काठमाडौं । दुबईमा सर्ने मानिसहरूको संख्या लगातार बढ्दै गएको छ । हान्ले एन्ड पार्टनर्सको प्राइभेट वेल्थ माइग्रेसन प्रतिवेदनअनुसार सन् २०२५ भरिमा १० हजार करोडपति यूएईमा सर्न सक्ने अनुमान गरिएको थियो ।
दुबईमा करमुक्त आम्दानी, उत्कृष्ट करिअर अवसरलगायतका धेरै कारणले मानिसहरूलाई त्यहाँ बस्न आकर्षित गरिरहेको छ ।
दुबई विश्वमै अलग पहिचान बनाएको सहर हो । यहाँ कमाइ राम्रो हुन्छ, आयकर बिल्कुलै लाग्दैन, सहर अत्यन्त सुरक्षित छ र आधुनिक सुविधाहरू प्रशस्त छन् । यहाँ बस्ने मानिसहरूले पूरै तलब पाउँछन्, जसले गर्दा बढी बचत गर्न र जीवनशैली सुधार गर्न सकिन्छ ।
यहाँ बस्नका लागि विभिन्न प्रकारका घरहरू उपलब्ध छन् । कम खर्चमा बस्न चाहनेदेखि लिएर विशेष क्षेत्रमा बस्न चाहनेहरूसम्म सबैका लागि विकल्प छन् । भीडभाड भएको सहरको बीचमा अपार्टमेन्ट चाहियोस् वा शान्त क्षेत्रमा भिल्ला दुबईमा तपाईंको रोजाइको ख्याल राखिन्छ ।
१. घर तथा फ्ल्याट भाडा खर्च
दुबईमा मासिक खर्चमध्ये सबैभन्दा ठूलो हिस्सा भाडाले ओगट्छ । ठीक्को क्षेत्रमा एक बेडरूमको फ्ल्याटको भाडा ६ हजारदेखि ८ हजार ५०० दिराम ९करिब २ लाख ३६ हजारदेखि ३।२ लाख रुपैयाँ० पर्न सक्छ । स्टुडियो अपार्टमेन्टको भाडा भने ४ हजारदेखि ६ हजार दिरामसम्म हुन्छ ।
२. बिजुली, पानी र इन्टरनेट
बिजुली, पानीको बिल मौसमअनुसार फरक पर्न सक्छ, विशेषगरी गर्मीमा एसी बढी चल्दा । औसतमा बिजुली, पानी र हाउजिङ शुल्क गरी मासिक ७०० देखि १ हजार २०० दिराम लाग्न सक्छ । इन्टरनेट र मोबाइल प्लानका लागि मासिक ४०० देखि ६०० दिराम पर्न सक्छ । यी खर्चले वर्षभरि घरलाई आरामदायी राख्न मद्दत गर्छन् ।
३. खानेकुरा
एक्लो व्यक्तिका लागि मासिक किराना खर्च ८०० देखि १ हजार २०० दिराम हुन सक्छ । बाहिर खानु तपाईंको चाहनामा निर्भर हुन्छ । यहाँ सस्तो खानादेखि ठूला रेस्टुरेन्टका अन्तर्राष्ट्रिय परिकारसम्म सबै विकल्प उपलब्ध छन्, जसले बजेटअनुसार व्यवस्थापन गर्न सजिलो बनाउँछ ।
४. यातायात
दुबईको सार्वजनिक यातायात अत्यन्त राम्रो र आधुनिक छ । मेट्रो वा बसको मासिक पास ३०० देखि ४५० दिराम पर्छ । ट्याक्सी र राइड–सेयरिङ सेवा सजिलै पाइन्छ । आफ्नै कार चलाउने हो भने पेट्रोल, इन्स्योरेन्स र वार्षिक टोल (रोड ट्याक्स) जोड्दा मासिक १ हजार देखि २ हजार ५०० दिराम खर्च हुन सक्छ ।
५. स्वास्थ्य बीमा
दुबईमा स्वास्थ्य बीमा अनिवार्य छ । यसको प्रिमियम तपाईंले छान्ने योजनामा निर्भर हुन्छ । एक्लो व्यक्तिका लागि राम्रो स्वास्थ्य बीमा योजना मासिक २०० देखि ५०० दिराम पर्न सक्छ । दुबईमा स्वास्थ्य सेवाको गुणस्तर उच्च छ र उपचार छिटो पाइन्छ ।
६. जीवनशैली
दुबईमा मनोरञ्जनका धेरै विकल्प छन् जस्तै समुद्रतट, डेजर्ट सफारी, थिम पार्क, विभिन्न रेस्टुरेन्ट आदि । मासिक मनोरञ्जन खर्च ८०० देखि १ हजार ५०० दिराम राख्न सकिन्छ । विलासी जीवनशैली चाहियो भने खर्च अझ बढ्न सक्छ । यसले तपाईंलाई रुचि र बजेटअनुसार व्यवस्थापन गर्ने स्वतन्त्रता दिन्छ ।
कति तलब पर्याप्त हुन्छ?
दुबईमा आयकर नलाग्ने भएकाले तपाईंको पूरै आम्दानी तपाईंको हुन्छ । एक सिंगल प्रोफेशनलका लागि आरामदायी जीवन बिताउन मासिक १२ हजार देखि १५ हजार दिराम तलब पर्याप्त मानिन्छ । यसबाट राम्रो एक बेडरूम फ्ल्याट लिन, दैनिक खर्च धान्न, मनोरञ्जन गर्न र केही बचतसमेत गर्न सकिन्छ ।
