चितवन । नेपाल प्रहरीको २२ वर्षे सेवाअवधि पूरा गरेकी कल्पना पौडेल खड्काले यहाँ होटल व्यवसाय शुरु गरेकी छन् । प्रहरी सेवामा रहँदा विभिन्न जिल्लामा अपराध अनुसन्धानमा बढी समय बिताएका उनले भरतपुरका चौबीसकोठीमा क्यूमिन रेष्ट्रो एण्ड थाली किचन सञ्चालनमा ल्याएकी हुन् ।

भरतपुर महानगरपालिका–३ बेलचोक निवासी उनले प्रहरी नायब निरीक्षक पदबाट गत वर्ष स्वेच्छिक अवकाश लिएकी थिइन् । अनिवार्य अवकाशका लागि आठ वर्ष बाँकी रहेको भए पनि ऊर्जाशील समयमा व्यवसाय गर्नकै लागि सेवा निवृत्त भएको उनले बताइन् । उनले एक करोडभन्दा बढी ऋण धन जुटाएर आकर्षक होटल सञ्चालनमा ल्याएकी छिन् ।

३० जना अट्ने सभाकक्षसहित एकै पटकमा १०० भन्दा बढी बसेर खाना खान मिल्ने गरी होटल सञ्चालनमा ल्याइएको छ । होटलमा मुख्यरूपमा थकाली खानासँगै रेष्टुरेण्टमा पाइने सबै प्रकारका खाना र खाजा पाइन्छन् । उनले भनिन्, “मेरोमा सेवाग्राहीको चाहनाअनुसार अन्यत्र पाइने खाजाका सबै परिकार बन्दछन् । तैपनि थकाली खाना हाम्रो मुख्य परिकार हो ।” स्थानीय जातको कुखुरा, खसी, हाँसको मासुसहितको खाना धेरैले मन पराएको उनको भनाइ छ । होटलमा मःमः, चाउमिन, ललिपप, चिकेनचिल्लीलगायतका रेष्टुरेन्टका परिकार पाइन्छन् ।

उनले थपिन्, “भरतपुर क्षेत्रमा राम्रो खाना कहाँ पाइन्छ भन्नेहरुका लागि सेवा दिनैका लागि मैले होटल खुलेकी हुँ ।” विदेशमा रहेका श्रीमान् श्रीराम पौडेललाई पनि यही व्यवसायमा सँगै काम गर्न बोलाएको उनले जानकारी दिइन् । तीन सन्तानकी आमा उनले घरको जिम्मेवारीसँगै व्यवसाय गरेकी हुन् । उनले भनिन्, “घरपरिवारकै सहयोगको कारण व्यवसायमा लागेकी हुँ ।”

गत वैशाखबाट शुरु गरिएको होटलमा हाल दैनिक १०० भन्दा बढीले सेवा लिने गरेको उनको भनाइ छ । सानो ठाउँमा राम्रो व्यवस्थापनका साथ आकर्षक सजावट गरेर होटल बनाइएको छ । पूर्वपश्चिम राजमार्गमा जोडिएको उक्त होटल भरतपुर विमानस्थलसँगै रहेको छ । होटल अगाडि पार्किङको सुविधासमेत भएकाले ग्राहकको रोजाइ बन्न सकेको उनको भनाइ छ ।

अपराध नियन्त्रणसँगै महिला अधिकारका क्षेत्रमा काम गर्ने भएकाले उनको होटलमा जिल्लाका महिला अधिकारकर्मीको पनि राम्रो उपस्थिति हुने गरेको छ । लामो समय जिल्ला प्रहरी कार्यालय चितवनमा कार्यरत रहेकी पौडेलको राजनीतिक, सामाजिक र व्यवसायिक व्यक्तिको सम्पर्क राम्रो रहेकाले पनि होटल व्यवसायमा सहयोग पुगेको उनी बताउँछिन् । उनले भनिन्, “मेरो प्रहरी सेवा थियो भने अहिले म सेवामूलक व्यवसायमा लागेको छु ।” प्रहरी सेवामा हुँदाको सम्पर्कले पनि अहिले व्यवसायमा सहज भएको उनको अनुभव छ ।

उनले प्रहरीमा हुँदा चितवनसहित धनुषा, रुपन्देही, काठमाडौँलगायतका जिल्लामा रहेर काम गरेकी थिइन् । उनको सम्पर्क र चिनजानकै कारण शनिबार राष्ट्रियसभाका सदस्यदेखि भरतपुर महानगरपालिकाका उपप्रमुखसम्मका महिला जनप्रतिनिधिले संयुक्तरूपमा होटलको उद्घाटन गरेकी थिइन् । सो उद्घाटनमा सबै दलका महिलाको सहभागिता थियो । राष्ट्रियसभाको राष्ट्रिय सरोकार तथा समन्वय समितिका सभापति पार्वती रावल, प्रदेशसभा सदस्य, कञ्चन खनाल, पार्वती सिलवाल, रिना गुरुङ र भरतपुर महानगरपालिकाका उपप्रमुख पार्वती शाह ठकुरीले संयुक्तरूपमा होटलको उद्घाटन गरेकी थिइन् । रासस

सम्बन्धित शिषर्कहरु

मेचीनगरमा तीन खानेपानी आयोजना सम्पन्न

आत्मनिर्भर अर्थतन्त्रको बाटो भनेकै साना तथा मझौला उद्योग हुन् : मन्त्री भण्डारी

आजदेखि कक्षा १२ को परीक्षा : ३ लाख ९० हजार परीक्षार्थी सहभागी हुँदै

यी प्रदेशमा चट्याङसहित वर्षाको सम्भावना

पूर्वमन्त्री आलमलाई जन्मकैदको फैसला

चौधरी ग्रुपलाई २ लाख रुपैयाँ जरिवाना, ७ दिनभित्र बुझाउनु पर्ने