२०७५ जेठ २९ गते १३:५५ विकासन्युज
काठमाडौं । नेपाल राष्ट्र बैंकमा रहेका सरकारी संस्थानहरुको खाता बन्द हुने भएको छ । राष्ट्र बैंकले सरकारी संस्थानहरुको खाता बन्द गरेर बाणिज्य बैंकमा सार्न सकिने व्यवस्था गरेको हो । अब सबै सरकारी संस्थानहरुले बाणिज्य बैंकहरुमा मात्रै खाता खोल्नुपर्नेछ । केन्द्रिय बैंकको यस्तो निर्णयले तत्कालै १२ अर्ब तरलता थपिने बैंकर्स संघका अध्यक्ष ज्ञानेन्द्र ढुंगानाले भने ।
हाल कर्मचारी सञ्चय कोष, नागरिक लगानी कोष, नेपाल टेलिकम, खाद्य संस्थान, नेपाल विद्युत प्राधिकरण लगायतका दर्जनौं सरकारी संस्थानहरुको राष्ट्र बैंकमा चालु खाता छ । राष्ट्र बैंकले सार्वजनिक गरेको ६ महिनाका वित्तिय तथ्यांक अनुसार सरकारी संस्थानहरुको ११ अर्ब ३३ करोड ४९ लाख ५० हजार रुपैंयाँ केन्द्रिय बैंकको चालु खातामा रहेको थियो ।
केन्द्रिय बैंकमा खोलिएको चालु खातामा राखिएको रकमलाई सरकारी संस्थानहरुले चालु खर्चका लागि उपयोग गर्दै आएका छन् । केन्द्रिय बैंकको खातामा राखिएको रकमबाट ती निकायहरुले ब्याज पाउँदैनन् । संस्थानहरुले निक्षेपको ब्याज पनि पाउने र बजारमा तरलता अभावको समस्या पनि हट्ने भन्दै राष्ट्र बैंकले सो योजना अघि सारेको हो ।
Copyright © 2024 Bikash Media Pvt. Ltd.