काठमाडौं । नेपाल स्टक एक्स्चेञ्ज (नेप्से)मा सूचीकृत विभिन्न १० वटा वाणिज्य बैंकले पुस महिनाभित्र साधारण सभा गर्ने तयारी गरेका छन् । साधारण सभा गर्न बाँकी रहेका १२ वाणिज्य बैंकमध्ये १० वटाले यही महिनाभित्रै सम्पन्न गर्ने गरी मिति तय गरेका हुन् ।

सनराइज, प्रभु, नेपाल एसबिआई, एनएमबि, एनसीसी, कृषि विकास, नबिल, सिद्धार्थ, सेञ्चुरी कमर्शियल र सिभिल बैंक यही महिनाभित्रै  सभा गर्ने तयारीमा रहेका छन् । उनीहरुले सार्वजनिक सूचना जारी गर्दै अबको २१ दिनभित्रमा सम्पन्न गर्ने गरी गत आर्थिक वर्ष २०७७/७८ को वार्षिक साधारण सभा डाकेका हुन् ।

पुसको महिनामा अधिकांश कम्पनीहरुलाई साधारण सभाको चटारो हुन्छ । कम्पनी ऐन अनुसार सूचीकृत कम्पनीहरुले आर्थिक वर्ष सकिएको ६ महिना भित्रमा सभा गरिसक्नु पर्ने प्रावधान रहेकोले पनि उनीहरु सभा गर्नमै व्यस्त हुन्छन् ।

उनीहरुले सभाको मितिसँगै सभामा जाने प्रयोजनको लागि बुक क्लोजको मिति समेत तय गरिसकेका छन् । जसमध्ये केहीको बुक क्लोज भइसकेको छ भने केही हुन बाँकी छ ।

साधारण सभा हुन बाँकी तर बुक क्लोज भने भइसकेकोमा सनराइज, प्रभु, नेपाल एसबिआई र एनएमबि बैंक रहेका छन् । यससँगै अब यी बैंकको सेयर किन्नेले गत आर्थिक वर्षको प्रस्तावित लाभांश पाउँदैनन् ।

लगानीकर्ताले अझै ८ वाणिज्य बैंकको लाभांश खान पाउने

लगानीकर्ताले अझै ८ वाणिज्य बैंकको लाभांश खान पाउने भएका छन् । सभाको मिति तय गरिसकेका ६ वटा र मिति तय गर्न बाँकी रहेका २ बैंक ९एनआईसी एशिया र हिमालयन० गरी ८ वटाको सेयर किन्नेले गत वर्षको लाभांश पाउने छन् । साधारण सभा बोलाइसकेका एनसीसी, कृषि विकास, नबिल, सिद्धार्थ, सेञ्चुरी कमर्शियल र सिभिल बैंकको पनि हालसम्म बुक क्लोज भएको छैन । बुक क्लोज भइ नसकेकाले यी कम्पनीको सेयर किन्नेलाई लाभांश खाने अवसर छ ।

जसमध्ये एनसीसी बैंकले पुस १२ गते बुक क्लोज गर्दै छ । यससँगै बैंकको लाभांश पाउन इच्छुक हुनेले अब पुस ११ गते आइतबार बैंकको सेयर खरिद गर्न सक्नेछन् । बैंकले सेयरधनीलाई ८.४२ प्रतिशत लाभांश वितरण गर्ने प्रस्ताव गरेको छ ।

त्यस्तै, कृषि विकास बैंक र नबिल बैंकले आगामी पुस १६ गते एकैदिन बुक क्लोज गर्ने निर्णय गरेका छन् । यससँगै यी दुई बैंकको प्रस्तावित लाभांश खान इच्छुकले आगामी पुस १५ गते भित्रमा सेयर किन्नु पर्ने हुन्छ । सो अवधिभित्रमा कृषि विकास बैंकको सेयर किन्नेले २१.०५ प्रतिशत र नबिलको सेयर किन्ने तथा होल्ड गर्नेले ३८ प्रतिशत लाभांश पाउने छन् ।

त्यस्तै, सिद्धार्थले पुस १८, सेञ्चुरीले पुस १९ र सिभिलले पुस २० गते बुक क्लोज गर्दै छन् । यससँगै, पुस १७ गतेसम्म सिद्धार्थको, पुस १८ गतेसम्म सेञ्चुरीको र पुस १९ गतेसम्म सिभिल बैंकको सेयर किन्नेले प्रस्तावित लाभांश पाउने छन् ।

एनसीसी र कृषि विकास बैंकको साधारण सभा पनि एकैदिन परेको छ । यी दुबै बैंकले पुस २९ गते सभा गर्न लागेका हुन् ।

४ बैंकको साधारण सभा एकैदिन

चार वटा वाणिज्य बैंकको साधारण सभा एकैदिन परेको छ । नबिल, सिद्धार्थ, सेञ्चुरी कमर्शियल र सिभिल बैंकले एकैदिन अर्थात पुस ३० गते सभा बोलाएका हुन् ।

त्यस्तै, पुस महिनायता एभरेष्ट, लक्ष्मी, प्राइम कमर्शियल र नेपाल बैंकले साधारणसभा सम्पन्न गरिसकेका छन् ।

मंसिरअघि साधारण सभा गरिसकेका बैंकहरु

वाणिज्य बैंकमध्ये माछापुच्छ्रे, सानिमा, सिटिजन्स, कुमारी, नेपाल बङ्गलादेश, ग्लोबल आईएमई, मेगा, नेपाल इन्भेष्टमेन्ट बैंक, स्ट्याण्डर्ड चार्टर्ड र बैंक अफ काठमाण्डू गरी १० वटाले मंसिर महिना अघि नै साधारणसभा सम्पन्न गरी लाभांशसमेत पारित गरिसकेका छन् ।

सम्बन्धित शिषर्कहरु

रवी लामिछानेको सम्पत्ति : साढे ७ लाख बचत र डेढ करोड ऋण, ११ रोपनी जग्गासँगै ८० तोला सुन

डेडिकेटेड-ट्रंक लाइन प्रतिवेदन कार्यान्वयन गर्न कुलमानलाई निर्देशन

अटो व्यवसायीलाई ईभीमा कर बढ्ने त्रास, बजेट अगावै २१ सय गाडी भित्रिए

महालक्ष्मी विकास बैंकले मनायाे ३०औं वार्षिकोत्सव

व्यापारमा निर्यातको हिस्सा घट्यो, ११ खर्ब ७७ अर्ब व्यापार घाटा

‘बेल-२१२’ ४३२ पटक दुर्घटना, प्रतिघण्टा २६० किलोमिटरको गति