काठमाडौं । पछिल्लो समय सेयर बजार घट्दो क्रममा छ । बजारमा तरलता अभावसँगै ड्राइ सिजन लागेसँगै सेयर बजार निरन्तर रुपमा घटीरहेको जानकारहरु बताउँछन् ।

भदौ २ गते नेप्से परिसूचक ३१९९ बिन्दुमा पुगेको थियो । जुन हालसम्मकै उच्चतम बिन्दु हो । त्यसयताको कारोबारमा परिसूचक झरेर २२८१ बिन्दुसम्म ओरालो लागेको थियो । त्यसपछि बढेर २९४७ बिन्दुसम्म पुगेको परिसूचक पुनः घटेर हाल २४२८ बिन्दुमा अडिएको छ । परिसूचक मात्रै नभई कारोबारमा आउने विभिन्न उपसूचकहरु पनि ओरालो लागेका छन् । जसमध्ये जीवन बीमा कम्पनीहरुको सेयर मूल्य मापक जीवन बीमा उपसूचक हाल २९ प्रतिशत बढीले घटीसकेको छ ।

सो उपसूचक २०७८ जेठ २६ गते बढेर १८ हजार ९९७.४२ बिन्दुसम्ममा पुगेको थियो । त्यसयताको कारोबारमा उपसूचक निरन्तर घटेर न्यूनतम १२ हजार १५५.२६ बिन्दुसम्म झर्यो । तर, त्यसपछि भने केही माथि उकालो लागेको उपसूचक हाल १३ हजार ४४०.५१ बिन्दुमा सीमित छ । जुन अधिकतम बिन्दुको तुलनामा २९.२५ प्रतिशतले घटी हो ।

उक्त क्षेत्रका कम्पनीहरुको सेयर मूल्य घटेसँगै उक्त समूहको उपसूचक स्वतः घट्छन् । बजारमा पुसदेखि चैतसम्म ड्राई सिजन लाग्ने, वित्तीय प्रणालीमा देखिएको तरलता अभावका साथै प्रस्तावित बोनस सेयरपछि मूल्य समायोजन हुँदा त्यसको प्रत्यक्ष असर कम्पनीहरुको सेयर मूल्य परेको छ । जसका कारण बीमा कम्पनीहरुको पुँजी वृद्धिको निर्णयले पनि बजारलाई खासै प्रभाव पारेको देखिएन । बजार त के बीमा कम्पनीहरुको सेयर मूल्यमा पनि खासै प्रभाव परेन र निरन्तर रुपमा घटिनै रह्यो ।

यससँगै, चैत २३ गते बुधबारको कारोबारलाई हेर्दा जीवन बीमा कम्पनीमध्ये दुई कम्पनीको सेयर मूल्य बढेको छ भने बाँकी कम्पनीको सेयर मूल्य घटेको छ । लाइफ इन्स्योरेन्स कर्पोरेसन (नेपाल) र सूर्या लाइफ इन्स्योरेन्सको सेयर मूल्य बढेको छ भने बाँकी सबैको सेयर भाउ घटेको छ । त्यस्तै, प्रत्येक जीवन बीमा कम्पनीको अधिकतम सेयर मूल्यको तुलनामा सबैभन्दा बढी सेयर मूल्य घट्नेमा नेपाल लाइफ इन्स्योरेन्स छ भने सबैभन्दा कमले घट्नेमा यूनियन लाइफ इन्स्योरेन्स रहेको छ । नेपाल लाइफको ५६.४३ प्रतिशतले सेयर मूल्य घट्दा यूनियन लाइफको सेयर मूल्य २७.६६ प्रतिशतले घटेको छ । जबकी नेपाल लाइफको अधिकतम मूल्य प्रतिकित्ता २२४७ रुपैयाँ छ भने यूनियन लाइफको अधिकतम मूल्य प्रतिकित्ता ९४० रुपैयाँ छ ।

तर, रुपैयाँको आधारमा हेर्ने हो भने हाल सबैभन्दा बढी सेयर मूल्य नेशनल लाइफको छ भने रिलायन्स लाइफको सबैभन्दा कम सेयर मूल्य छ ।

हाल नेशनल लाइफको सेयर प्रतिकित्ता ७९१.९० रुपैयाँमा कारोबार भइरहेको छ । जुन कम्पनीको उच्च मूल्यको तुलनामा ४२.७९ प्रतिशतले घटी हो । एक वर्षको अवधिमा कम्पनीको सेयर प्रतिकित्ता १३४६ रुपैयाँसम्ममा किनबेच भएको थियो भने न्यूनतम ७७० रुपैयाँमा कारोबार भएको थियो ।

त्यस्तै, जीवन बीमा कम्पनीमध्ये विभिन्न सूचकमा अग्रस्थानमा रहेको नेपाल लाइफ इन्स्योरेन्सको सेयर मूल्य सबैभन्दा बढी प्रतिशतले घटेको छ । प्रतिकित्ता २२४७ रुपैयाँसम्म किनबेच भएको नेपाल लाइफको सेयर मूल्य अहिले घटेर प्रतिकित्ता ९७९ रुपैयाँमा झरेको छ । जुन अधिकतम मूल्यको तुलनामा ५६.४३ प्रतिशतले घटी हो । दोश्रो बजारमा कम्पनीको ८ करोड २० लाख ७९ हजार ६६४ कित्ता सेयर सूचीकृत छ ।

त्यस्तै, एशियन लाइफ इन्स्योरेन्सको पनि सेयर मूल्य घटेर प्रतिकित्ता ८०८ रुपैयाँमा कारोबार भइरहेको छ । तर उक्त मूल्य हालसम्मकै न्यून भने होइन । दोश्रो बजारमा कम्पनीको प्रतिकित्ता सेयर अधिकतम १५६५ र न्यूनतम ७७५ रुपैयाँमा कारोबार भइसकेको छ । बजारमा कम्पनीको २ करोड ५३ लाख ९८ हजार ३५० कित्ता सेयर सूचीकृत छ ।

बुधबारको बजारमा प्राइम लाइफ इन्स्योरेन्सको सेयर मूल्य अघिल्लो दिनको तुलनामा ५ रुपैयाँले घटेर प्रतिकित्ता ६८५ रुपैयाँमा कारोबार भएको छ । जुन कम्पनीको अधिकतम सेयर मूल्यको तुलनामा ४४८ रुपैयाँले घटी हो । एक वर्षको अवधिमा कम्पनीको प्रतिकित्ता सेयर अधिकतम ११३३ रुपैयाँमा कारोबार भएको थियो । त्यस्तै, न्यूनतम मूल्य ५७० रुपैयाँ रहेको छ ।

बुधबारको बजारमा गुराँस लाइफ इन्स्योरेन्सको सेयर प्रतिकित्ता ५९७ रुपैयाँमा अन्तिम कारोबार भएको छ । जुन अघिल्लो दिनको तुलनामा ९ रुपैयाँले घटी हो । बजारमा कम्पनीको सेयर न्यूनतम ४६० रुपैयाँ ९०१ रुपैयाँसम्ममा किनबेच भएको छ । यता रिलायन्स लाइफ इन्स्योरेन्सको पनि सेयर मूल्य घटेको छ । बुधबारको बजारमा कम्पनीको सेयर मूल्य ७ रुपैयाँले घटेर प्रतिकित्ता ५२८ रुपैयाँमा कारोबार भएको छ । जबकी कम्पनीको हालसम्मकै उच्च मूल्य प्रतिकित्ता ७९५ र न्यून मूल्य प्रतिकित्ता ४२३ रुपैयाँ हो ।

प्रभु लाइफ इन्स्योरेन्सको पनि सेयर मूल्य घटेर प्रतिकित्ता ५६४ रुपैयाँमा कारोबार भइरहेको छ । एक वर्षको अवधिमा इन्स्योरेन्सको सेयर अधिकतम ८६१ रुपैयाँ र न्यूनतम ४७७ रुपैयाँमा किनबेच भइरहेको छ । त्यस्तै, ज्योति लाइफ इन्स्योरेन्सको सेयर भाउ प्रतिकित्ता ५८२ रुपैयाँ छ । २ लाख ४२ हजार कित्ता सेयर दोश्रो बजारमा सूचीकृत भएको कम्पनीको सेयर मूल्य अधिकतम ९९८ र न्यूनतम ३६० रुपैयाँमा कारोबार भएको छ । जुन एक वर्षको अवधिमा हो ।

यूनियन लाइफको हाल प्रतिकित्ता ६८० रुपैयाँमा सेयर कारोबार भइरहेको छ । कम्पनीको सेयर भाउ अधिकतम ९४० रुपैयाँ र न्यूनतम ३४२ रुपैयाँ पुगेको छ । बुधबारको बजारमा इन्स्योरेन्सको पुँजीकरण भने १४ अर्ब ६२ करोड रुपैयाँ छ । बुधबारको बजारमा सानिमा लाइफ इन्स्योरेन्सको सेयर मूल्य स्थिर छ । प्रतिकित्ता ७८७ रुपैयाँसम्ममा किनबेच भएको कम्पनीको सेयर भाउ अहिले घटेर ५५८ रुपैयाँमा कारोबार भइरहेको छ । इन्स्योरेन्सको हालसम्मको न्यूनतम मूल्य भने प्रतिकित्ता ३०९ रुपैयाँ हो ।

लाइफ इन्स्योरेन्स कर्पोरेसन (नेपाल) को भने सेयर मूल्य बढेको छ । बुधबारको बजारमा कम्पनीको सेयर मूल्य १७ रुपैयाँले बढेर प्रतिकित्ता १९६८ रुपैयाँमा अन्तिम कारोबार भएको छ । यद्दपि गत एक वर्षको अवधिमा कम्पनीको सेयर अधिकतम २७५५ रुपैयाँ र न्यूनतम १७०० रुपैयाँमा कारोबार भएको छ । यता साढे २ करोड बढी कित्ता सेयर सूचीकृत भएको सूर्या लाइफ इन्स्योरेन्सको सेयर मूल्य बढेर प्रतिकित्ता ६८९.५० रुपैयाँमा कारोबार भएको छ । एक वर्षको अवधिमा कम्पनीको प्रतिकित्ता सेयर न्यूनतम ६०५ रुपैयाँदेखि अधिकतम १०९१ रुपैयाँसम्म कारोबार भएको छ ।

यद्दपि, सेयर किन्ने लगानीकर्ताहरुलाई भने यो राम्रो समय हो । किनभने पछिल्लो समय बजार घटीरहेको छ । अधिकांश कम्पनीको सेयर मूल्य घटेको हुनाले नै समग्र सेयर बजार घट्छ । यससँगै, सेयर किन्न इच्छुकले आफूले चाहेको कम्पनीको सेयर कम मूल्यमा किनेर आगामी दिनमा फाइदा लिन सक्नेछन् ।

सम्बन्धित शिषर्कहरु

नेप्सेसँगै घट्यो कारोबार रकम, उत्पादन समूहमा लगानीकर्ताको आकर्षण

कर्मचारी राखेर व्यवसाय गर्ने परम्परा तोड्नुपर्छ- श्रवण रावल

आइजिआई प्रुडेन्सियलको केएल टावरमा रहेको शाखा स्थानान्तरण

मधेस प्रदेशका ९० प्रतिशत नागरिक बीमाको पहुँच बाहिर

प्रभु महालक्ष्मी लाइफको २५ लाख ८४ हजार कित्ता संस्थापक सेयर बिक्रीमा

सलिकोबाट देवेन्द्रले लिए भीआरएस, बरिष्मालाई कम्पनी सचिवको जिम्मेवारी