काठमाडौं । सिभिल बैंकले चालु आर्थिक वर्षको ९ महिनामा नाफा १२७ प्रतिशत बढाएको छ । बैंकले गत चैतसम्म नाफा बढाएर ३५ करोड रुपैयाँ पुर्याएको छ ।
गत आवको सोही अवधिमा बैंकको नाफा १५ करोड ४४ लाख रुपैयाँ थियो । ४६ करोड ९१ लाख रुपैयाँ निष्क्रिय कर्जा असुली (राइट ब्याक) गरेपछि बैंकले नाफा बढाएको हो । समीक्षा अवधिमा बैंकको ब्याज आम्दानी बढेर ८९ करोड २८ लाख रुपैयाँ पुगेको छ ।
९ महिनामा बैंकले निष्क्रिय कर्जा घटाएर ३.७४ प्रतिशतमा झारेको छ । यसअघि बैंकको यस्तो कर्जा ४.६६ प्रतिशत थियो । यस्तै निक्षेप लागत ८.८१, कर्जा र निक्षेप अनुपात ७७.७८ र आधार ब्याजदर १२.३६, ब्याजदर अन्तर २.४१ प्रतिशत रहेको छ । बैंकको संचित कोषमा १ अर्ब ९१ करोड रुपैयाँ छ ।
बैंकको निक्षेप परिचालन ९.१५ प्रतिशत बढेर ३६ अर्ब ९० करोड रुपैयाँ पुगेको छ । यस्तै कर्जा लगानी १७.१७ प्रतिशत बढेर ३४ अर्ब ९२ करोड रुपैयाँ पुगेको छ ।
