काठमाडौं । नेपालको बैंकिङ इतिहासमा महत्वपूर्ण नाम हो देवीप्रकाश भट्टचन । फाइनान्स कम्पनी स्थापना गरी दुईवटा वाणिज्य बैंकलाई ‘रेस्क्यू’ गरेको इतिहास बोकेका भट्टचन प्रभु बैंक संचालक समितिबाट बाहिरिनुलाई धेरैले अर्थपूर्ण रुपमा हेरेका छन् ।

प्रभु बैंकको १९औं वार्षिक साधारणसभाले संस्थापक सेयरधनीको तर्फबाट ३ जना र सर्वसाधारण समूहबाट ३ जना गरी ६ जना संचालक समिति सदस्य निर्वाचित गरेकाे छ । तर, प्रभु बैंक संचालक समितिको अध्यक्ष भट्टचनले संचालक सदस्यमा उम्मेदवारी नै दिएका थिएनन् ।

भट्टचनकै पहलमा सन् २००५ मा प्रभु फाइनान्स कम्पनी स्थापना भएको थियो । सो फाइनान्स कम्पनी स्थापना भएको २ वर्षपछि उनी अध्यक्ष भएका थिए । प्रभु फाइनान्स कम्पनी संचालनमा आउनुअघि उनी तत्कालिन ग्लोबल बैंकमा संचालक थिए ।

भट्टचनले प्रभु फाइनान्स संचालक समितिको अध्यक्षको जिम्मेवारी लिएपछि सो फाइनान्स कम्पनीले धेरै संस्थाहरु प्रभुमा मर्ज गराएका थिए । यसरी मर्ज हुँदै गएपछि तत्कालिन प्रभु फाइनान्स कम्पनी प्रभु विकास बैंकमा स्तरोन्नति भएको थियो । पछि प्रभु विकास बैंक र तत्कालिन किष्ट बैंक मर्ज भएर प्रभु बैंक बन्याे ।

जतिबेला किस्ट बैंक प्रभु विकास बैंकसँग मर्ज भएको थियो, त्यो बेला किस्ट बैंक समस्यामा परेको थियो । समस्यामा परेको किष्ट बैंक मर्ज गरेपछि प्रभु बैंकले समस्यामा परेको अर्काे बाणिज्य बैंक ग्राण्ड अक्याएर गरेको थियो । प्रभुमा किष्ट र ग्राण्ड बैंक मात्र हाेइन, गौरिशंकर डेभलपमेन्ट बैंक, जेनिथ फाइनान्स, वैभव फाइनान्स लगायतका वित्तीय संस्थाहरू गाभिएकाे थिए ।

वित्तीय क्षेत्रको स्थापना र विकासमा भट्टचनको योगदान महत्वपूर्ण छ । प्रभु समूह स्थापना गरी उनकै अगुवाईमा खुलेका प्रभु मनी ट्रान्सफर, प्रभु लाइफ इन्स्यारेन्स, प्रभु जनरल इन्स्योरेन्स लगायतका वित्तीय संस्था पनि संचालनमा छन् ।

भट्टचन तत्कालिन प्रभु फाइनान्सको २ कार्यकाल संचालक समिति अध्यक्ष भएका थिए । यस्तै, प्रभु विकास बैंक बनेपछि पनि २ कार्यकाल संचालक समिति अध्यक्ष भएका थिए । किष्ट बैंकसँग मर्जर पछि बनेकाे  बैंकमा पनि उनी अध्यक्ष भएका थिए । त्यसपछि ग्राण्ड बैंकसँगको मर्जपछि उनी फेरि संचालक समिति अध्यक्ष भएका थिए । त्यसपछिको साधारणसभाबाट अध्यक्षमा निर्वाचित भट्टचन प्रभु बैंकमा ३ पटक गरी ८ वर्ष संचालक समिति अध्यक्ष बनेका थिए ।

प्रभु बैंकको प्रमुख लगानीकर्तामध्येमा भट्टचन पर्छन् । प्रोफेसनलहरुलाई संचालन गर्न दिने आफ्नो योजना अनुसार नै आफू संचालक समितिबाट बाहिरिएको उनले प्रतिक्रिया दिए ।

‘सधैं म नै संचालक समिति अध्यक्ष हुनुपर्छ भन्ने छैन, प्रोफेसनल संचालकहरुले बैंक संचालन गर्नुहुन्छ, म संचालक समितिमा नहुँदैमा कुनै फरक पर्दैन,’ भट्टचनले विकासन्युजसँगको संक्षिप्त प्रतिक्रियामा भने ।

प्रभु बैंकको अहिले देशभर २ सय १२ वटा शाखा कार्यालयहरु छन् । यस्तै, ५३ वटा एक्सटेन्सन काउन्टर, २ सय ३ वटा एटिएम बुथ र १४ लाखभन्दा बढी ग्राहक छन् । प्रभु बैंकको व्यवस्थापकीय टीमको नेतृत्व अशोक शेरचनले गरिरहेका छन् ।

बैंकको वार्षिक साधारणसभाले गत वर्षको नाफाबाट सेयरधनीलाई १० प्रतिशत बोनस सेयर र ०.५३ प्रतिशत नगद दिने प्रस्ताव पारित गरेकाे छ ।

सम्बन्धित शिषर्कहरु

१० बैंकको २० अर्ब वितरणयोग्य नाफा ऋणात्मक

महालक्ष्मी विकास बैंकले गर्यो महिला उद्यमी लक्षित सशक्तीकरण अभियान

गरिमा बैंक र ट्रेकिङ एजेन्सीबीच कर्जामा सहुलियत सहित सेवा उपलब्ध गराउने सम्झौता

कामना सेवाद्वारा पोखरा विश्वविद्यालयमा स्वास्थ्य प्रयोगशाला निर्माण गरि हस्तान्तरण

विकास बैंकका सूचक खस्किए, वितरणयोग्य नाफा ध्वस्त

ग्लोबल आइएमई बैंकको नयाँ एक्सटेन्सन काउन्टर तुल्सीपुरस्थित मालपोत कार्यालयमा