उखु किसानलाई १२ दिनभित्र भुक्तानी दिलाउने मन्त्री भट्टकाे प्रतिबद्धता
२०७७ पुष ३ गते १९:५० विकासन्युज
काठमाडाैं । उद्योग, वाणिज्य तथा आपूर्ति मन्त्री लेखराज भट्टले आन्दोलनरत उखु किसानको वक्यौता रकम १२ दिन भित्र दिलाउने प्रतिबद्धता व्यक्त गरेका छन् । शुक्रबार माइतीघर मण्डलामा पुगेर आन्दोलनरत किसानहरुलाई बक्यौता रकम भुक्तानी गराउने जिम्मेवारी सरकारको भएकाले अवको १०/१२ दिनभित्र सम्पूर्ण रकम भुक्तानी गराईसक्ने प्रतिबद्धता व्यक्त गरेका हुन् ।
मन्त्री भट्टले उखु किसानको बक्यौता रकम उद्योगबाट दिने प्रक्रिया आरम्भ भइसकेको पनि बताए । उनले भने ‘१०/१२ दिनभित्र सम्पूर्ण भुक्तानी गराईसक्छौँ । नभए सम्बन्धित पक्षको सम्पती रोक्का गरिदिने प्रक्रियामा अगाडी बढ्छौं । हामिलाई विश्वास गर्नुहोस् ।’
उखु किसानको आन्दोलनमा सहभागिता जनाउँदै नेपाली कांग्रेसका बरिष्ठ नेता रामचन्द्र पौडेलले उखु किसानलाई रकम दिलाउने कर्तव्यबाट राज्य पन्छिन नहुने बताए । सरकारको ठुलो संयन्त्र हुँदाहुँदै पनि उद्योगीहरु भागेर हिंडेको बताउँदै बरिष्ठ नेता पौडेलले आन्दोलनरत किसानको मागलाई सरकारले पुरा गर्नुपर्ने बताए । सरकारले उखु किसानलाई बक्यौता रकम दिलाउन नसके नेपाली कांग्रेस पार्टी पनि उखु किसानको आन्दोलनमा समाहित हुने बताए ।
‘राज्यले यथासक्य छिटो किसानको मागलाई पुरा गर्ने कुरामा ध्यान दिनुपर्यो । किसानका ३ वर्ष देखिको पैसा दिलाईदिनु पर्यो । त्यो नदिलाईदिने हो भने यो आन्दोलनमा हाम्रो पार्टी, हामीपनि उपस्थित हुन्छौँ । हाम्रो पार्टी किसानको पार्टी हो । हामी ऐक्यबद्धता जनाउन आएका हौं । किसानले पैसा पाउनुपर्यो ।’, उनले भने ।
तराईका विभिन्न जिल्लादेखि काठमाडौंमा आई उखु किसानहरु आइतबारदेखि आन्दोलनमा छन् । किसानहरुले करिब ९० करोड रुपैयाँ बक्यौता रकम चिनी उद्योगीहरुबाट लिन बाँकी छ ।
सम्बन्धित शिषर्कहरु
Copyright © 2024 Bikash Media Pvt. Ltd.