जनशक्ति : रोजगारी

बैतडी । भारतबाट आएका बैतडीका चार हजारभन्दा बढीको र्यापिड डाइग्नोष्टिक (आरडिटी) टेष्ट गर्ने भएको छ । भारतबाट जिल्ला भित्रिएका चार हजार एक सय २२ जनाको आरडिटी गरिने भएको हो । चैत महिनामा भारतबाट फर्केका सबैको आरडिटी गरिने प्रमुख जिल्ला अधिकारी आनन्द पौडेलले जानकारी दिए । चैत महिनामा मात्रै भारतबाट ४ हजार ८ सय २२ जना जिल्ला भित्रिएका थिए । तीमध्ये अहिलेसम्म सात सयको मात्रै आरडिटी र स्वाब टेष्ट भएकाले बाँकी सबैको पनि र्यापिड डाइग्नोष्टिक टेष्ट गरिने उनले बताए । चैत महिनामा भारतबाट जिल्ला भित्रिएकामध्ये दशरथचन्द नगरपालिकामा ५ सय ३१, पुर्चौंडीमा ३ सय ४३, मेलौलीमा ४ सय ४९, पाटनमा ४ सय ८२ र सुर्नयामा ४ सय ५ जना रहेका छन् । त्यस्तै डिलाशैनीमा २ सय ६५, दोगडाकेदारमा ४ सय १, पञ्चेश्वरमा ८ सय ९५, सिगासमा १ सय ३९ र शिवनाथ ९ सय १२ जना जिल्ला भित्रिएको बताइएको छ । चैत १० गते अघि जिल्ला भित्रिएका कोही पनि क्वारेन्टाइनमा बसेका छैनन भने उनीहरुको चेकजाँच समेत भएको छैन् । जिल्लामा अहिले एक हजार ६ सय र्यापिड डाइग्नोष्टिक टेष्ट (आरडिटी) कीट मात्रै भएकाले थप कीट प्रदेश सरकारबाट मगाउने पहल भइरहेको स्वास्थ्य कार्यालयका प्रमुख योगेशप्रसाद भट्टले बताए । यस्तै कोरोना रोकथाम तथा नियन्त्रण जिल्ला स्तरीय संयन्त्रको बैठकले पालिकास्तरीय क्वारेन्टाइन निर्माणका कामलाई पनि तीव्रता दिने निर्णय गरेको छ । यस्तै राष्ट्रिय गौरवका आयोजना र प्रदेश गौरवका आयोजना सञ्चालन गर्न दिने र त्यसको अनुगमन समेत गर्ने निर्णय भएको प्रमुख जिल्ला अधिकारी पौडेलले जानकारी दिए । यस्तै राहत वितरण प्रक्रियालाई प्रभावकारी बनाउन एकद्वार प्रणालीमार्फत मात्रै गर्न पाउने व्यवस्थालाई कडाईका साथ लागू गर्ने निर्णय भएको उनले बताए । यसैगरी विवाह व्रतबन्धजस्ता शुभकार्यमा ५ जना मात्रै सहभागी भएर गर्न पाउने निर्णय समेत प्रमुख जिल्ला अधिकारी पौडेलले जानकारी दिए । बैठकले कोरोना भाइरस रोकथाम तथा नियन्त्रणका लागि जिल्लामा भइरहेका प्रयासलाई अझै प्रभावकारी बनाउने निर्णय समेत गरेको छ । रासस

काठमाडौं । कोरोनाको संक्रमणको कारण विश्व अर्थतन्त्रमा गम्भीर संकट देखिएसँगै नेपालीको बैदेशिक रोजगारीमा धक्का लाग्ने भएको छ । खाडी देशमा रहेका नेपालीको रोजगारी गुम्ने अवस्था देखिएको नेपालमा त्यसको तयारी गर्नुपर्ने राजदुतहरुले बताएका छन् । ओमानमा करिब १८ हजार नेपाली कामदार छन् । ओमानमा रहेका नेपालीमा कोरोना संक्रमण भएको छैन । तर, ओमानमा संक्रमण बढेसँगै त्यहाँ कार्यरत नेपाली नेपाल फर्कन चाहेका ओमानका लागि नेपाली राजदुत शर्मिला पराजुलीले जानकारी दिईन् । कोरोनाको संक्रमण बढेसँगै नेपाल फर्किन चाहनेको संख्या उच्च रहेको भन्दै उनले कोरोना कहरसँगै धेरैको रोजगारी गुम्ने हुँदा देशमा नै रोजगारी तय गर्ने विषयमा सरकारले योजना बनाएर अगाडी बढ्नु पर्ने धारणा राखिन् । कोरोनाको संक्रमण फैलिएसँगै केही कम्पनीले विदेशी कामदारलाई उनीहरुकै देश फर्काउन थालेकोले त्यसको असर नेपालीमा पनि पर्ने राजदुत पराजुलीको भनाइ छ । त्यस्तो अवस्थामा आफ्नो खर्चले नेपाल फर्कन नसक्ने कामदारको लागि सरकारले उद्धार गर्नुपर्ने उनले राजदुत पराजुलीले बताइन् । करिब ३५ हजार नेपाली कामदार रहेको बहराइनमा पछिल्लो समय ४९ जना नेपालीमा कोरोना संक्रमण पनि फैलिएको छ । करिब १ हजार ९ सय ७३ जना कोरोना संक्रमित रहेको बहराइनमा ७ जनाको सोही कारण मृत्यु भएको छ । सबै संक्रमित नेपालीको अवस्था सामान्य रहेको बहराइनस्थित नेपाली राजदुत पदम सुन्दासले जानकारी दिए । ‘धेरै कामदारको श्रम कटौती भईसकेकाले एक प्रकारको त्राससँगै वैदेशिक रोजगारीमा भयावह स्थिति आएको छ’ उनले भने । बहराइनमा गत आइतबार हेटौंडाका एक युवकले आत्महत्या गरेको जानकारी दिँदै सो शव लकडाउनपछि नेपाल पठाउने राजदुत सुन्दासले बताए । कोरोनाको कहर फैलिएसँगै ज्यानसँगै आफ्नो जागिर (रोजगारी) के हुने हो भन्ने कुरामा विदेशमा रहेका नेपाली केन्द्रित भएको गैरआवाशीय ननेपाली संघ (एनआरएनए) कतारका सचिव आरके शर्माले बताए । ‘अहिलेसम्म त विदेशमा भएका नेपालीलाई खान बस्न देऊ भनेर हारगुहार गर्नुपरेको अवस्था छैन, तर परिस्थिति यस्तै रहने हो भने त्यस्तो गुहार माग्नुपर्ने अवस्था पनि आउन सक्छ,’ सचिब शर्माले भने । खाडी मुलुकमा १६ देखि १८ लाख नेपाली कार्यरत छन् । पछिल्लो समय पेट्रोलियम पदार्थ ३ दशकयताकै कम मूल्य कायम भएसँगै खाडी मुलुकका धेरै कामदार कटौती हुने सचिव शर्माले बताए । वैदेशिक रोजगारीबाट फर्किएकालाई सिप अनुसारको काम दिने भन्ने विषयमा सरकारले योजना तय गरिरहेको श्रम, रोजगार तथा सामाजिक सुरक्षा मन्त्रालयका प्रवक्ता सुमन घिमिरेले जानकारी दिए । कोरोनाको कहरसँगै पैदा हुने वेरोजगारीलाई व्यवस्थापन गर्न तत्काल रोजगार दिन सक्ने अवस्था सिर्जना नभए पनि रोजगारीमुलक सेवा तथा कृषिजन्य उत्पादनलाई जोड दिएको प्रवक्ता घिमिरेले बताए । वैदेशिक रोजगारीबाट फर्किने सबैको सिप क्षमताको तथ्यांक राख्नुका साथै सरकारले कोभिड १९ नलागेको प्रमाण भएपछि मात्र नेपाल आउन दिने निर्णय गरेको प्रवक्ता घिमिरेको भनाइ छ । कोरोना संक्रमण भई मृत्यु भएको शव नेपाल ल्याउन नपाईने भन्दै सबै देशको दूतावासमा परराष्ट्र मन्त्रालयले पत्राचार गरेको छ । हालसम्म कोरोना बाहेक अन्य कारणले मृत्यू भएका ८० नेपालीको शव विदेशमा रोकिएको छ । विश्वमा एक हजार दुई सयभन्दा बढी नेपाली कोरोना संक्रमित छन्, भने ३० जना नेपालीको मृत्यु भइसकेको छ । वैदेशिक रोजगार पत्रकार समाजसँग डिजिटल कन्फरेन्समा सहभागीहरुले यस्तो धारणा राखेका हुन् ।

काठमाडौं । कुवेतमा बुधबार मात्र ५ जना नेपालीमा कोरोना भाइरसको संक्रमण देखिएको छ । हालसम्म २९ जना नेपाली कोरोना संक्रमित रहेको कुवेतस्थित नेपाली दुतावासले जानकारी दिएको छ । कोरोना संक्रमित सबै नेपालीको अवस्था सामान्य रहेको दूतावास बताएको छ ।  पछिल्लो समय कोरोना संक्रमितको संख्या बढ्दैसँगै दूतावासमा समस्या राख्ने नेपालीको संख्या बढेको छ । कुवेतमा हालसम्म २ हजार २ सय ४८ जना कोरोना संक्रमित छन् भने १३ जनाको मृत्यु भइसकेको छ ।