२०७५ मंसिर २ गते १६:१८ विकासन्युज
काठमाडौं । नेपाल बैंक लिमिटेड ८२औँ वर्षमा प्रवेश गरेको छ । सो अवसरमा बैंकले खुल्ला रक्तदान तथा निशुल्क आँखा परीक्षण कार्यक्रम आयोजना गरेको थियो । उक्त कार्यक्रममा बैंकका प्रमुख कार्यकारी अधिकृत देवेन्द्र प्रताप शाहले रक्तदाताहरुलाई प्रमाणपत्र प्रदान गरेका थिए ।
कार्यक्रममा अर्थमन्त्री डा. युवराज खतिवडाले नेपाल बैंक विगतको कमजोर अवस्थाबाट तुलनात्मक रुपमा माथि उठी आज सवल बैकको रुपमा स्थापित हुन सकेको बताएका छन् । साथै, आगामी दिनमा वित्तीय पहुँच तथा ग्राहक सेवामा बलियो उपस्थिति सहित सरकारी बैंकको हैसियतले नेपाल सरकारका गरिवी निवारण, सहुलियतपूर्ण ऋण कार्यक्रम, पूर्वाधार विकास सम्वन्धी आयोजनाहरुमा सक्रिय सहभागिता बढाउन जोड दिनुपर्ने उनले बताए ।
नेपाल राष्ट्र बैंकका गभर्नर डा.चिरन्जीवि नेपालले दिगो र समावेशी आर्थिक वृद्धिका लागि वित्तीय क्षेत्रबाट अपेक्षित भूमिका निर्वाहमा विशेष ध्यान पुर्याउन नेपाल बैकलाई शुभकामना दिएका छन् ।
बैंकका प्रमुख कार्यकारी अधिकृत देवेन्द्र प्रताप शाहले बैंकले हालका वर्षहरुमा हासिल गरेका उपलब्धिहरु गर्भ गर्न लायक रहेको बताए । बैकले प्राप्त गरेका उपलव्धिलाई दीगो बनाउन आगामी बैक व्यवस्थापनको ध्यान स्मार्ट ब्रान्चको प्रभावकारी कार्यान्वयन गरी ग्राहकलाई प्रफुल्ल बनाउने दिशामा केन्द्रित हुने प्रतिवद्धत व्यक्त गरेका छन् ।
यसैबीच बैंकले वार्षिकोत्सवकै दिन विभिन्न ८ स्थानमा शाखा स्थापना गरेको छ । यसरी स्थापित हुने शाखाहरु प्रदेश १ को विराटचोक (मोरङ्ग), मंगलवारे (ईलाम )पाख्रीवास (धनकुटा ) प्रदेश २ को सर्लाही पर्सा , भवानीपुर (सर्लाही ) वर्दिवास (महोत्तरी ) प्रदेश ३ को दुधौली (सिन्धुली )प्रदेश ४ को आरुङखोला (नवलपरासी ) रहेका छन् । यी शाखा स्थापना पश्चात बैंकको जिल्ला पहुंच ५९पुगेको छ ।
बैंकले चालु आर्थिक वर्षको प्रथम त्रैमाशमा ९१ करोड ३८ लाख रुपैयाँ खुद नाफा आर्जन गरेको छ । यस अवधिमा बैंकले ९३ अर्ब ४३ करोड निक्षेप संकलन गरि ८१ अर्ब कर्जा प्रवाह गरेको छ ।
Copyright © 2024 Bikash Media Pvt. Ltd.