सक्रिय बीमालेख घट्दा पनि बढ्यो बीमा व्यवसाय
२०८० मंसिर १४ गते १३:०९ विकासन्युज
काठमाडौं । चालु आर्थिक वर्षको ४ महिनामा जीवन बीमा कम्पनीहरूले झण्डै ५० अर्ब रुपैयाँ बराबरको कुल बीमाशुल्क आर्जन गरेका छन् । नेपाल बीमा प्राधिकरणको तथ्याङ्क अनुसार गत कात्तिकसम्म जीवन बीमा कम्पनीहरूको कुल बीमाशुल्क आर्जन ७.१६ प्रतिशत बढेर ४९ अर्ब ४४ करोड ११ लाख रुपैयाँ गरेका हुन् । गत वर्षको सोही अवधिमा बीमा कम्पनीहरूले ४६ अर्ब १ करोड १५ लाख रुपैयाँ कुल बीमा शुल्क आर्जन गरेका थिए ।
गत कात्तिकसम्म ८ वटा जीवन बीमा कम्पनीहरूको बीमा व्यवसाय बढेको छ । जसमध्ये सबैभन्दा धेरै बीमाशुल्क आर्जन राष्ट्रिय जीवन बीमा कम्पनीले गरेको हो । यस कम्पनीले १८५.५८ प्रतिशत बढाएर ४ अर्ब २३ करोड १ लाख रुपैयाँ आर्जन गरेको हो ।
यस्तै, प्रभु महालक्ष्मीको १४.४२ प्रतिशत बढेर १ अर्ब २७ करोड रुपैयाँ, आइएमई लाइफको १३.२४ प्रतिशत बढेर १ अर्ब ३० करोड रुपैयाँ, हिमालयन लाइफको ७.७० प्रतिशत बढेर ५ अर्ब ३६ करोड रुपैयाँ कुल बीमाशुल्क संकलन भएका छन् ।
यस्तै, रिलायबल नेपालको ६.०२ प्रतिशत बढेर १ अर्ब २१ करोड रुपैयाँ, नेपाल लाइफको ४.०५ प्रतिशत बढेर १३ अर्ब ४३ करोड रुपैयाँ, एशियन लाइफको ३.७८ प्रतिशत बढेर २ अर्ब ३६ करोड रुपैयाँ र मेट लाइफको १.९९ प्रतिशत बढेर १ अर्ब ७१ करोड रुपैयाँ बीमा शुल्क आर्जन गरेका हुन् ।
गत कात्तिकसम्म १४ वटा जीवन बीमा कम्पनीमध्ये ६ वटा कम्पनीको व्यवसायमा भने गिरावट आएको छ । सिटिजन लाइफको २.३६ प्रतिशत घटेर १ अर्ब ७८ करोड रुपैयाँ, सानीमा रिलायन्स लाइफको ३ प्रतिशत घटेर १ अर्ब ८९ करोड रुपैयाँ, लाइफ इन्स्योरेन्स कर्पाेरेशनको ३.४७ प्रतिशत घटेर ५ अर्ब ५६ करोड रुपैयाँ बीमाशुल्क पुगेको छ ।
यस्तै, नेशनल लाइफको ३.५८ प्रतिशत घटेर ५ अर्ब २९ करोड रुपैयाँ, सूर्यज्योति लाइफको ५ प्रतिशत घटेर २ अर्ब ७६ करोड रुपैयाँ र सन नेपाल लाइफको १६.३३ प्रतिशत घटेर १ अर्ब १२ करोड रुपैयाँ बीमाशुल्क पुगेको छ ।
साथै, ३ वटा लघुबीमा कम्पनीहरूले ४८ लाख रुपैयाँ बीमाशुल्क आर्जन गरेका छन् । जसमध्ये गार्डियन माइक्रो लाइफ इन्स्योरेन्सले २७ लाख ७० हजार रुपैयाँ, क्रेष्ट माइक्रोले २० लाख ३६ हजार रुपैयाँ र लिवर्टी माइक्रो लाइफले ८२ हजार रुपैयाँ कुल बीमाशुल्क आर्जन गरेको प्राधिकरणको तथ्याङ्क छ ।
२ लाख २७ हजार बीमालेख घटे
चालु आवको ४ महिनाको अवधिमा १४ वटा जीवन बीमा कम्पनीहरुको कुल सक्रिय रहेको बीमालेख संख्या भने घटेको छ । प्राधिकरणको तथ्याङ्क अनुसार कात्तिकसम्म १.६३ प्रतिशत घटेर १ करोड ३७ लाख १४ हजार कुल बीमालेख सक्रिय रहेका छन् । गत वर्षको सोही अवधिमा १ करोड ३९ लाख ४२ हजार बीमालेख सक्रिय थिए । गत वर्षको तुलनामा यस वर्ष २ लाख २७ हजार ७६२ वटा सक्रिय बीमालेख संख्या घटेको तथ्याङ्कले देखाउँछ ।
समग्र जीवन बीमा क्षेत्रमा बीमालेख संख्या घटेको भएपनि ९ वटा कम्पनीको भने बढेको देखिन्छ । जसमध्ये सबैभन्दा धेरै आइएमई लाइफको १६६ प्रतिशत बढेर ३ लाख ८२ हजार बीमालेख सक्रिय छन् ।
यस्तै, सुर्यज्योति लाइफको ४५.९१ प्रतिशत बढेर ९ लाख ३५ हजार, नेपाल लाइफको २९.८० प्रतिशत बढेर ११ लाख ९७ हजार, एशियन लाइफको १४.४० प्रतिशत बढेर ६ लाख २६ हजार, सन नेपाल लाइफको १२ प्रतिशत बढेर ९ लाख १४ हजार बीमा लेख सक्रिय छन् ।
यस्तै, राष्ट्रिय जीवन बीमा कम्पनीको ६.२२ प्रतिशत बढेर ५ लाख ८० हजार, नेशनल लाईफको ४.२३ प्रतिशत बढेर १५ लाख ६९ हजार, हिमालयन लाइफको २.६८ प्रतिशत बढेर ३ लाख ९६ हजार र लाइफ इन्स्योरेन्स कर्पोरेशनको २.६४ प्रतिशत बढेर ७ लाख २ हजार बीमालेख सक्रिय रहेका छन् ।
पछिल्लो चार महिनाको अवधिमा विभिन्न ५ कम्पनीको सक्रिय बीमालेख संख्या घटेका छन् । सानीमा रिलायन्स लाइफको १५ प्रतिशत घटेर ९ लाख ३७ हजार, प्रभु महालक्ष्मीको १५.३२ प्रतिशत घटेर १ लाख ६९ हजार, रिलायबल नेपालको १७ प्रतिशत घटेर ३२ लाख ५३ हजार, मेट लाइफको १८.७५ प्रतिशत घटेर ८ लाख ३ हजार र सिटिजन लाइफको १८.७६ प्रतिशत घटेर १२ लाख ५४ हजार बीमालेख सक्रिय छन् ।
सम्बन्धित शिषर्कहरु
Copyright © 2024 Bikash Media Pvt. Ltd.