काठमाडौं । बैंक तथा वित्तीय संस्था परिसंघ नेपाल (सिविफिन) का वरिष्ठ उपाध्यक्ष भोज बहादुर शाहले निक्षेपको ब्याजदर २ प्रतिशतले घट्ने बताएका छन् । मंगलबार सिविफिनले आयोजना गरेको पत्रकार सम्मेलनमा बोल्दै उनले सो बताएका हुन् ।
‘बैंक विरोधि घटनालाई रोक्न सकिएन भने सेवाग्राहीको बैंकप्रति भइरहेको विश्वासमा गुम्न सक्छ, निक्षेपको ब्याजदरलाई मुद्रास्फितिसँग टाइअप गर्नुपर्छ, निक्षेपको ब्याजदर २ प्रतिशतले घट्नु पर्छ,’ उनले भने ।
बैंकहरु उपभोगमा नभई लगानीमा केन्द्रीत हुनु पर्ने उनले बताए ।
निर्माण र उद्योग क्षेत्रमा अन्यभन्दा २ प्रतिशत ब्याज कम हुनु पर्ने बताउँदै उनले भने- ‘ब्याजदरमा बढाउनमा भूमिका खेल्ने सरकारकै स्वामित्वमा रहेका संस्था छन्, ती संस्थाहरु ब्याजबाट कमाउनमा केन्द्रीत भए ।’
साथै, उनले अर्थमन्त्री र गभर्नरले अब ब्याजदरलाई ९.९ प्रतिशतमा व्यवस्थापन गर्ने प्रतिबद्धता गरेको समेत जानकारी गराए । बैंकहरुले धेरै नकमाए खुलस्त पर्दै उनले ४० प्रतिशतसम्म कर तिर्नुपर्ने बाध्यता रहेको बताए ।
‘ऋणीले ब्याज तिर्न आनाकानी गरिरहेका छन् यसले बैंकको अवस्था दिनप्रतिदिन कमजोर बन्दै गएको छ, ऋण लिएपछि भुक्तानी गर्नुपर्छ,’ वरिष्ठ उपाध्यक्ष शाहले भने ।
