इकाइ कायम गरिएको क्यापिटलले जनाएको छ । बढाइएको आकारअनुसार योग्य ६७ हजार ७२० आवेदकलाई (बीज पुँजीसहित) इकाइ बाँडफाँड गरिएको छ। इकाइ निष्कासन तथा बिक्री प्रक्रियामा सहयोग र सद्भाव प्रदान गर्ने सम्पूर्ण लगानीकर्ता, सि–आस्वा सदस्य बैंक तथा वित्तीय संस्था, नेपाल धितोपत्र बोर्ड, नेपाल स्टक एक्सचेन्ज, सिडिएस एण्ड क्लियरिङ, सञ्चार माध्यम तथा सम्बन्धित सबै निकायप्रति सिटिजन्स क्यापिटलले धन्यवाद तथा कृतज्ञता व्यक्त गरेको छ। सिटिजन्स क्यापिटलले योजना व्यवस्थापन तथा डिपोजिटरी, लगानी व्यवस्थापन सेवा, धितोपत्र प्रत्याभूति, धितोपत्र निष्कासन तथा बिक्री प्रबन्ध, सेयर रजिस्ट्रार तथा संस्थागत परामर्श सेवाजस्ता विभिन्न वित्तीय सेवाहरू प्रदान गर्दै आएको छ। कम्पनीले आगामी दिनमा पनि पारदर्शिता, सुशासन र लगानी जोखिम व्यवस्थापनलाई प्राथमिकतामा राख्दै प्रविधिमैत्री तथा लगानीमैत्री सेवा विस्तार गर्ने जनाएको छ । सिटिजन्स बैंक इन्टरनेसनल लिमिटेडको सहायक कम्पनीका रूपमा रहेको सिटिजन्स क्यापिटलमा कर्मचारी सञ्चय कोष तथा प्रतिष्ठित उद्योगी–व्यवसायीहरूको समेत लगानी रहेको छ । कम्पनीका अध्यक्ष राजेन्द्रलाल श्रेष्ठ तथा प्रमुख कार्यकारी अधिकृत सबिर बादे श्रेष्ठ रहेका छन् ।
