कांग्रेसले क्रियाशील सदस्यता फारम दुई दिनमा सबै क्षेत्रमा पुर्याउने
काठमाडौं । नेपाली कांग्रेसले १५औँ महाधिवेशनको मिति औपचारिक रूपमा घोषणा गरेसँगै पार्टीले क्रियाशील सदस्यताको प्रक्रिया छिट्टै टुङ्ग्याउने तयारी गरेको छ । क्रियाशील सदस्यता व्यवस्थापन समितिले १६५ निर्वाचन क्षेत्रमा दुई दिन भित्र पार्टी सदस्यता पुर्याउने तयारी गरेको छ । पार्टीको क्रियाशील सदस्यता संकलन प्रक्रिया गत वर्षदेखि देशभर तीव्र रूपमा चलिरहे पनि टुङ्गिन सकेको छैन । जिल्ला, नगर, गाउँपालिका र वार्डस्तरमा सदस्यता केन्द्रहरू सञ्चालन गरेर सदस्यता नविकरण र वितरण सुरु गरिने समिति सदस्य प्रकाश रसाइलीले जानकारी दिए । रसाइली भन्छन्, 'महाधिवेशनको मिति निश्चित भएसँगै हामीले सदस्यता प्रक्रिया छिटो टुङ्ग्याउने योजना बनाएका छौं । यसले प्रतिनिधि चयन र मतदान प्रक्रियालाई सहज र पारदर्शी बनाउनेछ ।' महाधिवेशनमा प्रदेश, जिल्ला र केन्द्रीय स्तरका प्रतिनिधिहरूको चयन क्रियाशील सदस्यताको आधारमा हुने भएकाले सदस्यताको अन्तिम सूची तयार पार्नु पार्टी नेतृत्वको प्राथमिकता बनेको छ । डिजिटल प्रणालीको प्रयोग गर्ने तयारी पनि भइरहेको छ । यसैबीच, पार्टीले सदस्यता प्रक्रिया पूरा गर्न जिल्लास्तरीय समितिहरूलाई निर्देशन दिइसकेको प्रकाश रसाइलीले बताए ।
कैलालीका सीमानाकामा सुरक्षा जाँचमा कडाइ, शंकास्पद व्यक्ति प्रवेशमा निगरानी
अत्तरिया । कैलालीसँग जोडिएका नेपाल–भारत सीमानाकामा सुरक्षा जाँचलाई कडाइ गरिएको छ । जिल्लास्थित सीमानाकामा भारतबाट नेपाल प्रवेश गर्नेलाई जाँचमा कडाइ गरिएको हो । सीमावर्ती नाकाबाट परिचय नखुलेका शंकास्पद व्यक्ति तथा समूह अवैध तरिकाले प्रवेश गर्नसक्ने हुँदा सुरक्षा निकायबाट जाँचमा कडाइ गरिएको जिल्ला प्रशासन कार्यालयका सूचना अधिकारी शिवराज जोशीले जानकारी दिए । 'सुरक्षा चुनौतिलाई दृष्टिगत गरेर जाँचमा कडाइ गरिएको हो', उनले भने, 'शंकास्पद व्यक्ति वा समूह जिल्लाभित्र प्रवेश गरेको देखिएमा नजिकको सुरक्षा निकायहरुमा जानकारी गरी सहयोग गरी दिनहुन सबैमा अनुरोध गरिन्छ ।' परिचय नखुलेका अपरिचित व्यक्ति वा समूह तथा समुदायलाई आफ्नो घरमा बसोबास नगराउन तथा कुनै कामकाजमा नलगाउन जिल्ला प्रशासन कार्यालयले सबैमा अनुरोधसमेत गरेको छ ।
बाजुरामा सात मतदानस्थल थपिए, कुल संख्या ७७ पुग्यो
बाजुरा । आगामी फागुन २१ गते हुने प्रतिनिधिसभाको निर्वाचनका लागि बाजुरामा सात वटा मतदानस्थल थपिएका छन् । यी सँगै ७७ वटा मतदानस्थल भएका र ११२ वटा मतदान केन्द्र कायम भएका छन् । जिल्ला निर्वाचन कार्यालयको सिफारिसमा प्रदेशसभा ‘क’मा बूढीनन्दा नगरपालिका, हिमाली, स्वामीकार्तिक खापर गाउँपालिका र प्रदेशसभा निर्वाचन क्षेत्र ‘ख’को त्रिवेणी नगरपालिकामा मतदानस्थल थप भएका हुन् । जिल्ला निर्वाचन कार्यालयका निर्वाचन अधिकारी भीमबहादुर शाहीकाअनुसार स्वामीकार्तिक खापर गाउँपालिका–१ मा भगवती आधारभूत विद्यालय रुढी, मण्डाली माध्यमिक विद्यालय खोलीकोट र वडा नम्बर ३ जुकोटलाई फुटाएर शम्भुशुनन्दा माध्यमिक विद्यालय जुकुमा नयाँ मतदानस्थल कायम गरिएको बताए । यसैगरी, बूढीनन्दा नगरपालिका–३ मा मदनआश्रित आधारभूत विद्यालय बड्डाला, हिमाली गाउँपालिका–१ मा सुनन्दा आधारभूत विद्यालय बाम, वडा नम्बर ५ कुलामष्टाजन आधारभूत विद्यालयक्यिुरी र वडा नम्बर ६ खोलीकोट आधारभूत विद्यालयलाई नयाँ मतदानस्थल कायम गरिएको छ । चार गाउँपालिका र पाँच नगरपालिका रहेको बाजुरामा मतदाता सङ्ख्या ८६ हजार ५५७ पुगेको छ । यी मध्ये एक हजार ५१६ जना हालसालै थपिएका हुन् ।
