काठमाडौं। वर्षेनी आर्थिक रुपमा  टाँट पल्टिँदै गएको राष्ट्रिय ध्वजा वाहक नेपाल वायु सेवा निगमलाई आर्थिक रुपमा सक्षम बनाउनको लागि खरिद गरिएका चिनीयाँ जहाजले झन समस्या थुपार्दै गएका छन् । अधिक खर्च र न्युन आम्दानीका कारण उडाएर नाफा लिन नसक्ने निष्कर्ष निकाल्दै निगमले गत साउनमा जहाज ग्राउन्डेड गर्ने निर्णय गरे यता मात्रै चिनियाँ जहाजले निगमलाई थप आर्थिक भार थुपारेको हुन् ।

त्रिभुवन अन्तराष्ट्रिय विमानस्थलको पार्किङमा राखिएको ६ थान चिनियाँ जहाजबाट निगमलाई ९ महिनाको अबधिमा साढे १० करोड रुपैयाँ आर्थिक भार  थपिएको छ । विमानस्थलको पार्किङमा राखिएको शुल्क र इन्स्युरेन्स (बीमा)  शुल्क बापत निगमलाई उक्त रकम थपिएको हो । सञ्चालन गर्दा नोक्सान भएको भन्दै निगम सञ्चालक समितिले साउन १५ गतेदेखि चिनियाँ जहाज सञ्चालन नगर्ने निर्णय गरेको थियाे।

ग्राउन्डेड भएको ९ महिनाको अबधिमा निगमले इन्स्युरेन्स बापत ६ थान विमानको १० करोड ३४ लाख रुपैयाँ र विमानस्थलको पार्किङ शुल्क बापत २१ लाख रुपैयाँ गरी १० करोड ५५ लाख रुपैयाँ थप आर्थिक भार थपिएको निगम अन्तरगतको अर्थ विभागले जनाएको छ । उक्त जहाजका क्यापटेन, कोपाइलट, एयरहोस्टेस तथा अन्य कर्मचारीको सेवासुविधा बाहेक विमानस्थको पार्किङ र बीमा बापत उक्त रकम खर्च भएको हो ।

अर्थ विभागको तथ्यांक अनुसार चिनियाँ कम्पनीको एम ए–६० जहाजको दैनिक पार्किङ शुल्क २ हजार ५ सय १४ रुपैयाँ र इन्स्युरेन्स वापतको एक हजार ६१ अमेरिकी डलर दैनिक खर्च हुने निगमले जनाएको छ । यसैगरी वाई–१२ ई जहाजको एक दिन विमानस्थल कार्यालयमा राखिएबापत विमानस्थल कार्यालयले ६ सय ८५ रुपैयाँ लिन्छ भने इन्स्योरेन्सबापतको ३ सय १५ अमेरिकी डलर भुक्तानी गर्नुपर्छ ।

जहाज उडान तथा ग्राउन्डेड गरेर राखेतापनि वायुसेवा सञ्चालकले विमानस्थल कार्यालयलाई पार्किङ र इन्स्योरेन्स कम्पनीलाई इन्स्योरेन्सको शुल्क बुझाउँनुपर्छ । विमानस्थलको पार्किङ शुल्क रुपैयाँमा भुक्तानी हुनेछ भने इन्स्योरेन्सको शुल्क डलरमा बुझाउनुपर्ने हुन्छ ।

निगमले चीनबाट ५६ सिट क्षमताका २ थान एमए–६० र १९ सिट क्षमताका ४ थान वाई–१२ ई जहाज अनुदान तथा खरिद गरेर ल्याएको थियो । दुई अर्ब ९४ करोड अनुदान र तीन अर्ब ७२ करोड ऋणमा २०७१ सालदेखि २०७४ सालसम्म ६ वटा जहाज नेपाल ल्याईएको थियो । खरिद गरेर ल्याईएको ४ थान जहाज १.५ प्रतिशत ब्याजमा चीनकै एक्जिम बैंकबाट नेपाल सरकारले ऋण लिएको थियो ।

६ वर्षमा आधा घट्यो खरिद मूल्य

निगमको व्यवस्थापनले सम्पत्ति तथा दायित्व मूल्यांकन (डिडिए) गराउँदा निगमको सम्पत्तिअन्तर्गतको चिनियाँ जहाजको मूल्य ३ अर्ब ८१ करोड १० रुपैयाँ मात्रै मूल्यांकन गरिएको छ ।

चार्टर्ड एकाउन्टेन्ट फर्म एसएआर एसोसिएट्सले सम्पन्न गरेको निगमको डिडिए प्रतिवेदन अनुसार २०७६ असार मसान्तसम्म ६ थान चिनियाँ विमानको मूल्य मूल्यांकलन गरेको थियो । ६ अर्ब ६६ करोड रुपैयाँ मूल्यमा ल्याईएको उत्त जहाजको मूल्य पाँच वर्षमा नै दोब्बर घटेको हो । जहाज नउडाई ग्राउन्डेड गर्दै जाने हो भने अझै मूल्य घट्दै जानेछ ।

६ थान चिनियाँ जहाज मध्येमा एक थान वाई १२ ई जहाज गत चैतमा नेपालगन्ज विमानस्थलमा दुर्घटना भएको थियो । विमानस्थलको धावनमार्गमा धसिएको उक्त विमान सञ्चालन योग्य नभएको नेपाल नागरिक उडड्यन प्राधिकरणले जनाएको छ ।

निगमले ६ वर्षअघि ल्याएको उक्र ६ थान चिनियाँ जहाज मध्येमा हाल तीन थान मात्र सञ्चालन योग्य रहेको छ । सञ्चालन गर्न नसक्ने भन्दै ग्राउन्डेड गरिएको चिनियाँ जहाज व्यवस्थापनका लागि अर्थ मन्त्रालयले बिहीबार निगम व्यवस्थापनलाई दुई विकल्प दिएको छ ।

सम्बन्धित सामग्री

निगमलाई अर्थ मन्त्रालयका दुई विकल्पः सके जहाज भाडामा लगाउ, नसके बिक्री गरेर व्यवस्थापन गर

सम्बन्धित शिषर्कहरु

पर्यटकको रोजाइमा मच्छिम डाँडा ‘भ्युस्टेसन’

इन्फोसिसले यसरी बढाइरहेको छ बेलायती प्रधानमन्त्री दम्पतीको सम्पत्ति

चोली फेर्दै ६० नाघेका उद्यमी

राष्ट्र बैंक भन्छ– लचिलो मौद्रिक नीतिले उत्साह बढाउँछ, कर्जा वृद्धि हुने

यसरी बनाउन सकिन्छ सफल सहकारी

चौतर्फी प्रहार भइरहेको बैंकिङलाई राष्ट्र बैंकको मलम